ലഹരി വിരുദ്ധ റാലിയും സത്യപ്രതിജ്ഞയും : Deepika.com Nattu Visesham

സാമ്പത്തിക തട്ടിപ്പ്: ഒളിവിലായിരുന്ന പ്രതി വലയിൽ

മൂവാറ്റുപുഴ: സാമ്പത്തിക തട്ടിപ്പ് കേസിൽ ദീർഘകാലമായി ഒളിവിൽ കഴിഞ്ഞിരുന്ന പ്രതി അറസ്റ്റിൽ. പേഴക്കാപ്പിള്ളി കൊച്ചുമാരിയിൽ മുഹമ്മദ് മുഹ്സി (37) നെയാണ് മൂവാറ്റുപുഴ പോലീസ് അറസ്റ്റ് ചെയ്തത്. 2019 മുതൽ സാമ്പത്തിക തട്ടിപ്പ് നടത്തി പല സ്ഥലങ്ങളിലായി ഒളിവിൽ കഴിയുകയായിരുന്നു. കുട്ടമ്പുഴ ഭാഗത്തുനിന്നാണ് പിടികൂടിയത്. നിലവിൽ എറണാകുളം, ആലുവ, മലപ്പുറം എന്നീ കോടതികളിൽ കേസുകൾ നടക്കുന്നുണ്ട്. പ്രതികളെ പിടികൂടിയ സംഘത്തിൽ ഇൻസ്പെക്ടർ ബേസിൽ തോമസ്, എസ്ഐ മാരായ വിഷ്ണുരാജു, കെ.കെ. രാജേഷ് തുടങ്ങിയവർ ഉണ്ടായിരുന്നു.

വീട്ടിലിരുന്ന വാഹനം കത്തിച്ച പ്രതി അറസ്റ്റിൽ

പെരുമ്പാവൂർ: മുൻകാല സുഹൃത്തായിരുന്ന സ്ത്രീയുടെ വീട്ടിൽ അതിക്രമിച്ചു കയറി വാഹനം കത്തിച്ച കേസിൽ പ്രതി അറസ്റ്റിൽ. കൊല്ലം ഇരവിപുരം വടക്കേവിള ഇക്ബാൽ നഗർ മല്ലൻ തോട്ടത്തിൽ വീട്ടിൽ അനീഷിനെയാണ് (38) പോലീസ് അറസ്റ്റ് ചെയ്തത് . വാതിൽ മുട്ടി വിളിച്ചിട്ടും ഫോൺ വിളിച്ചിട്ടും പെൺ സുഹൃത്ത് വെളിയിൽ വരാത്ത ദേഷ്യത്തിൽ പോർച്ചിൽ ഉണ്ടായിരുന്ന വാഹനം കത്തിക്കുകയായിരുന്നു. ബുധനാഴ്ചെയായിരുന്നു സംഭവം. ഇൻസ്പെക്ടർ ടി.എം. സൂഫിയുടെ നേതൃത്വത്തിലുള്ള അന്വേഷണസംഘത്തിൽ എസ് ഐ റിൻസ് എം തോമസ്, സിപിഒ സന്ധ്യ എന്നിവരാണ് ഉണ്ടായിരുന്നത്.

യുഡിഎഫ് ഡിഎഫ് ഓഫീസ് മാർച്ച് ഇന്ന്

കൊച്ചി: ഐക്യ ജനാധിപത്യ മുന്നണി എറണാകുളം ജില്ലാ കമ്മിറ്റിയുടെ ആഭിമുഖ്യത്തില്‍ കോടനാട് ഡിഎഫ് ഓഫീസിലേക്ക് ഇന്ന് മാര്‍ച്ച് നടത്തും. രാവിലെ 10 ന് കുറിച്ചിലക്കോട് കവലയില്‍ നിന്ന് മാര്‍ച്ച് ആരംഭിക്കും. പ്രതിപക്ഷനേതാവ് വി.ഡി.സതീശന്‍ മാര്‍ച്ച് ഉദ്ഘാടനം ചെയ്യും. വന്യമൃഗ ശല്യത്തിന് ശാശ്വത പരിഹാരം കാണുക , കൃഷി നശിച്ചവര്‍ക്കും ജീവന്‍ നഷ്ടപ്പെട്ടവരുടെ ആശ്രിതര്‍ക്ക് ഉചിതമായ നഷ്ടപരിഹാരം നല്‍കുക തുടങ്ങിയ ആവശ്യങ്ങള്‍ ഉന്നയിച്ചാണ് മാര്‍ച്ച് സംഘടിപ്പിക്കുന്നതെന്ന് യുഡിഎഫ് ജില്ലാ ചെയര്‍മാന്‍ ഡൊമിനിക് പ്രസന്‍റേഷനും കണ്‍വീനര്‍ ഷിബു തെക്കുംപുറവും അറിയിച്ചു.

വനിതാ ടിടിഇയെ ആക്രമിച്ച യാത്രക്കാരനെ പിടികൂടി

കൊച്ചി: ട്രെയിനില്‍ വനിതാ ടിടിഇയെ ആക്രമിച്ച കേസില്‍ യാത്രക്കാരന്‍ അറസ്റ്റില്‍. ആലപ്പുഴ ഹരിപ്പാട് സ്വദേശിയും മുന്‍ സൈനികനുമായ ഗോപകുമാര്‍ (45) ആണ് അറസ്റ്റിലായത്. കഴിഞ്ഞ മാസം 30ന് നിലമ്പൂര്‍ റോഡ് കോട്ടയം പാസഞ്ചര്‍ ട്രെയിനിലായിരുന്നു സംഭവം. എറണാകുളത്ത് സെക്യൂരിറ്റി ജോലി ചെയ്യുന്ന ഗോപാലകൃഷ്ണന്‍ ടിക്കറ്റില്ലാതെയാണ് ട്രെയിനില്‍ യാത്ര ചെയ്തിരുന്നത്. പരിശോധനടയ്ക്കിടെ ടിടിഇ പിടികൂടുകയും ഫൈന്‍ അടയ്ക്കാൻ ആവശ്യപ്പെടുകയും ചെയ്തു. ഇതില്‍ പ്രകോപിതനായ ഗോപാലകൃഷ്ണന്‍ ടിടിഇയെ തള്ളി താഴെയിട്ട ശേഷം ഇവരുടെ ഫോണ്‍ നിലത്തിട്ട് ചവിട്ടി കേടുപാട് വരുത്തുകയും അസഭ്യം പറയുകയുമായിരുന്നു. തുടര്‍ന്ന് ട്രെയിന്‍ വേഗതകുറച്ച സമയം ഇയാള്‍ ട്രെയിനില്‍ നിന്ന് ചാടി രക്ഷപ്പെട്ടു. ടിടിഇയുടെ പരാതിയില്‍ കേസെടുത്തെങ്കിലും പ്രതിയെ കണ്ടെത്താന്‍ കഴിഞ്ഞിരുന്നില്ല. സിസിടിവി ദൃശ്യങ്ങളടക്കം ശേഖരിച്ച് നടത്തിയ അന്വേഷണത്തില്‍ ചൊവ്വാഴ്ച കലൂരില്‍ എറണാകുളം സൗത്ത് റെയില്‍വേ പോലീസ് പിടികൂടുകയായിരുന്നു. പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു. സ്ത്രീകളെ അപമാനിച്ചതടക്കം സമാനമായ കേസുകളില്‍ പ്രതിയാണ് ഇയാള്‍.

സപ്ലൈകോ, കണ്‍സ്യൂമര്‍ഫെഡ് ഫെയറുകള്‍

കൊച്ചി: പൊതുവിപണിയിലെ വിലക്കയറ്റത്തിനിടയിലും സാധാരണക്കാർക്ക് സമാശ്വാസമാകാൻ സപ്ലൈകോ, കണ്‍സ്യൂമര്‍ഫെഡ് ഫെയറുകള്‍ . ജില്ലയിൽ സപ്ലൈകോ വിഷു ഈസ്റ്റര്‍ ഫെയർ ഇന്നും കണ്‍സ്യൂമര്‍ ഫെഡ് വിഷു ഈസ്റ്റര്‍ സഹകരണ വിപണി 12നും ആരംഭിക്കും. 19 വരെയാണ് സപ്ലൈകോ വിഷു ഈസ്റ്റര്‍ ഫെയര്‍. വിഷു, ദുഃഖവെള്ളി ഒഴികെ മറ്റ് എല്ലാ ദിവസങ്ങളിലും ഫെയറുകള്‍ തുറന്നുപ്രവര്‍ത്തിക്കും. സബ്‌സിഡി സാധനങ്ങള്‍ക്ക് പുറമേ, തെരഞ്ഞെടുത്ത ബ്രാന്‍ഡഡ് അവശ്യ ഉല്‍പ്പന്നങ്ങള്‍ക്കും, സപ്ലൈകോയുടെ സ്വന്തം ബ്രാന്‍ഡ് ആയ ശബരി ഉത്പന്നങ്ങള്‍ക്കും വിലക്കുറവും ഓഫറുകളും ഉണ്ട്. സപ്ലൈകോ വിഷു, ഈസ്റ്റര്‍ ഫെയറുകള്‍ ആലുവ സൂപ്പര്‍മാര്‍ക്കറ്റ്, തൃപ്പൂണിത്തുറ ലാഭം സൂപ്പര്‍മാര്‍ക്കറ്റ്, പെരുമ്പാവൂര്‍ സൂപ്പര്‍മാര്‍ക്കറ്റ്, മൂവാറ്റുപുഴ സൂപ്പര്‍ മാര്‍ക്കറ്റ്, കോതമംഗലം സൂപ്പര്‍മാര്‍ക്കറ്റ്, കൊച്ചി താലൂക്കിലെ ചുള്ളിക്കല്‍ പീപ്പിള്‍സ് ബസാര്‍, നോര്‍ത്ത് പറവൂര്‍ പീപ്പിള്‍സ് ബസാര്‍. കണ്‍സ്യൂമര്‍ഫെഡ് സബ്‌സിഡി വിപണി വഴി 13 ഇനങ്ങൾ 12 മുതല്‍ 21 വരെയാണ് കണ്‍സ്യൂമര്‍ഫെഡ് വിഷു-ഈസ്റ്റര്‍ സബ്‌സിഡി വിപണി. 13 ഇന നിത്യോപയോഗ സാധനങ്ങളാകും വിപണി വഴി ലഭിക്കുക. ജില്ലയില്‍ 15 ഇടങ്ങളിലാണ് വില്‍പ്പന കേന്ദ്രം ഒരുക്കിയിട്ടുള്ളത്. ഗാന്ധിനഗറിലെ ജില്ലാതല വില്പന കേന്ദ്രത്തില്‍ നിന്നും പ്രതിദിനം 150 ഉപയോക്താക്കള്‍ക്കും മറ്റിടങ്ങളില്‍ നിന്ന് 75 പേര്‍ക്കുമാകും പ്രതിദിനം സബ്‌സിഡി സാധനങ്ങള്‍ ലഭിക്കുക. സബ്‌സിഡി സാധനങ്ങള്‍ക്ക് പുറമേ 10 മുതല്‍ 35 ശതമാനം വരെ വിലക്കുറവില്‍ മറ്റ് നിത്യോപയോഗ സാധനങ്ങളും ലഭിക്കും. 1136 രൂപയ്ക്കാണ് സബ്‌സിഡി സാധനങ്ങള്‍ വിപണിയില്‍ ലഭിക്കുക.

ട്രാന്‍സ്‌പോര്‍ട്ട് കമ്മീഷണര്‍ ഓഫീസ് ഉപരോധിച്ചു

കൊച്ചി: കോണ്‍ട്രാക്ട് ക്യാരേജ് വ്യവസായത്തെ തകര്‍ക്കുന്ന സര്‍ക്കാര്‍, ഉദ്യോഗസ്ഥ നിലപാടുകള്‍ തിരുത്തണമെന്നാവശ്യപ്പെട്ട് കോണ്‍ട്രാക്ട് ക്യാരേജ് ഓപ്പറേറ്റേഴ്‌സ് അസോസിയേഷന്‍ (സിസിഒഎ) സംസ്ഥാന കമ്മിറ്റിയുടെ നേതൃത്വത്തില്‍ വാഹന ഉടമകളും ജീവനക്കാരും കാക്കനാട് ഡെപ്യൂട്ടി ട്രാന്‍സ്‌പോര്‍ട്ട് കമ്മീഷണര്‍ ഓഫീസ് ഉപരോധിച്ചു. സിസിഒഎ സംസ്ഥാന പ്രസിഡന്‍റ് ബിനു ജോണ്‍ ഉപരോധ സമരം ഉദ്ഘാടനം ചെയ്തു. സിസിഒഎ സംസ്ഥാന വൈസ് പ്രസിഡന്‍റും എറണാകുളം ജില്ലാ പ്രസിഡന്‍റുമായ എ.ജെ.റിജാസ് അധ്യക്ഷത വഹിച്ചു.

എടവനക്കാട് കടല്‍ഭിത്തി: ജിഡ 35 കോടി അനുവദിക്കും

കൊച്ചി: കടല്‍കയറ്റം രൂക്ഷമായ എടവനക്കാട് കടല്‍ഭിത്തി ഒരുങ്ങുന്നു. നിര്‍മാണത്തിന് ഗോശ്രീ ഐലൻഡ്സ് ഡെവലപ്‌മെന്‍റ് അഥോറിറ്റിയുടെ(ജിഡ) ഫണ്ട് വിനിയോഗിക്കാന്‍ തീരുമാനമായി. 35 കോടി രൂപയാണ് ജിഡ ഇതിനായി അനുവദിച്ചിട്ടുള്ളത്. ബാക്കി തുക ദേശീയ ദുരന്ത നിവാരണ ഏജന്‍സിയില്‍ നിന്ന് ലഭ്യമാക്കാനാണ് നീക്കം. കഴിഞ്ഞ ജൂണില്‍ ഉണ്ടായ രൂക്ഷമായ കടല്‍ ആക്രമണത്തെ തുടര്‍ന്ന് പ്രദേശത്ത് നിരവധി നാശനഷ്ടങ്ങള്‍ സംഭവിച്ചിരുന്നു. പ്രദേശവാസികളുടെ നേതൃത്വത്തില്‍ സമരവും നടത്തിയിരുന്നു. ഇതിനുപുറമേ ചെറായി ജംഗ്ഷനിലെ രൂക്ഷമായ ഗതാഗത കുരുക്കിന് പരിഹരം കാണുന്നതിനായി ചെറായി ദേവസ്വം നട ബൈപ്പാസ് നിര്‍മാണത്തിനും ജിഡ കൗണ്‍സില്‍ അംഗീകാരം നല്‍കി. പദ്ധതികള്‍ സംബന്ധിച്ച് അന്തിമരൂപം തയാറായി വരുന്നതായി കെ.എന്‍. ഉണ്ണികൃഷ്ണന്‍ എംഎല്‍എ പറഞ്ഞു.

കിലി യൂണിവേഴ്‌സിറ്റി പ്രതിനിധികള്‍ പരുത്തുവയലില്‍ ഹോസ്പിറ്റല്‍ സന്ദര്‍ശിച്ചു

കൊച്ചി: യുകെ ആസ്ഥാനമായ കിലി യൂണിവേഴ്‌സിറ്റിയില്‍ നിന്നുള്ള പ്രതിനിധികള്‍ പെരുമ്പാവൂര്‍, കീഴില്ലം ആസ്ഥാനമായ പരത്തുവയലില്‍ ഹോസ്പിറ്റലും വെല്‍നെസ് ഡിവിഷനായ സത്മയ വെല്‍നെസ് സെന്‍റര്‍, ആയുര്‍വേദ മെഡിസിന്‍ മാനുഫാക്ചറിംഗ് യൂണിറ്റായ പാം ലാബ്‌സ് ഇന്ത്യ ഹെല്‍ത്ത് കെയര്‍ എന്നിവ സന്ദര്‍ശിച്ചു. പ്രഫ. ജറാള്‍ഡ് ബെയറിന്‍ (ഡയറക്ടര്‍ ഓഫ് ഗ്ലോബല്‍ ഹെല്‍ത്ത്, കണ്‍സള്‍ട്ടന്‍സ് സര്‍ജന്‍ ഓഫ് ഇംഗ്ലണ്ട്), പ്രഫ. ലാന്‍ ക്യൂമിംഗ് (യുകെ അംബാസിഡര്‍ ഓഫ് ഹെല്‍ത്ത് കെയര്‍ ഓവര്‍സീസ് ടെറിട്ടറിസ്), പ്രഫ. ഹെയ്ദി ഫുള്ളര്‍ (ഫാക്കല്‍റ്റി ഓഫ് മെഡിസിന്‍ ആന്‍ഡ് ഹെല്‍ത്ത് സയന്‍സ്, പ്രഫസര്‍ ഓഫ് മെഡിക്കല്‍ സയന്‍സ്) എന്നിവരുടെ നേതൃത്വത്തിലുള്ള 25 അംഗ വിദേശ പ്രതിനിധികളാണ് സന്ദര്‍ശനം നടത്തിയത്. ചെയര്‍മാനും മാനേജിംഗ് ഡയറക്ടറുമായ ഡോ. പത്രോസ് പരുത്തുവയലില്‍ ഈ സ്ഥാപനങ്ങള്‍ക്കുവേണ്ടി ഇവരെ സ്വാഗതം ചെയ്തു.

കണ്ണമാലിയിൽ നാലു പേർക്ക് തെരുവുനായയുടെ കടിയേറ്റു

പള്ളുരുത്തി: കണ്ണമാലിയിൽ അലഞ്ഞു തിരിഞ്ഞു നടന്ന തെരുവുനായയുടെ കടിയേറ്റ് നാലു പേർക്ക് പരിക്ക്. കണ്ണമാലി സ്വദേശികളായ കലയേഴത്ത് വീട്ടിൽ ബാബു, മുട്ടുങ്കൽ വീട്ടിൽ സേവ്യറിന്‍റെ ഭാര്യ ഫിലോമിന, പുളിയംപള്ളി വീട്ടിൽ സേവ്യർ, വർഗീസ് എന്നിവരെയാണ് നായ ആക്രമിച്ചത്. ബുധനാഴ്ച പുലർച്ചെ അഞ്ചോടെ കണ്ണമാലി സെന്‍റ് അഗസ്റ്റിൻസ് പള്ളിയുടെ മുന്നിലായിരുന്നു നായയുടെ ആക്രമണം. പള്ളിയിൽ പോയവരെ യും ജോലിക്കു പോകാനായി ബസ് കാത്തുനിന്നവരെയുമാണ് നായ ആക്രമിച്ചത്. കഴിഞ്ഞ ഏതാനും മാസങ്ങളായി തെരുവുനായ ശല്യം രൂക്ഷമാണെന്ന് നാട്ടുകാർ പറയുന്നു. രണ്ടാഴ്ച മുൻപ് മൂന്നു പേരെ തെരുവുനായ കടിച്ചിരുന്നു. നാട്ടുകാരുടെ നിർബന്ധ പ്രകാരം വെറ്ററിനറി സർജന്‍റെ നേതൃത്വത്തിൽ നായയെ പോസ്റ്റുമോർട്ടം ചെയ്തു. പോസ്റ്റ്മോർട്ടം റിപ്പോർട്ടിൽ നായയ്ക്ക് പേവിഷബാധയുണ്ടെന്ന വിവരം നാട്ടുകാരെ ആശങ്കയിലാഴ്ത്തിയിരുന്നു. ചെല്ലാനം ഗ്രാമ പഞ്ചായത്തിൽ നായ ശല്യത്തിനെതിരെ പരാതി നൽകിയെങ്കിലും നടപടിയില്ലെന്ന് പ്രദേശവാസികൾ പറഞ്ഞു. കടപ്പുറത്ത് അലഞ്ഞു തിരിയുന്ന നായകൾ ഭക്ഷണം കിട്ടാതാവുന്നതോടെയാണ് ജനവാസ മേഖലയിലേക്ക് ഇറങ്ങുന്നത്.

കോടതി ബഹിഷ്കരണം: അഭിഭാഷകർ ഹാജരാകാതിരുന്ന കേസുകൾ തള്ളി

കൊച്ചി: കോടതി ഫീസ് വര്‍ധനയ്ക്കെതിരെ കോടതി ബഹിഷ്‌കരിച്ച് അഭിഭാഷകര്‍. ഫീസ് വര്‍ധനയ്ക്കെതിരെ ഇന്നലെ കോടതി ബഹിഷ്‌കരിക്കുന്നതായി വ്യക്തമാക്കി ഹൈക്കോടതി അഭിഭാഷക അസോസിയേഷന്‍ ചീഫ് ജസ്റ്റീസിന് കത്ത് നല്‍കിയിരുന്നു. അഭിഭാഷകര്‍ ഹാജരാകാതിരുന്നതിനെ തുടര്‍ന്ന് ഹൈക്കോടതിയുടെ പ്രവര്‍ത്തനം ഇന്നലെ ഭാഗികമായി തടസപ്പെട്ടു. ഇതിനിടെ അഭിഭാഷകര്‍ ഹാജരാകാതിരുന്ന കേസുകള്‍ ജസ്റ്റീസ് ഡോ.എ.കെ. ജയശങ്കരന്‍ നമ്പ്യാര്‍, ജസ്റ്റീസ് എസ്.ഈശ്വരന്‍ എന്നിവരടങ്ങുന്ന ഡിവിഷന്‍ ബെഞ്ച് തള്ളി. എന്നാല്‍, ഒരു മാസത്തിനുള്ളില്‍ മതിയായ കാരണം കാണിച്ച് കേസുകള്‍ പുനഃസ്ഥാപിക്കാന്‍ വ്യവഹാരികള്‍ക്ക് ഹൈക്കോടതിയെ സമീപിക്കാവുന്നതാണെന്ന് ഉത്തരവില്‍ വ്യക്തമാക്കിയിട്ടുണ്ട്. സംസ്ഥാന സര്‍ക്കാര്‍ ഫീസ് വര്‍ധിപ്പിച്ചതില്‍ കോടതി ബഹിഷ്‌കരിക്കാന്‍ ആഹ്വാനം ചെയ്തത് നിയമവിരുദ്ധമാണെന്ന് കോടതി ചൂണ്ടിക്കാട്ടി. ഇത് സംബന്ധിച്ച പൊതുതാല്‍പര്യ ഹര്‍ജി ചീഫ് ജസ്റ്റീസ് അധ്യക്ഷനായ ബെഞ്ചിന്‍റെ പരിഗണനയിലാണ്. കോടതി ബഹിഷ്‌കരണം അറിയിച്ച് ഹൈക്കോടതി അഭിഭാഷക അസോസിയേഷന്‍ നല്‍കിയ കത്തിന്‍റെ ഉള്ളടക്കം അരോചകമാണെന്നും കോടതി വിമര്‍ശിച്ചു.

കെ.എം. മാണിയെ അനുസ്മരിച്ച് കേരള കോൺഗ്രസ്

കൊച്ചി: കേരള കോൺഗ്രസ് മുൻ ചെയർമാനും മന്ത്രിയുമായിരുന്ന കെ.എം. മാണിയുടെ ആറാം ചരമദിനത്തോടനുബന്ധിച്ചു കേരള കോൺഗ്രസ് എറണാകുളം ജില്ലാ കമ്മിറ്റി അനുസ്മരണ സമ്മേളനം നടത്തി. സംസ്ഥാന കോ -ഓർഡിനേറ്റർ അപു ജോൺ ജോസഫ് ഉദ്ഘാടനം ചെയ്തു. ജില്ലാ പ്രസിഡന്‍റ് ഷിബു തെക്കുംപുറം അധ്യക്ഷത വഹിച്ചു. എം.പി. ജോസഫ്, സേവി കുരിശുവീട്ടിൽ, ബേബി വി. മുണ്ടാടൻ, ജിസൺ ജോർജ്, ജോമി തെക്കേക്കര, സി.കെ. സത്യൻ, ബോബി കുറുപ്പത്ത്, സെബാസ്റ്റ്യൻ പൈനാടത്ത്, രാജു വടക്കേക്കര, റോഷൻ ചാക്കപ്പൻ, ജോഷ്വ തായങ്കരി, സെബി ആന്‍റണി, ആന്‍റണി മാഞ്ഞൂരാൻ, പി.വി. തോമസ് തുടങ്ങിയവർ പ്രസംഗിച്ചു.

മൂവാറ്റുപുഴയിൽ അരമണിക്കൂറിനിടെ കവർന്നത് മൂന്നു ബൈക്കുകൾ

മൂവാറ്റുപുഴ: ഒറ്റരാത്രിയിൽ മൂവാറ്റുപുഴ നഗരത്തിൽനിന്ന് അരമണിക്കൂറിനിടെ കവർന്നത് മൂന്നു ബൈക്കുകൾ. ചൊവ്വാഴ്ച പുലർച്ചെ ഒരേ റൂട്ടിൽ മൂന്നു കിലോമീറ്ററിനുള്ളിലാണ് വിലകൂടിയ ബൈക്കുകൾ മോഷണം പോയത്. ഇതിൽ ഒരെണ്ണം പിന്നീട് ഉപേക്ഷിച്ചനിലയിൽ കണ്ടെത്തി. മൂവാറ്റുപുഴ കടാതി നക്ഷത്ര ഓഡിറ്റോറിയത്തിനു സമീപം പുളിനാട്ട് ഫ്ലാറ്റ് സമുച്ചയത്തിൽ നിന്ന് ചൊവ്വാഴ്ച പുലർച്ചെ 3.45 നാണ് മനോജിന്‍റെ ഉടമസ്ഥതയിലുള്ള ബൈക്ക് കവർന്നത്. മോഷ്ടാക്കൾ പോർച്ചിൽനിന്ന് ബൈക്ക് സ്റ്റാർട്ട് ചെയ്ത് ഓടിച്ചുകൊണ്ടുപോകുന്നതും മറ്റ് ബൈക്കുകളിൽ നിന്നുള്ള ഹെൽമെറ്റെടുത്ത് ധരിക്കുന്നതും സിസി ടിവി ദൃശ്യങ്ങളിൽ പതിഞ്ഞിട്ടുണ്ട്. മോഷ്ടാക്കളിലൊരാൾ വെള്ളയും കറുപ്പും ചെക്ക് ഷർട്ടും പാന്‍റ്സും മറ്റൊരാൾ കറുത്ത ഷർട്ടും പാന്‍റ്സുമാണ് ധരിച്ചിരിക്കുന്നത്. ഒരാൾ മുടി പിന്നിൽ കെട്ടിവച്ചിട്ടുണ്ട്. ഇരുവരും മാസ്ക് ധരിച്ചിരുന്നു. ഇതേ സംഘം തന്നെ നാലോടെ മേക്കടന്പിലെ കൊറിയർ സ്ഥാപനത്തിന് മുന്നിൽ നിന്നും സ്ഥാപന ഉടമ ക്രിസ്റ്റി ജോയിയുടെ ബൈക്കും മോഷ്ടിച്ചു. മൂവാറ്റുപുഴ എൽഐസി ഓഫീസിനു മുന്നിൽ നിന്നാണ് മറ്റൊരു ബൈക്ക് കവർന്നത്. ഇത് 500 മീറ്റർ മാറി ഉപേക്ഷിച്ച നിലയിൽ കണ്ടെട്ടിയിട്ടുണ്ട്. സിസി ടിവി ദൃശ്യങ്ങൾ കേന്ദ്രീകരിച്ച് മൂവാറ്റുപുഴ പോലീസ് അന്വേഷണമാരംഭിച്ചു.

വൈപ്പിനിൽ ചെമ്മീൻ കെട്ടുകലക്ക് തുടങ്ങി

വൈപ്പിൻ: വൈപ്പിൻ കരയിലെ വേനൽക്കാല ചെമ്മീൻ കെട്ടുകളിൽ മതസ്യത്തൊഴിലാളികളുടെ കെട്ടു കലക്കൽ തുടങ്ങി. ചെമ്മീൻ കെട്ടുകളുടെ കാലാവാധി തിങ്കളാഴ്ച വരെയുണ്ടെങ്കിലും അതുവരെ കാത്തു നിൽക്കാതെ കൈയേറി കലക്കി മത്സ്യബന്ധനം നടത്തുകയാണ്. കുഴുപ്പിള്ളി പഞ്ചായത്തിലെ തുണ്ടിപ്പുറം പാടശേഖരത്തിലാണ് ഇന്നലെ ആദ്യമായി കൈയേറി കലക്കിയത്. ഇതറിഞ്ഞതോടെ പിന്നീട് ആളുകൾ എത്തി മറ്റു പല ചെമ്മീൻ കെട്ടുകളും കൈയേറി കലക്കുകയും ചെയ്തു. പിലോപ്പി, കരിമീൻ, പൂമീൻ, മുള്ളൻ, കൂരി തുടങ്ങിയ മത്സ്യങ്ങളാണ് കെട്ടുകലക്കിൽ മത്സ്യത്തൊഴിലാളികൾക്ക് ലഭിച്ചത്. കാലാവസ്ഥാ വ്യതിയാനം മൂലം വലിയ വെള്ളപ്പൊക്കമായിരുന്നതിനാൽ ചെമ്മീൻ കർഷകർക്ക് ഇക്കുറി വൻ നഷ്ടമാണ്. വളർത്താൻ ഇട്ടിരുന്ന മത്സ്യകുഞ്ഞുങ്ങൾ ഭൂരിഭാഗവും വെള്ളപ്പൊക്കത്തിൽ ഒഴുകി പോയി. മാത്രമല്ല ചെമ്മീൻ കെട്ടുകാർക്ക് ഇക്കുറി പ്രതീക്ഷിച്ച രീതിയിലുള്ള തെള്ളി ചെമ്മീനുകൾ കിട്ടാതിരുന്നതും തിരിച്ചടിയായി. സാധാരണ നവംബർ ഒന്നിന് ആരംഭിക്കുന്ന വേനൽക്കാല കെട്ടുകൾ ഏപ്രിൽ 14 നാണ് തീരുക. എന്നാൽ ഇത് എപ്രിൽ 30 വരെയെങ്കിലും നീട്ടിത്തരണമെന്നതാണ് ചെമ്മീൻ കർഷകരുടെ ആവശ്യം. പക്ഷേ മത്സ്യത്തൊഴിലാളി സംഘടനകൾ ഇത് അംഗീകരിക്കാറില്ല. നിലമുടമകൾ നീട്ടി നൽകിയാലും മത്സ്യത്തൊഴിലാളികൾ കാലാവധിക്ക് മുന്നേ കൈയേറി കലക്കി പോകുന്നത് ഇവിടെ പതിവാണ്.

ശുചിത്വ സാഗരം, സുന്ദര തീരം രണ്ടാംഘട്ടം നാളെ

കൊച്ചി: ശുചിത്വ സാഗരം, സുന്ദര തീരം പദ്ധതിയുടെ രണ്ടാംഘട്ടമായി ഏകദിന തീരശുചീകണ കാമ്പയിന്‍ നാളെ വിപുലമായ ജനപങ്കാളിത്തത്തോടെ ജില്ലയില്‍ നടത്തും. 46 കിലോമീറ്റര്‍ നീളുന്നതാണ് ജില്ലയിലെ കടൽത്തീരം. ഒരോ കിലോ മീറ്ററിലും 25 വോളന്‍റിയേഴ്‌സ് ശുചീകരണ പ്രവര്‍ത്തനങ്ങള്‍ക്ക് നേതൃത്വം നല്‍കും. തൊഴിലുറപ്പ്, ഹരിതകര്‍മ സേനാംഗങ്ങള്‍ എന്നിവരോടൊപ്പം ഓരോ പഞ്ചായത്തിലെയും യുവജന സംഘടനകളുടെയും പങ്കാളിത്തവും ശുചീകരണ പരിപാടിയിലുണ്ടാകുമെന്ന് കെ.എന്‍. ഉണ്ണികൃഷ്ണന്‍ എംഎല്‍എ അറിയിച്ചു. പരിപാടിയുടെ ജില്ലാതല ഉദ്ഘാടനം വൈപ്പിനില്‍ നാളെ രാവിലെ ഏഴിന് ചെറായി ബീച്ചില്‍ കെ.എന്‍. ഉണ്ണികൃഷ്ണന്‍ എംഎല്‍എയും ഫോര്‍ട്ട്‌കൊച്ചി വാസ്‌കോഡഗാമ സ്‌ക്വയറില്‍ കെ.ജെ. മാക്‌സി എംഎല്‍എയും നിര്‍വഹിക്കും. ജില്ലയിലെ 46 ആക്ഷന്‍ കേന്ദ്രങ്ങളില്‍ നിന്നും ശേഖരിക്കുന്ന മാലിന്യ കൊച്ചി കോര്‍പറേഷന്‍റെ സഹകരണത്തോടെ സംസ്‌കരിക്കും.

രണ്ടിടങ്ങളിലായി ലഹരി വേട്ട : ജില്ലയിൽ അഞ്ചുപേർ പിടിയിൽ

ആലുവ/അങ്കമാലി/മൂവാറ്റുപുഴ: ജില്ലയിൽ രണ്ടിടത്തായി നടത്തിയ ലഹരിവേട്ടയിൽ അഞ്ചുപേർ പിടിയിൽ. അങ്കമാലി അത്താണിയിൽ വച്ച് ബംഗളൂരുവിൽ നിന്ന് എറണാകുളത്തേക്ക് വരികയായിരുന്ന രണ്ട് ടൂറിസ്റ്റ് ബസുകളിൽ റൂറൽ ജില്ലാ ഡാൻസാഫ് ടീം നടത്തിയ റെയ്ഡിൽ യാത്രക്കാരിൽ നിന്ന് 123 ഗ്രാം എംഡിഎംഎ പിടികൂടി. മൂവാറ്റുപുഴയിൽ എക്സൈസ് വകുപ്പ് നടത്തിയ ലഹരിവേട്ടയിൽ കഞ്ചാവും എംഡിഎംഎയും തോക്കുമായി മൂന്നുയുവാക്കളാണ് പിടിയിലായത്. അത്താണിയിൽ ടൂറിസ്റ്റ് ബസിൽ നടത്തിയ പരിശോധനയിൽ ആലുവ ചൊവ്വര വെളിയത്ത് മിഥുനിൽനിന്ന് (35) 90 ഗ്രാമും ആലപ്പുഴ പൂന്തോപ്പ് വള്ളിയാട് വീട്ടിൽ ആൽബിൻ ഫ്രാൻസിസിൽനിന്ന് (19) 33 ഗ്രാമും എംഡിഎംഎ കണ്ടെടുത്തു. മിഥുൻ ഷൂവിലും ആൽബിൽ ഷോൾഡർ ബാഗിലുമാണ് രാസലഹരി സൂക്ഷിച്ചിരുന്നത്. ജില്ലാ പോലീസ് മേധാവി ഡോ. വൈഭവ് സക്സേനയ്ക്ക് ലഭിച്ച രഹസ്യവിവരത്തിന്‍റെ അടിസ്ഥാനത്തിൽ ആയിരുന്നു പരിശോധന. ദേശീയപാതയിൽ അങ്കമാലി അത്താണിയിൽ വാഹനം തടഞ്ഞുനിർത്തി പരിശോധിച്ചപ്പോഴാണ് മിഥുൻ പിടിയിലായത്. സ്ഥിരമായി മയക്കുമരുന്ന് കടത്തുന്നവരാണ് ഇവരെന്ന് പോലീസിന് വിവരം ലഭിച്ചു. ജില്ലാ പോലീസ് മേധാവി ഡോ. വൈഭവ് സക്സേനയുടെ നേതൃത്വത്തിൽ ഡിവൈഎസ്പി മാരായ ജെ. ഉമേഷ് കുമാർ, ടി.ആർ. രാജേഷ്, ഇൻസ്പെക്ടർമാരായ സാബു ജി. മാസ്, എ. രമേഷ് എന്നിവരാണ് അന്വേഷണസംഘത്തിൽ ഉള്ളത്. മൂവാറ്റുപുഴയിൽ പേഴയ്ക്കപ്പള്ളി ആയിരുമല ഷാലിം ഷാജി (28), പുന്നൊപ്പടി പുത്തന്‍പുര കിഴക്കേകുടിയില്‍ ഹരീഷ് (27), കടാതി തറവേലി സജിന്‍ (37) എന്നിവരാണ് പിടിയിലായത്. കോളജ് വിദ്യാര്‍ഥികള്‍ക്കിടയിലും സിനിമാ മേഖലയില്‍ പ്രവര്‍ത്തിക്കുന്നവര്‍ക്കും വില്പനയ്ക്കായെത്തിച്ച രാസലഹരിയുമായാണ് പ്രതികള്‍ പിടിയിലായത്. ഇവരിൽ നിന്നും 3.28 ഗ്രാം എംഡിഎംഎ, അഞ്ച് ഗ്രാം കഞ്ചാവ്, മൂന്ന് മൊബൈല്‍ ഫോണുകള്‍, ഒരു തോക്ക് എന്നിവ പിടികൂടി. മയക്കുമരുന്ന് കടത്താന്‍ ഉപയോഗിച്ച കാറും എക്‌സൈസ് സംഘം പിടിച്ചെടുത്തു. പ്രതികളെ വ്യാഴാഴ്ച കോടതിയില്‍ ഹാജരാക്കും. മൂവാറ്റുപുഴ എക്‌സൈസ് സര്‍ക്കിള്‍ ഇന്‍സ്‌പെക്ടര്‍ ജി. കൃഷ്ണകുമാറിന്‍റെ നേതൃത്വത്തില്‍ അസി. എക്‌സൈസ് ഇന്‍സ്‌പെക്ടര്‍മാരായ കെ.എ. നിയാസ്, ഇ.എ. അസീസ്, പ്രിവന്‍റീവ് ഓഫീസര്‍മാരായ പി.ഇ. ഉമ്മര്‍, എം.എം. ഷബീര്‍, സിവില്‍ എക്‌സൈസ് ഓഫീസര്‍മാരായ പി.ബി. മാഹിന്‍, നൗഷാദ്, ബിജു ഐസക്, പി.എന്‍. അനിത, എന്നിവര്‍ ചേര്‍ന്നാണ് പ്രതികളെ പിടികൂടിയത്.

മീനപ്പൂരവും പൊങ്കാലയും

മൂവാറ്റുപുഴ: പുഴക്കരക്കാവ് ദേവീക്ഷേത്രത്തിലെ മീനപ്പൂര മഹോത്സവവും പൊങ്കാല സമർപ്പണവും ഇന്ന് നടക്കും. രാവിലെ അഞ്ച് മുതൽ ആറ് വരെ രുദ്രാഭിഷേകം, ഏഴ് മുതല് എട്ട് വരെ ഉഷപൂജ, ഒന്പതിന് പൂരം ഇടി, 9.30ന് നവകം, പഞ്ചഗവ്യം, 10ന് പൊങ്കാല ദീപം പകർന്ന് നൽകൽ, 11.30ന് പൂജ, വൈകുന്നേരം 6.30ന് ദീപാരാധന, രാത്രി 8.30ന് ദേശമുടിയേറ്റ്.

അവധിക്കാല സഹവാസക്യാന്പ്

മൂവാറ്റുപുഴ: പതഞ്ജലി യോഗാ ട്രെയിനിംഗ് ആന്‍ഡ് റിസർച്ച് സെന്‍റർ (പൈതൃക്) ഗവേഷണ വിഭാഗം മൂവാറ്റുപുഴ മാറാടി പൈതൃക് ഭവനിൽ ത്രിദിന അവധിക്കാല സഹവാസക്യാന്പ് ‘ബ്ലിസ്ഫുൾ ഹോളിഡേയ്സ്’ ആരംഭിച്ചു. കായികതാരം ജോബി മാത്യു ഉദ്ഘാടനം നിർവഹിച്ചു. പൈതൃക് പ്രസിഡന്‍റ് എ. രാധാകൃഷ്ണൻ അധ്യക്ഷത വഹിച്ചു. ഡയറക്ടർ കൈതപ്രം വാസുദേവൻ നന്പൂതിരി അനുഗ്രഹ പ്രഭാഷണം നടത്തി. പിന്നണി ഗായിക ഗ്രേഷ്യ അരുണിന്‍റെ നേതൃത്വത്തിൽ മ്യൂസിക്കൽ സെഷൻ നടത്തി. ഗ്രന്ഥകാരൻ ജോർജ് പുളിക്കൻ വ്യക്തിത്വ വികസന പരിശീലന ക്ലാസ് നയിച്ചു. മനീഷ് കുരുക്ഷേത്രയുടെ നേതൃത്വത്തിൽ കുട്ടികൾക്ക് കളരി പരിശീലനം നൽകി. ‘റെസ്പോൻസിബിൾ സിറ്റിസണ്‍’ എന്ന വിഷയത്തിൽ അധ്യാപകനും എൻസിടിഇ, എൻസിഇആർടി അംഗവുമായ ജോബി ബാലകൃഷ്ണൻ ക്ലാസ് നയിച്ചു. ലഹരി വിമുക്ത വിദ്യാർഥി സമൂഹം എന്നതാണ് ത്രിദിന സഹവാസ ക്യാന്പ് മുന്നോട്ട് വയ്ക്കുന്ന പ്രധാന സന്ദേശം.

സിപിഐ ആയവന ലോക്കൽ സമ്മേളനം

മൂവാറ്റുപുഴ: സിപിഐ 25-ാം പാർട്ടി കോണ്‍ഗ്രസിനോടനുബന്ധിച്ചുള്ള ആയവന ലോക്കൽ സമ്മേളനം നടത്തി. പൊതുസമ്മേളനം എഐവൈഎഫ് സംസ്ഥാന പ്രസിഡന്‍റ് എൻ. അരുണ്‍ ഉദ്ഘാടനം ചെയ്തു. തുടർന്ന് പ്രതിനിധി സമ്മേളനം പാർട്ടി സംസ്ഥാന കണ്‍ട്രോൾ കമ്മീഷൻ അംഗം ഇ.കെ. ശിവൻ ഉദ്ഘാടനം ചെയ്തു. സമ്മേളനത്തിൽ ഒന്പത് അംഗ ലോക്കൽ കമ്മിറ്റി അംഗങ്ങളെ തെരഞ്ഞെടുക്കുകയും തുടർന്ന് ഐക്യകണ്ഠേന ബ്ലോക്ക് പഞ്ചായത്തംഗമായ ഷിവാഗോ തോമസിനെ ലോക്കൽ സെക്രട്ടറിയായി തെരഞ്ഞെടുക്കുകയും ചെയ്തു.

ആംബുലൻസ് കൈമാറി

കോതമംഗലം: യുഎഇയിലെ കോതമംഗലം, മൂവാറ്റുപുഴ പ്രവാസികളുടെ സാംസ്കാരിക സംഘടനയായ ആശ്രയം കൂട്ടായ്മ പീസ് വാലിക്ക് ആംബുലൻസ് കൈമാറി. ആന്‍റണി ജോണ്‍ എംഎൽഎ ഫ്ളാഗ് ഓഫ് നിർവഹിച്ചു.

മുഖ്യമന്ത്രിയുടെ കോലം കത്തിച്ചു

കോലഞ്ചേരി: മാസപ്പടിയിൽ വീണാ വിജയൻ പ്രതിയായ സാഹചര്യത്തിൽ മുഖ്യമന്ത്രിയുടെ രാജി ആവശ്യപ്പെട്ടു യൂത്ത് കോൺഗ്രസ്‌ കുന്നത്തുനാട് നിയോജക മണ്ഡലം കമ്മിറ്റിയുടെ നേതൃത്വത്തിൽ പ്രതിഷേധ യോഗവും മാർച്ചും നടത്തി. യോഗത്തിന് ശേഷം മുഖ്യമന്ത്രിയുടെ കോലം കത്തിച്ചു. യൂത്ത് കോൺഗ്രസ്‌ നിയോജക മണ്ഡലം പ്രസിഡന്‍റ് ജെയ്സൽ ജബ്ബാർ അധ്യക്ഷത വഹിച്ചു. സംസ്ഥാന സെക്രട്ടറി എബി പൊങ്ങണത്തിൽ ഉദ്ഘാടനം നിർവഹിച്ചു.

കാവന-അരിക്കുഴ റോഡ് ബിഎംബിസി നിലവാരത്തിലേക്ക്

വാഴക്കുളം: കാവന-അരിക്കുഴ റോഡ് ബിഎംബിസി നിലവാരത്തിലേക്ക്. വാഴക്കുളം ടൗണിൽനിന്ന് കാവന പുളിക്കായത്ത് കടവ് വഴി അരിക്കുഴ മഠം കവല വരെയുള്ള റോഡാണ് ബിഎംബിസി നിലവാരത്തിൽ ടാറിംഗ് നടത്തുന്നത്. മാത്യു കുഴൽനാടൻ എംഎൽഎയുടെ ആവശ്യപ്രകാരം കഴിഞ്ഞ വർഷത്തെ ബജറ്റ് പ്രൊവിഷൻ ഫണ്ടിൽ നിന്നുള്ള 2.60 കോടി വിനിയോഗിച്ചാണ് റോഡ് നവീകരണം. റോഡ് ടാറിംഗിനു പുറമേ കാവന കുരിശുപള്ളിക്കു സമീപമുള്ള പാറ നീക്കം ചെയ്ത് വീതി കൂട്ടുന്നതും ഇതിൽ ഉൾപ്പെടുത്തിയിട്ടുണ്ട്. ഇവിടെയുള്ള ജലവിതരണ പൈപ്പുകൾ മാറ്റി സ്ഥാപിക്കേണ്ടതിനാൽ കഠിനമായ വേനൽ കഴിഞ്ഞ് ജലലഭ്യത ഉറപ്പാക്കിയേ ഈ ഭാഗത്ത് റോഡ് നവീകരണം നടത്താൻ സാധ്യതയുള്ളൂ. വാഴക്കുളം ടൗണിൽ നിന്നുള്ള ഭാഗത്ത് ടാറിംഗ് ഇന്നലെ ആരംഭിച്ചു. നവീകരണ ജോലികൾ അവസാനിക്കുന്നതു വരെ ഇതുവഴിയുള്ള ഗതാഗതം താൽക്കാലികമായി നിരോധിച്ചതായി പൊതുമരാമത്ത് വകുപ്പ് കല്ലൂർക്കാട് അസിസ്റ്റന്‍റ് എൻജിനീയർ അറിയിച്ചു.

ലോറിയും ഓട്ടോറിക്ഷയും കൂട്ടിയിടിച്ചു

കൂത്താട്ടുകുളം: എംസി റോഡിൽ ലോറിയും ഓട്ടോറിക്ഷയും കൂട്ടിയിടിച്ചു. ഓട്ടോറിക്ഷ ഡ്രൈവർക്കും യാത്രക്കാരനും പരിക്കേറ്റു. പരിക്കേറ്റവരെ ഏറെ പണിപ്പെട്ടാണ് പുറത്തെടുത്തത്. ആറൂർ സ്കൂളിനു സമീപം വളവിൽ ചൊവ്വ രാത്രി 11.30ഓടെയാണ് അപകടം. ഓട്ടോറിക്ഷ ഡ്രൈവർ കല്ലൂർക്കാട് കരിന്പനയ്ക്കൽ രാജൻ, യാത്രക്കാരൻ ഈന്തയ്ക്കൽ സതീഷ് എന്നിവർക്കാണ് പരിക്കേറ്റത്. മലയാറ്റൂരിൽനിന്നും കറിപ്പൊടികളുമായി പോയ ലോറിയും മൂവാറ്റുപുഴ ഭാഗത്തേക്ക് പോയ ഓട്ടോറിക്ഷയും നേർക്കുനേർ കുട്ടിയിടിക്കുകയായിരുന്നു. അപകടത്തിനിടെ ലോറിയുടെ പിന്നിൽ കാറും ഇടിച്ചു. വിമാനത്താവളത്തിൽനിന്നു കുറവിലങ്ങാടേയ്ക്കു പോയ കാറാണ് അപകടത്തിൽപ്പെട്ടത്. ആർക്കും പരിക്കില്ല. സ്ഥലത്തെത്തിയ കൂത്താട്ടുകുളം, മൂവാറ്റുപുഴ അഗ്നിരക്ഷാ സേനാംഗങ്ങൾ ഏറെ പണിപ്പെട്ടാണ് ഓട്ടോറിക്ഷയിൽനിന്നും പരിക്കേറ്റവരെ പുറത്തെടുത്തത്. ഇവരെ പിന്നീട് കൂത്താട്ടുകുളത്തെ സ്വകാര്യ ആശുപത്രിയിൽ പ്രവേശിപ്പിച്ചു. ആരുടെയും പരിക്ക് ഗുരതരമല്ലെന്ന് ആശുപത്രി അധികൃതർ അറിയിച്ചു.

കേരളോത്സവം; സംഘാടനത്തിൽനിന്ന് ഒഴിവാക്കിയതിൽ പ്രതിഷേധിച്ചു

കോതമംഗലം: സംസ്ഥാന കേരളോത്സവത്തിന്‍റെ സംഘാടനം രാഷ്ട്രീയവൽക്കരിക്കുകയും ബ്ലോക്ക് പഞ്ചായത്ത് ഉൾപ്പടെ കോണ്‍ഗ്രസ് ഭരിക്കുന്ന വിവിധ തദ്ദേശ സ്വയംഭരണ സ്ഥാപനങ്ങളെയും വിവിധ യുവജന സംഘടനകളെയും സംഘാടനത്തിൽനിന്ന് ഒഴിവാക്കുകയും ചെയ്ത നടപടിയിൽ യൂത്ത് കോണ്‍ഗ്രസ് പ്രതിഷേധിച്ചു. കോതമംഗലം നിയോജകമണ്ഡലം കമ്മിറ്റിയുടെ നേതൃത്വത്തിൽ മന്ത്രി സജി ചെറിയാന്‍റെ കോലം കത്തിച്ചു. യൂത്ത് കോണ്‍ഗ്രസ് ജില്ലാ വൈസ് പ്രസിഡന്‍റ് സൽമാൻ ഓലിക്കൽ ഉദ്ഘാടനം ചെയ്തു. കോതമംഗലം നിയോജകമണ്ഡലം പ്രസിഡന്‍റ് എൽദോസ് എൻ. ഡാനിയൽ അധ്യക്ഷത വഹിച്ചു.

വാളിയപ്പാടം പാലം പുനർനിർമിക്കാൻ പൊതുമരാമത്തിന് നിവേദനം നൽകി

കൂത്താട്ടുകുളം: നടക്കാവ് കൂത്താട്ടുകുളം റോഡിൽ അപകടാവസ്ഥയിലായ വാളിയപ്പാടം പാലം ഉടൻ പുനർ‌നിർമിക്കണമെന്ന് ആവശ്യപ്പെട്ട് സിപിഎമ്മിന്‍റെ നേതൃത്വത്തിൽ പൊതുമരാമത്ത് വകുപ്പിന് നിവേദനം നൽകി. മന്ത്രി പി.എ. മുഹമ്മദ് റിയാസിന്‍റെ പ്രൈവറ്റ് സെക്രട്ടറി പി.കെ. ശബരീഷ്കുമാർ നിവേദനം ഏറ്റുവാങ്ങി. സിപിഎം കൂത്താട്ടുകുളം ഏരിയ സെക്രട്ടറി പി.ബി. രതീഷ്, ലോക്കൽ സെക്രട്ടറി എം.കെ. ശശി, പഞ്ചായത്ത് പ്രസിഡന്‍റ് സന്ധ്യമോൾ പ്രകാശ്, ലോക്കൽ കമ്മിറ്റിയംഗം ബിനു കുര്യാക്കോസ് എന്നിവർ നിവേദക സംഘത്തിലുണ്ടായിരുന്നു. വാളിയപ്പാടം തോടിനു കുറുകെയുള്ള പാലത്തിന്‍റെ ഒരു ഭാഗം ഇടിഞ്ഞുതാഴ്ന്ന നിലയിലാണ്. കഴിഞ്ഞ മഴക്കാലത്തുണ്ടായ മലവെള്ളപ്പാച്ചിലാണ് പാലത്തിന് ബലക്ഷയമുണ്ടാക്കിയത്. പാലത്തിൽ ഗതാഗത നിയന്ത്രണം ഏർപ്പെടുത്തിയിട്ടുണ്ട്. ഒരു വശത്തുകൂടിയാണ് ഗതാഗതം നടക്കുന്നത്.

കുട്ടന്പുഴയിലെ ഗിരിവർഗ സങ്കേതങ്ങളിൽ സുഗന്ധ വ്യഞ്ജന ഗ്രാമം പദ്ധതി തുടങ്ങി

കോതമംഗലം: ഗിരിവർഗ സങ്കേതങ്ങളിലുള്ളവർക്ക് വരുമാന വർധനവ് ലക്ഷ്യമിട്ട് എറണാകുളം ജില്ലാ പഞ്ചായത്ത് ആവിഷ്ക്കരിച്ചിട്ടുള്ള സുഗന്ധ വ്യഞ്ജനഗ്രാമം പദ്ധതിയുടെ രണ്ടാം ഘട്ടമായി കുട്ടന്പുഴ പഞ്ചായത്തിലെ 12 ഗിരിവർഗ സങ്കേതങ്ങളിൽ മഞ്ഞൾ, ഇഞ്ചി തുടങ്ങിയവയുടെ വിത്ത് വിതരണം നടത്തി പദ്ധതി ആരംഭിച്ചു. കുട്ടന്പുഴ പഞ്ചായത്തിലെ മാമലക്കണ്ടം മേട്നാപാറ കമ്യൂണിറ്റി ഹാളിൽ നടന്ന ചടങ്ങിൽ ജില്ലാ പഞ്ചായത്ത് പ്രസിഡന്‍റ് മനോജ് മൂത്തേടൻ വിത്ത് വിതരണോദ്ഘാടനം നിർവഹിച്ചു. വൈസ് പ്രസിഡന്‍റ് എൽസി ജോർജ് അധ്യക്ഷത വഹിച്ചു. ജില്ലാ പഞ്ചായത്തിന്‍റെ 2024-25 വാർഷിക പദ്ധതിയുടെ ഭാഗമായി അഞ്ച് ലക്ഷം ചെലവഴിച്ചാണ് ജില്ലയിലെ 13 ഗിരിവർഗ സങ്കേതങ്ങളിൽ സുഗന്ധവ്യഞ്ജനഗ്രാമം പദ്ധതി നടപ്പാക്കുന്നത് ഇതിന്‍റെ ആദ്യ ഘട്ടമായി പൊങ്ങൻചുവട് സങ്കേതത്തിൽ വിത്ത് വിതരണം ചെയ്തിരുന്നു. 13 ഗിരിവർഗ സങ്കേതങ്ങളിലായി 60 ഏക്കർ സ്ഥലത്താണ് സുഗന്ധവ്യഞ്ജന കൃഷിയിറക്കുന്നത്.

മൂവാറ്റുപുഴയിൽ ഒറ്റവരി ഗതാഗതം

മൂവാറ്റുപുഴ: പോസ്റ്റ് ഓഫീസ് ജംഗ്ഷൻ മുതൽ കച്ചേരിത്താഴം വരെ നാലുവരിയായി വികസിപ്പിക്കുന്നതിന്‍റെ ഭാഗമായി 12 മുതൽ ഒരുനിര ഗതാഗതം മാത്രമേ ഇതുവഴി അനുവദിക്കുകയുള്ളു. ഇതുമായി ബന്ധപ്പെട്ട് മൂവാറ്റുപുഴ നഗരസഭ ട്രാഫിക് ഉപദേശക സമിതി യോഗം ഇന്ന് രാവിലെ 11ന് നഗരസഭ കോണ്‍ഫ്രൻസ് ഹാളിൽ ചേരുമെന്ന് നഗരസഭാധ്യക്ഷൻ പി.പി. എൽദോസ് അറിയിച്ചു.

അഭിഭാഷകർ കോടതി ബഹിഷ്കരിച്ചു

മൂവാറ്റുപുഴ: കേരള സർക്കാർ നടപ്പാക്കിയ അന്യായമായ കോർട്ഫീ വർധനയിൽ പ്രതിഷേധിച്ച് മൂവാറ്റുപുഴയിലെ മുഴുവൻ അഭിഭാഷകരും ഇന്നലെ കോടതി നടപടികളിൽ പങ്കെടുക്കാതെ ബഹിഷ്കരിച്ചു. മറ്റ് സംസ്ഥാനങ്ങളെക്കാൾ ഉയർന്ന നിരക്കാണ് കേരളത്തിലെന്നും ഇപ്പോഴത്തെ അന്യായ വർധന നീതിന്യായ രംഗത്ത് പ്രതിസന്ധി സൃഷ്ടിക്കുമെന്നും അഭിഭാഷകർ പറഞ്ഞു. നിലവിൽലുള്ളതിനേക്കാൾ അഞ്ചു മുതൽ പത്തിരട്ടി വരെയാണ് ശരാശരി കോർട്ട് ഫീ വർധന. എല്ലാ കോടതി വ്യവഹാര മേഖലയിലും ഇത് പ്രതിഫലിക്കും. കോടതിയെ സമീപിക്കുന്ന സാധാരണക്കാരെ ബുദ്ധിമുട്ടിലാക്കും. 2025 ഏപ്രിൽ ഒന്നു മുതലാണ് ഇത് പ്രാബല്യത്തിൽ വന്നിട്ടുള്ളത്. കോടതി ബഹിഷ്കരിച്ച അഭിഭാഷകർ നഗരത്തിൽ പ്രകടനം നടത്തി. അസോസിയേഷൻ പ്രസിഡന്‍റ് ജോസ് വർഗീസ് ആമുഖപ്രഭാഷണം നടത്തി. കോലഞ്ചേരി: അന്യായവും അശാസ്ത്രീയവുമായ കോർട്ട് ഫീസ് വർധനവിനെതിരെ കോലഞ്ചേരി ബാർ അസോസിയേഷന്‍റെ നേതൃത്വത്തിൽ ഇന്നലെ കോടതി ബഹിഷ്‌ക്കരിച്ച് പ്രതിഷേധിച്ചു. കോടതി നടപടികൾ ആരംഭിക്കേണ്ട 11ന് ബാർ അസോസിയേഷനിൽ കൂടിയ അഭിഭാഷകർ വിഷയത്തിൽ പ്രതിഷേധ യോഗം ചേർന്നു. ബാർ അസോസിയേഷൻ പ്രസിഡന്‍റ് ചാൾസ് ടി. ഡേവിഡ് യോഗത്തിൽ അധ്യക്ഷത വഹിച്ചു.

കേരള ലേബർ മൂവ്മെന്‍റ് സോണൽ സമ്മേളനം

മൂവാറ്റുപുഴ: സാമൂഹിക പുരോഗതയിലും സാന്പത്തിക വളർച്ചയിലും തൊഴിലാളികളുടെ അധ്വാനത്തിനും സമർപ്പണ ബുദ്ധിയോടെയുള്ള പ്രവർത്തനത്തിനും വലിയ പങ്കാണുള്ളതെന്ന് മൂവാറ്റുപുഴ രൂപതാധ്യക്ഷൻ യൂഹന്നോൻ മാർ തെയോഡോഷ്യസ്. കേരള ലേബർ മൂവ്മെന്‍റ് എറണാകുളം സോണൽ സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. തൊഴിലാളികളുടെ ജീവസന്ധാരണത്തിനും നിലനിൽപ്പിനും ആവശ്യമായത് തൊഴിലിലൂടെ ലഭിക്കാൻ തൊഴിലാളിക്ക് അവകാശമുണ്ടെന്നും ബിഷപ് പറഞ്ഞു. ലേബർ മൂവ്മെന്‍റ് സംസ്ഥാന പ്രസിഡന്‍റ് ജോസ് മാത്യു അധ്യക്ഷത വഹിച്ചു. സംസ്ഥാന ഡയറക്ടർ ഫാ. അരുണ്‍ വലിയതാഴത്ത് സന്ദേശം നൽകി. ഫാ. പ്രസാദ് കണ്ടെത്തിപ്പറന്പിൽ, ബാബു തണ്ണിക്കോട്ടിൽ എന്നിവർ ക്ലാസുകൾ നയിച്ചു. സംസ്ഥാന ജനറൽ സെക്രട്ടറി ഡിക്സണ്‍ മണിക് ചർച്ചകൾക്ക് നേതൃത്വം നൽകി. തോമസ് മാത്യു, ബെയ്സ് ബെറ്റ് ബ്ലെയ്സ്, ഫാ. ജോണ്‍ മാക്കപ്പിള്ളി എന്നിവർ പ്രസംഗിച്ചു.

‘ആലുവ-മൂന്നാർ രാജപാത ഗതാഗതത്തിനായി തുറക്കണം’ : കോതമംഗലം താലൂക്ക് വികസന സമിതി യോഗം

കോതമംഗലം: ആലുവ - മൂന്നാർ രാജപാത ഗതാഗതത്തിനായി തുറന്ന് നൽകണമെന്നും രാജപാത സമരവുമായി ബന്ധപ്പെട്ട് ബിഷപ് മാർ ജോർജ് പുന്നക്കോട്ടിലിനും ജനപ്രതിനിധികൾക്കും പൊതുജനങ്ങൾക്കുമെതിരെയെടുത്ത കേസുകൾ പിൻവലിക്കണമെന്നും താലൂക്ക് വികസന സമിതി യോഗം പ്രമേയത്തിലൂടെ ആവശ്യപ്പെട്ടു. ഇല്ലാത്ത അവകാശം സ്ഥാപിച്ചെടുക്കാനുള്ള വ്യഗ്രതയിലാണ് വനം വകുപ്പിലെ ചില ഉന്നത ഉദ്യോഗസ്ഥർ. ആലുവ - മൂന്നാർ രാജപാതയുടെ ഭാഗമായ കോതമംഗലം- പെരുന്പൻകുത്ത് റോഡ് നിലവിൽ പൊതുമരാമത്ത് വകുപ്പിന്‍റെ ആസ്തിയിലുള്ളതും വനം വകുപ്പിന് യാതൊരു അവകാശം ഇല്ലാത്തതുമാണ്. ഈ റോഡാണ് അനധികൃതമായി വനം വകുപ്പ് പൂയംകുട്ടിക്ക് സമീപം അടച്ചിട്ടുള്ളത്. വടാട്ടുപാറ - പലവൻപടി പുഴയിൽ നിരവധി മുങ്ങി മരണങ്ങൾ ഉണ്ടാകുന്ന സാഹചര്യത്തിൽ ദുരന്ത നിവാരണ നിയമ പ്രകാരമുള്ള അടിയന്തര നടപടികൾ സ്വീകരിക്കുന്നതിന് യോഗം തഹസിൽദാർമാരെ ചുമതലപ്പെടുത്തി. കോതമംഗലം ടൗണിൽ വിവിധ വേദികളിലായി നടക്കുന്ന കേരളോത്സവം വിജയകരമാക്കുന്നതിന് എല്ലാവരുടെയും സഹകരണം ഉണ്ടാകണമെന്ന് യോഗം നിർദേശിച്ചു. കോതമംഗലം മണ്ഡലത്തിലെ അഞ്ച് പഞ്ചായത്തുകളിലെ വിവിധ പ്രദേശങ്ങളിൽ നേരിട്ടുകൊണ്ടിരിക്കുന്ന വന്യമൃഗശല്യത്തെ പ്രതിരോധിക്കുന്നതിന് സർക്കാർ പ്രഖ്യാപിച്ചിട്ടുള്ള ഫെൻസിംഗ്, ഹാംഗിംഗ് ഫെൻസിംഗ്, ട്രഞ്ചിംഗ് ഉൾപ്പെടെയുള്ള വർക്കുകളുടെ സമയബന്ധിതവും കാര്യക്ഷമമായുമുള്ള പൂർത്തീകരണം ബന്ധപ്പെട്ട ഡിഎഫ്ഒമാർ ഉറപ്പുവരുത്തണമെന്നും യോഗം ആവശ്യപ്പെട്ടു. യോഗത്തിൽ ആന്‍റണി ജോണ്‍ എംഎൽഎ അധ്യക്ഷത വഹിച്ചു. തഹസിൽദാർ എം. അനിൽകുമാർ, നഗരസഭാധ്യക്ഷൻ ടോമി എബ്രഹാം, പഞ്ചായത്ത് പ്രസിഡന്‍റുമാരായ പി.കെ ചന്ദ്രശേഖരൻ നായർ, എം.പി ഗോപി, ജില്ലാ പഞ്ചായത്തംഗം റാണിക്കുട്ടി ജോർജ്, നഗരസഭ സ്ഥിരംസമിതി അധ്യക്ഷൻ കെ.എ നൗഷാദ്, എം.എസ് എൽദോസ്, പി.ടി ബെന്നി, എ.ടി പൗലോസ്, തോമസ് വട്ടപ്പാറയിൽ, സാജൻ അന്പാട്ട്, വിവിധ വകുപ്പ് മേധാവികൾ എന്നിവർ യോഗത്തിൽ പങ്കെടുത്തു.

ഭൂതത്താൻകെട്ട് ടൂറിസ്റ്റ് കേന്ദ്രത്തിൽ നിർത്തിവച്ച ബോട്ട് സർവീസ് ഇന്നാരംഭിക്കും

അഖില കേരള സെവൻസ് ഫുട്ബോൾ ടൂർണമെന്‍റ്

ആലുവ: അഖില കേരള ഫ്ളഡ് ലൈറ്റ് സെവൻസ് ഫുട്ബോൾ ടൂർണമെന്‍റ് 13 മുതൽ 20 വരെ ആലുവ കുന്നത്തേരി പള്ളിത്താഴം ഗ്രൗണ്ടിൽ നടക്കും. കേരളത്തിലെ പ്രമുഖ ടീമുകൾ പങ്കെടുക്കുന്ന ഫുട്ബോൾ മത്സരത്തിൽ നൈജീരിയൻ സുഡാൻ, സന്തോഷ്‌ ട്രോഫി താരങ്ങൾ ഉണ്ടാകുമെന്ന് സംഘാടകരായ യൂത്ത് കോൺഗ്രസ് അറിയിച്ചു.

ജില്ലാ വെക്ടര്‍ കണ്‍ട്രോള്‍ യൂണിറ്റിന് പുതിയ വാഹനം

കൊച്ചി: പ്രാണിജന്യ രോഗ നിയന്ത്രണത്തിന്‍റെ ജില്ല കാര്യാലമായ ജില്ലാ വെക്ടര്‍ കണ്‍ട്രോള്‍ യൂണിറ്റിന് പെട്രോനെറ്റ് എല്‍എന്‍ജി നല്‍കിയ പുതിയ വാഹനത്തിന്‍റെ ഫ്ലാഗ് ഓഫ് ജില്ല കളക്ടര്‍ എന്‍.എസ്.കെ. ഉമേഷ് നിര്‍വഹിച്ചു. താക്കോല്‍ദാനം പെട്രോനെറ്റ് എല്‍എന്‍ജി പ്ലാന്‍റ് ഹെഡ് ഉപേന്ദ്രകുമാര്‍ നിര്‍വഹിച്ചു. ചടങ്ങില്‍ പെട്രോനെറ്റ് മേധാവികളായ ആശിഷ് ഗുപ്ത, സഞ്ജയ് കുമാര്‍ സിംഗ്, ശോഭ ലിമിറ്റഡ് മേധാവി കെ.സി.റാഹില്‍, ജില്ല പ്രോഗ്രാം മാനേജര്‍ ഡോ, ശിവകുമാര്‍, ജില്ല വെക്ടര്‍ കണ്‍ട്രോള്‍ യൂണിറ്റ് മേധാവി ജെ.കെ. മുജീബ് റഹ്മാന്‍ എന്നിവര്‍ പങ്കെടുത്തു .

കുമ്പളങ്ങിയിലുണ്ട്, സച്ചിന്‍ ടെന്‍ഡുല്‍ക്കര്‍ റോഡ്

കൊച്ചി: ക്രിക്കറ്റ് ഇതിഹാസം സച്ചിന്‍ ടെന്‍ഡുല്‍ക്കറും കുമ്പളങ്ങിയും തമ്മിലെന്ത് ? ഒരു റോഡിന്‍റെ അപ്പുറവും ഇപ്പുറവും തമ്മിലുള്ള ബന്ധമെന്നു കുമ്പളങ്ങിക്കാര്‍ കൗതുകത്തോടെ പറയും. അതെ; കുമ്പളങ്ങിയിലുണ്ട് സച്ചിന്‍ ടെന്‍ഡുല്‍ക്കറുടെ പേരിലൊരു റോഡ്. സച്ചിന്‍റെ ആരാധകരായ കുമ്പളങ്ങിയിലെ അഞ്ചംഗ സുഹൃദ്‌സംഘമാണ് തങ്ങളുടെ ഗ്രാമത്തിലെ റോഡിന് താരത്തിന്‍റെ പേരു നല്‍കാന്‍ നിമിത്തമായത്. മാതൃകാ ടൂറിസം ഗ്രാമമെന്നറിയപ്പെടുന്ന കുമ്പളങ്ങി ഗ്രാമപഞ്ചായത്ത് 16- ാം വാര്‍ഡിലാണ് അഴിക്കകം വടക്ക് പടിഞ്ഞാറു ഭാഗത്തുള്ള പൂവന്‍സ് റോഡിനെയും കിഴക്കുവശമുള്ള സ്വരാജ് റോഡിനെയും ബന്ധിപ്പിക്കുന്ന സച്ചിന്‍ ടെന്‍ഡുല്‍ക്കര്‍ റോഡ്. കെസിവൈഎം സജീവ പ്രവര്‍ത്തകനായിരുന്ന പള്ളുരുത്തി ബ്ലോക്ക് പഞ്ചായത്ത് വൈസ് പ്രസിഡന്‍റ് ജോബി പനക്കല്‍, സുഹൃത്തുക്കളായ ജേക്കബ് ജസ്റ്റിന്‍ ആലുങ്കല്‍, സോജന്‍ പുത്തന്‍പുരയ്ക്കല്‍, ഫ്രാന്‍സിസ് ഷിബിന്‍ കുരിശുപറമ്പില്‍, ജോബ് മനു എന്നിവരോടാണ് റോഡിന്‍റെ താരപ്പേരിനു കടപ്പാട്. 2015- 20 ല്‍ പതിനാറാം വാര്‍ഡില്‍ നിന്നു സ്വതന്ത്രസ്ഥാനാര്‍ഥിയായി മത്സരിച്ചു ജയിച്ചതാണ് ജോബി പനക്കല്‍. ഇദ്ദേഹം പഞ്ചായത്ത് അംഗമായിരുന്ന ആദ്യ ടേമില്‍ ഗതാഗത സൗകര്യമില്ലാതിരുന്ന ഈ പ്രദേശത്തേക്ക് കെ.ജെ. മാക്‌സി എംഎല്‍എയുടെ വികസന ഫണ്ടില്‍ നിന്ന് 23 ലക്ഷം രൂപ അനുവദിച്ച് 2018 ഡിസംബറിലാണ് റോഡിന്‍റെ ആദ്യഘട്ട നിര്‍മാണോദ്ഘാടനം നടന്നത്. ഈ സമയത്ത് റോഡിനൊരു പേരു കണ്ടെത്തണമെന്ന് ജോബി കൂട്ടുകാരോട് പറഞ്ഞു. പുലിക്കുട്ടികള്‍ എന്ന ഇവരുടെ ടെലഗ്രാം ഗ്രൂപ്പിലൂടെ ജേക്കബ് ജെസ്റ്റിന്‍ പങ്കുവച്ച പേരിനെ മറ്റുള്ളവരും ഏറ്റെടുത്തു. 2020 ഓഗസ്റ്റില്‍ നിര്‍മാണം പൂര്‍ത്തിയായ റോഡിന്‍റെ രണ്ടാം ഘട്ട നിര്‍മാണ പ്രവര്‍ത്തനങ്ങള്‍ ഉടന്‍ ആരംഭിക്കും. കെ.ജെ. മാക്‌സി എംഎല്‍എയുടെ ആസ്തി വികസന ഫണ്ടില്‍ നിന്ന് 56.20 ലക്ഷം രൂപയാണ് ഇപ്പോള്‍ അനുവദിച്ചിരിക്കുന്നത്.

പ്രിസൺ ഓഫീസർക്കു മർദനമേറ്റ സംഭവം: പ്രതികൾക്കെതിരെ കേസെടുത്തു

കാക്കനാട്: എറണാകുളം ജില്ലാ ജയിലിലെ തടവുകാര്‍ക്കിടയിലുണ്ടായ ഏറ്റുമുട്ടല്‍ ചോദ്യം ചെയ്ത അസി. പ്രിസണ്‍ ഓഫീസര്‍ അഖില്‍ മോഹനന്‍റെ കൈയൊടിച്ച സംഭവത്തില്‍ രണ്ട് തടവുകാര്‍ക്കെതിരെ കേസെടുത്തു. റിമാന്‍ഡ് പ്രതികളും സഹോദരങ്ങളുമായ അജിത് ഗണേശന്‍, അഖില്‍ ഗണേശന്‍ എന്നിവര്‍ക്കെതിരെയാണ് ഇന്‍ഫോപാര്‍ക്ക് പോലീസ് കേസെടുത്തത്. സഹ തടവുകാരനെ ആക്രമിച്ചതിനെ കുറിച്ച് ചോദിക്കാന്‍ ഓഫീസിലേക്ക് വിളിപ്പിച്ചതിനെ തുടര്‍ന്നു ഗാര്‍ഡ് ഓഫീസര്‍ വിനോദ്, അസിസ്റ്റന്‍റ് പ്രിസണ്‍ ഓഫീസര്‍ ശംഭുനാഥ് എന്നിവരെ കൈയേറ്റം ചെയ്യുന്നതു കണ്ടു തടയാന്‍ ശ്രമിച്ചപ്പോഴാണ് അഖില്‍ മോഹനെ ആക്രമിച്ചത്. പ്രതികള്‍ അഖിലിനെ മര്‍ദിച്ച ശേഷം താഴേക്കു തള്ളിയിട്ടതോടെ ഭിത്തിയില്‍ ഇടിച്ചു വീണ വലതു കൈ ഒടിയുകയായിരുന്നു. ബഹളം കൂട്ടി ലോക്കപ്പ് മുറി തുറപ്പിച്ചു പുറത്തിറങ്ങിയാണ് രണ്ടാം പ്രതിയും ആക്രമിച്ചത്. ഇക്കഴിഞ്ഞ ഫ്രെബുവരിയില്‍ മോഷണക്കേസിലാണ് സഹോദരങ്ങളായ പ്രതികളെ അമ്പലമേട് പോലീസ് പിടികൂടുന്നത്. പ്രതികള്‍ സ്റ്റേഷന്‍ ആക്രമിക്കുകയും ചെയ്തിരുന്നു. ഈ കേസുകളിൽ ഉള്‍പ്പെടെയാണ് റിമാന്‍ഡിലായത്.

ഇടക്കൊച്ചിയിലെ വേലിയേറ്റ വെള്ളക്കെട്ട്: പരിഹാര നടപടികൾക്ക് അനുമതിയെന്ന് എംഎൽഎ

ഇടക്കൊച്ചി: ഇടക്കൊച്ചി മേഖലയിലെ വേലിയേറ്റ വെള്ളക്കെട്ട് പരിഹരിക്കുന്നതിനായി സംരക്ഷണഭിത്തിയും സ്ലുയിസും നിർമിക്കുന്നതിന് വിഭജിച്ചു ടെൻഡർ ചെയ്യുന്നതിന് ഇറിഗേഷൻ വകുപ്പ് തയാറാക്കിയ പദ്ധതിക്ക് സർക്കാർ അനുമതിയായെന്ന് കെ. ബാബു എംഎൽഎ അറിയിച്ചു. പള്ളുരുത്തി, ഇടക്കൊച്ചി, കുമ്പളം പ്രദേശങ്ങളിൽ കായൽ വേലിയേറ്റം തടയുന്നതിന് സംരക്ഷണ ഭിത്തിയും, സ്ലുയിസും നിർമിക്കുന്നതിന് 4.85 കോടി രൂപയുടെ പ്രവർത്തിയാണ് ഇറിഗേഷൻ വകുപ്പ് തയാറാക്കിയത്. മൂന്നുതവണ ടെൻഡർ ചെയ്തിട്ടും ഏറ്റെടുക്കാൻ കരാറുകാർ ആരും തയാറാകാത്ത സാഹചര്യത്തിലാണ് ഈ പ്രവർത്തി മൂന്നായി വിഭജിച്ച് ടെൻഡർ ചെയ്യുവാൻ തീരുമാനിച്ചതെന്ന് കെ. ബാബു എംഎൽഎ അറിയിച്ചു. നഗരസഭ 16ാം വാർഡിൽ സംരക്ഷണ ഭിത്തിയും സ്ലുയിസും നിർമിക്കുന്നതിന് 1.181 കോടി രൂപയുടെ പദ്ധതിയാണുള്ളത്. ഇടക്കൊച്ചി, പള്ളുരുത്തി, പെരുമ്പടപ്പ് എന്നീ ഭാഗങ്ങളിൽ സംരക്ഷണ ഭിത്തിയും നിർമിക്കുന്നതിന് 3.34 കോടി രൂപയുടെ എസ്റ്റിമേറ്റും ഇറിഗേഷൻ വകുപ്പ് തയാറാക്കിയിട്ടുണ്ട്. പദ്ധതിയുടെ നടത്തിപ്പിനായി സർക്കാർ ഉത്തരവ് ഇറങ്ങിയതോടെ പദ്ധതി ടെൻഡർ നടത്തുമെന്ന് കെ. ബാബു എംഎൽഎ അറിയിച്ചു.

ചമ്പക്കര കനാൽ റോഡും കൈവരിയും നാടിനു സമർപ്പിച്ചു

മരട്: എംഎൽഎ ആസ്തി വികസന ഫണ്ടിൽ നിന്നും 69 ലക്ഷം രൂപ ചെലവഴിച്ച് നിർമിച്ച ചമ്പക്കര കനാൽ റോഡിന്‍റെയും കൈവരിയുടെയും നടപ്പാതയുടെയും ഉദ്ഘാടനം കെ. ബാബു എംഎൽഎ നിർവഹിച്ചു. നഗരസഭാ ചെയർമാൻ ആന്‍റണി ആശാംപറമ്പിൽ അധ്യക്ഷത വഹിച്ചു. വൈസ് ചെയർപേഴ്സൺ അഡ്വ. രശ്മി സനിൽ, സ്ഥിരം സമിതി അധ്യക്ഷന്മാരായ റിയാസ് കെ. മുഹമ്മദ്, റിനി തോമസ്, ശോഭ ചന്ദ്രൻ, ബേബി പോൾ, ബിനോയ് ജോസഫ് തുടങ്ങിയവർ പ്രസംഗിച്ചു. ചമ്പക്കര കനാൽ റോഡിൽ കൈവരിയില്ലാതിരുന്നതിനാൽ നിരവധി അപകടങ്ങൾ മുൻപുണ്ടായിട്ടുണ്ട്. ഇതേ തുടർന്നാണ് ഇവിടെ കൈവരി നിർമിക്കാൻ തീരുമാനമായത്.

മൂഴിക്കുളം അക്ഷയയിൽ എടിഎം പ്രവർത്തനമാരംഭിച്ചു

മൂഴിക്കുളം: പാറക്കടവ് പഞ്ചായത്തിലെ മൂഴിക്കുളം അക്ഷയ ഇ-സെന്‍ററിൽ എടിഎം പ്രവർത്തനം ആരംഭിച്ചു. എല്ലാ ബാങ്കിന്‍റെയും എടിഎം ഉപയോഗിക്കാവുന്നതാണ്. ഒരു എടിഎമ്മിൽനിന്ന് പരമാവധി 10,000 രൂപ വരെ പിൻവലിക്കാവുന്നതാണ്. രാവിലെ ഒന്പതുമുതൽ 5.30 വരെയാണ് പ്രവർത്തന സമയം.

പീഡാനുഭവ ഗാനശുശ്രൂഷ നടത്തി

കൊച്ചി: എറണാകുളം വൈഎംസിഎയുടെ ആഭിമുഖ്യത്തിൽ പീഡാനുഭവ ഗാനശുശ്രൂഷ സംഘടിപ്പിച്ചു. വൈഎംസിഎ പ്രസിഡന്‍റ് ഡോ. ടെറി തോമസ് എടത്തൊട്ടി ഉദ്ഘാടനം ചെയ്തു. ഫാ. ജെയ്‌റ്റ്സ് കോച്ചാപ്പിള്ളി കപ്പൂച്ചിൻ പീഡാനുഭവ സന്ദേശം നൽകി. റിലീജിയസ് കമ്മിറ്റി ചെയർമാൻ വി. ഏബ്രഹാം സൈമൺ, ജനറൽ സെക്രട്ടറി ആന്‍റോ ജോസഫ്, അസോ. ജനറൽ സെക്രട്ടറി സജി ഏബ്രഹാം എന്നിവർ നേതൃത്വം നൽകി. സിഎസ്ഐ ഇമ്മാനുവേൽ കത്തീഡ്രൽ ചർച്ച് , തൃപ്പൂണിത്തുറ സെന്‍റ് സ്റ്റീഫൻസ് ചർച്ച് , ആലുവ യുണൈറ്റഡ് മെൻസ്, എളംകുളം സിഎസ്ഐ ക്രൈസ്റ്റ് ചർച്ച്, എറണാകുളം കേരള സിംഗിംഗ് അബാസിറ്റർസ് എന്നീ കൊയറുകൾ ഗാനശ്രുശ്രുഷ നടത്തി. റവ. രഞ്ജു വർഗീസ്, റവ. സന്തോഷ് രാജ് എന്നിവർ പ്രസംഗിച്ചു.

പാറക്കടവ് ബാങ്കിന്‍റെ കാർഷിക ഫെസ്റ്റ് നാളെ മുതൽ

നെടുമ്പാശേരി: വിഷുവിനോടനുബന്ധിച്ച് പാറക്കടവ് കാർഷിക സേവന കേന്ദ്രത്തിൽ കാർഷിക ഫെസ്റ്റും ലഹരി വിരുദ്ധ കാമ്പയിനും സംഘടിപ്പിക്കും. കാർഷിക ഫെസ്റ്റ് വെള്ളിയാഴ്ച ആരംഭിക്കും. മൂന്നു ദിവസം നീണ്ടുനിൽക്കും. വെള്ളിയാഴ്ച രാവിലെ 10 ന്, പാറക്കടവ് സഹകരണ ബാങ്ക് ഹാളിൽ കാർഷിക ഫെസ്റ്റ് ആലുവ സർക്കിൾ സഹകരണ യൂണിയൻ ചെയർമാൻ കെ.എ. ചാക്കോച്ചൻ ഉദ്ഘാടനം ചെയ്യും. ബാങ്ക് പ്രസിഡന്‍റ് വി.എൻ. അജയകുമാർ അധ്യക്ഷനാകും. ജില്ലാ കൃഷി ഓഫീസർ ഷെർലി സക്കറിയാസ് മുഖ്യാതിഥിയാകും. ഫെസ്റ്റിനോടനുബന്ധിച്ച് യുവാക്കളിലും, കുട്ടികളിലും വളർന്നു വരുന്ന ലഹരി ഉപയോഗത്തിന് എതിരേ " ജീവിത ലഹരി കൃഷിയിലൂടെ' എന്ന കാമ്പയിന് തുടക്കം കുറിക്കും.

ശ്രേഷ്ഠ കാതോലിക്കയ്ക്ക് ആശംസകൾ നേർന്ന് അതിരൂപത പ്രതിനിധികൾ

കൊച്ചി: യാക്കോബായ സഭ ശ്രേഷ്ഠ കാതോലിക്ക ബസേലിയോസ് ജോസഫ് ബാവായെ എറണാകുളം -അങ്കമാലി അതിരൂപത പ്രതിനിധികൾ തിരുവാങ്കുളം കൃംതാ സെമിനാരിയിൽ സന്ദർശിച്ച് ആശംസകൾ നേർന്നു. അതിരൂപത വികാരി ജനറാൾ ഫാ. ജേക്കബ് ജി. പാലയ്ക്കാപ്പിള്ളി ബാവയെ പൊന്നാടയണിയിച്ചു. അതിരൂപത ഫിനാൻസ് ഓഫീസർ ഫാ. സൈമൺ പള്ളുപ്പേട്ട, തൃപ്പൂണിത്തുറ ഫൊറോന പള്ളി അഡ്മിനിസ്ട്രേറ്റർ ഫാ. കുര്യൻ ഭരണികുളങ്ങര, മാതാനാഗർ പള്ളി അഡ്മിനിസ്ട്രേറ്റർ ഫാ. ജോർജ് മൂഞ്ഞേലി എന്നിവരും ഒപ്പമുണ്ടായിരുന്നു.

തൃക്കാക്കരയിൽ ഓപ്പൺ ജിം തുറന്നു

ചികിത്സയിൽ കഴിഞ്ഞിരുന്ന ഉമാ തോമസ് എംഎൽഎയുടെ ആദ്യ പൊതുപരിപാടി കാക്കനാട് : തൃക്കാക്കര നഗരസഭയുടെ ഉടമസ്ഥതയിട്ടുള്ള കാക്കനാട്ടെ കുട്ടികളുടെ പാർക്കിനു സമീപം ആരോഗ്യത്തിനും ആനന്ദത്തിനുമായി ഓപ്പൺജിം പ്രവർത്തനം ആരംഭിച്ചു. ഇന്നലെ തൃക്കാക്കര എംഎൽഎ ഉമാതോമസ് ഓപ്പൺജിം പാർക്ക് പൊതുജനത്തിനായി തുറന്നു കൊടുത്തു. കെട്ടിലും മട്ടിലും ചാരുതയാർന്ന ഓപ്പൺ ജിം നിർമാണത്തിന് എംഎൽഎയുടെ ആസ്ഥി വികസന ഫണ്ടിൽ നിന്നും 37 ലക്ഷം രൂപ അനുവദിച്ചിരുന്നു. ഗാന്ധിസ്മാരകത്തിനോട് ചേർന്നാണ് പുതിയ ജിം സ്ഥാപിച്ചിട്ടുള്ളത്. കലൂർ ജവഹർലാൽ നെഹ്രു സ്റ്റേഡിയത്തിൽ വേദിയിൽ നിന്നും വീണു പരിക്കേറ്റു ചികിൽസയിൽ കഴിഞ്ഞിരുന്ന ഉമാ തോമസ് എംഎൽഎ പങ്കെടുഞ്ഞ ആദ്യ പൊതുപരിപാടിയാണ് ഇതെന്ന പ്രത്യേകതയും ഉണ്ട്. നഗരസഭാധ്യക്ഷ രാധാമണി പിള്ള, വൈസ് ചെയർമാൻ അബ്ദു ഷാന, സ്ഥിരം സമിതി അധ്യക്ഷരായ സ്മിതാ സണ്ണി, നൗഷാദ് പല്ലച്ചി, വർഗീസ് പ്ലാശേരി, വാർഡു കൗൺസിലർ വി.ഡി. സുരേഷ് തുടങ്ങി ഒട്ടേറെ പേർ പങ്കെടുത്തു.

മുസിരിസ് ടൂറിസം ഫെസ്റ്റ് നാളെ മുതൽ

പറവൂർ: പറവൂർ ബ്ലോക്ക് പഞ്ചായത്തും വടക്കേക്കര പഞ്ചായത്ത് സാമൂഹ്യ ക്ഷേമ സഹകരണ സംഘവും ചേർന്ന് നടത്തുന്ന മുസിരിസ് ടൂറിസം ഫെസ്‌റ്റ് - 2025 വെള്ളിയാഴ്ച മുത്തകുന്നം പാലത്തിന് സമീപം തുടങ്ങുമെന്ന് ഭാരവാഹികൾ വാർത്താ സമ്മേളനത്തിൽ പറഞ്ഞു. പകൽ ഒമ്പതിന് ഫെസ്‌റ്റ് രക്ഷാധികാരി എ.എസ്. അനിൽകുമാർ പതാക ഉയർത്തും. 9.30നു കൊട്ടുവള്ളിക്കാട് എച്ച്എംവൈഎസ് എച്ച്എസ്എസ് ഗ്രൗണ്ടിൽ കേരള സ്‌റ്റേറ്റ് ബോൾ ബാഡ്‌മിന്‍റൻ ചാന്പ്യൻഷിപ് വടക്കേക്കര പഞ്ചായത്ത് പ്രസിഡന്‍റ് രശ്‌മി അനിൽകുമാർ ഉദ്ഘാടനം ചെയ്യും. ബ്ലോക്ക് പഞ്ചായത്ത് ക്ഷേമകാര്യ സ്ഥിരംസമിതി അധ്യക്ഷൻ സുരേഷ് ബാബു അധ്യക്ഷനാകും. 14നു വൈകിട്ട് അഞ്ചിന് സമാപനസമ്മേളനം വി.ആർ. സുനിൽകുമാർ എംഎൽഎ ഉദ്ഘാടനം ചെയ്യും. ബ്ലോക്ക് പഞ്ചായത്ത് പ്രസിഡന്‍റ് കമല സദാനന്ദൻ അധ്യക്ഷയാകും.

മൂക്കന്നൂരിൽ ഖാദി ഫെസ്റ്റ്

അങ്കമാലി: മൂക്കന്നൂർ ഗ്രാമ പഞ്ചായത്തും മൂക്കന്നൂർ ഖാദി വ്യവസായ കേന്ദ്രവും സംയുക്തമായി നടത്തുന്ന മൂന്ന് ദിവസത്തെ ഖാദി വിപണന മേള ഖാദി ഫെസ്റ്റ് മൂക്കന്നൂർ ഗ്രാമപഞ്ചായത്ത് അങ്കണത്തിൽ തുടങ്ങി. ജില്ലാ പഞ്ചായത്ത് മെമ്പർ ഷൈനി ജോർജ് ഉദ്ഘാടനം നിർവഹിച്ചു. ഗ്രാമ പഞ്ചായത്ത് പ്രസിഡന്‍റ് കെ.വി. ബിബീഷ് അധ്യക്ഷത വഹിച്ചു. ഗ്രാമ പഞ്ചായത്ത് വൈസ് പ്രസിഡന്‍റ് ഗ്രേസി ചാക്കോ, സ്ഥിരം സമിതി അധ്യക്ഷരായ സിനി മാത്തച്ചൻ , ജസ്റ്റി ദേവസി, ബ്ലോക്ക് പഞ്ചായത്ത് മെമ്പർ ലാലി ആന്‍റു തുടങ്ങിയവർ സംസാരിച്ചു. ഖാദി തുണിത്തരങ്ങൾക്ക് 30 ശതമാനം റിബേറ്റ് ഉണ്ടായിരിക്കുന്നതാണ്. മറ്റ് ഖാദി ഉൽപ്പന്നങ്ങളും ലഭ്യമാണ് .

പെരുമ്പടപ്പിൽ ശുദ്ധജല പൈപ്പിലൂടെ മലിനജലം

പള്ളുരുത്തി: കുടിവെള്ള പൈപ്പിലൂടെ ദുർഗന്ധമുള്ള വെള്ളം മൂലം ദുരിതത്തിലായി പെരുമ്പടപ്പ് പ്രദേശവാസികൾ. പെരുമ്പടപ്പ് ശ്രീനാരായണ റോഡിന് തെക്കോട്ട് ശംഖുതറ ലൈൻ, കുപ്പക്കാട്ട് ലൈൻ തുടങ്ങിയ പ്രദേശങ്ങളിലാണ് പൈപ്പിലൂടെ മലിനജലം എത്തുന്നത്. കഴിഞ്ഞ ഒരു മാസത്തിലധികമായി നല്ല വെള്ളമില്ലാതെ മലിനജലം മാത്രമായി പൈപ്പിലൂടെ എത്തുന്നതിനാൽ വലയുകയാണ് നാട്ടുകാർ. കുമ്പളങ്ങി കായലിനോട് ചേർന്നുള്ള പെരുമ്പടപ്പിന്‍റെ തെക്കൻ മേഖലയിലാണ് ഈ ദുരവസ്ഥ. ജല അഥോറിറ്റിയിൽ നാട്ടുകാർ നിരന്തരം പരാതികൾ നൽകിയെങ്കിലും പരിഹാരമുണ്ടാകുന്നില്ലെന്ന് പ്രദേശവാസികൾ പറഞ്ഞു. പണം കൊടുത്ത് വെള്ളം വാങ്ങി ഉപയോഗിക്കേണ്ട അവസ്ഥയിലാണ് നാട്ടുകാർ. കൊച്ചി കോർപറേഷന്‍റെ കാനകളിലൂടെയും തോടുകളിലൂടെയുമാണ് കുടിവെള്ള പൈപ്പുകൾ കടന്നു പോകുന്നത്. കാലപ്പഴക്കത്താൽ പൈപ്പുകൾ തകർന്നതാണ് മലിനജലം കുടിവെള്ള പൈപ്പുകളിലേക്ക് കയറാൻ കാരണമെന്ന് പ്രദേശവാസികൾ പറഞ്ഞു.

ആശാ വര്‍ക്കര്‍മാരുടെ ഓണറേറിയം വര്‍ധിപ്പിക്കല്‍: പ്രതിപക്ഷ ആവശ്യം കൗണ്‍സില്‍ തള്ളി

കൊച്ചി: കൊച്ചി കോര്‍പറേഷന്‍റെ പരിധിയില്‍ പ്രവര്‍ത്തിക്കുന്ന ആശാ വര്‍ക്കര്‍മാരുടെ ഓണറേറിയം വര്‍ധിപ്പിക്കണമെന്ന പ്രതിപക്ഷത്തിന്‍റെ ആവശ്യം ഇന്നലെ ചേര്‍ന്ന കൗണ്‍സില്‍ യോഗം തള്ളി. അഡ്വ. മിനിമോളാണ് പ്രമേയം അവതരിപ്പിച്ചത്. കോര്‍പറേഷനിലെ 74 ഡിവിഷനുകളിലും 300 ആശാപ്രവര്‍ത്തകര്‍ ജോലി ചെയ്യുന്നുണ്ടെന്നും തൊഴിലുറപ്പ് തൊഴിലാളികള്‍ക്ക് കിട്ടുന്ന പ്രതിഫലം പോലും ഇവര്‍ക്ക് കിട്ടുന്നില്ലെന്നും മൂവായിരം രൂപകൂടി നല്‍കി ഇവരുടെ ഓണറേറിയം പതിനായിരം രൂപയായി ഉയര്‍ത്തണമെന്നുമായിരുന്നു പ്രമേയത്തിലൂടെ ആവശ്യപ്പെട്ടത്. കലാകാരമാര്‍ക്ക് ഫെലോഷിപ്പ് നല്‍കുന്നതുപോലെ പ്ലാന്‍ ഫണ്ടില്‍ നിന്നോ കോര്‍പറേഷന്‍റെ തനത് ഫണ്ടില്‍ നിന്നോ തുക അനുവദിച്ച് ഓണറേറിയം വര്‍ധിപ്പിക്കണമെന്നും ആവശ്യപ്പെട്ടു. എന്നാല്‍ ഭരണ പ്രതിപക്ഷ വാഗ്വാദങ്ങള്‍ക്ക് ശേഷം വോട്ടെടുപ്പ് അനുവദിക്കാതെ മേയര്‍ പ്രമേയം തള്ളുകയായിരുന്നു. പ്രമേയം രാഷ്ട്രീയപ്രേരിതമാണെന്ന് വിദ്യാഭ്യാസ സ്റ്റാന്‍ഡിംഗ് കമ്മിറ്റി ചെയര്‍മാന്‍ ശ്രീജിത്ത് വാദിച്ചു. ഇപ്പോള്‍ നടക്കുന്ന സമരം എസ്‌യുസിഐ യുടെ നേതൃത്വത്തിലാണെന്നും അദ്ദേഹം പറഞ്ഞു. എല്‍ഡിഎഫ് മാനിഫെസ്‌റ്റോയില്‍ പ്രതിദിനം 700 രൂപ ആശ വര്‍ക്കര്‍മാര്‍ക്ക് നല്‍കുമെന്ന് വാഗ്ദാനം ചെയ്തിരുന്നെന്ന് പ്രതിപക്ഷ കൗണ്‍സിലര്‍മാര്‍ ചൂണ്ടിക്കാട്ടി. കേന്ദ്രസര്‍ക്കാരില്‍ നിന്ന് ലഭിക്കുന്ന 60 ശതമാനം ഇന്‍സെന്‍റീവ് തുക മുടങ്ങിയതിനെപ്പറ്റിയും വാഗ്വാദം ഉണ്ടായി. പ്രമേയത്തെ ബിജെപി അംഗങ്ങളായ പ്രിയ പ്രശാന്തും പത്മജ എസ്. മേനോനും അനുകൂലിച്ചതും വാദപ്രതിവാദങ്ങള്‍ക്ക് ഇടയാക്കി. പ്രതിപക്ഷാംഗം രതീഷിന്‍റെ പ്രസംഗം നീണ്ടു പോയപ്പോള്‍ പത്മജ അടുത്തെത്തി തടസപ്പെടുത്തിയതും ബഹളത്തിന് കാരണമായി.

എം.സി. ജോസഫൈന്‍ അനുസ്മരണം ഇന്ന്

അങ്കമാലി: സിപിഎം കേന്ദ്ര കമ്മിറ്റി അംഗവും കേരള വനിതാ കമ്മീഷൻ ചെയർപേഴ്സണും ജിസിഡിഎ ചെയർപേഴ്സണുമായിരുന്ന എം.സി. ജോസഫൈന്‍റെ മൂന്നാമത് വാർഷിക അനുസ്മരണം ഇന്ന് നടക്കും. രാവിലെ അങ്കമാലി എരിയായിലെ എല്ലാ സിപിഎം ബ്രാഞ്ചുകളിലും പാർട്ടി ഓഫീസുകളിലും പതാക ഉയർത്തും. വൈകിട്ട് അങ്കമാലി ടൗണിൽ റെഡ് വോളണ്ടിയർ മാർച്ചും, തുടർന്ന് സിഎസ്എ ഓഡിറ്റോറിയത്തിൽ അനുസ്മരണ യോഗവും നടക്കും. അനുസ്‌മരണ സമ്മേളനം പാർട്ടി സംസ്ഥാന സെക്രട്ടറിയേറ്റംഗം സി.എൻ. മോഹനൻ ഉദ്ഘാടനം ചെയ്യും.

റോഡിൽ മാലിന്യം നിക്ഷേപിച്ചയാളിൽ നിന്നും പിഴയീടാക്കി

ഉദയംപേരൂർ: റോഡിൽ മാലിന്യം തള്ളിയ ആളിൽ നിന്നും പിഴയീടാക്കി. ഉദയംപേരൂർ ഗ്രാമപഞ്ചായത്തിലെ നടക്കാവ് -മുളന്തുരുത്തി റോഡിലാണ് കഴിഞ്ഞ ദിവസം മാലിന്യ നിക്ഷേപം കണ്ടത്. ഹെൽത്ത് ഇൻസ്പെക്ടർ കെ.എ. ജിസ്മിയുടെ നേതൃത്വത്തിൽ മാലിന്യമടങ്ങിയ കവറുകൾ പരിശോധിച്ചതിൽ നിന്നും തമ്മനത്ത് നിന്നുള്ള വ്യക്തിയുടെ മേൽവിലാസം ലഭിച്ചതിനെ തുടർന്ന് ഫൈൻ ഈടാക്കി നോട്ടീസ് നൽകുകയായിരുന്നു. തുടർന്ന് തമ്മനം സ്വദേശി പഞ്ചായത്തിലെത്തി 7,000 രൂപ പിഴയടച്ചു. പഞ്ചായത്ത് തല വിജിലൻസ് സ്ക്വാഡ് നിരന്തരമായ പരിശോധനകൾ നടത്തുന്നുണ്ടെന്നും ഇത്തരത്തിലുള്ള പ്രവർത്തികൾ ചെയ്യുന്നവരെ കണ്ടെത്തി കർശനമായ നിയമ നടപടികൾ സ്വീകരിക്കുമെന്നും പ്രസിഡന്‍റ് സജിത മുരളി അറിയിച്ചു.

ചത്ത പൂച്ചയെ എടുക്കാൻ കിണറ്റിലിറങ്ങി കുടുങ്ങിയ വീട്ടുടമയെ രക്ഷപ്പെടുത്തി

ആലുവയിലെ കൈയേറ്റങ്ങൾ ഒഴിപ്പിക്കൽ വിഫലം : ലോട്ടറി സ്റ്റാൾ ഉടമകൾ വീണ്ടും മെട്രോ നടപ്പാത കൈയേറി

ആലുവ: ദേശീയപാതാ ഫ്ലൈ ഓവറിന് താഴെ സർവീസ് റോഡിലും മെട്രോ നടപ്പാതയിലും അനധികൃത കൈയേറ്റങ്ങൾ ഒഴിപ്പിക്കുന്നതിന് പിന്നാലെ വീണ്ടും കൈയേറ്റം. കെഎംആർഎൽ വീണ്ടെടുത്ത സ്‌ഥലത്ത് നിന്ന് ഒഴിവാക്കിയ എട്ടോളം ലോട്ടറി സ്റ്റാളുകളാണ് തൊട്ടടുത്ത് തന്നെ മെട്രോ നടപ്പാത കൈയേറി പുന:സ്ഥാപിച്ചത്. ഒരാഴ്ച്ച മുമ്പ് ആലുവ സ്വകാര്യ ബസ് സ്റ്റാൻഡിന് സമീപം മെട്രോ പില്ലർ 21 ന് അടുത്ത് സ്ഥലം കൈയേറി സ്ഥാപിച്ച സ്റ്റാളുകൾ മാറ്റാൻ ആലുവ നഗരസഭ പൊതുമരാമത്ത് വിഭാഗം ശ്രമിച്ച് പരാജയപ്പെട്ടിരുന്നു. സിഐടിയു കൊടികൾ കുത്തിയാണ് ഒഴിപ്പിക്കൽ ശ്രമം തടഞ്ഞത്. എന്നാൽ കഴിഞ്ഞ രാത്രി കൊച്ചി മെട്രോയുടെ നേതൃത്വത്തിൽ സ്ഥലം ബാരിക്കേഡ് കെട്ടി തിരിച്ചു. എടുത്തു മാറ്റിയ ലോട്ടറി സ്റ്റാളുകൾ തൊട്ടടുത്ത പില്ലറിന് സമീപത്തേക്ക് മാറ്റി സ്ഥാപിക്കുകയാണ് ചെയ്തത്. നടപ്പാതയുടെ പകുതിയോളം കൈയേറിയാണ് തട്ടുകൾ വച്ചിരിക്കുന്നത്. കഴിഞ്ഞ ഒരു മാസമായി ആലുവ നഗരസഭ, ദേശീയപാതാ അഥോറിറ്റി, കൊച്ചി മെട്രോ എന്നിവർ സംയുക്തമായും അല്ലാതെയും അപകട സാധ്യത ഉള്ള സ്ഥലങ്ങളിൽ നിന്ന് ഒഴിപ്പിക്കൽ നടത്തിയിട്ടും അനധികൃത കടകൾ തിരിച്ചു വരുന്നതായാണ് പരാതി. രാഷ്ട്രീയ പാർട്ടികളുടെ രഹസ്യ പിന്തുണയെന്ന് ആരോപണമുണ്ട്. ദേശീയപാത സർവീസ് റോഡ് കൈയേറിയ കടകൾ ഒഴിപ്പിച്ചെങ്കിലും വീണ്ടും ഇവിടെ കൈയേറ്റം തിരിച്ചു വന്നു തുടങ്ങി. പഴവർഗങ്ങൾ വിൽക്കുന്ന കടയാണ് തിരിച്ചു വന്നിരിക്കുന്നത്. ഈ മേഖലയിൽ ഏഴോളം കടകളാണ് കഴിഞ്ഞ മാസം ആലുവ നഗരസഭയുടെ നേതൃത്വത്തിൽ ഒഴിപ്പിച്ചത്. അസഭ്യം പറയുകയും വധഭീഷണി മുഴക്കുകയും ചെയ്തവരെ നഗരസഭയുടെ പരാതിയെ തുടർന്ന് പോലീസ് അറസ്റ്റും ചെയ്തു. അതേ സമയം ദേശീയപാത മേൽപ്പാലത്തിനടിയിൽ നിന്ന് ഒഴിപ്പിച്ച കടകൾ ഇതുവരെയും തിരിച്ചു വന്നിട്ടില്ല. നഗരസഭയുടെ പേ ആൻഡ് പാർക്ക് കരാർ അവസാനിച്ചതോടെ ഇരുചക്രവാഹനങ്ങൾ, ഓട്ടോറിക്ഷകൾ സ്ഥലം കൈയടക്കിയിരിക്കുകയാണ്.

അനധികൃത മണ്ണെടുപ്പിനായി എത്തിയ ടിപ്പർ സ്കൂട്ടർ യാത്രക്കാരന്‍റെ ജീവനെടുത്തു

കിഴക്കന്പലം: അനധികൃത മണ്ണെടു പ്പിനായി എത്തിയ ടിപ്പർ സ്കൂട്ടർ യാത്രക്കാരന്‍റെ ജീവനെടുത്തു. വിലങ്ങ് അന്പലപ്പടിക്ക് സമീപം ഇന്നലെ ഉച്ചയ്ക്ക് 12.15 ഓടെയായിരുന്നു അപകടം. വിലങ്ങ് തച്ചൻകോട്ട്പുത്തൻപുര ടി.പി. ദിവാകരൻ (56) ആണ് മരിച്ചത്. തൈക്കാവിന് സമീപം നടക്കുന്ന അനധികൃത മണ്ണെടുപ്പ് സ്ഥലത്തുനിന്നും കിഴക്കന്പലം ഭാഗത്തേക്ക് പോയ ടിപ്പർ ഡ്രൈവർക്ക് വഴി തെറ്റിയതോടെ ടിപ്പർ തിരിക്കാൻ അശ്രദ്ധമായി പിന്നോട്ടെടുത്തതാണ് അപകടത്തിന് ഇടയാക്കിയത്. ടിപ്പറിന് തൊട്ടുപിന്നിൽ ദിവാകരൻ ഓടിച്ച സ്കൂട്ടറായിരുന്നു. ലോറിയുടെ പിൻചക്രങ്ങളിൽ കുടുങ്ങിയ ദിവാകരൻ തൽക്ഷണം മരിച്ചു. മരപ്പണിക്കാരനായ ദിവാകരൻ പഞ്ചായത്ത് ഓഫീസിൽ പോയി തിരിച്ചുവരും വഴിയാണ് അപകടമുണ്ടായത്. എസി കാബിനുള്ള ലോറിയിൽ ഇരുന്ന ഡ്രൈവർ അപകടം അറിയാതെ ലോറി തിരിച്ച് മുന്നോട്ട് പോകാൻ ശ്രമിച്ചത് നാട്ടുകാർ തടയുകയായിരുന്നു. അപകട സ്ഥലത്തുനിന്നും മൃതദേഹം ആലുവ രാജഗിരി ആശുപത്രിയിലേയ്ക്ക് മാറ്റി. ഭാര്യ: മിനി. മക്കൾ: ദേവിക, ദർശന. മരുമകൻ: നിഥിൻ.

ബൈബിൾ കൺവൻഷൻ വേദിയിൽ ലഹരിക്കെതിരായി ക്ലാസ് എടുത്ത് പോലീസ് ഇൻസ്പെക്‌ടർ

പളളിക്കര: പോലീസുകാർക്ക് എന്താ ബൈബിൾ കൺവൻഷൻ പന്തലിൽ കാര്യം...! യൂണിഫോം അണിഞ്ഞെത്തിയ മൂവാറ്റുപുഴ സബ് ഇൻസ്പെക്‌ടർ സിബി അച്യുതനെ കണ്ട് പലരും അമ്പരന്നു. വർധിച്ചു വരുന്ന ലഹരിയുടെ ദൂഷ്യ വശങ്ങളെ കുറിച്ച് അവബോധം വളർത്താൻ കൺവൻഷൻ സംഘാടകരുടെ ക്ഷണപ്രകാരമാണ് സബ് ഇൻസ്പെക്‌ടർ എത്തിയത്. എറണാകുളം പള്ളിക്കര സെന്‍റ് മേരീസ് കത്തീഡ്രൽ പള്ളി സംഘടിപ്പിച്ച കാൽവരി കൺവൻഷന്‍റെ സമാപന ദിവസത്തിലാണ് സിബി അച്യുതൻ ലഹരിക്കെതിരേ ക്ലാസ് നയിച്ചത്. വർധിച്ച് വരുന്ന ലഹരി ആസ്കതിയും അതിക്രമങ്ങളും കണക്കിലെടുത്താണ് സംഘാടകർ വേറിട്ട മാർഗം സ്വീകരിച്ചത്. ലഹരിക്കെതിരായ പോരാട്ടത്തിന് കരുത്ത് പകരുന്നതാണ് സംഘാടകരുടെ തീരുമാനമെന്ന് സിബി അച്യുതൻ അഭിപ്രായപ്പെട്ടു. കൺവൻഷന്‍റെ മൂന്നാം ദിവസം ഫാ. ജിനോ ജോസ് കരിപ്പക്കാടന്‍റെ സുവിശേഷ പ്രസംഗത്തിന് ശേഷമായിരുന്നു ലഹരിക്കെതിരായ ക്ലാസ്. തുടർന്ന് നിയമ വിരുദ്ധ ലഹരി പദാര്‍ഥങ്ങളുടെ ഉപയോഗത്തിനെതിരേ ഒറ്റക്കെട്ടായി പ്രതിജ്ഞയെടുത്തു. പ്രളയവും കോവിഡും ഒരുമിച്ചുനിന്നു നേരിട്ട കേരളത്തിന്, ലഹരിയുടെ കെട്ട കാലവും അതിജീവിക്കാൻ കഴിയുമെന്ന് കത്തീഡ്രൽ വികാരി ഫാ. ബാബു വർഗീസ് പറഞ്ഞു. വൈരുദ്ധ്യങ്ങള്‍ നിറഞ്ഞ ഈ സമൂഹത്തില്‍ ജീവിക്കുമ്പോള്‍ കെണികളില്‍ അകപ്പെടാതെ സ്വന്തം ജീവിതത്തെ വെളിച്ചത്തിലേക്ക് നയിക്കണമെന്നും അദ്ദേഹം ഓർമിപ്പിച്ചു.

ലഹരിക്കെതിരെ വിപുല പ്രചാരണ പരിപാടികള്‍

കൊച്ചി: ലഹരിയുടെ ഉപയോഗവും അതുമൂലമുള്ള അക്രമങ്ങളും വര്‍ധിച്ചുവരുന്ന സാഹചര്യത്തില്‍ ജില്ലയില്‍ വിപുലമായ പ്രചാരണ പരിപാടികള്‍ സംഘടിപ്പിക്കാന്‍ ജില്ലാതല അവലോകന യോഗത്തിൽ തീരുമാനമായി. ജില്ലാ സ്‌പോര്‍ട്‌സ് കൗണ്‍സിലിന്‍റെ നേതൃത്വത്തില്‍ "സ്‌പോര്‍ട്‌സ് ആണ് ലഹരി' എന്ന ആശയം മുന്‍നിര്‍ത്തിയാണ് പരിപാടികള്‍ സംഘടിപ്പിക്കുന്നത്. കളക്ടറേറ്റ് കോണ്‍ഫറന്‍സ് ഹാളില്‍ ചേര്‍ന്ന യോഗം പി.വി. ശ്രീനിജിന്‍ എംഎല്‍എ ഉദ്ഘാടനം ചെയ്തു. ജില്ലയില്‍ ഇറിഗേഷന്‍, വാട്ടര്‍ അഥോറിറ്റി തുടങ്ങി വിവിധ വകുപ്പുകളുടെ ഭൂമികള്‍ കാടുപിടിച്ച് കിടക്കുന്നുണ്ട്. ഇവ വൃത്തിയാക്കി കുട്ടികള്‍ക്ക് കളിക്കളമായി നല്‍കണമെന്ന് യോഗത്തില്‍ ജില്ലാ പഞ്ചായത്ത് പ്രസിഡന്‍റ് മനോജ് മൂത്തേടന്‍ പറഞ്ഞു. എന്‍ഫോഴ്‌സ്‌മെന്‍റ് ടീമിനെ ശക്തിപ്പെടുത്തുന്നതിനുള്ള നടപടികള്‍ സ്വീകരിക്കുമെന്ന് യോഗത്തില്‍ ജില്ലാ കളക്ടര്‍ എന്‍.എസ്.കെ. ഉമേഷ് പറഞ്ഞു. പഞ്ചായത്ത്, മുനിസിപ്പാലിറ്റി, കോര്‍പറേഷന്‍ തലത്തില്‍ കോര്‍ കമ്മിറ്റികള്‍ രൂപീകരിച്ച് വൈവിധ്യമാര്‍ന്ന പരിപാടികള്‍ സംഘടിപ്പിക്കാനും തീരുമാനമായി. ലഹരി ഉപയോഗത്തിനെതിരെ മാരത്തണ്‍, കുടുംബശ്രീ പ്രവര്‍ത്തനങ്ങള്‍ ശക്തമാക്കുക, കായികവുമായി ബന്ധപ്പെവരെ ഉള്‍പ്പെടുത്തി പ്രചാരണ പരിപാടികള്‍ സംഘടിപ്പിക്കുക തുടങ്ങിയ വിഷയങ്ങളും യോഗം ചര്‍ച്ച ചെയ്തു. ജില്ലയില്‍ 102 സിഡിഎസുകളും 25303 അയല്‍ക്കൂട്ടങ്ങളാണ് മികച്ച രീതിയില്‍ പ്രവര്‍ത്തിക്കുന്നത്. കുടുംബശ്രീ തലത്തില്‍ താഴെത്തട്ടില്‍ വരെ മാസ് കാമ്പയിനുകളും ബോധവത്കരണ പരിപാടികളും സംഘടിപ്പിക്കും. കുട്ടികളുടെ ബാലസഭകള്‍ വഴിയും ലഹരി ഉപയോഗത്തിന്‍റെ ദൂഷ്യവശങ്ങള്‍ പ്രചരിപ്പിക്കും. "ലഹരിക്കെതിരെ ഒരു ഗോള്‍' എന്ന പേരില്‍ വിവിധ ഭാഗങ്ങളില്‍ പരിപാടികള്‍ സംഘടിപ്പിക്കും. ശാരീരിക വൈകല്യമുള്ള കുട്ടികളെ പങ്കെടുപ്പിച്ച് വീല്‍ ചെയര്‍ ബാസ്‌കറ്റ് ബോള്‍, സൈക്കിളിംഗ് അസോസിയേഷന്‍റെ നേതൃത്വത്തില്‍ രാത്രിയില്‍ സൈക്കിള്‍ ഡ്രൈവുകള്‍, റോളര്‍ സ്‌കേറ്റിംഗ്, കരാട്ടെ, വടംവലി പഞ്ചഗുസ്തി, സെപാക്‌തക്രോ തുടങ്ങി വിവിധ കായിക ഇനങ്ങള്‍ ലഹരിക്കെതിരായ പോരാട്ടത്തില്‍ അണിനിരത്തി വിപുലമായ കാമ്പയിനുകള്‍ സംഘടിപ്പിക്കും.

തടവുപുള്ളികളുടെ ആക്രമണം; അസി. പ്രിസൺ ഓഫീസറുടെ കൈ ഒടിഞ്ഞു

കാക്കനാട്: ചിറ്റേത്തുകര ജില്ലാ ജയിലിൽ സഹോദരങ്ങളായ പ്രതികൾ ചേർന്ന് അസിസ്റ്റന്‍റ് പ്രിസൺ ഓഫീസറെ ആക്രമിച്ചു. 2025 ഫെബ്രുവരിയിൽ അമ്പലമേട് പോലീസ് രജിസ്റ്റർ ചെയ്ത മോഷണ കേസിൽ പ്രതികളായ അഖിൽ ഗണേഷ്, അജിത് ഗണേഷ് എന്നിവർ ചേർന്നാണ് പ്രിസൺ ഓഫീസർ അഖിൽ മോഹനനെ ആക്രമിച്ച് പരിക്കേൽപ്പിച്ചതെന്ന് പോലീസ് പറഞ്ഞു. ജില്ലാ ജയിലിൽ മറ്റൊരു കേസിൽ പ്രതിയായി ഇവർക്കൊപ്പം റിമാൻഡിൽ കഴിയുന്ന ഷംനാദ് എന്ന തടവുകാരനെ ഇരുവരും ചേർന്ന് ഇന്നലെ മർദിച്ചതാണ് സംഭവങ്ങളുടെ തുടക്കം. സെല്ലിനുള്ളിൽ നിന്നും അഖിലിനെയും അജിത്തിനെയും പുറത്തിറക്കാനായി എത്തിയ അസിസ്റ്റന്‍റ് പ്രിസൺ ഓഫീസറെ ഇവർ ആക്രമിച്ച് തള്ളിത്താഴെയിടുകയായിരുന്നു. കഴിഞ്ഞ ഫെബ്രുവരിയിൽ മോഷണക്കേസിൽ അറസ്റ്റിലായി അമ്പലമേട് പോലീസ് കസ്റ്റഡിയിലിരിക്കെ ഇരുവരും ചേർന്ന് പോലീസ് സ്റ്റേഷനിൽ നാശനഷ്ടം വരുത്തുകയും പോലീസുകാരെ ആക്രമിക്കുകയും ചെയ്തിരുന്നു. ജയിൽ അധികൃതർ നൽകിയ പരാതിയിൽ ഇൻഫോപാർക്ക് പോലീസ് കേസെടുത്തു.

സ്‌കൂട്ടറിനും ബൈക്കിനും ഒരേ രജിസ്ട്രേഷൻ നമ്പർ

വാഴക്കുളം: ഒരേ രജിസ്ട്രേഷൻ നന്പറിലുള്ള സ്‌കൂട്ടറും ബൈക്കും കണ്ടെത്തി. കെഎല്‍ 17 ജെ 6574 രജിസ്‌ട്രേഷന്‍ നമ്പരിലുള്ള സ്‌കൂട്ടറും അതേ നമ്പരിലുള്ള ബൈക്കുമാണ് പരിവാഹന്‍ സൈറ്റില്‍ നടത്തിയ പിഴ പരിശോധനയില്‍ കണ്ടെത്തിയത്. മൂവാറ്റുപുഴ ആവോലി പോത്തനാമുഴിയില്‍ മേരി ജോണ്‍സണ്‍ എന്ന സ്‌കൂട്ടര്‍ ഉടമ കഴിഞ്ഞ ദിവസം മോട്ടോര്‍ വാഹന വകുപ്പിന്‍റെ പരിവാഹന്‍ സൈറ്റില്‍ കയറി ട്രാഫിക് ലംഘന പിഴയുണ്ടോയെന്ന് നോക്കിയപ്പോഴാണ് അതേ നമ്പരിലുള്ള ബൈക്കും ഉള്ളതായി അറിയാനിടയായത്. കഴിഞ്ഞ ഫെബ്രുവരി 18ന് രാവിലെ 7.26ന് ഹെല്‍മെറ്റ് ധരിക്കാതെ കീഴില്ലത്ത് ഇതേ നമ്പറിലുള്ള ബൈക്കില്‍ ഒരു പുരുഷന്‍ സഞ്ചരിക്കുന്ന ട്രാഫിക് നിയമ ലംഘനത്തിന്‍റെ ചിത്രവും ഇതോടൊപ്പമുണ്ട്. കീഴില്ലം ഭാഗത്തു കൂടി സ്‌കൂട്ടറില്‍ പോയിട്ടില്ലെന്നാണ് മേരി ജോണ്‍സണ്‍ പറയുന്നത്. തന്‍റെ വാഹനത്തിന്‍റെ നമ്പര്‍ വ്യാജമായി നിര്‍മിച്ച് ബൈക്കില്‍ ഉപയോഗിച്ചിരിക്കുകയാണെന്നും ഇതുസംബന്ധിച്ച് അധികൃതര്‍ അന്വേഷണം നടത്തണമെന്നും അവർ ആവശ്യപ്പെട്ടു. പിഴയടയ്ക്കാനുള്ള ചെലാനില്‍ പരാമര്‍ശിച്ചിട്ടുള്ള പരാതി അറിയിക്കാനുള്ള സൈറ്റില്‍ ഇക്കാര്യങ്ങള്‍ വിശദമാക്കി പരാതി സമര്‍പ്പിച്ചിട്ടുണ്ടെന്നും മേരി ജോണ്‍സണ്‍ പറഞ്ഞു.

മാസപ്പടി കേസ്: മുഖ്യമന്ത്രിയുടെ രാജി ആവശ്യപ്പെട്ട് കേരള കോൺഗ്രസ് മാർച്ച്

കൊച്ചി: മാസപ്പടി കേസിൽ മുഖ്യമന്ത്രി രാജിവയ്ക്കണമെന്നാവശ്യപ്പെട്ട് കേരള കോൺഗ്രസ് എറണാകുളം ജില്ലാ കമ്മിറ്റിയുടെ ആഭിമുഖ്യത്തിൽ കണയന്നൂർ താലൂക്ക് ഓഫീസിലേക്കു മാർച്ച് നടത്തി. തുടർന്നു പ്രവർത്തകർ മുഖ്യമന്ത്രിയുടെ കോലം കത്തിച്ചു. പൊതുജനങ്ങൾക്ക് അപ്രാപ്യമായ എന്തു സേവനമാണ് മുഖ്യമന്ത്രിയുടെ മകളുടെ കമ്പനി കെഎംആർഎലി നു നൽകിയതെന്ന് മാർക്സിസ്റ്റ് നേതാക്കൾ വ്യക്തമാക്കണമെന്ന് മാർച്ച് ഉദ്ഘാടനം ചെയ്ത പാർട്ടി വർക്കിംഗ് ചെയർമാൻ പി.സി. തോമസ് ആവശ്യപ്പെട്ടു. മുഖ്യമന്ത്രിയുടെ മകളുടെ അഴിമതിയെ ന്യായീകരിക്കുന്ന പുതിയ പാർട്ടി സെക്രട്ടറിയുടെ നിലപാട് അപഹാസ്യമാണെന്നും അദ്ദേഹം പറഞ്ഞു. ജില്ലാ പ്രസിഡന്‍റ് ഷിബു തെക്കുംപുറം അധ്യക്ഷത വഹിച്ചു. സംസ്ഥാന കോ-ഓർഡിനേറ്റർ അപു ജോൺ ജോസഫ് മുഖ്യപ്രഭാഷണം നടത്തി. എം.പി. ജോസഫ്, അഹമ്മദ് തോട്ടത്തിൽ, സേവി കുരിശുവീട്ടിൽ, ജോണി അരീക്കാട്ടിൽ, ബേബി വി. മുണ്ടാടാൻ, ജിസൺ ജോർജ്, വിനോദ് തമ്പി, ജോമി തെക്കേക്കര തുടങ്ങിയവർ പ്രസംഗിച്ചു. ജില്ലാ കമ്മിറ്റി ഓഫീസിൽ നിന്നും ആരംഭിച്ച മാർച്ചിന് നേതാക്കളായ ജേക്കബ് കളപ്പറമ്പത്ത്, ഉണ്ണി വടുതല, വിനോദ് തെക്കേക്കര, ബേബി പൊട്ടനാനി, ബേബി ഈരത്തറ തുടങ്ങിയവർ നേതൃത്വം നൽകി.

ന്യൂനപക്ഷ കമ്മീഷന്‍ സിറ്റിംഗ് ഇന്ന്

കൊച്ചി: സംസ്ഥാന ന്യൂനപക്ഷ കമ്മീഷന്‍ സിറ്റിംഗ് ഇന്ന് രാവിലെ 11ന് കളക്ടറേറ്റ് കോണ്‍ഫറന്‍സ് ഹാളില്‍ നടക്കും. സിറ്റിംഗില്‍ ജില്ലയില്‍ നിന്നുള്ള പുതിയ പരാതികള്‍ സ്വീകരിക്കുന്നതാണ്. 9746515133 എന്ന വാട്‌സ്ആപ്പ് നമ്പര്‍ വഴി ഓണ്‍ലൈനായും അപേക്ഷകള്‍ സമര്‍പ്പിക്കാം.

ബസ് യാത്രയ്ക്കിടെ അധ്യാപികയോട് മോശം പെരുമാറ്റം; തമിഴ്‌നാട് സ്വദേശി പിടിയില്‍

കൊച്ചി: ബസ് യാത്രയ്ക്കിടെ അധ്യാപികയോട് മോശമായി പെരുമാറിയ തമിഴ്‌നാട് രാമനാഥപുരം സ്വദേശിയായ 49കാരനെ പാലാരിവട്ടം പോലീസ് കരുതല്‍ അറസ്റ്റ് ചെയ്തു. എറണാകുളത്തെ സ്വകാര്യ സ്‌കൂളിലെ അധ്യാപികയായ തോപ്പുംപടി സ്വദേശിനിയുടെ പരാതിയിലാണ് അറസ്റ്റ്. ഇന്നലെ പുലര്‍ച്ചെ നാലോടെ കോയമ്പത്തൂര്‍-എറണാകുളം ദീര്‍ഘദൂര ബസിലായിരുന്നു സംഭവം. തമിഴ്‌നാട്ടില്‍ നടന്ന പരീക്ഷാ മൂല്യനിര്‍ണയ ക്യാമ്പ് പൂര്‍ത്തിയാക്കി തിരികെ വീട്ടിലേക്ക് വരുന്നതിനിടെയായിരുന്നു അതിക്രമം. ഉറക്കത്തിനിടെ സഹയാത്രികന്‍ മോശമായി പെരുമാറിയതോടെ ഞെട്ടിയുണര്‍ന്ന അധ്യാപിക ബഹളം വച്ചു. ഇതോടെ കണ്ടക്ടറും മറ്റു യാത്രക്കാരും ഇടപെടുകയും ബസ് പാലാരിവട്ടം സ്റ്റേഷനില്‍ എത്തിക്കുകയായിരുന്നു. തുടർന്ന് അധ്യാപികയുടെ മൊഴിയുടെ അടിസ്ഥാനത്തിൽ 49കാരനെ കരുതൽ അറസ്റ്റ് ചെയ്തു. സംഭവത്തില്‍ പോലീസ് അന്വേഷണം ആരംഭിച്ചു.

വാവേലിയിലും പുല്ലുവഴിച്ചാലിലും കാട്ടാനക്കൂട്ടം

കോതമംഗലം: കോട്ടപ്പടി പഞ്ചായത്തിലെ വാവേലി, പുല്ലുവഴിച്ചാൽ ജനവാസമേഖലകളിൽ കുട്ടിയാനകളുൾപ്പെടെയുള്ള കാട്ടാനക്കൂട്ടം ഇറങ്ങിയത് പ്രദേശ വാസികൾക്കിടയിൽ പരിഭ്രാന്തി പരത്തി. തിങ്കളാഴ്ച രാത്രി എത്തിയ എട്ടു കാട്ടാനകൾ ഇന്നലെ രാവിലെയും കൃഷിയിടങ്ങളിൽ തന്നെ തുടരുകയായിരുന്നു. രാവിലെ എട്ടോടെയാണ് കാട്ടാനക്കൂട്ടം ജനവാസ മേഖലയിൽ നിന്ന് പോയത്. മുന്പൊക്കെ നേരം പുലരുംമുന്പേ ആനക്കൂട്ടം പ്ലാന്‍റേഷനിലേക്ക് മടങ്ങുമായിരുന്നു. അതിന് മാറ്റംവരികയാണോയെന്ന ആശങ്കയിലാണ് നാട്ടുകാർ. പുല്ലുവഴിച്ചാൽ ഭാഗത്ത് വിവിധയിടങ്ങളിൽ ആനക്കൂട്ടം കൃ ഷി നശിപ്പിച്ചിട്ടുണ്ട്. അങ്ങാടശേരി സോമന്‍റെ കൃഷിയിടത്തിലെ നിരവധി വാഴകളും പൈനാപ്പിളും ഉൾപ്പെടെയുള്ള കൃഷികളും നശിപ്പിച്ചു.

കേന്ദ്രമന്ത്രി വാട്ടർ മെട്രോയിൽ യാത്ര ചെയ്തു

കൊച്ചി: കൊച്ചിയിലെത്തിയ കേന്ദ്ര ഷിപ്പിംഗ് മന്ത്രി സര്‍ബാനന്ദ സോനോവാള്‍ വാട്ടര്‍ മെട്രോയില്‍ യാത്ര നടത്തി. ഹൈക്കോടതി ജംഗ്ഷന്‍ ടെര്‍മിനലില്‍ എത്തിയ അദ്ദേഹം ഫോര്‍ട്ടുകൊച്ചി, വൈപ്പിന്‍ റൂട്ടുകളിലാണ്‍ വാട്ടര്‍ മെട്രോയില്‍ യാത്രചെയ്തത്. കായല്‍ കാഴ്ചകളും സൗന്ദര്യവും ആസ്വദിച്ച സര്‍ബാനന്ദ സോനോവാള്‍ അതുല്യമായ യാത്രാനുഭവമാണ് കൊച്ചി വാട്ടര്‍ മെട്രോയിലേതെന്ന് സന്ദര്‍ശക രജിസ്റ്ററില്‍ കുറിച്ചു. ഷിപ്പിംഗ് മന്ത്രാലയത്തിലെ ജോയിന്‍റ് സെക്രട്ടറി ശ്രീനാഥ്, കെഎംആര്‍എല്‍ എംഡി ലോക്‌നാഥ് ബെഹ്‌റ, കൊച്ചിന്‍ പോര്‍ട്ട് ട്രസ്റ്റ് ചെയര്‍മാന്‍ ബി. കാശിവിശ്വനാഥന്‍, വിഴിഞ്ഞം ഇന്‍റര്‍നാഷണല്‍ സീപോര്‍ട്ട് മാനേജിംഗ് ഡയറക്ടര്‍ ദിവ്യ എസ്. അയ്യര്‍, കൊച്ചി മെട്രോ ഡയറക്ടര്‍മാരായ സഞ്ജയ് കുമാര്‍, ഡോ. എം.പി. രാംനവാസ്, വാട്ടര്‍ മെട്രോ ചീഫ് ജനറല്‍ മാനേജര്‍ ഷാജി ജനാര്‍ദനന്‍, ചീഫ് ഓപ്പറേറ്റിംഗ് ഓഫീസര്‍ സാജന്‍ ജോണ്‍ തുടങ്ങിയവരും യാത്രയില്‍ പങ്കെടുത്തു.

കരുമാലൂർ കൃഷി ഓഫീസിൽ വിജിലൻസ് പരിശോധന

കരുമാലൂർ: കരുമാലൂർ കൃഷി ഓഫീസിൽ വിജിലൻസ് സംഘം മിന്നൽ പരിശോധന നടത്തി. ഭൂമി തരം മാറ്റുന്നതിനുള്ള അപേക്ഷകൾ വസ്തു ഉടമകൾ നേരിട്ടു നൽകിയാൽ കൃഷി ഓഫീസർ തുടർനടപടികൾ സ്വീകരിക്കുന്നില്ലെന്ന പരാതി വിജിലൻസിന് ലഭിച്ചിരുന്നു. എന്നാൽ ഏജന്‍റുമാർ മുഖേന നൽകുന്ന അപേക്ഷകളിൽ വേഗത്തിൽ അനുകൂല തീരുമാനം കൈക്കൊള്ളുന്നുതായും വിജിലൻസിന് വിവരം ലഭിച്ചു. ഇതു പരിശോധിക്കുന്നതിനായി ഇന്നലെ രാവിലെ 10.45ന് തുടങ്ങിയ മിന്നൽ പരിശോധന വൈകിട്ട് നാലിനാണ് അവസാനിച്ചത്.

ഡ്രൈവിംഗ് പരിശീലനത്തിനിടെ പെരിയാർവാലി കനാലിലേക്ക് കാർ തലകീഴായി മറിഞ്ഞു

കോതമംഗലം: ഡ്രൈവിംഗ് പരിശീലനത്തിനിടെ നിയന്ത്രണം നഷ്ടപ്പെട്ട കാർ പെരിയാർവാലി കനാലിലേക്ക് തലകീഴായി മറിഞ്ഞു. അപകടത്തിൽ കാറിലു ണ്ടായിരുന്നവർക്ക് നിസാര പരിക്കേറ്റു. കോതമംഗലം അന്പലപ്പറന്പിൽ ഇന്നലെ ഉച്ചയ്ക്ക് 12ഓടെയായിരുന്നു അപകടം. കുത്തുകുഴി സ്വദേശിയുടെ ഉടമസ്ഥതയിലുള്ള മാരുതി 800 കാറാണ് അപകടത്തിൽപ്പെട്ടത്. കോതമംഗലത്തുനിന്നു അഗ്നിശമന രക്ഷാസേന റിക്കവറി വെഹിക്കിൾ, എആർടി എന്നീ വാഹനങ്ങൾ ഉപയോഗിച്ച് 15 അടി താഴ്ചയിൽനിന്നു കാർ ഉയർത്തി കരയ്ക്ക് കയറ്റി. സീനിയർ ഫയർ ഓഫീസർ സിദ്ദിഖ് ഇസ്മയിൽ, കെ.എൻ. ബിജു, കെ.പി. ഷമീർ, പി. സുബ്രമണ്യൻ, എ.ഒ. ആബിദ്, നന്ദു കൃഷ്ണ, വിഷ്ണു മോഹൻ, എം.എ. അംജിത്, എം. സേതു എന്നിവരുടെ നേതൃത്വത്തിലായിരുന്നു രക്ഷാപ്രവർത്തനം.

വൈകല്യം സഹനമാക്കി, വിശ്വാസതീക്ഷ്ണത‌യിൽ അവർ കുരിശുമുടി കയറി

കാലടി: കേൾവിയുടെയും ശബ്ദത്തിന്‍റെയും ലോകം അന്യമായവർ പൊന്നിൻ കുരിശുമല മുത്തപ്പന്‍റെ അനുഗ്രഹം തേടി മലയാറ്റൂർ കുരിശുമുടി കയറി. ഓൾ ഇന്ത്യ ഡഫ് അസോസിയേഷന്‍റെ നേതൃത്വത്തിലാണ് സംസാരിക്കാൻ കഴിയാത്തവരും കേൾവിശക്തി ഇല്ലാത്തവരുമായ ഒരു പറ്റം വിശ്വാസികൾ കുരിശുമുടി കയറിയത്. ഫാ. ജോസഫ് തെർമടം, ഫാ. ബിജു മൂലൻ, ഫാ. ജോളി അൽഫോൻസ് എന്നിവരുടെ നേതൃത്വത്തിൽ 225ഓളം വരുന്ന സംഘം അടിവാരത്തുള്ള തോമാശ്ലീഹായുടെ പ്രതിമയ്ക്കു മുന്നിൽ പ്രാർഥിച്ച് 200 കിലോ‌യോളം വരുന്ന കുരിശും ചുമന്നാണ് കുരിശുമുടി ചവിട്ടാൻ ആരംഭിച്ചത്. കേരളത്തിനകത്തും പുറത്തുനിന്നുമുള്ളവർ സംഘത്തിലുണ്ടായിരുന്നു. കുരിശിന്‍റെ വഴി ചൊല്ലി രാവിലെ മലകയറിയ ഇവർ കുരിശുമുടിയിലെത്തി പ്രത്യേകം പ്രാർഥനകൾ നടത്തിയാണ് മടങ്ങിയത്.

വാട്ടര്‍ മെട്രോ യാത്രക്കാർ 40 ലക്ഷം പിന്നിട്ടു

കൊച്ചി: പ്രവര്‍ത്തനം തുടങ്ങി രണ്ടു വര്‍ഷം പുര്‍ത്തിയാകുന്നതിനു മുന്നേ 40 ലക്ഷം യാത്രക്കാര്‍ എന്ന ചരിത്രനേട്ടവും വാട്ടര്‍ മെട്രോ സ്വന്തമാക്കി. അഞ്ചു റൂട്ടുകളിലായി 19 ബോട്ടുകൾ 10 ടെര്‍മിനലുകളിലേക്കാണ് സര്‍വീസ് നടത്തുന്നത്. മട്ടാഞ്ചേരി, വെല്ലിംഗ്ടണ്‍ ഐലൻഡ് ടെര്‍മിനലുകളുടെ നിര്‍മാണം അന്തി മ ഘട്ടത്തിലാണെന്നും വാട്ടര്‍മെട്രോ അധികൃതര്‍ അറിയിച്ചു. മാര്‍ച്ചോടെ മട്ടാഞ്ചേരി സര്‍വീസ് ആരംഭിക്കുമെന്ന് അറിയിച്ചിരുന്നതെങ്കിലും നിര്‍മാണം വൈകുന്നത് പ്രതിസ ന്ധിയായി. ബോട്ടടുപ്പിക്കുന്ന ഭാഗത്തെ ചെളി നീക്കല്‍ ഉള്‍പ്പടെയുള്ള പ്രവൃത്തികള്‍ നടക്കുകയാണ്. നിലവില്‍ ജലഗതാഗത വകുപ്പിന്‍റെ ബോട്ട് സര്‍വീസ് ഇവിടെയുണ്ടെങ്കിലും ചെളി അടിയുന്നതിനാല്‍ ട്രിപ്പുകള്‍ മുടങ്ങുന്നത് പതിവാണ്. ഈ പ്രശ്‌നത്തിന് ശാശ്വതമായ പരിഹാരം കാണാനായില്ലെങ്കില്‍ വാട്ടര്‍മെട്രോ സര്‍വീസിനെയും ബാധിച്ചേക്കും. മൂന്നു ബെര്‍ത്തുകള്‍ ഉണ്ടെങ്കിലും ഒരു സമയം ഒരു ബോട്ടിന് നിര്‍ത്തിയിടാനുള്ള ആഴം മാത്രമേ മട്ടാഞ്ചേരി ടെര്‍മിനലിനുള്ളൂ. 50 പേര്‍ക്ക് ഇരുന്നു സഞ്ചരിക്കാന്‍ കഴിയുന്ന ബോട്ട് തന്നെയാകും ഇവിടേക്കും സര്‍വീസിനുപയോഗിക്കുക. ഹൈക്കോടതി ജംഗ്ഷനിലെ എറണാകുളം ടെര്‍മിനല്‍ കേന്ദ്രീകരിച്ച് വെല്ലിംഗ്ടണ്‍ ഐലൻഡ് വഴിയാകും സര്‍വീസ്. ഫോര്‍ട്ടുകൊച്ചിക്ക് നേരിട്ട് സര്‍വീസുള്ളതിനാല്‍ ഫോര്‍ട്ടുകൊച്ചിയിലേക്ക് ബോട്ട് പോകില്ല. മട്ടാഞ്ചേരി സര്‍വീസ് ആരംഭിക്കുന്നതോടെ പ്രതിദിന വാട്ടര്‍ മെട്രോ യാത്രക്കാരുടെ എണ്ണം 10,000 കടക്കുമെന്ന പ്രതീക്ഷ. 2023 ഏപ്രില്‍ 23ന് സര്‍വീസ് ആരംഭിച്ച ശേഷം അടുത്തിടെയാണ് പ്രതിദിന യാത്രക്കാരുടെ എണ്ണം 10,000 എന്ന നാഴികക്കല്ലിലേക്ക് അടുത്തത്. ഹൈക്കോടതി-വൈപ്പിന്‍, വൈറ്റില-കാക്കനാട് റൂട്ടുകളില്‍ ആദ്യഘത്തില്‍ സര്‍വീസ് ആരംഭിച്ച ശേഷം ഇപ്പോള്‍ എട്ടു ടെര്‍മിനലുകള്‍ കേന്ദ്രീകരിച്ച് നൂറിലേറെ സര്‍വീസുകള്‍ വാട്ടര്‍ മെട്രോ നടത്തുന്നുണ്ട്.

"ലഹരിയില്‍' ഡ്രൈവിംഗ് പൊലിഞ്ഞത് 14 ജീവനുകള്‍

ശിക്ഷ അപര്യാപ്തമായാതിനാലാണ് കുറ്റം ആവര്‍ത്തിക്കുന്നതെന്നാണ് വിലയിരുത്തല്‍ കൊച്ചി: ലഹരി ഉപയോഗിച്ച ശേഷം വാഹനം ഓടിച്ചത് മൂലം കഴിഞ്ഞ അഞ്ചു വര്‍ഷത്തിനിടെ ജില്ലയില്‍ നടന്നത് 94 അപകടങ്ങള്‍. 14 പേര്‍ക്ക് ജീവനും നഷ്ടമായി. 10 പേര്‍ കൊച്ചി സിറ്റിയില്‍ നടന്ന അപകടങ്ങളിലും നാലു പേര്‍ എറണാകുളം റൂറലില്‍ നടന്ന അപകടങ്ങളിലുമാണ് മരിച്ചത്. ഈ വര്‍ഷം ഇതുവരെ കൊച്ചി സിറ്റിയിലും റൂറലിലുമായി രണ്ട് അപകടങ്ങളാണ് റിപ്പോര്‍ട്ട് ചെയ്തത്. ഈ വര്‍ഷം മാത്രം ലഹരി ഉപയോഗിച്ച് വാഹനം ഓടിച്ചതിന് നടപടി നേരിട്ടത് 3,114 പേരാണ്. 2,682 പേര്‍ റൂറലിലും 432 പേര്‍ കൊച്ചി സിറ്റിയിലും. സിറ്റിയില്‍ 432 പേരും. അഞ്ച് വര്‍ഷത്തിനിടെ ജില്ലയില്‍ ഇത്തരത്തില്‍ നടപടി നേരിട്ടത് 68,542 പേരാണ്. ഓരോ വര്‍ഷവും ലഹരി ഉപയോഗിച്ചുള്ള അപകടകരമായ ഡ്രൈവിംഗ് വര്‍ധിക്കുന്നതായാണ് കണക്കുകള്‍ വ്യക്തമാക്കുന്നത്. ഇത്തരം സംഭവങ്ങളില്‍ ഭൂരിഭാഗം കുറ്റവാളികളും ശിക്ഷിക്കപ്പെടാറുണ്ട്. ശിക്ഷ അപര്യാപ്തമായാതിനാലാണ് കുറ്റം ആവര്‍ത്തിക്കുന്നതെന്നാണ് വിലയിരുത്തല്‍. ജീവന്‍ നഷ്ടമാകുന്ന കേസുകളും, ചുരുക്കം ചില സംഭവങ്ങളില്‍ ലൈസന്‍സ് സസ്‌പെന്‍ഡ് ചെയ്യുന്നതും ഒഴിച്ചാല്‍ പലതിനും ഫൈന്‍ ഈടാക്കി മടക്കി അയക്കുക മാത്രണ് ചെയ്യുന്നത്. ലഹരി ഉപയോഗിച്ച് വാഹനം ഓടിക്കുന്നതിന് 10,000 രൂപ പിഴയും ആറു മാസം തടവും തുടര്‍ന്ന് ആവര്‍ത്തിക്കുന്നതിന് 15,000 രൂപ പിഴയും രണ്ട് വര്‍ഷം തടവു ശിക്ഷയുമാണ് നിലവിലുള്ളത്. ലൈസന്‍സ് സസ്‌പെന്‍ഡ് ചെയ്തവര്‍ പിന്നീട് മറ്റ് വാഹനങ്ങള്‍ ഓടിച്ച് കുടുങ്ങിയ സംഭവങ്ങളുമുണ്ട്. കൊച്ചി സിറ്റിയില്‍ 2021 മുതല്‍ കഴിഞ്ഞ മാര്‍ച്ച് വരെ 14,289 പേര്‍ ഇത്തരത്തില്‍ ശിക്ഷിക്കപ്പെട്ടിട്ടുണ്ട്. എറണാകുളം റൂറലില്‍ ഇത് 19,577 ആണ്.

ആലുവയിൽ ഇന്ന് കോടതി ബഹിഷ്കരണം

ആലുവ: അന്യായമായ കോർട്ട് ഫീസ് വർധനയിൽ പ്രതിഷേധിച്ച് ആലുവ ബാർ അസോസിയേഷനിലെ അഭിഭാഷകർ ഇന്ന് കോടതി നടപടികളിൽനിന്ന് വിട്ടുനിൽക്കാൻ ബാർ അസോസിയേഷൻ ജനറൽ ബോഡി യോഗം തീരുമാനിച്ചു. യോഗത്തിൽ പ്രസിഡന്‍റ് പി.എൻ. ഉണ്ണികൃഷ്ണൻ അധ്യക്ഷത വഹിച്ചു.

മുനമ്പത്ത് ‘നന്ദി മോദി’ ബഹുജനകൂട്ടായ്മ 15ന്

കൊച്ചി: വഖഫ് നിയമ ഭേദഗതി ബിൽ പാർലമെന്‍റ് പാസാക്കിയ പശ്ചാത്തലത്തിൽ മുനന്പത്ത് ദേശീയ ജനാധിപത്യ സഖ്യത്തിന്‍റെ നേതൃത്വത്തിൽ "നന്ദി മോദി’ ബഹുജനകൂട്ടായ്മ നടത്തും. 15ന് വൈകുന്നേരം നാലിന് കേന്ദ്രമന്ത്രി കിരൺ റിജിജു ഉദ്ഘാടനം ചെയ്യും. എൻഡിഎ സംസ്ഥാന നേതാക്കൾ പങ്കെടുക്കുമെന്ന് ബിജെപി സിറ്റി ജില്ലാ പ്രസിഡന്‍റ് കെ.എസ്. ഷൈജു അറിയിച്ചു.

ദണ്ഡിയാത്രയുടെ ഓർമയിൽ ഉപ്പുകുറുക്കി

നെടുമ്പാശേരി: മൂഴിക്കുളം ശാലയുടെ നേതൃത്വത്തിൽ നടന്ന സർവ്വോദയ മേളയുടെ സമാപനത്തിൽ ദണ്ഡി സമരത്തിന്‍റെ പ്രതീകമായി ഉപ്പുകുറുക്കി. പാറക്കടവ് പഞ്ചായത്ത് പ്രസിഡന്‍റ് എസ്.വി. ജയദേവൻ മേള ഉദ്ഘാടനം ചെയ്തു. ഗാന്ധി പ്രതിമയിലും ഗാന്ധിമരത്തിലും (പേരാൽ) പുഷ്പാർച്ചന നടത്തി. കടൽ വെള്ളം വറ്റിച്ച് ഉപ്പുണ്ടാക്കി വിതരണം നടത്തി. ചിത്രകാരി രാജി പിഷാരസ്യാർ ദണ്ഡിയാത്രയുടെ ചിത്രങ്ങൾ വരച്ചു.

നേര്‍ച്ചസദ്യ പന്തലിന് കാല്‍നാട്ടി

ചൊവ്വര: സെന്‍റ് മേരീസ് പള്ളിയില്‍ വിശുദ്ധ യൗസേപ്പിതാവിന്‍റെ മധ്യസ്ഥ തിരുനാളിനോടനുബന്ധിച്ച് മേയ് ഒന്നിന് നടക്കുന്ന നേര്‍ച്ചസദ്യക്കുള്ള പന്തലിന്‍റെ കാല്‍നാട്ട് കര്‍മം വികാരി ഫാ.ജോസ് പൈനുങ്കല്‍ നിര്‍വഹിച്ചു. ജനറല്‍ കണ്‍വീനര്‍ ദീപക് ചുമ്മാര്‍ ചന്ദനത്തില്‍, ജോയിന്‍റ് കണ്‍വീനര്‍ ജോസ് ചെറുതുരുത്തി തുടങ്ങിയവര്‍ പങ്കെടുത്തു. ഈ മാസം 21 മുതല്‍ മേയ് ഒന്നു വരെയാണ് തിരുനാള്‍.

‘ഫാക്ടിന് സ്ഥിരം എംഡി വേണം’

ഏലൂർ: ഫാക്ടിന്‍റെ സുസ്ഥിര ഭാവിക്കായി കേന്ദ്ര - സംസ്ഥാന സർക്കാറുകൾ അടിയന്തരമായി ഇടപെടണമെന്നും സ്ഥിരം എംഡിയെ നിയമിക്കണമെന്നും ഫാക്ട് വർക്കേഴ്സ് ഓർഗനൈസേഷൻ വാർഷിക പൊതുയോഗം ആവശ്യപ്പെട്ടു. ഒരു വർഷത്തിലേറെയായി (2024 ഫെബ്രുവരി രണ്ട് മുതൽ) ഫാക്ടിന് സ്ഥിരം സിഎംഡി ഇല്ല. മുൻ കാലങ്ങളെ അപേക്ഷിച്ച് ഉത്പാദന - വിപണന രംഗങ്ങളിൽ തളർച്ച നേരിടുന്നു. ക്യാപ്രോലാക്റ്റം ഉല്പാദനവും നിർത്തിയിട്ട് ഒരു വർഷത്തിലേറെയായി. പിന്നിട്ട സാമ്പത്തിക വർഷം ലാഭത്തിലും വൻ കുറവ് സംഭവിച്ചിട്ടുണ്ട്. അതിനാൽ ഫാക്ടിന് സ്ഥിരം സിഎംഡിയെ നിയമിക്കുവാൻ കേന്ദ്ര സർക്കാർ അടിയന്തര നടപടി എടുക്കണമെന്ന് യൂണിയൻ യോഗം ആവശ്യപ്പെട്ടു.

സെമിത്തേരി കപ്പേളയിൽ മോഷണം

ആലങ്ങാട്. നീറിക്കോട് സെന്‍റ് സെബാസ്റ്റ്യൻസ് പള്ളിയുടെ സെമിത്തേരി കപ്പേളയിൽ മോഷണം. 40 കിലോ തൂക്കംവരുന്ന ഓട്ടുമണി മോഷണം പോയി. ഇന്നലെ വൈകിട്ടു കപ്യാര് മണി അടിക്കാൻ എത്തിയപ്പോഴാണു മോഷണം നടന്ന വിവരമറിയുന്നത്. ഉടനെ ആലങ്ങാട് പോലീസിൽ വിവരമറിയിക്കുകയായിരുന്നു. ഒരിടവേളയ്ക്കു ശേഷം ആലങ്ങാട് നീറിക്കോട് മേഖലയിൽ മോഷ്ടാക്കളെത്തിയതോടെ നാട്ടുകാർ ആശങ്കയിലാണ്. നാട്ടുകാരുടെ നേതൃത്വത്തിൽ സമീപ പ്രദേശങ്ങളിലെ സിസിടിവി ദൃശ്യങ്ങൾ പരിശോധിച്ചു.

തൊരപ്പൻ രാജേഷിനെ നാടു കടത്തി

ചെറായി: മുനമ്പം പോലീസ് സ്റ്റേഷൻ പരിധിയിലെ ഗുണ്ട തൊരപ്പൻ രാജേഷ് എന്ന് വിളിക്കുന്ന ചെറായി വാടേപ്പറമ്പിൽ രാജേഷിനെ - 52 കാപ്പ നിയമ പ്രകാരം നാടുകടത്തി. എറണാകുളം റൂറൽ ജില്ലാ പോലീസ് മേധാവിയുടെ പരിധിയിൽ വരുന്ന പ്രദേശങ്ങളിൽ പ്രവേശിക്കുന്നതിൽനിന്നു ആറ് മാസത്തേക്കുള്ള വിലക്ക് ഏർപ്പെടുത്തിയാണ് നാടുകടത്തിയിരിക്കുന്നതെന്ന് മുനമ്പം പോലീസ് അറിയിച്ചു.

ബോധവത്കരണ സെമിനാര്‍

കൊച്ചി: ചാവറ കള്‍ച്ചറല്‍ സെന്‍ററിന്‍റെ കീഴില്‍ പ്രവര്‍ത്തിക്കുന്ന ചാവറ ഇന്‍സ്റ്റിറ്റ്യൂട്ടില്‍ ലോകാരോഗ്യ ദിനത്തോടനുബന്ധിച്ച് "ഓപ്പറേഷന്‍ ഉണര്‍വ്' എന്ന പേരില്‍ ലഹരി വിരുദ്ധ ബോധവത്കരണ സെമിനാര്‍ സംഘടിപ്പിച്ചു. കൊച്ചി സിറ്റി ഡിഎച്ച്ക്യു ക്യാമ്പ് പോലീസ് ഇന്‍സ്‌പെക്ടര്‍ പി. ബാബു ജോണ്‍ വിദ്യാര്‍ഥികള്‍ക്ക് ലഹരി വിരുദ്ധ പ്രതിജ്ഞ ചൊല്ലിക്കൊടുത്ത് സെമിനാര്‍ ഉദ്ഘാടനം ചെയ്തു. ചാവറ ഇന്‍സ്റ്റിറ്റ്യട്ട് ഡയറക്ടര്‍ ഫാ. ബിജു വടക്കേല്‍, ഹോട്ടല്‍ മാനേജ്‌മെന്‍റ് വിഭാഗം മേധാവി ജയ്‌മോള്‍ മേരി തോമസ്, ഏവിയേഷന്‍ വിഭാഗം മേധാവി ടിയ തോമസ് എന്നിവര്‍ പ്രസംഗിച്ചു.

സഹൃദയ സംഗീത കാരുണ്യവേദി വാർഷികാഘോഷം

ആലുവ: സഹൃദയ സംഗീത കാരുണ്യവേദിയുടെ 18-ാമത് വാർഷികാഘോഷം നടന്നു. ഹൈക്കോടതി ജസ്റ്റീസ് പി.എം. മനോജ് ഉദ്ഘാടനം ചെയ്തു. ചടങ്ങിൽ സഹൃദയപുരസ്കാരം കിഡ്നി ഫെഡറേഷൻ ഓഫ് ഇന്ത്യ സ്ഥാപകൻ ഫാ. ഡേവിസ് ചിറമലിന് ജസ്റ്റീസ് പി.എം. മനോജ് കൈമാറി. 10,001 രൂപയും പ്രശസ്തിപത്രവും ഫലകവും അടങ്ങുന്നതാണ് പുരസ്കാരം. കലാസന്ധ്യ ഉദ്ഘാടനം ഡബ്ബിംഗ് ആർട്ടിസ്റ്റ് പ്രവീൺ ഹരിശ്രീ നിർവഹിച്ചു. സുമേഷ് സ്മാരക പുരസ്കാരം അശോകൻ അമ്പാട്ടിന് നൽകി. സഹൃദയ സംഗീത കാരുണ്യവേദി പ്രസിഡന്‍റ് എം. വിശ്വനാഥക്കുറുപ്പ് അധ്യക്ഷനായി. 30 രോഗികൾക്ക് ചികിത്സാസഹായ വിതരണവും 15 വിദ്യാർഥികൾക്ക് വിദ്യാഭ്യാസ സ്കോളർഷിപ്പും വിതരണം ചെയ്തു. വിജയൻ മേനോൻ അനുസ്മരണ ലളിതഗാന മത്സര വിജയികൾക്കുള്ള സമ്മാനദാനവും നടന്നു.

ആറര പതിറ്റാണ്ട് പഴക്കമുള്ള കിണർ നവീകരിച്ച് പൈതൃക സ്മാരകമാക്കി

നെടുമ്പാശേരി: ആറര പതിറ്റാണ്ട് മുന്പ് ചെങ്ങമനാട് പഞ്ചായത്തിലെ പുതുവാശേരിയിൽ നിർമിച്ച കിണർ ആധുനിക രീതിയിൽ നവീകരിച്ച് പൈതൃക സ്മാരകമാക്കി. സ്വന്തം സ്ഥലത്ത് കിണർ കുഴിച്ച് ദാഹജലം കണ്ടെത്തുക ഏറെ ക്ലേശകരമായിരുന്ന കാലയളവിൽ ചെങ്ങമനാട് പഞ്ചായത്തിൽ പുതുവാശേരിയിൽ ഇപ്പോഴത്തെ അഞ്ചാം വാർഡിൽ ഗ്രാമവാസികൾ കുടിവെള്ളത്തിനു വേണ്ടി ഉണ്ടാക്കിയതാണ് ഈ കിണർ. അന്നത്തെ പഞ്ചായത്തംഗം പുല്ലേലിൽ ഉണ്ണിക്കുറുപ്പിന്‍റെ ശ്രമഫലമായി 1958 മാർച്ച് 28നാണ് ഈ കിണർ പൂർത്തീകരിച്ചത്. ആ കാലയളവിൽ ചെങ്ങമനാട് പഞ്ചായത്തിന് അഞ്ചു വാർഡുകൾ മാത്രമാണ് ഉണ്ടായിരുന്നത്. ഇപ്പോഴത്തെ രണ്ടും മൂന്നും വാർഡുകൾ ഉൾപ്പെട്ട പ്രദേശത്താണ് കിണർ കുഴിച്ചത്. നിലവിൽ 18 വാർഡുകളാണ് ഈ പഞ്ചായത്തിനുള്ളത്. നല്ല ആഴവും ശക്തമായ നീരുറവയും ഉണ്ടായിരുന്ന ഈ കിണറിൽ നിന്നാണ് ആ കാലയളവിൽ ദൂരത്തുള്ളവർ പോലും കുടിവെള്ളം സംഭരിച്ചിരുന്നത്. നാട്ടുകൂട്ടം 67 വർഷം മുമ്പ് ഉണ്ടാക്കിയ ഈ കിണർ ഇന്നും പുതുവാശേരി ഗ്രാമത്തിന് മുടങ്ങാതെ കുടിവെള്ളം നൽകിവരുന്നു. കനത്ത വേനലിലും ഈ കിണർ വറ്റാറില്ല. പഴയ കാലങ്ങളിൽ ഗ്രാമവാസികൾ ഒത്തുകൂടുന്നതും കാർഷിക ഉൽപ്പന്നങ്ങൾ വിൽക്കുന്നതും വാങ്ങുന്നതും ഈ ഭാഗത്തായിരുന്നു. വെളിച്ചത്തിനായി അവർ ഉപയോഗിച്ചിരുന്ന പന്തം സ്ഥാപിക്കാനുള്ള കാലുകളും കിണറിന് സമീപം ഇന്നും സ്ഥിതി ചെയ്യുന്നുണ്ട്. നവീകരിച്ച കിണർ പഞ്ചായത്തംഗം ഇ.ഡി. ഉണ്ണിക്കൃഷ്ണൻ ഉദ്ഘാടനം ചെയ്തു. വികസന സമിതി കൺവീനർ എം.വി. സുന്ദരൻ അധ്യക്ഷനായി.

തൊഴില്‍മേള 12ന്

കൊച്ചി: വ്യവസായ മന്ത്രി പി. രാജീവ് കളമശേരി മണ്ഡലത്തില്‍ നടപ്പാക്കുന്ന നൈപുണ്യ വികസന പദ്ധതി സ്‌കൈ സ്‌കിലിംഗ് കളമശേരി യൂത്തിന്‍റെ ഭാഗമായി സംഘടിപ്പിക്കുന്ന നാലാമത് തൊഴില്‍മേള 12ന് രാവിലെ ഒന്പതിന് ആലങ്ങാട് കൊങ്ങോര്‍പ്പിള്ളി ഹയര്‍ സെക്കന്‍ഡറി സ്‌കൂളില്‍ നടക്കും. കേരള നോളഡ്ജ് ഇക്കണോമിക് മിഷന്‍റെ സഹകരണത്തോടെ മുപ്പതിലധികം കമ്പനികള്‍ പങ്കെടുക്കുന്ന തൊഴില്‍മേളയില്‍ പത്ത്, പ്ലസ്ടു, ഐടിഐ, ഡിപ്ലോമ , ഡിഗ്രി യോഗ്യതയുള്ളവര്‍ക്ക് പങ്കെടുക്കാം. താത്പര്യമുള്ളവര്‍ താഴെ കാണുന്ന ലിങ്ക് https://forms.gle/NbYc84A6QQeZecTt7 വഴി ഒമ്പതിനു മുമ്പായി രജിസ്റ്റര്‍ ചെയ്യണം. ഫോണ്‍ : 9946291983.

ഗ്രീന്‍ ഹാര്‍വെസ്റ്റ് ചലഞ്ചിന് തുടക്കം

കൊച്ചി: രാജഗിരി ഹയര്‍ സെക്കന്‍ഡറി സ്‌കൂള്‍ സംരംഭമായ 'ഹരിതഗിരി' പദ്ധതിയുടെ ഭാഗമായി വിദ്യാര്‍ഥികള്‍ക്കായി വേനല്‍ക്കാല ജൈവകൃഷി പ്രവര്‍ത്തനങ്ങള്‍ക്ക് അവസരമൊരുക്കുന്ന ഗ്രീന്‍ ഹാര്‍വെസ്റ്റ് ചലഞ്ചിന് തുടക്കമായി. സ്‌കൂള്‍ കാമ്പസില്‍ വച്ച് പ്രിന്‍സിപ്പല്‍ ഫാ. ടോമി കൊച്ചെലഞ്ഞിക്കല്‍ വിദ്യാര്‍ഥികള്‍ക്ക് വിത്തുകള്‍ വിതരണം ചെയ്താണ് പരിപാടിക്ക് തുടക്കംകുറിച്ചത്. അവധിക്കാലത്ത് ഒരു അടുക്കളത്തോട്ടം ഒരുക്കുന്നതിലൂടെ പ്രകൃതിയുടെ ജീവന പാഠങ്ങള്‍ തിരിച്ചറിയാനും ആരോഗ്യമുള്ള മനസും ശരീരവും ഒരുക്കിയെടുക്കാനുമാണ് 'ഗ്രീന്‍ ഹാര്‍വെസ്റ്റ് ചലഞ്ച്' ലക്ഷ്യമിടുന്നത്. ഓണ്‍ലൈന്‍ അഡിക്ഷനില്‍ നിന്നു വിടുതല്‍ നേടാനും കുട്ടികളിലെ ഊര്‍ജം ക്രിയാത്മകമായി ഉപയോഗപ്പെടുത്താനും പദ്ധതിയിലൂടെ ലക്ഷ്യം വയ്ക്കുന്നു.

കാറിന് തീപിടിച്ചു; അണച്ചത് ടൂറിസ്റ്റ് ബസ് ഡ്രൈവർ

ആലുവ: ദേശീയ പാതയിൽ ഓടിക്കൊണ്ടിരുന്ന കാറിന്‍റെ ബോണറ്റിൽ തീപിടിച്ചു. പിന്നാലെ വന്ന ടൂറിസ്റ്റ് ബസിലെ ഡ്രൈവർ ഫയർ എക്സ്റ്റിഗ്യൂഷർ ഉപയോഗിച്ച് തീ കെടുത്തിയതോടെ കൂടുതൽ അനിഷ്ട സംഭവങ്ങൾ ഒഴിവായി. ഇന്നലെ വൈകുന്നേരം അഞ്ചരയോടെ കമ്പനിപ്പടി മെട്രോ പില്ലർ 121ന് സമീപത്താണ് സംഭവം. എറണാകുളത്തുനിന്ന് നെടുമ്പാശേരി വിമാനത്താവളത്തിലേക്ക് പോവുകയായിരുന്ന മാരുതി സ്വിഫ്റ്റ് കാറിന്‍റെ എൻജിനിലാണ് തീ പടർന്നത്. കാറിൽ രണ്ട് പേർ ഉണ്ടായിരുന്നു. പിന്നാലെ വന്ന വാഹനയാത്രക്കാരാണ് തീ ആദ്യം കണ്ടത്. കാർ നിർത്തിയപ്പോൾ തൊട്ടുപിന്നിൽ ഉണ്ടായിരുന്ന ടൂറിസ്റ്റ് ബസ് നിർത്തി അതിലെ ഫയർ എക്സ്റ്റിഗ്യൂഷർ ഉപയോഗിച്ചാണ് തീ കെടുത്തിയത്. നാട്ടുകാർ ബക്കറ്റിലും കുപ്പിയിലും വെള്ളം ഒഴിച്ചും സഹായിച്ചു. പട്ടാമ്പി രജിസ്ട്രേഷനുള്ള കാർ ഗോകുൽ എന്ന യുവാവാണ് ഓടിച്ചിരുന്നത്. ഗോകുലിന്‍റെ ഗാന്ധിനഗർ സ്വദേശിയായ അമ്മാവന്‍റേതാണ് കാർ. അരമണിക്കൂറോളം ദേശീയ പാതയിൽ ഗതാഗതക്കുരുക്ക് ഉണ്ടായി. രണ്ട് ദിവസം മുമ്പ് ഇതേ സ്ഥലത്ത് ഒരു കാർ തീപിടിച്ച് പൂർണമായി കത്തിനശിച്ചിരുന്നു. കഴിഞ്ഞ ഒന്നര മാസത്തിൽ നാലാമത്തെ കാറാണ് ആലുവ മേഖലയിൽ തീ പിടിക്കുന്നത്.

വിഷു മാറ്റച്ചന്ത: നൈറ്റ്‌ @ മ്യൂസിയം 11ന്

പറവൂർ: വിഷു മാറ്റച്ചന്ത എന്ന പരമ്പരാഗത കൈമാറ്റ വ്യവസ്ഥയുടെ പ്രതീകമെന്ന നിലയിൽ 11 വരെ നടക്കുന്ന വ്യാപാരമേളയെയും സമന്വയിപ്പിച്ച് മുസിരിസ് പൈതൃക പദ്ധതിയുടെ ഭാഗമായി പാലിയം കോവിലക മ്യൂസിയത്തിൽ 11ന് ‘നൈറ്റ്@മ്യൂസിയം’ പരിപാടി വൈകുന്നേരം ആറു മുതൽ ഒൻപത് വരെ സംഘടിപ്പിക്കും. പരിപാടിയുടെ ഭാഗമായി കേരളത്തിന്‍റെ തനത് ആയോധനകലയായ കളരിപ്പയറ്റ് പാലിയം കോവിലകത്തെ പരമ്പരാഗത കളരിത്തറയിൽ നടത്തും. മുസിരിസ്: മുൻതുറൈ മുചറി അങ്കം എന്ന പേരിൽ പറവൂർ മൂകാംബിക നന്ത്യാട്ടുകുന്നം പുഴവൂർ കളരിയിലെ ഗുരുക്കളായ സ്വാമിനാഥനും സംഘവുമാണ് പാലിയം കളരിത്തറയിൽ അങ്കം കുറിക്കുന്നത്. അന്നേ ദിവസം വടക്കൻ കളരി സമ്പ്രദായത്തിലും അറപ്പക്കൈ സമ്പ്രദായത്തിനും തെക്കൻ കളരിയിലും പ്രകടനങ്ങൾ ഉണ്ടാകും. രാത്രിയിലെ മ്യൂസിയം സന്ദര്‍ശനത്തോടൊപ്പം കളരിപ്പയറ്റില്‍ ഉപയോഗിക്കുന്ന ആയുധങ്ങളുടെ പ്രദർശനവും സംഘടിപ്പിക്കും. അന്നേദിവസം പാലിയം മ്യൂസിയം സന്ദർശനത്തിനുള്ള ടിക്കറ്റ് നിരക്ക് 50 ശതമാനം കുറച്ചിട്ടുണ്ട്.

ബിയറും വിദേശ മദ്യവുമായി രണ്ടുപേർ കുടുങ്ങി

തൃപ്പൂണിത്തുറ: വിൽപ്പനയ്ക്കായി സൂക്ഷിച്ച ബിയറും വിദേശ മദ്യവുമായി രണ്ടുപേരെ പോലീസ് പിടികൂടി. തെക്കുംഭാഗം സ്വദേശികളായ വല്ലത്ത് വീട് മധു, സ്രാമ്പിക്കൽ വീട്ടിൽ സുമേഷ് എന്നിവരെയാണ് ഹിൽപാലസ് പോലീസ് അറസ്റ്റ് ചെയ്തത്. പാവംകുളങ്ങര ക്ഷേത്രത്തിന് സമീപത്തെ വീട്ടിൽനിന്നും വിൽപ്പനയ്ക്കായി സൂക്ഷിച്ചിരുന്ന 16 കുപ്പി ബിയറും രണ്ടര ലിറ്റർ വിവിധ ബ്രാന്‍റുകളിലുള്ള ഇന്ത്യൻ നിർമിത വിദേശ മദ്യവുമാണ് പിടികൂടിയത്. ബിയർ തണുപ്പിച്ച് കൊടുക്കുന്ന രീതിയാണ് ഇവർ സ്വീകരിച്ചിരുന്നത്.

15.5 ലിറ്റർ മദ്യവുമായി യുവാവ് പിടിയിൽ

പറവൂർ: വിൽപ്പനയ്ക്കായി വീട്ടിൽ സൂക്ഷിച്ചിരുന്ന 15.5 ലിറ്റർ ഇന്ത്യൻ നിർമിത മദ്യവുമായി യുവാവ് പിടിയിൽ. പുത്തൻവേലിക്കര ഇളന്തിക്കര കീഴുപ്പാടം മുട്ടിക്കൽ എം.എ. സനോജിനെ (42) പോലീസ് അറസ്‌റ്റ് ചെയ്തു. ബവറേജസ് കോർപറേഷന്‍റെ വിവിധ ഔ‌ട്ട്‌ലെറ്റുകളിൽനിന്നു വാങ്ങിയ മദ്യം വിലകൂട്ടി വിൽപ്പന നടത്തിയിരുന്ന സനോജിന്‍റെ വീട്ടിൽ ചില്ലറ വിൽപ്പനയും ഉണ്ടായിരുന്നതായി പോലീസ് പറഞ്ഞു. പുത്തൻവേലിക്കര ഇൻസ്പെക്‌ടർ സിദ്ദിഖ് അബ്‌ദുൽ ഖാദറിന്‍റെയും എസ്ഐ വിക്കി ജോസഫിന്‍റെയും നേതൃത്വത്തിലുള്ള സംഘമാണ് സനോജിനെ പിടികൂടിയത്. പ്രതിയെ കോടതിയിൽ ഹാജരാക്കി റിമാൻഡ് ചെയ്തു.

Deepika.com

The Largest Read Malayalam Internet Daily

Quick Links

Rashtra Deepika LTD

Deepika.com

The Largest Read Malayalam Internet Daily

Local News

Quick Links

Rashtra Deepika LTD