എറണാകുളം-അങ്കമാലി അതിരൂപതയില്‍ ഏകീകൃത കുര്‍ബാന: 25നു മുമ്പ് കര്‍മപദ്ധതി : Deepika.com Kerala News |

കൊച്ചി: എറണാകുളം-അങ്കമാലി അതിരൂപതയില്‍ ഏകീകൃത കുര്‍ബാന അര്‍പ്പണരീതി നടപ്പിലാക്കാത്ത വൈദികര്‍ക്കെതിരേ സഭാനിയമം അനുശാസിക്കുന്ന അച്ചടക്ക നടപടികള്‍ സ്വീകരിക്കുമെന്ന് സീറോമലബാര്‍ സഭ മേജര്‍ ആര്‍ച്ച്ബിഷപ് മാര്‍ റാഫേല്‍ തട്ടിലും അതിരൂപത അഡ്മിനിസ്‌ട്രേറ്റര്‍ മാര്‍ ബോസ്‌കോ പുത്തൂരും അറിയിച്ചു.

ഈ മാസം 25ന് മുമ്പ് ഏകീകൃത കുര്‍ബാനയര്‍പ്പണ രീതി എല്ലാ ഇടവകകളിലും കൃത്യവും ഏറ്റവും കുറഞ്ഞ സമയത്തിനുള്ളില്‍ നടപ്പാക്കുന്നതുമായ കര്‍മപദ്ധതി തയാറാക്കുന്നതിന് എല്ലാ വൈദികരും അഡ്മിനിസ്‌ട്രേറ്ററോടു സഹകരിക്കണമെന്നും വൈദികര്‍ക്കായി നല്‍കിയ കത്തില്‍ ഇരുവരും ആവശ്യപ്പെട്ടു.

ഫ്രാന്‍സിസ് മാര്‍പാപ്പ രണ്ടുവട്ടം നിര്‍ദേശം നല്‍കിയിട്ടും അതിരൂപതയില്‍ ഏകീകൃത കുര്‍ബാന നടപ്പാക്കാത്തതു വത്തിക്കാന്‍ വളരെ ഗൗരവത്തോടെയാണു കാണുന്നത്. ഒരു അവസാനവട്ട ശ്രമമെന്ന നിലയിലാണ് അതിരൂപതയില്‍ നിലനില്‍ക്കുന്ന പ്രത്യേക സാഹചര്യം കണക്കിലെടുത്ത് സമയബന്ധിതമായി ഏകീകൃത കുര്‍ബാന അര്‍പ്പണരീതി എല്ലാ ഇടവകകളിലും നടപ്പാക്കാനുള്ള കര്‍മപദ്ധതി തയാറാക്കി വത്തിക്കാനു സമര്‍പ്പിക്കുന്നത്. മേയിൽ റോമില്‍ നടക്കുന്ന അധികാരികളുമായുള്ള കൂടിക്കാഴ്ചയില്‍ കര്‍മപദ്ധതി അവതരിപ്പിക്കണം.

പൗരസ്ത്യ കാര്യാലയത്തിന്‍റെ തലവന്‍ കര്‍ദിനാള്‍ ക്ലൗദിയോ ഗുജറോത്തി ഈ ദിവസങ്ങളില്‍ എഴുതിയ കത്തില്‍ വ്യക്തമാക്കിയിരിക്കുന്നതുപോലെ അവസാനവട്ട അവസരവും പ്രയോജനപ്പെടുത്താതെ കുര്‍ബാനയുടെ ഏകീകൃതക്രമം നടപ്പാക്കാത്ത വൈദികര്‍ക്കെതിരേ നടപടി സ്വീകരിക്കേണ്ടതായി വരും.

ഏകീകൃത കുര്‍ബാനയര്‍പ്പണരീതി നടപ്പാക്കുന്നതുമായി ബന്ധപ്പെട്ട് ഇടവകകളില്‍ വിഭാഗീയത വര്‍ധിക്കുന്ന സാഹചര്യം അതിരൂപതയ്ക്ക് ഒരുവിധത്തിലും നന്മയാകില്ല. ഏകീകൃത കുര്‍ബാനയര്‍പ്പണരീതി ത്യാഗപൂര്‍വം നടപ്പിലാക്കാന്‍ തയാറാകണമെന്നും മേജര്‍ ആര്‍ച്ച്ബിഷപ്പും അഡ്മിനിസ്‌ട്രേറ്ററും കത്തിലൂടെ ആഹ്വാനം ചെയ്തു.