ജെസ്ന കേസിൽ സിബിഐ തെളിവുകൾ ഹാജരാക്കിയാൽ തുടരന്വേഷണത്തിനു തയാർ : Deepika.com Kerala News |

Click here for detailed news of all items

ജെസ്ന കേസിൽ സിബിഐ തെളിവുകൾ ഹാജരാക്കിയാൽ തുടരന്വേഷണത്തിനു തയാർ

Wednesday, April 24, 2024 2:24 AM IST

തിരുവനന്തപുരം: പത്തനംതിട്ട മുക്കൂട്ടുതറയിൽനിന്നു കാണാതായ ജെസ്ന മരിയ ജയിംസിന്‍റെ തിരോധാനത്തിൽ പിതാവിന്‍റെ ഹർജിയിലെ ആരോപണങ്ങളുമായി ബന്ധപ്പെട്ട തെളിവുകൾ സീൽ ചെയ്ത കവറിൽ കൈമാറാൻ ചീഫ് ജുഡീഷൽ മജിസ്ട്രേറ്റ് കോടതി നിർദേശിച്ചു. കേസ് മേയ് മൂന്നിനു വീണ്ടും പരിഗണിക്കും.

കേസിന്‍റെ മുഴുവൻ സാധ്യതകളും നേരത്തേ പരിശോധിച്ചതാണെന്നും പുതിയ തെളിവുകൾ കുടുംബത്തിനു ലഭിച്ചിട്ടുണ്ടെങ്കിൽ സീൽ ചെയ്ത കവറിൽ സമർപ്പിക്കാനും സിബിഐ അഭിഭാഷകൻ ആവശ്യപ്പെട്ടു. തെളിവുകൾ ഹാജരാക്കിയാൽ തുടരന്വേഷണത്തിന് തയാറാണെന്നും സിബിഐ അഭിഭാഷകൻ വ്യക്തമാക്കി.

ജെസ്നയുടെ തിരോധാനവുമായി ബന്ധപ്പെട്ട് പുതിയ തെളിവുകളുണ്ടെന്നും ആറുമാസംകൂടി സിബിഐ അന്വേഷണം നടത്തണമെന്നാണ് ജെസ്നയുടെ പിതാവ് ജയിംസ് ജോസഫിന്‍റെ ഹർജിയിൽ പറയുന്നത്.

ജെസ്നയെ കണ്ടെത്താനായില്ലെന്നും മരിച്ചതിനു തെളിവുകൾ ലഭിച്ചിട്ടില്ലെന്നും വ്യക്തമാക്കിയാണ് അന്വേഷണം അവസാനിപ്പിക്കാൻ സിബിഐ നേരത്തേ കോടതിയെ സമീപിച്ചത്.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.