ADVERTISEMENT

ADVERTISEMENT

സംയുക്ത കുരിശിന്‍റെവഴി നടത്തി

ആര്യങ്കാവ് : ആര്യങ്കാവിൽ കത്തോലിക്കാ ദേവാലയങ്ങൾ ഒന്ന് ചേർന്നുള്ള സംയുക്ത കുരിശിന്‍റെവഴി നടത്തി.

മുരുക പാഞ്ചാൽ മുതൽ ഇടപ്പാളയം പള്ളി വരെ സെന്‍റ് മേരീസ്‌ ആര്യങ്കാവ്, സെന്‍റ് ജോർജ് ഇടപ്പളയം, സെന്‍റ് ജോർജ്‌ മലങ്കര ദേവാലയം ആര്യങ്കാവ്, നെടുമ്പാറ, പുളിയറ, പുലരി ദേവാലയങ്ങളിലെ വിശ്വാസി കൾ കുരിശിന്‍റെ വഴിയിൽ പങ്കെടുത്തു.

ADVERTISEMENT

ആദിവാസി ദളിത് മുന്നേറ്റ സമിതി

കുളത്തൂപ്പുഴ: ഡോ.ബി.ആർ. അംബേദ്കറുടെ ജന്മദിനം ആദിവാസി ദളിത് മുന്നേറ്റ സമിതിയുടെ നേതൃത്വത്തിൽ അരിപ്പ സമരഭൂമിയിൽ ആഘോഷിച്ചു. അംബേദ്കറുടെ ഛായാ ചിത്രത്തിനു മുന്നിൽ പുഷ്പാർച്ചന നടത്തി. എഡിഎംഎസ് സംസ്ഥാന സെക്രട്ടറി വി. രമേശൻ ഉദ്ഘാടനം ചെയ്തു. ജില്ലാ സെക്രട്ടറി വി.എസ്.വിജയൻ അധ്യക്ഷത വഹിച്ചു. സുലേഖബീവി, സുനിൽ അച്ചൻകോവിൽ, വി. ചന്ദ്രശേഖരൻ, പുഷ്പ അപ്പുക്കുട്ടൻ, അമ്മിണി ചെങ്ങറ, പാപ്പൻ വിതുര, ശ്രീജിത്ത്, തുടങ്ങിയവർ നേതൃത്വം നൽകി.

ശനിയാഴ്ച നിയന്ത്രിതഅവധി നൽകണമെന്ന്

കൊല്ലം : ദുഃഖവെള്ളിയാഴ്ചയുടെ അടുത്ത ദിവസമായ ശനിയാഴ്ച ക്രൈസ്തവ വിശ്വാസികളായ സർക്കാർ ജീവനക്കാർക്ക് നിയന്ത്രിത അവധി നൽകണമെന്ന് മഹാത്മാഗാന്ധി സാംസ്കാരിക സമിതി ആവശ്യപ്പെട്ടു. പ്രസിഡന്‍റ് സജീവ്പരിശവിള ഉദ്ഘാടനം ചെയ്തു.അഡ്വ.എം.ജി.ജയകൃഷ്ണൻ അധ്യക്ഷനായിരുന്നു. കണ്ണനല്ലൂർ നിസാം,ആന്‍റണി വടക്കുംതല, പ്രജീഷ് രാമകൃഷ്ണൻ, എം.മാത്യൂസ്, ഷീബ എന്നിവർ പ്രസംഗിച്ചു.

അംബേദ്കർ ജയന്തി ദിനം ആചരിച്ചു

കൊട്ടാരക്കര : കെപിഎംഎസ് കൊട്ടാരക്കര താലൂക്ക് യൂണിയന്‍റെ നേതൃത്വത്തിൽ അംബേദ്കർ ജയന്തി ദിനം ആചരിച്ചു. കൊട്ടാരക്കര ബ്ലോക്ക് പഞ്ചായത്ത് പ്രസിഡൻ്റ് എ. അഭിലാഷ് ഉദ്ഘാടനം ചെയ്തു. കോട്ടാത്തല സുരേഷ് അദ്ധ്യക്ഷത വഹിച്ചു. ബ്ലോക്ക് പഞ്ചായത്ത് അംഗം എം.ശിവപ്രസാദ് മുഖ്യ പ്രഭാഷണം നടത്തി. എ. കെ.മനോജ്,പ്രദീപ് പുല്ലാമല, സുദേവൻ, അഡ്വ. അമൽ കൃഷ്ണ, സജിമോൻ, അരുൺ പുത്തൂർ, ബസന്ത് കൃഷ്ണകുമാർ അജിത, ബീനഇടവട്ടം, പ്രദീപ് ചിറ്റിക്കോട് എന്നിവർ പ്രസംഗിച്ചു.

അംബേദ്കർ അനുസ്മരണ യോഗം

കൊട്ടാരക്കര: ഡോ. ബി. ആർ അംബേദ്കറുടെ ജയന്തിദിനത്തിൽ കൊട്ടാരക്കര ബ്ലോക്ക്‌ കോൺഗ്രസ് കമ്മിറ്റിയുടെ നേതൃത്വത്തിൽ കോൺഗ്രസ് ഭവനിൽ പുഷ്പാർച്ചന നടത്തി. അനുസ്മരണ യോഗത്തിൽബ്ലോക്ക് പ്രസിഡന്‍റ് കെ. ജി. അലക്സ്‌ അധ്യക്ഷത വഹിച്ചു. അഡ്വ. ബ്രിജേഷ് ഏബ്രഹാം, പാത്തല രാഘവൻ, ഒ. രാജൻ, ബേബി പടിഞ്ഞാറ്റിൻകര, അനീഷ് മംഗലത്ത്, കോശി. കെ ജോൺ, ആർ. മധു, സാംസൺ വാളകം,ജലജശ്രീകുമാർ, എം. സി. ജോൺസൻ,ശിവൻ പിള്ള, ഉണ്ണി കൃഷ്ണൻ, രമാ പ്രസാദ്, അരുൺകുമാർ, ദേവരാജൻ തുടങ്ങിയവർ നേതൃത്വം നൽകി.

ഗവർണറുടെ കാർ അപകടത്തിൽപ്പെട്ടു

കൊട്ടാരക്കര: ഗവർണറുടെ കാർ അപകടത്തിൽ പെട്ടു. മുൻപേ പോയ കാറുകളിലിടിച്ചാണ് അപകടമുണ്ടായത്. കാറിൽ ഗവർണർ ഉണ്ടായിരുന്നില്ല. ഇന്നലെ വൈകിട്ട് 5.30 ഓടെ കൊട്ടാരക്കര ലോവർ കരിക്കത്താണ് അപകടമുണ്ടായത്. ഗവർണറെ കൂട്ടികൊണ്ടുവരാൻ എറണാകുകുളത്തേക്ക് പോവുകയായിരുന്നു കാർ. പിന്നാലെ അകമ്പടി വാഹനവുമുണ്ടായിരുന്നു. മുന്നിൽ പോയ കാറിൽ ഗവർണറുടെ കാർ ഇടിച്ചതിനെ തുടർന്ന് കാർ അതിനു മുന്നിൽ പോയ കാറിൽ ഇടിക്കുകയായിരുന്നു. രണ്ട് കാറുകൾക്കും കേടുപാടുകൾ പറ്റി. ആർക്കും പരിക്കില്ല. ഇതിനിടയിൽ ഒരു കാറിന്‍റെ ഡ്രൈവർ അകമ്പടി വാഹനത്തിലെ പോലീസുകാരനെ അടിച്ചു. ഇയാളെ കൊട്ടാരക്കര പോലീസ് കസ്റ്റഡിയിലെടുത്തു.

മാര്‍ച്ചും ധര്‍ണയും നടത്തി

അഞ്ചല്‍ : ഏരൂര്‍ ഗ്രാമപഞ്ചായത്തില്‍ അഴിമതിയും കെടുകാര്യസ്ഥതയും കൊടികുത്തി വാഴുകയാണെന്ന് ബിജെപി ആരോപിച്ചു. പഞ്ചായത്തിലെ ഇടതുമുന്നണി ഭരണം അഴിമതി നിറഞ്ഞതാണെന്നും അവതരിപ്പിച്ച ബജ്റ്റിന് പേപ്പറിന്‍റെ വിലപോലും ഇല്ലന്നും മാട്ടിറച്ചി സ്റ്റാളുകളുടെ ലേലത്തില്‍ ഉള്‍പ്പടെ നടന്നിരിക്കുന്നത് വലിയ ക്രമക്കേടാണെന്നും ബിജെപി ആരോപിച്ചു. ഇക്കാര്യങ്ങളില്‍ അന്വേഷണം ആവശ്യപ്പെട്ടുകൊണ്ട് ഏരൂര്‍ പഞ്ചായത്ത് സമിതിയുടെ നേതൃത്വത്തില്‍ പഞ്ചായത്ത് ഓഫീസിലേക്ക് മാര്‍ച്ചും ധര്‍ണയും സംഘടിപ്പിച്ചു. സ്കൂള്‍ ജംഗ്ഷനില്‍ നിന്നും ആരംഭിച്ച മാര്‍ച്ച് പഞ്ചായത്ത് ഓഫീസ് പടിക്കല്‍ പോലീസ് തടഞ്ഞു. തുടര്‍ന്നു നടന്ന ധർണ ബിജെപി സംസ്ഥാന കൗൺസിൽ അംഗം ഉമേഷ് ബാബു ഉദ്ഘാടനം ചെയ്തു. പഞ്ചായത്ത് സമിതി പ്രസിഡന്‍റ് അഖിലിന്‍റെ ആധ്യക്ഷതയില്‍ നടന്ന പ്രതിഷേധത്തില്‍ ജില്ലാ കമ്മറ്റി അംഗങ്ങൾ ആയ സുമൻ ശ്രീനിവാസൻ, അലഞ്ചേരി ജയചന്ദ്രൻ, മണ്ഡലം ജനറൽ സെക്രട്ടറി ബാലചന്ദ്രൻ പിള്ള, മണ്ഡലം വൈസ് പ്രസിഡന്‍റ് അനിൽകുമാർ മഹിളാ മോർച്ച മണ്ഡലം പ്രസിഡന്‍റ് ചന്ദ്രലേഖ, നേതാക്കളായ വിഷ്ണു, കൃഷ്ണൻ കുട്ടി, സുരേഷ് ബാബു, സുജാത എന്നിവർ പ്രസംഗിച്ചു.

ആരാധനാലയങ്ങൾ രാഷ്‌ട്രീയ വത്കരിക്കരുത്: ബിന്ദു കൃഷ്ണ

കൊല്ലം: കൊല്ലം പൂരത്തിൽ നടന്ന കുടമാറ്റത്തിൽ ലോകത്തിന് മാതൃകയായ നവോത്ഥാന നായകർക്ക് ഒപ്പം ആർഎസ്എസ് സ്ഥാപകൻ ഹെഗ്‌ഡേവാറിന്‍റെ ചിത്രം ഉയർത്തിയത് ആരാധനാലയങ്ങൾ രാഷഷ്‌ട്രീീയ വത്്കരിക്കരുത് എന്നുള്ള ഹൈകോടതി വിധിയുടെ ഗുരുതരമായ ലംഘനം ആണെന്ന് കെ പി സി സി രാഷ്ട്രീയകാര്യസമിതിയംഗം ബിന്ദുകൃഷ്ണ. ഇത്തരം ദുഷിച്ച പ്രവണതകൾ കേരളിയ സമുഹത്തിൽ വർഗീയതയുടെ വിഷവിത്തുകൾ വളരാനെ ഉപകരിക്കുകയുള്ളു എന്നും ആരാധനാലയങ്ങൾ വിശ്വാസികൾക്ക് മാത്രം ഉള്ളതാണന്നും അവിടെങ്ങളെ അന്ധമായി രാഷ്‌ട്രീയവത്കരിക്കരുത് എന്നുള്ള തിരിച്ചറിവ് സിപിഎമ്മുകാർക്കും ബി ജെ പിക്കാർക്കും ഉണ്ടാകണമെന്നും ബിന്ദുകൃഷ്ണ പറഞ്ഞു. ഇത്തരം സംഭവങ്ങൾ ആവർത്തിക്കുന്നത് ആഭ്യന്തര വകുപ്പിന്‍റെയും ദേവസ്വം ബോർഡിന്‍റെയും പിടിപ്പ്‌കേടും കൊണ്ടാണ്. യഥാർത്ഥ വിശ്വാസികൾക്ക് വേദനയുളവാക്കുന്ന ഇത്തരം സംഭവങ്ങൾ ആവർത്തിക്കാതിരിക്കാൻ വേണ്ട ശക്തമായ നടപടി സർക്കാർ സ്വീകരിക്കണമെന്നും ബിന്ദുകൃഷ്ണ ആവശ്യപ്പെട്ടു.

വനപാത മാലിന്യങ്ങളാല്‍ സമൃദ്ധം; കണ്ണടച്ച് വനപാലകര്‍

അഞ്ചല്‍: അലയമണ്‍-കുളത്തൂപ്പുഴ പഞ്ചായത്തുകളെ ബന്ധിപ്പിക്കുന്ന വനപാതയിലൂടെ മൂക്ക് പൊത്താതെ യാത്രചെയ്യാനാവില്ല. മടത്തറ പാലോട് നെടുമങ്ങാട് ഭാഗങ്ങളില്‍ നിന്നുള്ളവര്‍ക്ക് കുളത്തൂപ്പുഴ വഴി ചുറ്റാതെ വേഗത്തില്‍ അഞ്ചല്‍, പുനലൂര്‍ ഭാഗങ്ങളില്‍ എത്താന്‍ കഴിയുന്ന പാത നിലവിൽ മാലിന്യം തള്ളുന്ന കേന്ദ്രമായി മാറിയിരിക്കുകയാണ്. കുടുക്കത്തുപാറ ഇക്കോടൂറിസത്തിലേക്ക് എത്താന്‍ കഴിയുന്ന മലയോര പാതയിലൂടെ നിത്യവും സ്വകാര്യ ബസുകള്‍ ഉള്‍പ്പടെ നിരവധി വാഹനങ്ങള്‍ ആണ് കടന്നുപോകുന്നത്. മാലിന്യം ഭക്ഷിക്കാന്‍ എത്തുന്ന കാട്ടുപന്നികള്‍, തെരുവ് നായക്കള്‍ എന്നിവയുടെ ശല്ല്യം വാഹനങ്ങൾക്കും പ്രത്യേകിച്ച് ഇരു ചക്ര വാഹന യാത്രക്കും ദുസഹമായിട്ടുണ്ട്. വനം വകുപ്പിന്‍റെ അഞ്ചല്‍ റേഞ്ച്, കേരള ഫോറസ്റ്റ് ഡവലപ്മെന്‍റ് കോര്‍പ്പറേഷന്‍ തുടങ്ങിവയയുടെ അധികാരപരിധിയിലുള്ള പാതയോരത്ത് കക്കൂസ് മാലിന്യം, അറവു മാലിന്യം, കോഴിവേസ്റ്റ്, കെട്ടിട വേസ്റ്റ്, കുട്ടികളുടെ ഉപയോഗിച്ച പാമ്പേഴ്സ്, പച്ചക്കറി വേസ്റ്റ്, ബാർബർ ഷോപ്പിൽ നിന്നുള്ള തലമുടി, പഴകിയ തുരുമ്പ് പിടിച്ച ബ്ലൈഡ് ഉൾപ്പെടെ വലിയ അളവിലുള്ള മാലിന്യങ്ങളാണ് ഇവിടെ തള്ളപ്പെടുന്നത്. ഡിസ്പോസിബിള്‍ പ്ലേറ്റ്, ഗ്ലാസുകള്‍ ഉള്‍പ്പടെ വലിയ അളവില്‍ പ്ലാസ്റ്റിക് മാലിന്യവും പാതയോരത്ത് ടണ്‍ കണക്കിന് തള്ളിയിരിക്കുന്നു. മാലിന്യങ്ങള്‍ കാക്കകള്‍ കൊത്തിവലിച്ചു വീടുകളിലെ കിണറുകളില്‍ ഇടുന്നത് നിത്യസംഭവമായിട്ടുണ്ട്. നവകേരളം പദ്ധതിയുടെ ഭാഗമായി ഗ്രാമ പഞ്ചായത്തുകൾ മാലിന്യ നിക്ഷേപങ്ങള്‍ക്കെതിരേ കര്‍ശന നടപടികള്‍ സ്വീകരിച്ച് തുടങ്ങിയതോടെയാണ് ആളൊഴിഞ്ഞ വനപാതകള്‍ മാലിന്യം തള്ളുന്നതിനായി സാമൂഹിക വിരുദ്ധര്‍ തെരഞ്ഞെടുത്തിരിക്കുന്നത്. വനപാതയിലെ മാലിന്യം നിക്ഷേപിക്കുന്നത് പലതവണ വനംവകുപ്പ് അധികൃതരെ അറിയിച്ചിട്ടും നടപടിയില്ലന്നു നാട്ടുകാര്‍ ആരോപിക്കുന്നു. വനപാത ആയതിനാല്‍ ഗ്രാമപഞ്ചായത്തിനും മാലിന്യ നിക്ഷേപം തടയാന്‍ കഴിയാത്ത സാഹചര്യമാണ് ഉള്ളത്. വനം പോലീസ് വകുപ്പുകള്‍ രാത്രികാല പെട്രോളിംഗ് നടത്തണമെന്ന ആവസശ്യമാണുയരുന്നത്. പരാതികള്‍ ഉയര്‍ന്നപ്പോള്‍ നിരീക്ഷണ കാമറകളും ചെക്ക്പോസ്റ്റും സ്ഥാപിക്കുമെന്ന് വനം വകുപ്പ് പറഞ്ഞിരുന്നു. എന്നാല്‍ ഇതിനുള്ള നടപടികള്‍ ഒന്നും പിന്നീട് ഉണ്ടായിട്ടില്ല.

ആശാ സമരത്തോട് നിഷേധാത്മക സമീപനമെന്ന്

കൊല്ലം: കിഫ്ബിയുടെ പേരിൽ കെ. എം. എബ്രഹാമിന് ആറേ മുക്കാൽ ലക്ഷം രൂപ മാസ ശമ്പളവും പിഎസ്‌സി ചെയർമാനും അംഗങ്ങൾക്കും ലക്ഷങ്ങളുടെ ശമ്പള വർദ്ധവനും മറ്റ് ആനുകൂല്യങ്ങളും, കെ. വി.തോമസിന് ലക്ഷങ്ങൾ നോക്ക് കൂലിയും നൽകുന്ന സർക്കാർ ആശാ വർക്കർമാരുടെ ന്യായമായ സമരത്തിന് മുന്നിൽ സാമ്പത്തിക ബാധ്യതയെ കുറിച്ച് പറയുന്നത് ലജ്ജാകരമാണെന്ന് ഐഎൻടിയു സി ജില്ലാ പ്രസിഡന്‍റ് എ. കെ. ഹഫീസ് പ്രസ്താവനയിൽ പറഞ്ഞു. ആശാ വർക്കർമാരെ സർക്കാർ ജീവനക്കാരായി അംഗീകരിച്ച് അവർക്ക് മാസ ശമ്പളവും ആനുകൂല്യങ്ങളും അനുവദിക്കണമെന്ന് ഹഫീസ് ആവശ്യപ്പെട്ടു.

കൊട്ടാരക്കര ഡിഇഒ ഓഫീസിൽ ബോംബ് ഭീഷണി

കൊട്ടാരക്കര: ജില്ലാ വിദ്യാഭ്യാസ ഓഫീസറുടെ കാര്യാലയത്തിൽ ബോംബ് ഭീഷണി. തുടർന്ന് പ്രവർത്തനം നിർത്തിവച്ച് പരിശോധന നടന്നു. പുലർച്ചെ നാലുമണിയോടെ ഇ-മെയിലായാണ് ബോംബ് ഭീഷണി സന്ദേശം എത്തുന്നത്. എഐഎഡിഎംകെ നേതാവ് പളനി സ്വാമിയെ മാറ്റണമെന്നാവശ്യപ്പെട്ടാണ് ബോംബ് വച്ചിരിക്കുന്നതെന്നും ഭീഷണി സന്ദേശത്തിലുണ്ട്. രാവിലെ ജീവനക്കാരെത്തി മെയിൽ പരിശോധിക്കുമ്പോഴാണ് സന്ദേശം കാണുന്നത്. ഉടൻ പോലീസിനെ വിവരമറിയിക്കുകയായിരുന്നു. പോലീസും ബോംബ് സ്ക്വാഡും ഡോഗ് സ്ക്വാഡുമെത്തി പരിശോധന നടത്തിയെങ്കിലും ഒന്നും കണ്ടെത്താനായില്ല. ജീവനക്കാരെയും പൊതുജനങ്ങളെയും ഓഫീസ് വളപ്പിൽ നിന്നും പുറത്താക്കി പരിശോധന നടത്തി. സമീപത്തെ മറ്റു കെട്ടിടങ്ങളിലും പരിശോധന നടന്നു.

സി.ആർ. മഹേഷ് എംഎൽഎയുമായി ചർച്ച നടത്തി

കൊല്ലം: യുണൈറ്റഡ് മർച്ചൻ്സ് ചേമ്പർ, പുള്ളിമാൻ സാംസ്കാരിക വേദി എന്നിവയുടെ ഭാരവാഹികൾ സി. ആർ.മഹേഷ് എം എൽ എയുമായി ചർച്ച നടത്തി. റോഡ് വികസനം, പില്ലർ ഹൈവേ പുതിയകാവ് വരെ നീട്ടൽ, അടിപ്പാതകൾ, റെയിൽവേ വികസനം തുടങ്ങിയ നാടിന്‍റെ വികസന കാര്യങ്ങളിലായിരുന്നു ചർച്ച. എം എൽ എയുമായി എംപിയുടെ സാന്നിധ്യത്തിൽ കേന്ദ്ര മന്ത്രിമാരെ ഡൽഹിയിൽ പോയി കാണാനും നിവേദനം നൽകാനും തീരുമാനിച്ചു. ചർച്ചയിൽ യുഎംസി കൊല്ലം ജില്ലാ പ്രസിഡന്‍റ് നിജാം ബഷി,പുള്ളിമാൻ സാംസ്കാരിക വേദി ചെയർമാൻ കെ.കെ.രവി, യു എം സി.ഭാരവാഹികളായ എസ്.ഷംസുദ്ദീൻ, എന്നിവർ പങ്കെടുത്തു.

ലോട്ടറി തൊഴിലാളി യൂണിയൻ ജില്ലാ പ്രവർത്തകയോഗം

കൊല്ലം: ലോട്ടറി തൊഴിലാളി ക്ഷേമനിധി ബോർഡിൽ തട്ടിപ്പ് നടത്തിയ മുഴുവൻ പേർക്കെതിരെയും ശക്തമായ നടപടി സ്വീകരിക്കണമെന്ന് ഓൾ കേരള ലോട്ടറി ഏജന്‍റ് ആൻഡ് സെല്ലേഴ്സ് കോൺഗ്രസ് ഐഎൻടിയുസി കൊല്ലം ജില്ലാ കമ്മറ്റി ആവശ്യപ്പെട്ടു. തൊഴിലാളികളുടെ ക്ഷേമനിധി ആനുകൂല്യങ്ങൾ വൈകിപ്പിച്ചും അകാരണമായി അവരെ ക്ഷേമനിധിയിൽ നിന്നും പുറത്താക്കിയും ബോണസിൽ കാലോചിതമായ വർധനവ് വരുത്താതെയും കടുത്ത തൊഴിലാളി ദ്രോഹം ഇവർ നടത്തുമ്പോഴാണ് ഉന്നതരുടെ ഒത്താശയോടെ കോടികൾ കൊള്ള നടത്തുന്നതെന്നും ഐഎൻടിയു സി ആരോപിച്ചു. തിരൂരിൽ 26,27 തീയതികളിൽ നടക്കുന്ന യൂണിയൻ സംസ്ഥാന സമ്മേളനത്തിൽ 200 തൊഴിലാളി പ്രതിനിധികളെ പങ്കെടുപ്പിക്കാൻ യോഗം തീരുമാനിച്ചു. സംസ്ഥാന വൈസ് പ്രസിഡന്‍റ്് വടക്കേവിള ശശി യോഗം ഉദ്ഘാടനം ചെയ്തു. ജില്ലാ പ്രസിഡന്‍റ് ഒ.ബി. രാജേഷ് അധ്യക്ഷത വഹിച്ചു. ഭാരവാഹികളായ വിളയത്ത് രാധാകൃഷ്ണൻ, ചവറ ഹരീഷ്, എച്ച് താജുദ്ദീൻ, കുണ്ടറ സുബ്രഹ്മണ്യം, റഹീം ചൂളൂർ, മുനീർ ബാനു, അശോകൻ, വൈശാഖ് വി. പിള്ള, ഷുജാ ഷാഹുൽ തുടങ്ങിയവർ പ്രസംഗിച്ചു.

നാലംഗ സംഘം ബസ് കണ്ടക്ടറെ മർദിച്ചു

അഞ്ചൽ: സ്വകാര്യബസ് കണ്ടക്ടറെ ഇരുചക്ര വാഹനങ്ങളിലെത്തിയ നാലംഗ സംഘം മർദിച്ചു. മടത്തറ വേങ്കൊല്ല റാഷിദ് മൻസിലിൽ റാഷിദ് (20) നാണ് മർദനമേറ്റത്. കഴിഞ്ഞ ദിവസം രാവിലെ ഏഴേകാലോടെ ഏരൂര്‍ വിളക്കുപാറയിലാണ് സംഭവം. വിളക്കുപാറ - അഞ്ചൽ -കടയ്ക്കൽ - ചടയമംഗലം റൂട്ടിൽ സർവീസ് നടത്തുന്ന അജ്മി ബസിലെ കണ്ടക്ടറാണ് റാഷിദ്. വിളക്കുപാറയില്‍ പുലര്‍ച്ചെയെത്തിയ സംഘം ബസ് വരുന്നതും കാത്ത് കടത്തിണയില്‍ കാത്തിരിക്കുന്നതിന്‍റെ സിസിടിവി ദൃശ്യങ്ങള്‍ പോലീസിന് കിട്ടിയിട്ടുണ്ട്. ബൈക്കിലും സ്കൂട്ടിയിലുമായെത്തിയ നാലംഗ സംഘം ബസിൽ നിന്നും റാഷിദിനെ വലിച്ചിറക്കി ക്രൂരമായി മർദ്ദിക്കുകയായിരുന്നു. ഭക്ഷണം കഴിക്കുവാനായി പോയ ബസ് ഡ്രൈവർ ബഹളം കേട്ട് ഓടി വന്നപ്പോഴേക്കും അക്രമികൾ ബൈക്കിലും സ്കൂട്ടിയിലും കയറി രക്ഷപെടുകയായിരുന്നു. തലയ്ക്കും കൈകാലുകൾക്കും ഗുരുതരമായി പരിക്കേറ്റ റാഷിദിനെ ഡ്രൈവറും നാട്ടുകാരും ചേർന്ന് അഞ്ചലിലെ സ്വകാര്യ ആശുപത്രിയിലും തുടർന്ന് പുനലൂർ താലൂക്കാശുപത്രിയിലും പ്രവേശിപ്പിച്ചു. ബസിൽ നിന്നും വലിച്ചിറക്കിയ തന്നെ റോഡിൽ കിടന്ന റബർ കമ്പ് ഉപയോഗിച്ച് നാലുപേരും ചേർന്ന് മർദിച്ചെന്നും താനുമായി പരിചയത്തിലുള്ള ഒരു പെൺകുട്ടിയുടെ പേര് പറഞ്ഞാണ് മർദിച്ചതെന്നും റാഷിദ് പറയുന്നു. അക്രമികളുമായി മുൻ പരിചയം ഇല്ലെന്നും റാഷിദ് വ്യക്തമാക്കി. റാഷിദിന്‍റെ മൊഴി ഉള്‍പ്പടെ രേഖപ്പെടുത്തിയ പോലീസ് അന്വേഷണം നടത്തി വരികയാണ്.

നിയന്ത്രണം വിട്ട കാർ പാതയോരത്തെ വീട്ടുമുറ്റത്തേക്ക് തലകീഴായി മറിഞ്ഞു

കുളത്തൂപ്പുഴ :നിർമാണത്തിലെ പിഴവുമൂലം മലയോര ഹൈവേയിൽ അപകടങ്ങൾ പതിവാകുന്നതായി പരാതി. കുളത്തൂപ്പുഴ മടത്തറ പാതയിൽ നിയന്ത്രണം വിട്ടകാർ ഇന്നലെ പാതയോരത്തെ വീട്ടുമുറ്റത്തേക്ക് തലകീഴായി മറിഞ്ഞു. രാത്രി മൈലമൂട് ജംഗ്ഷനു സമീപമായിരുന്നു അപകടം. തെന്മല സ്വദേശികളായ കുടുംബം മടത്തറ ബന്ധുവീട്ടിലേക്ക് പോകവേ മൈലമൂട് വളവിൽ വച്ച് നിയന്ത്രണംവിട്ട കാർ എതിർവശത്തെ വീട്ടുമുറ്റത്തേക്ക് പതിക്കുകയായിരുന്നു. കഴിഞ്ഞ ദിവസം പെയ്ത മഴയിൽ സമീപത്തെ കുന്നിൻ മുകളിൽ നിന്നും പാതയിലൂടെ ചരലും മണ്ണും ചെളിയും ഒലിച്ചെത്തി ഹൈവേയുടെ ഒരു വശത്ത് തിട്ട പോലെ രൂപപ്പെട്ടതാണ് കാരണം. ശബ്ദം കേട്ട് ഓടിക്കൂടിയ നാട്ടുകാരും സമീപത്തെ വീട്ടുകാരും ചേർന്ന് അപകടത്തിൽപ്പെട്ട കാറിൽ സഞ്ചരിച്ചിരുന്ന പിഞ്ചുകുഞ്ഞ് അടക്കമുള്ളവരെ പുറത്തെത്തിച്ചു. ഇവർക്ക് കുളത്തൂപ്പുഴ സാമൂഹ്യ ആരോഗ്യ കേന്ദ്രത്തിൽ പ്രാഥമിക ശുശ്രൂഷ നൽകി.

101 അമ്മമാര്‍ സന്ദേശമുയര്‍ത്തി; ഗാന്ധിഭവന്‍റെ ലഹരിവിരുദ്ധ പ്രചാരണത്തിന് തുടക്കമായി

പത്തനാപുരം : നടി ശ്രീലത നമ്പൂതിരി ലഹരിവിരുദ്ധ ‍ പ്രതിജ്ഞ ചൊല്ലി കൊണ്ട് ഗാന്ധിഭവനില്‍ ലഹരി വിരുദ്ധ പ്രചാരണ പരിപാടിക്ക് തുടക്കമായി. ഗാന്ധിഭവനിലെ അന്തേവാസികളായ 101 അമ്മമാര്‍ 'ഞങ്ങള്‍ക്ക് ലഹരി വേണ്ട, ജീവിതം മതി' എന്ന സന്ദേശമെഴുതിയ പ്ലക്കാര്‍ഡുകള്‍ ഉയര്‍ത്തിപ്പിടിച്ചപ്പോള്‍ ഗാന്ധിഭവനിലെ നൂറോളം കുട്ടികളും സന്ദര്‍ശകരായെത്തിയ വിദ്യാര്‍ഥികളുള്‍പ്പെടെയുള്ളവരും പ്രതിജ്ഞ ഏറ്റുചൊല്ലി. സ്‌കൂളുകള്‍, കോളജുകള്‍, കുടുംബശ്രീകള്‍, ക്ലബുകള്‍, സന്നദ്ധ കൂട്ടായ്മകള്‍ വഴി ലഹരിക്കെതിരേ വ്യാപകമായ പ്രചരണം നടത്തുകയാണ് ഗാന്ധിഭവന്‍ പദ്ധതിയിലൂടെ ഉദ്ദേശിക്കുന്നത്. ഗാന്ധിഭവന്‍ സെക്രട്ടറി പുനലൂര്‍ സോമരാജന്‍ അധ്യക്ഷത വഹിച്ച ചടങ്ങില്‍ അലക്‌സാണ്ടര്‍ യേശുദാസന്‍, വി. സരളാഭായി, ആര്‍. ദിലീപ് കുമാര്‍ എന്നിവര്‍ പ്രസംഗിച്ചു.

കർഷക തൊഴിലാളി പെന്‍ഷന്‍ 5000 രൂപയാക്കണം: ഡികെടിഎഫ്

കൊല്ലം: കര്‍ഷക തൊഴിലാളി പെന്‍ഷന്‍ പ്രതിമാസം 5000 രൂപയാക്കി ഉയര്‍ത്തണമെന്ന് ദേശീയ കര്‍ഷക തൊഴിലാളി ഫെഡറേഷന്‍ ജില്ലാ നേതൃയോഗം സര്‍ക്കാരിനോട് ആവശ്യപ്പെട്ടു. പത്തു വര്‍ഷമായി മുടങ്ങിക്കിടക്കുന്ന അതിവര്‍ഷാനുകൂല്യങ്ങള്‍ നല്‍കുന്നതിന് ആവശ്യമായ ഫണ്ട് സര്‍ക്കാര്‍ ക്ഷേമനിധി ബോര്‍ഡിന് നല്‍കുക, പെന്‍ഷന്‍ അനുവദിക്കുന്നതിനുളള ഉപാധികള്‍ ഒഴിവാക്കുക എന്നീ ആവശ്യങ്ങള്‍ക്കായി തൊഴില്‍ വകുപ്പ് മന്ത്രിയ്ക്ക് നിവേദനം നല്‍കുന്നതിനും യോഗം തീരുമാനിച്ചു. നേതൃയോഗം ജില്ലാ പ്രസിഡന്‍റ് പി.ശിവാനന്ദന്‍ ഉദ്‌ഘാടനം ചെയ്തു. ജില്ലാ വൈസ്പ്രസിഡന്‍റ് കുണ്ടറ സുബ്രഹ്മണ്യം അധ്യക്ഷത വഹിച്ചു. സംസ്ഥാന ഭാരവാഹികളായ ആര്‍.ഡി.പ്രകാശ്, പോരുവഴി ജലീല്‍, ആദിനാട് ശിവാനന്ദന്‍, ഡി.വിജയന്‍, ജി.ആര്‍.നരേന്ദ്രനാഥ്, വൈ.ജോയി, കരിക്കോട് ഷറഫ്, ഇളമാട് ഷാജി, രാഘവന്‍പിളള, റജികുമാര്‍, ജി.കാര്‍ത്തികേയന്‍, ഉണ്ണി ഇളമാട്, സീതാഗോപാല്‍ എന്നിവര്‍ പ്രസംഗിച്ചു.

പന്മന ആശ്രമ തീർഥാടനം 26 മുതൽ

കൊല്ലം: ചട്ടമ്പി സ്വാമികളുടെ സമാധി വാർഷികാചരണവും പന്മന ആശ്രമ തീർഥാടനവും 26 മുതൽ 29 വരെ പന്മന ആശ്രമത്തിൽ നടക്കും. തീർഥാടനത്തിന് തുടക്കം കുറിച്ച് മഠാധിപതി കൃഷ്ണമയാനന്ദ തീർഥപാദരും ആശ്രമ ആചാര്യൻ സ്വാമി നിത്യ സ്വരൂപാനന്ദയും ചേർന്ന് 26 ന് രാവിലെ എട്ടിന് ദീപം തെളിക്കും. കുമ്പളത്ത് ശങ്കുപ്പിള്ള അനുസ്മരണ ചടങ്ങുകൾക്ക് പ്രാരംഭം കുറിച്ച് കുമ്പളം സ്മൃതി മണ്ഡപത്തിൽ പന്മന ആശ്രമം ട്രസ്റ്റ് പ്രസിഡന്‍റ് കുമ്പളത്ത് വിജയകൃഷ്ണപിള്ള ഭദ്രദീപം പ്രകാശിപ്പിക്കും. 10.30 ന് ചേരുന്ന കുമ്പളത്ത് ശങ്കുപ്പിള്ള അനുസ്മരണ സമ്മേളനം മുൻ മന്ത്രി രമേശ് ചെന്നിത്തല ഉദ്ഘാടനം ചെയ്യും. സിപിഎം ജനറൽ സെക്രട്ടറി എം.എ. ബേബി മുഖ്യാതിഥിയായി പങ്കെടുക്കും. എൻ. കെ.പ്രേമചന്ദ്രൻ എംപി മുഖ്യപ്രഭാഷണം നടത്തും. 27 ന് രാവിലെ പത്തിന് ശാസ്ത്ര സമ്മേളനം ഡോ.സുജിത് വിജയൻ പിള്ള എംഎൽഎ ഉദ്ഘാടനം ചെയ്യും. കേരള അക്കാഡമി ഓഫ് സയൻസ് പ്രസിഡന്‍റ് ഡോ.ജി.എം. നായർ അധ്യക്ഷത വഹിക്കും. കേരള യൂണിവേഴ്സിറ്റി ഹെൽത്ത് സയൻസ് വിഭാഗം മുൻ വൈസ് ചാൻസിലർ ഡോ. എം.കെ. സി. നായർ മുഖ്യ പ്രഭാഷണം നടത്തും. 11 മുതൽ ശാസ്ത്ര സെമിനാർ. 28 ന് രാവിലെ 10.30 ന് യുവജന സമ്മേളനം മുൻ ഡിജിപി ജേക്കബ് പുന്നൂസ് ഉദ്ഘാടനം ചെയ്യും. ആർഎസ്പി സംസ്ഥാന സെക്രട്ടറി ഷിബു ബേബി ജോൺ അധ്യക്ഷത വഹിക്കും. പന്മന ആശ്രമം ആചാര്യൻ സ്വാമി നിത്യ സ്വരൂപാനന്ദ, സ്വാമി പ്രണവാനന്ദ തീർഥപാദർ അനുസ്മരണ പ്രഭാഷണം നടത്തും. വർധിച്ച് വരുന്ന അധാർമികത എന്ന വിഷയത്തിൽ ഡോ. എൻ. ഗോപാലകൃഷ്ണൻ നായരും യുവജനങ്ങളും രാഷ്‌ട്ര നിർമിതിയും എന്ന വിഷയത്തിൽ പ്രഫ. ബി. കാർത്തികേയൻ നായരും പ്രഭാഷണം നടത്തും. 29 ന് രാവിലെ 10.30 ന് സമാധി സമ്മേളനം മഹാ മണ്ഡലേശ്വർ ആനന്ദവനം ഭാരതി സ്വാമികൾ ഉദ്ഘാടനം ചെയ്യും. പ്രജ്ഞാനന്ദ തീർഥപാദർ അധ്യക്ഷത വഹിക്കും. സ്വാമി കൃഷ്ണമയാനന്ദ തീർഥപാദർ വിദ്യാധിരാജ സന്ദേശം നൽകും. ഉച്ചകഴിഞ്ഞ് 2.30 ന് സമാധി ദിവ്യജ്യോതി പ്രയാണം, രാത്രി ഏഴിന് മേജർ സെറ്റ് കഥകളി.

വന്യജീവി ശല്യം: ശാശ്വത പരിഹാരം വേണമെന്ന് ഐക്യ കർഷക സംഘം

കൊല്ലം: വർധിച്ചു വരുന്ന വന്യജീവി ശല്യം പരിഹരിക്കുന്നതിനും മനുഷ്യന്‍റെ ജീവനും സ്വത്തിനും സംരക്ഷണം നൽകുന്നതിനും വന്യജീവി സംരക്ഷണ നിയമം ഭേദഗതി ചെയ്യണമെന്ന് ഐക്യ കർഷക സംഘം ആവശ്യപ്പെട്ടു. വന്യജീവി ശല്യം പരിഹരിക്കുന്നതിനുള്ള നടപടി സ്വീകരിക്കേണ്ട കേന്ദ്ര - സംസ്ഥാന സർക്കാരുകൾ പരസ്പരം പഴിചാരി ഉത്തരവാദിത്ത്വത്തിൽ നിന്ന് ഒഴിഞ്ഞു മാറുന്ന അവസ്ഥ അവസാനിപ്പിക്കണമെന്ന് യോഗം ആവശ്യപ്പെട്ടു. കാർഷിക മേഖലയിൽ ഇറങ്ങുന്ന വന്യജീവികളെ ഇല്ലാഴ്മ ചെയ്യുവാൻ കാർഷകർക്ക് അനുവാദം കൊടുക്കുന്നതിനുളള നിയമനിർമാണം നടപ്പാക്കുന്നതിന് സർക്കാർ നടപടികൾ സ്വീകരിക്കണമെന്നും കർഷക ക്ഷേമ ബോർഡിന്‍റെ പ്രവർത്തനം നടപ്പാക്കുന്നതിനു സംസ്ഥാന സർക്കാർ നടപടി സ്വീകരിക്കണമെന്നുംയോഗം ആവശ്യപ്പെട്ടു. ഓമനക്കുട്ടന്‍റെ അദ്ധ്യക്ഷതയിൽ ചേർന്നയോഗം എ.എ. അസിസ് ഉദ്‌ഘാടനം ചെയ്തു. കെ. ജി. വിജയദേവൻപിള്ള. കെ. എസ്. വേണുഗോപാൽ, ആർ. അജിത്കുമാർ, മഹേശ്വരൻപിള്ള, വിക്രമൻനായർ, ഉണ്ണികൃഷ്ണൻ, കെ. ജി. ഗിരിഷ് തുടങ്ങിയവർ പ്രസംഗിച്ചു.

‘അറിവിന്‍റെ ചെറുതുള്ളികൾ’; തിരുവനന്തപുരം ജേതാക്കൾ

ചവറ : ചവറ സൗത്ത് മാലിഭാഗം കാർത്തിക മന്ദിരത്തിൽ എൻ. തങ്കപ്പൻ സ്മാരക കാഷ് അവാർഡിനു വേണ്ടി നടത്തിയ ‘അറിവിന്‍റെ ചെറുതുള്ളികൾ’ - സീസൺ ഒൻപത് സംസ്ഥാന ക്വിസ് മത്സരത്തിൽ വെള്ളനാട് സ്വദേശികളായ എസ്. എൽ. ശ്രീലേഷ് - എസ്. എൽ. ശ്രീലവ്യ ടീം ഒന്നാം സ്ഥാനം സ്വന്തമാക്കി. കാസ്കറ്റ് വായനശാല സംഘടിപ്പിച്ച മത്സരം കരുനാഗപ്പള്ളി താലൂക്ക് ലൈബ്രറി കൗൺസിൽ സെക്രട്ടറി വി. വിജയകുമാർ ഉദ്ഘാടനം ചെയ്തു. പ്രസിഡന്‍റ് ബി. കെ. വിനോദ് അധ്യക്ഷത വഹിച്ചു. സെക്രട്ടറി കെ. എസ്. അനിൽ, ബാലവേദി പ്രസിഡന്‍റ് പി. ആർ. പവിത്ര എന്നിവർ പ്രസംഗിച്ചു . രതീഷ്ചന്ദ്രൻ ക്വിസ് മാസ്റ്ററായി. രണ്ടാം സ്ഥാനം നേടിയ ചവറ തെക്കുംഭാഗം സ്വദേശികളായ എസ്. മിത്ര, എ. ആർ. മീനാക്ഷി ടീം ബീന റഷീദ് സ്മാരക കാഷ് അവാർഡ് നേടി. മത്സരാർഥികൾക്ക് സർട്ടിഫിക്കറ്റുകളും മെഡലുകളും വിതരണം ചെയ്തു. സമാപന സമ്മേളനം കൃഷിവകുപ്പ് തൃശൂർ റീജണൽ ഡെപ്യൂട്ടി ഡയറക്ടർ പ്രിയൻ അലക്സ് റിബല്ലോ ഉദ്ഘാടനം ചെയ്തു. ക വായനശാല രക്ഷാധികാരി ആർ. ഷാജിശർമ, ഇ എംഎസ് സ്മാരക ചാരിറ്റബിൾ സൊസൈറ്റി സെക്രട്ടറി സി. ശശിധരൻ, താലൂക്ക് ലൈബ്രറി കൗൺസിൽ അംഗം ടി. ദിലീപ്, കാസ്കറ്റ് ക്വിസ് ക്ലബ് കോ-ഓർഡിനേറ്റർ ടി. സുമേഷ് എന്നിവർ പ്രസംഗിച്ചു.

സ്കൂട്ടറിന്‍റെ സീറ്റിനടിയില്‍നിന്നും പണം മോഷ്ടിച്ച യുവാക്കള്‍ പിടിയില്‍

കൊല്ലം: സ്കൂട്ടറിന്‍റെ സീറ്റിനടിയില്‍ നിന്നും പണം മോഷ്ടിച്ച യുവാക്കള്‍ പോലീസ് പിടിയിലായി. മയ്യനാട്, സുനാമി ഫ്ളാറ്റ് 19, തെക്കുംമൂട്, നാസര്‍ മകന്‍ തന്‍സീം (24), തഴുത്തല, ഉമയനല്ലൂര്‍, ചരുവിള പുത്തന്‍ വീട്ടില്‍ അസീബ് മകന്‍ ഇജാസ് (24) എന്നിവരാണ് ഇരവിപുരം പോലീസിന്‍റെ പിടിയിലായത്. ഭരണിക്കാവ് അമ്പലത്തിന്‍റെ കോമ്പൗണ്ടില്‍ പാര്‍ക്ക് ചെയ്തിരുന്ന തട്ടാമല സ്വദേശിയായ ഗീതയുടെ സ്കൂട്ടറിന്‍റെ സീറ്റിനടിയില്‍ സൂക്ഷിച്ചിരുന്ന നാല്‍പതിനായിരം രൂപ പ്രതികള്‍ മോഷ്ടിച്ച് കടന്ന് കളയുകയായിരുന്നു. യുവതി പോലീസില്‍ നല്‍കിയ പരാതിയുടെ അടിസ്ഥാനത്തില്‍ കേസ് രജിസ്റ്റര്‍ ചെയ്ത് നടത്തിയ അന്വേഷണത്തില്‍ പ്രതികളെ കണ്ടെത്തി പിടികൂടുകയായിരുന്നു.

കേരള അഡ്വക്കേറ്റ് ക്ലാർക്സ് അസോസിയേഷൻ ധർണ നടത്തി

കൊല്ലം: കോടതി ഫീസുകൾ വർധിപ്പിച്ചതിൽ പ്രതിഷേധിച്ച് കേരള അഡ്വക്കേറ്റ് ക്ലാർക്സ് അസോസിയേഷന്‍റെ ആഭിമുഖ്യത്തിൽ കൊല്ലം സിവിൽ സ്റ്റേഷന് മുന്നിൽ പ്രതിഷേധ ധർണ നടത്തി. കേരള ബാർ കൗൺസിൽ അംഗം അഡ്വ.സജീവ് ബാബു ഉദ്‌ഘാടനം ചെയ്തു. ശങ്കർ, സേതുലക്ഷ്മി,അഡ്വ.കൈപ്പുഴ ,വി, റാം മോഹൻ, അഡ്വ. പി. ബി. ശിവൻ, അഡ്വ. ഷൈജു മങ്ങാട്, അഡ്വ. മരത്തടി നവാസ്, അഡ്വ.പനമ്പിൽ .എസ്. ജയകുമാർ, അഡ്വ. സേതുനാഥൻ പിള്ള, അഡ്വ. സുനിൽ .സി. എസ്, മിഥിലാജ്, ശശിധരൻ പിള്ള, പി. രാജൻ,രാധാകൃഷ്ണപിള്ള, സുരേന്ദ്രൻ പിള്ള, ഷീജു, വസന്തകുമാരി, ശശിധരൻ പിള്ള മാമ്പുഴ, കൃഷ്ണൻകുട്ടി എന്നിവർ പ്രസംഗിച്ചു.

ലോകജനതയ്ക്ക് നന്മയുടെ വിത്തുപാകിയ മഹാനാണ് ഗാന്ധിജി: ഡോ.എ.നീല ലോഹിതദാസ്

പത്തനാപുരം: ലോകജനതയ്ക്ക് നന്മയുടെ വിത്തുപാകിയ മഹാനാണ് രാഷ്‌ട്രപിതാവായ ഗാന്ധിജിയെന്ന് ഡോ.എ.നീല ലോഹിതദാസ്. വർത്തമാന കാലത്ത് മഹാത്മജിയുടെ ജീവിതവും ദർശനവും പുതിയ തലമുറകളിലേക്ക് എത്തിക്കുന്നതിനുംഅവരെ ഭാവിയിലേക്ക് കർമ്മോത്സുകരാക്കുന്നതിനുമുള്ള കർമ്മ പരിപാടികൾ നടപ്പിലാക്കുമെന്ന് ഗാന്ധിയൻ ബാല കേന്ദ്രം രക്ഷാധികാരി സമിതി ചെയർമാൻ ഡോ.എ.നീലലോഹിത ദാസ് പറഞ്ഞു. പത്തനാപുരം. ഗാന്ധിഭവനിൽ നടന്ന ഗാന്ധിയൻ ബാല കേന്ദ്രങ്ങളുടെ രക്ഷാധികാര സമിതിയുടെ നേതൃയോഗം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ഗാന്ധിയൻ ബാല കേന്ദ്രങ്ങളുടെ സംസ്ഥാന നേതൃത്വ പരിശീലന ക്യാമ്പ് മേയ് 16, 17 തീയതികളിൽ പത്തനാപുരം ഗാന്ധിഭവനിൽ നടക്കുമെന്ന് ഭാരവാഹികൾ അറിയിച്ചു. കല, സാഹിത്യം, സംസ്കാരം, എന്നീ വിഷയങ്ങളിൽ ചർച്ചകൾ, സിമ്പോസിയങ്ങൾ, പ്രതിഭാ സംഗമങ്ങൾ എന്നിവ രണ്ടു ദിവസങ്ങളിലായി നടക്കുന്ന ക്യാമ്പിന്‍റെ ഭാഗമായി ഉണ്ടായിരിക്കും.

കഞ്ചാവ് കേസ് പ്രതിക്ക് അഞ്ചു വര്‍ഷം കഠിനതടവും അമ്പതിനായിരം പിഴയും

കൊല്ലം: 2.200 കിലോ കഞ്ചാവ് വില്‍ക്കാനായി കടത്തി കൊണ്ട് വന്ന കേസിൽ ഓച്ചിറ കാരലില്‍ തറവീട്ടില്‍ അരുണ്‍ കൃഷ്ണ (34) ന് അഞ്ചു വര്‍ഷം കഠിനതടവും അമ്പതിനായിരം രൂപ പിഴയും ശിക്ഷിച്ച് കോടതി. കൊല്ലം ഫസ്റ്റ്‌ ക്ലാസ് അഡീഷണല്‍ ജില്ലാ സെഷന്‍സ്‌ ജഡ്ജി പി.എൻ.വിനോദിനന്‍റേതാണ് ഉത്തരവ്. കഞ്ചാവ് വിൽപ്പനക്കായി കൊണ്ട് പോകവേ ഓച്ചിറ മേമന ജംഗ്ഷനില്‍ വച്ചാണ് പ്രതിയെ കൊല്ലം എക്‌സൈസ്‌ ആൻഡ് നാര്‍കോട്ടിക്‌ സ്പെഷല്‍ സ്ക്വാഡ്‌ ഇന്‍സ്പെക്ടര്‍ എസ്‌. ഷാജിയും സംഘവും പിടികൂടുന്നത്. സഞ്ചിയിൽ കൊണ്ട് പോവുകയായിരുന്ന കഞ്ചാവായിരുന്നു പിടിച്ചെടുത്തത്. എക്സൈസ്‌ സര്‍ക്കിള്‍ ഇന്‍സ്പെക്ടര്‍ ജി. കൃഷ്ണകുമാര്‍ അന്വേഷിച്ച്‌ കുറ്റപത്രം ഹാജരാക്കിയ കേസില്‍ പ്രോസി ക്യൂഷന്‌ വേണ്ടി പബ്ലിക് പ്രോസിക്യൂട്ടര്‍ അഡ്വ. സിസിന്‍. ഇ.കുണ്ടയ്‌ക്കല്‍ ആണ് ഹാജരായത്. ഗ്രേഡ്‌ പ്രിവന്‍റീവ്‌ ഓഫീസര്‍ രാജുഗോപാലന്‍ ചെട്ടിയാര്‍ പ്രോസിക്യൂഷന്‍ സഹായി ആയിരുന്നു.

നെഹ്‌റു കുടുംബത്തിലെ ഇളം തലമുറയ്ക്ക് അഴിമതി നടത്തേണ്ട കാര്യമില്ല: ബിന്ദു കൃഷ്ണ

കൊല്ലം: കോടാനുകോടി രൂപയുടെ സ്വത്ത് വകകള്‍ ഇന്ത്യന്‍ സമൂഹത്തിന് ഉദാരപൂര്‍വം സംഭാവന നല്‍കിയ നെഹ്‌റു കുടുംബത്തിലെ ഇളംതലമുറയ്ക്ക് അഴിമതി നടത്തേണ്ട കാര്യമില്ലെന്ന് കോൺഗ്രസ് രാഷ്‌ട്രീയകാര്യ സമിതി അംഗം ബിന്ദുകൃഷ്ണ. കോടി കണക്കിന് രൂപ നഷ്ടത്തിലായ നാഷണല്‍ ഹെറാള്‍ഡ് എന്ന ദേശീയ പത്രത്തിനന്‍റെ പുനരുദ്ധാരണത്തിന് വായ്പ എടുത്തു എന്നല്ലാതെ മറ്റൊന്നും ചെയ്തിട്ടില്ലാത്ത സോണിയാഗാന്ധിയ്ക്കും രാഹുല്‍ ഗാന്ധിയ്ക്കും എതിരെ ഇ ഡിയെ ഉപയോഗിച്ച് കുറ്റപത്രം സമര്‍പ്പിച്ചത് രാഷ്‌ട്രീയ പ്രതിയോഗികളെ കേന്ദ്ര അന്വേഷണ ഏജന്‍സികളെ ഉപയോഗിച്ച് തകര്‍ക്കുവാന്‍ ശ്രമിക്കുന്നതിന്‍റെ ഭാഗമാണെന്നും ബിന്ദു കൃഷ്ണ പറഞ്ഞു. ഇ ഡി യെ ഉപയോഗിച്ച് സോണിയാഗാന്ധിയും രാഹുല്‍ഗാന്ധിയും കേസില്‍ കുടുക്കാന്‍ ശ്രമിക്കുന്ന നരേന്ദ്രമോദി സര്‍ക്കാരിനന്‍റെ സമീപനങ്ങള്‍ക്ക് എതിരെയും പെട്രോളിയം ഉത്പന്നങ്ങളുടെ വില വര്‍ദ്ധനവിന് എതിരെയും ചിന്നക്കടയില്‍ കോണ്‍ഗ്രസും ഐഎന്‍ടിയുസിയും സംയുക്തമായി നടത്തിയ പ്രതിഷേധ ജാഥ ഉദ്ഘാടനം ചെയ്യുകയായിരുന്നു അവര്‍. ഡി സി സി വൈസ് പ്രസിഡന്‍റ് എസ്. വിപിനചന്ദ്രന്‍ അധ്യക്ഷത വഹിച്ചു. ഐ എന്‍ ടി യു സി ജില്ലാ പ്രസിഡന്‍റ് എ. കെ. ഹഫീസ്,കെ പി സി സി സെക്രട്ടറി പി. ജര്‍മ്മിയാസ്, ഡി സി സി ഭാരവാഹികളായ ജി . ജയപ്രകാശ്, കൃഷ്ണവേണി ശര്‍മ്മ, ആനന്ദ് ബ്രഹ്‌മാനന്ദ്, എം. എം. സഞ്ജീവ് കുമാര്‍, ഡി. ഗീതാകൃഷ്ണന്‍, എം. നാസര്‍, പ്രാക്കുളം സുരേഷ്, പാലത്തറ രാജീവ്, സാബ്ജാന്‍, എസ്. നാസര്‍, ബി. ശങ്കരനാരായണ പിള്ള, കോതേത്ത് ഭാസുരന്‍, എം. നൗഷാദ്, പനയം സജീവ്, എന്നിവര്‍ പ്രസംഗിച്ചു.

ലഹരി മുക്ത കേരളം കാമ്പയിൻ സംഘടിപ്പിച്ചു

പുനലൂർ : ലഹരി മുക്ത ഭാരതം ആരോഗ്യകരമായ ഒരു സമൂഹം എന്ന ലക്ഷ്യത്തിനായി 'നശ മുക്ത് ഭാരത് അഭിയാൻ' പദ്ധതിയുടെ ആഭിമുഖ്യത്തിൽ ബ്രഹ്മാകുമാരീസ് മെഡിക്കൽ വിംഗ് പുനലൂർ തൂക്കുപാലത്തിനു മുന്നിലെ ഗാന്ധിസ്‌മൃതി മണ്ഡപത്തിൽ ലഹരി മുക്ത കേരളം കാമ്പയിൻ സംഘടിപ്പിച്ചു. പുനലൂർ, പത്തനാപുരം താലൂക്കുകൾ കേന്ദ്രികരിച്ച് ബി. കെ. രഞ്ജിനിയുടെ നേതൃത്വത്തിൽ നടന്ന റാലിയുടെ ഉദ്ഘാടനം ഇന്ത്യൻ മെഡിക്കൽ അസോസിയേഷൻ പ്രസിഡന്‍റ് ഡോ. ആർ. വി. അശോകൻ നിർവ്വഹിച്ചു. എക്‌സൈസ് സർക്കിൾ ഇൻസ്‌പെക്ടർ ഷെമീർഖാൻ തുടങ്ങിയവർ പ്രസംഗിച്ചു.

പെസഹ-ദുഃഖ വെള്ളിയാഴ്ച തിരുകർമങ്ങൾ

സെന്‍റ് ആൻഡ്രൂസ് ദേവാലയം ചവറ : കോവിൽത്തോട്ടം സെന്‍റ് ആൻഡ്രൂസ് ദേവാലയത്തിൽ പെസഹ - ദുഃഖ വെള്ളി - ഈസ്റ്റർ തിരുകർമ്മങ്ങൾക്ക് ഇന്ന് തുടക്കമാകും. ഇന്ന് വൈകുന്നേരം അഞ്ചിന് തിരുകർമ്മങ്ങൾ ആരംഭിക്കും. തിരുവത്താഴ ദിവ്യബലി, പാദക്ഷാളന കർമ്മം തുടർന്ന് രാത്രി 10 വരെ ആരാധന. ദുഃഖ വെള്ളിയാഴ്ച രാവിലെ ആറിന് കുരിശിനന്‍റെ വഴി തുടർന്ന് ആരാധന, വൈകുന്നേരം മൂന്നിന് തിരുകർമ്മങ്ങൾ ആരംഭിക്കും. തുടർന്ന് നഗരികാണിക്കൽ പ്രദക്ഷിണം, രാത്രി പത്തിന് കബറടക്കം. ദുഃഖ ശനിയാഴ്ച രാത്രി 11 ന് ഉയർപ്പ് ദിവ്യബലി. ഈസ്റ്റർ ദിനത്തിൽ രാവിലെ ഏഴിന് ദിവ്യബലി എന്നിവ നടക്കും. അഞ്ചൽ മേരി മാതാ പള്ളി അഞ്ചൽ : മേരിമാതാ പള്ളിയിൽ വിശുദ്ധവാര തിരു കർമങ്ങളുടെ ഭാഗമായി ഇന്ന് 5.15 ന് കാൽ കഴുകൽ ശുശ്രൂഷ, ദിവ്യകാരുണ്യ ആരാധന. 18 ന് എട്ടിന് കുരിശിനന്‍റെ വഴി, പൊതു ആരാധന, രണ്ടിന് പീഡാനുഭവ തിരുകർമ്മങ്ങൾ. 19 ന് 6.45 ന് വിശുദ്ധ കുർബാന, പുത്തൻ തീ, പുത്തൻ വെള്ളം വെഞ്ചരിപ്പ്. 20 ന് മൂന്നു മുതൽ ഉയർപ്പ് തിരു കർമങ്ങൾ, ഏഴിന് കുർബാന. പഴയെരൂർ സെന്‍റ് തോമസ് പള്ളി പഴയെരൂർ : സെന്‍റ് തോമസ് പള്ളിയിൽ വിശുദ്ധവാര തിരു കർമങ്ങളുടെ ഭാഗമായി ഇന്ന് 4.45 ന് കാൽ കഴുകൽ ശുശ്രൂഷ, ദിവ്യകാരുണ്യ ആരാധന. നാളെ എട്ടിന് കുരിശിന്‍റെ വഴി, പൊതു ആരാധന, 1.30 ന് പീഡാനുഭവ തിരുകർമ്മങ്ങൾ. 19 ന് ഏഴിന് വിശുദ്ധ കുർബാന, പുത്തൻ തീ, പുത്തൻ വെള്ളം വെഞ്ചരിപ്പ്. സെന്‍റ് ജോസഫ് പള്ളി ഫിൽഗിരി: ഇന്ന് നാലിന് വി. കുർബാന, കാൽ കഴുകൽ ശുശ്രൂഷ, തിരുമണിക്കൂർ. പീഡാനുഭവ വെള്ളി. ഏഴിന് : പട്ടണ സ്ലീവാപാത. ഒൻപതിന് ഒരുമണിക്ക് ആരാധന, നേർച്ച ഭക്ഷണം. രണ്ടിന് പൊതു ആരാധന, മൂന്നിന് പീഡാനുഭവ തിരുക്കർമ്മങ്ങൾ. അഞ്ചിന് നഗരി കാണിക്കൽ. വലിയ ശനി. 6.15 നു സപ്രാ, വി. കുർബാന, പുത്തൻ തീ, പുത്തൻ വെള്ളം വെഞ്ചിരിപ്പ്. ഉയിർപ്പു ഞായർ 2.30. ഉയിർപ്പു തിരുക്കർമ്മങ്ങൾ വി. കുർബാന. ഏഴിന് വി. കുർബാന. സെന്‍റ് മേരീസ് മലങ്കര കത്തോലിക്കാ പള്ളി അഞ്ചല്‍: ഇന്ന് രാവിലെ ഒൻപതു മുതല്‍ ദിവ്യകാരുണ്യ ആരാധന, വൈകിട്ട് അഞ്ചിന് പെസഹാ കുര്‍ബാന, ദുഃഖവെള്ളി ശുശ്രൂഷകള്‍ രാവിലെ ഏഴിന് ആരംഭിക്കും. വൈകുന്നേരം അഞ്ചി ന് സന്ധ്യാ നമസ്‌കാരം. ദുഃഖശനിയാഴ്ച രാവിലെ ഏഴിന് കുര്‍ബാന തുടര്‍ന്ന് സെമിത്തേരിയില്‍ പരേതരായവര്‍ക്കുവേണ്ടി പ്രത്യേക പ്രാര്‍ത്ഥന. ഈസ്റ്റര്‍ ശുശ്രൂഷകള്‍ ശനി വൈകിട്ട് 6.30 ന് ആരംഭിക്കും. എട്ടിന് ഉയിര്‍പ്പ് പെരുന്നാള്‍ കുര്‍ബാന. സെന്‍റ് ജോര്‍ജ്ജ് മലങ്കര കത്തോലിക്കാ പള്ളി തഴമേല്‍: ഇന്ന് വൈകിട്ട് 5.30 ന് പെസഹാ കുര്‍ബാന. ദുഃഖവെള്ളി ശുശ്രൂഷകള്‍ രാവിലെ ഏഴിന് ആരംഭിക്കും. ശനിയാഴ്ച വൈകിട്ട് 6.30 ന് ഉയിര്‍പ്പിന്‍റെ ശുശ്രൂഷകളും കുര്‍ബാനയും.

എഐവൈഎഫ് പ്രതിഷേധിച്ചു

കൊല്ലം : കൊല്ലം പൂരത്തിന്‍റെ കുടമാറ്റത്തിൽ നവോത്ഥാന നായകർക്കൊപ്പം ആർഎസ്എസ് സ്ഥാപക നേതാവായിരുന്ന ഹെഡ്‌കേവാറിനന്‍റെ ചിത്രവും ഉയർത്തിക്കാട്ടിയത്തിൽ പ്രതിഷേധിച്ചു എഐവൈഎഫ് കൊല്ലം ജില്ല കമ്മറ്റി പ്രതിഷേധ പ്രകടനവും യോഗവും നടത്തി. ജില്ലാ സെക്രട്ടറി ടി. എസ്. നിതീഷ് ഉദ്ഘാടനം ചെയ്തു. കൊല്ലം ജില്ലാ പ്രസിഡന്‍റ് അഡ്വ. വിനീത് വിൻസന്‍റ് അധ്യക്ഷത വഹിച്ചു എഐവൈഎഫ് സംസ്ഥാന കമ്മിറ്റി അംഗം ജി. എസ്. ശ്രീലക്ഷ്മി എഐഎസ്എഫ് ജില്ലാ പ്രസിഡന്‍റ് ശ്രീജിത്ത്‌ സുദർശനൻ എഐവൈഎഫ് ജില്ലാ ജോയിൻ സെക്രട്ടറി യു. കണ്ണൻ ജില്ലാ എസിക്യൂട്ടീവ് അഗം ആർ. ഹരീഷ്, കൊല്ലം മണ്ഡലം സെക്രട്ടറി എസ്. എസ്. കണ്ണൻ ജില്ലാ കമ്മിറ്റിയംഗം ഷംനാദ് എന്നിവർ പ്രസംഗിച്ചു. വിഷയവുമായി ബന്ധപ്പെട്ട് ജില്ലാ കമ്മിറ്റി പോലീസ് മേധാവിക്ക് പരാതി നൽകി.

കുടമാറ്റത്തിൽ ഹെഡ്ഗേവാറിന്‍റെ ചിത്രം; ദേവസ്വം ബോർഡ് അന്വേഷിക്കും

കൊല്ലം: കൊല്ലം പൂരത്തിൽ പുതിയകാവ് ക്ഷേത്രത്തിന്‍റെ കുടമാറ്റത്തിൽ ആർഎസ്എസ് നേതാവ് ഹെഡ്‌ഗേവാറിനന്‍റെ ചിത്രം ഉയർത്തിയത് വൻ വിവാദത്തിന് കാരണമായി. നവോഥാന നായകരുടെ ചിത്രത്തിനൊപ്പമാണ് ഹെഡ്‌ഗേവാറിനന്‍റെ ചിത്രം ഉയർത്തിയത്. സ്വാമിവിവേകാനന്ദൻ, ബി.ആർ.അംബേദ്കർ, ശ്രീനാരായണ ഗുരു എന്നിവരുടെ ചിത്രങ്ങൾക്കൊപ്പമാണ് ഹെഡ്‌ഗേവാറിന്‍റെ ചിത്രവും ഉൾപ്പെടുത്തിയത്. ആശ്രാമം ശ്രീകൃഷ്ണ സ്വാമി ക്ഷേത്ര ഭാരവാഹികളാണ് പൂരം നടത്തുന്നത്. വിഷയത്തിൽ പരാതിയുമായി യൂത്ത് കോൺഗ്രസും ഡിവൈഎഫ്ഐയും രംഗത്തെത്തി. ക്ഷേത്ര ആചാരങ്ങളിലും വിശ്വാസങ്ങളിലും രാഷ്‌ട്രീയം കലർത്തുന്ന നടപടിയാണ് ഉണ്ടായതെന്നാണ് പരാതി. സംഭവത്തിൽ കേസ് എടുത്ത് അന്വേഷണം നടത്തണമെന്നാണ് ആവശ്യം. ഇതിന്‍റെ അടിസ്ഥാനത്തിൽ ഈസ്റ്റ് പോലീസ് കേസെടുത്തിട്ടുണ്ട്. സംഭവത്തിൽ അന്വേഷണത്തിന് ദേവസ്വം ബോർഡ് പ്രസിഡന്‍റ് പി. എസ്. പ്രശാന്ത് നിർദേശം നൽകി. വിജിലൻസ് എസ്പിക്കാണ് അന്വേഷണ ചുമതല. ദേവസ്വം ബോർഡിന്‍റെ കൊല്ലം അസിസ്റ്റന്‍റ് കമ്മീഷണറോട് സംഭവത്തിൽ അടിയന്തര റിപ്പോർട്ടും തേടി. വിഷയത്തിൽ ചട്ടലംഘനം ബോധ്യപ്പെട്ടാൽ നടപടി ഉണ്ടാകും. ക്ഷേത്രം വിശ്വാസികൾക്ക് പ്രാർഥിക്കാൻ ഉള്ളതാണ്. രാഷ്‌ട്രീയ പാർട്ടികൾക്കോ മത സമുദായിക സംഘടനകൾക്കോ പരിപാടി നടത്താൻ കഴിയില്ല. ഉപദേശക സമിതിക്ക് കൊടി അടയാളങ്ങളില്ല. ധിക്കരിച്ചു മുന്നോട്ടു പോകുന്ന ഉപദേശക സമിതികൾ പിരിച്ചു വിടും - പി.എസ്. പ്രശാന്ത് വ്യക്തമാക്കി.

അഷ്ടമുടിക്ക് 59 കോടിയുടെ പദ്ധതി: മന്ത്രി കെ.എന്‍. ബാലഗോപാല്‍

കൊല്ലം: കൊല്ലത്ത് അഷ്ടമുടി കായൽ കേന്ദ്രീകരിച്ച് 59 കോടി രൂപയുടെ വിനോദസഞ്ചാര വികസന പദ്ധതി നടപ്പിലാക്കുമെന്ന് മന്ത്രി കെ.എന്‍. ബാലഗോപാല്‍. സി.കേശവന്‍ സ്മാരക ടൗണ്‍ഹാളില്‍ സംസ്ഥാന മന്ത്രിസഭ വാര്‍ഷികത്തോടനുബന്ധിച്ച സംഘാടക സമിതി യോഗം ഉദ്ഘാടനം ചെയ്യുകയായിരുന്നു മന്ത്രി. ഒരു ലക്ഷത്തോളം പഠിതാക്കളെ ലക്ഷ്യമിട്ട് വികസിപ്പിക്കുകയാണ് ശ്രീനാരായണ ഓപണ്‍ യൂണിവെഴ്സിറ്റി. പടിഞ്ഞാറേ കല്ലടയില്‍ സോളാര്‍ പദ്ധതി യാഥാര്‍ഥ്യമാകുന്നു. കോടതി സമുച്ചയം, വല നിര്‍മാണ ഫാക്ടറി, ഓഷ്യനേറിയം, ഐ ടി പാര്‍ക്ക്, തുറമുഖ വികസനം തുടങ്ങി കേരളത്തിന്‍റെ മുന്നേറ്റത്തില്‍ കുതിച്ചുചാട്ടത്തിന് സഹായകമാകുന്ന പദ്ധതികളാണ് ജില്ലയില്‍ സാക്ഷാത്കരിക്കുന്നത്. കേരളത്തിനന്‍റെ ഭാവിസ്വപ്നങ്ങള്‍ സാക്ഷാത്കരിക്കാന്‍ സഹായകമാകുംവിധമാണ് എന്‍റെ കേരളം പ്രദര്‍ശനവിപണന മേള ഒരുക്കുക എന്നും മന്ത്രി പറഞ്ഞു. നിയോജക മണ്ഡലം അടിസ്ഥാനത്തിലും, ഗ്രാമ- ബ്ലോക്ക് - വാര്‍ഡ് തലത്തിലും പ്രചാരണം ശക്തിപ്പെടുത്തണം. ഏപ്രില്‍ 30 നകം നിയോജകമണ്ഡല തലത്തിലും മേയ് അഞ്ചിനകം പഞ്ചായത്ത് തലത്തിലും 10നകം വാര്‍ഡ് തലത്തിലും യോഗങ്ങള്‍ നടത്താനും തീരുമാനിച്ചതായി മന്ത്രി വ്യക്തമാക്കി. സര്‍ക്കാര്‍ താഴെത്തട്ട് വരെ നടത്തിയ പ്രവര്‍ത്തനങ്ങളാണ് മേളയിലൂടെ സാക്ഷ്യപ്പെടുത്തുകയെന്ന് അധ്യക്ഷയായ മന്ത്രി ജെ. ചിഞ്ചുറാണി പറഞ്ഞു. എംഎല്‍എമാരായ എം. നൗഷാദ്, ജി.എസ്. ജയലാല്‍, മേയര്‍ ഹണി, ജില്ലാ പഞ്ചായത്ത് പ്രസിഡന്‍റ് ഡോ. പി.കെ. ഗോപന്‍, ജില്ലാ കളക്ടര്‍ എന്‍. ദേവിദാസ് തുടങ്ങിയവര്‍ പങ്കെടുത്തു.

കാട്ടുപോത്ത് ഓട്ടോറിക്ഷ ഇടിച്ചു മറിച്ചു

കുളത്തൂപ്പുഴ: കാട്ടുപോത്തിന്‍റെ ആക്രമണത്തിൽ നിയന്ത്രണം വിട്ട ഓട്ടോ റിക്ഷ മറിഞ്ഞ് ഡ്രൈവര്‍ക്ക് പരിക്ക്. തിരുവനന്തപുരം-തെങ്കാശി അന്തര്‍ സംസ്ഥാന പാതയില്‍ കുളത്തൂപ്പുഴ നെടുവന്നൂര്‍ക്കടവ് ചെക്ക് പോസ്റ്റിനു സമീപം ഇന്നലെ പുലര്‍ച്ചെ നാലിനായിരുന്നു സംഭവം. കുളത്തൂപ്പുഴ ആര്‍പിഎല്‍ പള്ളംവെട്ടി കോളനിയില്‍ സൂര്യരാജ് (49) നാണ് പരിക്കേറ്റത്. യാത്രക്കാരെ കുളത്തൂപ്പുഴയിലെത്തിച്ച് തിരികെ മടങ്ങുകയായിരുന്ന ഓട്ടോറിക്ഷക്കു മുന്നിലേക്ക് സമീപത്തെ വനത്തില്‍ നിന്നും ഓടിയെത്തിയ കാട്ടുപോത്ത് ഇടിക്കുകയായിരുന്നു. ഇടിയുടെ ആഘാതത്തില്‍ മുന്‍വശം തകര്‍ന്ന ഓട്ടോറിക്ഷയില്‍ നിന്നും ഡ്രൈവറായ സൂര്യരാജ് പുറത്തേക്ക് തെറിച്ചു വീണു. ഇടതു കൈക്ക് പരിക്കേറ്റ സൂര്യരാജിനെ കുളത്തൂപ്പുഴ സര്‍ക്കാര്‍ ആശുപത്രിയിലെത്തിച്ച് പ്രാഥമിക ശുശ്രൂഷ നല്‍കി. അപകടത്തിനു ശേഷം കാട്ടുപോത്ത് തിരികെ വനത്തിലേക്ക് കയറി പോയി. ശബ്ദം കേട്ട് സമീപത്തെ ക്വാര്‍ട്ടേഴ്സിലെ താമസക്കാരെത്തി സഹായിച്ചാണ് റോഡില്‍ മറിഞ്ഞ ഓട്ടോ റിക്ഷ നിവർത്താനായത്. വാഹനത്തിന്‍റെ മുന്‍ഭാഗവും ഇടതുഭാഗത്തിനം കേടുപാടുണ്ടായി. സംഭവമറിഞ്ഞ് സെക്ഷന്‍ വനപാലകരെത്തി വിവരങ്ങള്‍ ശേഖരിച്ചു മടങ്ങിയതായും തന്‍റെ ജീവിത മാര്‍ഗമായ ഓട്ടോ റിക്ഷ തകര്‍ന്നതോടെ അറ്റകുറ്റപണി നടത്താന്‍ പോലും കടം വാങ്ങേണ്ട അവസ്ഥയിലാണെന്നും സൂര്യരാജ് പറഞ്ഞു. പ്രദേശത്ത് വന്യമൃഗ ശല്യം രൂക്ഷമാണെങ്കിലും ഇതിനെതിരെ വനം വകുപ്പ് ഉദ്യോഗസ്ഥർ ഒരു നടപടിയും കൈക്കൊള്ളുന്നില്ല എന്നാണ് നാട്ടുകാരുടെ പരാതി.

ഡോ. വന്ദനദാസ് കൊലക്കേസ്; ക്രോസ് വിസ്താരം 25ന്

കൊല്ലം: കൊട്ടാരക്കര താലൂക്ക് ആശുപത്രിയിൽ കൊലചെയ്യപ്പെട്ട ഡോ. വന്ദനാദാസ് കേസിലെ സാക്ഷിയും വന്ദനയ്ക്കൊപ്പം ജോലി ചെയ്തിരുന്നതുമായ ഡോ.ഷിബിൻ മുഹമ്മദിന്‍റെ ക്രോസ് വിസ്താരം 25 ലേക്ക് മാറ്റി. പീഡനക്കേസ് പ്രതിയായ മുൻ ഗവ.പ്ലീഡർ പി.ജി. മനുവിന്‍റെ മരണത്തെ തുടർന്ന് കേസുമായി ബന്ധപ്പെട്ട ഫയലുകളെല്ലാം കൊല്ലത്തെ വാടകവീട്ടിലാണെന്നും പോലീസ് നടപടികൾ നടക്കുന്നതിനാൽ ഫയലുകൾ കൈവശം ലഭിച്ചിട്ടില്ലെന്നും കേസിലെ പ്രതിഭാഗം അഭിഭാഷകനായ ബി.എ. ആളൂർ ഇന്നലെ കോടതിയെ ധരിപ്പിച്ചിരുന്നു. ഇതേ തുടർന്നാണ് ഇന്നലെ നടക്കാനിരുന്ന വിസ്താരം 25 ലേക്ക് മാറ്റിയത്. കേസിൽ പ്രതിഭാഗത്തിനുവേണ്ടി ഹാജരാകാനാണ് എറണാകുളം പിറവം സ്വദേശിയായ പി.ജി.മനു കൊല്ലത്തെത്തിയത്. സംഭവദിവസം വന്ദനയെ കൊലപ്പെടുത്താൻ ശ്രമിച്ച ശേഷം പ്രതി കാഷ്വാലിറ്റിക്ക് പുറത്തേക്ക് വരുന്നതും കൗണ്ടറിന്‍റെ മുൻവശത്ത് നിന്ന പോലീസുകാരന്‍റെ തലയിൽ കുത്തുന്നതും ഡോ.ഷിബിൻ കോടതിയിൽ നേരത്തെ തിരിച്ചറിഞ്ഞിരുന്നു. പ്രതിയുടെ ആക്രമണത്തിൽ സാരമായി പരിക്കേറ്റ ഡോ. വന്ദനയെ താങ്ങി ആംബുലൻസിലേക്ക് കൊണ്ടുപോകുന്നത് താനാണെന്നും ദൃശ്യങ്ങൾ കണ്ട ശേഷം ഡോക്ടർ കോടതിയിൽ മൊഴി നൽകിയിരുന്നു. പ്രോസിക്യൂഷന് വേണ്ടി സ്‌പെഷൽ പ്രോസിക്യൂട്ടർ പ്രതാപ് ജി. പടിക്കലിനോടൊപ്പം അഭിഭാഷകരായ ശ്രീദേവി പ്രതാപ്, ശില്പ ശിവൻ, ഹരീഷ് കാട്ടൂർ എന്നിവരാണ് ഹാജരാകുന്നത്.

ഓണ്‍ലൈന്‍ തട്ടിപ്പ് : അഞ്ച് ലക്ഷം അപഹരിച്ച വിദേശ പൗരന്‍ അറസ്റ്റിൽ

കൊല്ലം: ഓണ്‍ലൈന്‍ തട്ടിപ്പിലൂടെ കൊല്ലം ഉമയനല്ലൂര്‍ സ്വദേശിനിയില്‍ നിന്നും അഞ്ച് ലക്ഷത്തോളം രൂപ തട്ടിയെടുത്ത വിദേശ പൗരന്‍ പോലീസിന്‍റെ പിടിയിലായി. നൈജീരിയന്‍ സ്വദേശിയായ മാത്യൂ എമേക്കാ(30) ആണ് കൊട്ടിയം പോലീസ് അറസ്റ്റ് ചെയ്തത്. പോയ വർഷം ജൂലൈ, ആഗസ്റ്റ് മാസങ്ങളിലാണ് കേസിനാസ്പദമായ സംഭവം അരങ്ങേറുന്നത്. യുകെയില്‍ ഡോക്ടറാണെന്ന് വിശ്വസിപ്പിച്ച് കൊല്ലം സ്വദേശിനിയുമായി ഇയാള്‍ ഓണ്‍ലൈനിലൂടെ സൗഹൃദം സ്ഥാപിക്കുകയായിരുന്നു. തുടര്‍ന്ന് വിലപിടിപ്പുള്ള സമ്മാനങ്ങള്‍ യുവതിയുടെ പേരില്‍ അയച്ചിട്ടുണ്ടെന്നും അത് ഡല്‍ഹിയില്‍ കൊറിയറിൽ എത്തിയിട്ടുണ്ടെന്നും പറഞ്ഞു കൈപ്പറ്റുന്നതിന് 45000 രൂപ ആവശ്യപ്പെടുകയായിരുന്നു. പ്രതി നിര്‍ദേശിച്ച അക്കൗണ്ടിലേക്ക് പണം കൈമാറിയ യുവതിയെ പലപ്പോഴായി നുണകള്‍ പറഞ്ഞ് വിശ്വസിപ്പിച്ചും ഭീഷണിപ്പെടുത്തിയും പലപ്പോഴായി 4,90,000 രൂപ തട്ടിയെടുക്കുകയായിരുന്നു. കൊട്ടിയം പോലീസ് സ്റ്റേഷനില്‍ നല്‍കിയ പരാതിയുടെ അടിസ്ഥാനത്തില്‍ ഓണ്‍ലൈനായി തട്ടിപ്പ് നടത്തി പണം കൈക്കലാക്കിയ കുറ്റത്തിന് ഐ ടി ആക്ട് പ്രകാരം ഇയാള്‍ക്കെതിരേ കേസ് രജിസ്റ്റര്‍ ചെയ്തു. പണം കൈമാറിയ ബാങ്ക് അക്കൗണ്ടിന്‍റെ വിവരങ്ങള്‍ പിന്‍തുടര്‍ന്ന് ഡല്‍ഹിയിലെത്തിയ പോലീസ് സംഘം നടത്തിയ അന്വേഷണത്തില്‍ പ്രതിയെ സമാനമായ കുറ്റത്തിന് ഡല്‍ഹി പോലീസും തുടര്‍ന്ന് വയനാട് അമ്പലവയല്‍ പോലീസും അറസ്റ്റ് ചെയ്തിട്ടുള്ളതായും തുടര്‍ന്ന് കോടതിയില്‍ നിന്നും ജാമ്യം ലഭിച്ച പ്രതിയെ സാമൂഹ്യ നീതി വകുപ്പിന്‍റെ കീഴില്‍ കൊട്ടിയത്ത് പ്രവര്‍ത്തിക്കുന്ന ട്രാന്‍സിറ്റ് ഹോമില്‍ പാര്‍പ്പിച്ചിരിക്കുകയാണെന്നും കണ്ടെത്തി. കൊട്ടിയം എസ് എച്ച് ഒയുടെ ചാര്‍ജ് വഹിക്കുന്ന ചാത്തന്നൂര്‍ ഇന്‍സ്പെക്ടര്‍ അനൂപിന്‍റെ നിര്‍ദ്ദേശപ്രകാരം എസ് ഐ മാരായ നിതിന്‍ നളന്‍, പ്രമോദ്, മിനുരാജ് എന്നിവരടങ്ങിയ പോലീസ് സംഘമാണ് അന്വേഷണം നടത്തിയത്.

വീട്ടമ്മ തൂങ്ങിമരിച്ച നിലയില്‍

കൊട്ടാരക്കര: നെടുവത്തൂർ സ്വദേശിയയ വീട്ടമ്മയെ വീട്ടിനുള്ളിൽ തൂങ്ങി മരിച്ച നിലയിൽ കണ്ടെത്തി. ഇഞ്ചക്കാട് അനീഷാ ഭവനം അനീഷിന്‍റെ ഭാര്യ നെടുവത്തൂർ നെടിയില വീട്ടിൽ ശരണ്യമോള്‍ (26) ആണ് മരിച്ചത്. ഭര്‍ത്താവ് അനീഷ് വിദേശത്താണ്. ആത്മഹത്യാ കുറിപ്പ് പോലീസിന് ലഭിച്ചു. ഭര്‍തൃവീടായ ഇഞ്ചക്കാട്ടുനിന്ന് രണ്ടു ദിവസം മുന്പാണ് ശരണ്യ നെടുവത്തൂരിലെ വീട്ടിലേക്ക് എത്തിയത്. മൂന്നും ആറും വയസുളള കുട്ടികളെ മുറിയില്‍ നിന്ന് പുറത്താക്കിയ ശേഷം തൂങ്ങിമരിക്കുകയായിരുന്നു. മക്കൾ: ആദ്യ, ആദർശ്. കൊട്ടാരക്കര പോലീസ് അന്വേഷണം നടത്തി വരുകയാണ്.

പത്ത് രൂപയ്ക്ക് പ്രഭാതഭക്ഷണം; വിഷുക്കൈനീട്ടമായി കോര്‍പറേഷന്‍റെ പുതിയ പദ്ധതി

കൊല്ലം: പത്ത് രൂപ നല്‍കിയാല്‍ വയറ് നിറയെ പ്രഭാത ഭക്ഷണം കഴിക്കാം. കേള്‍ക്കുമ്പോള്‍തന്നെ ആശ്വാസം പകരുന്ന പദ്ധതിയാണ് വിഷുക്കൈനീട്ടമായി കൊല്ലം കോര്‍പറേഷന്‍ നടപ്പിലാക്കിയത്. നഗരത്തിലെത്തുന്ന പാവപ്പെട്ടവരുടെ വിശപ്പകറ്റുകയെന്ന ലക്ഷ്യത്തോടെ 2025-26 വാര്‍ഷിക പദ്ധതിയില്‍ ഉള്‍പ്പെടുത്തിയാണ് ‘ഗുഡ്‌മോണിംഗ് കൊല്ലം' എന്ന മാതൃകാ പദ്ധതി നടപ്പാക്കിയത്. ചിന്നക്കട ബസ് കാത്തിരിപ്പ് കേന്ദ്രത്തിനു സമീപം ഒരുക്കുന്ന പ്രത്യേക കൗണ്ടറില്‍ എത്തിയാല്‍ ഓരോ പ്രഭാതത്തിലും ഇഡ്ഡലിയും ദോശയും അപ്പവും ഇടിയപ്പവുമെല്ലാം കറിയും കൂട്ടി 10 രൂപക്ക് കഴിച്ചു മടങ്ങാം. ഓരോ ദിവസം ഓരോ വിഭവങ്ങളാണ് ഉണ്ടാവുക. ആദ്യഘട്ടത്തില്‍ 300 പേര്‍ക്ക് പദ്ധതിയുടെ പ്രയോജനം ലഭിക്കും. കൂടുതല്‍ ആവശ്യക്കാരുണ്ടെങ്കില്‍ വിപുലീകരിക്കും. പദ്ധതി മന്ത്രി ജെ. ചിഞ്ചുറാണി ഉദ്ഘാടനം ചെയ്തു. മേയര്‍ ഹണി അധ്യക്ഷത വഹിച്ചു. എം. നൗഷാദ് എംഎല്‍എ, ഡെപ്യൂട്ടി മേയര്‍ എസ്. ജയൻ‍ തുടങ്ങിയവര്‍ സംബന്ധിച്ചു. രാവിലെ ഏഴുമുതൽ ഒമ്പത് വരെയാണ് ഭക്ഷണ വിതരണം. 2015 മുതല്‍ വിദ്യാലയങ്ങളില്‍ കുട്ടികളുടെ വിശപ്പകറ്റാന്‍ നടപ്പാക്കിവരുന്ന"അമ്മമനസ്’ പദ്ധതിയുടെയും കോവിഡ് കാലത്ത് നടപ്പാക്കിത്തുടങ്ങിയ ജനകീയ ഹോട്ടലുകളുടെയും തുടര്‍ച്ചയാണിതെന്ന് മേയര്‍ പറഞ്ഞു.

വ്യാപാരസ്ഥാപനങ്ങളിൽ പരിശോധന; ക്രമക്കേടുകൾ കണ്ടെത്തി

കൊല്ലം: താലൂക്ക് സപ്ലൈ ഓഫീസറുടെ നേതൃത്വത്തിൽ താലൂക്കിലെ വിവിധ സ്ഥാപനങ്ങളിൽ പരിശോധന നടത്തി. വിലവിവരപ്പട്ടിക പ്രദർ ശിപ്പിക്കൽ, ഉപഭോക്താക്കൾക്ക് ബില്ലുകൾ നൽകൽ എന്നിവ പാലിക്കുന്നുണ്ടോയെന്ന് കണ്ടെത്തുന്നതിനും കരിഞ്ചന്ത, പൂഴ്ത്തിവെപ്പ്, അമിത വില ഈടാക്കൽ എന്നിവ തടയുന്നതിനും ഹോട്ടലുകൾ, റസ്റ്ററന്‍റുകൾ,പഴം - പച്ചക്കറി വ്യാപാര സ്ഥാപനങ്ങൾ എന്നിവയിലെ വൃത്തി സംബന്ധിച്ച്താലൂക്ക് സപ്ലൈ ഓഫിസറുടെ നേതൃത്വത്തിൽ വിവിധ സ്ഥാപനങ്ങളിൽ പരിശോധന നടന്നു. സിവിൽ സപ്ലൈസ് വകുപ്പ് നടത്തിയ പരിശോധനയിൽ നിശ്ചിത മാതൃകയിൽ വിലവിവരപ്പട്ടിക പ്രദർശിപ്പിക്കാത്തതടക്കമുള്ള സ്ഥാപനങ്ങൾക്കെതിരേയും ലൈസൻസ് പുതുക്കിയിട്ടില്ലാത്തതുൾപ്പെയുള്ളവർക്കെതിരേയും കേസുകൾ രജിസ്റ്റർ ചെയ്തു. കൊല്ലം താലൂക്ക് സപ്ലൈ ഓഫിസർ വൈ. സാറാമ്മയുടെ നേതൃത്വത്തിൽ നടത്തിയ പരിശോധനയിൽ റേഷനിംഗ് ഇൻസ്പെക്ടർമാരായ ജി.ബിജുകുമാരകുറുപ്പ്, രാമചന്ദ്രൻ, അജീഷ്, ആശ, അനില, ശ്രീലത ,ഡ്രൈവർ ഷജീർ തുടങ്ങിയവരും പങ്കെടുത്തു. തുടർന്നുള്ള ദിവസങ്ങളിലും പരിശോധന ശക്തമാക്കുമെന്ന് താലൂക്ക് സപ്ലൈ ഓഫിസർ അറിയിച്ചു.

ഒരു കിലോഗ്രാം കഞ്ചാവുമായി യുവാവ് അറസ്റ്റിൽ

കൊല്ലം: വിൽപ്പനയ്ക്കായി കൊണ്ടുവന്ന ഒരു കിലോഗ്രാം കഞ്ചാവുമായി യുവാവ് അറസ്റ്റിൽ. മുണ്ടയ്ക്കൽ ഉദയ മാർത്താണ്ഡപുരം സ്വദേശി അഭിലാഷിനെ (38) യാണ് കൊല്ലം റൂറൽ ഡാൻസാഫ് ടീമും കുണ്ടറ പോലീസും ചേർന്ന് പിടികൂടിയത്. ഇയാളിൽ നിന്ന് 1.05 കിലോഗ്രാം കഞ്ചാവ് കണ്ടെടുത്തു.റൂറൽ പോലീസ് മേധാവി കെ.എം. സാബു മാത്യുവിന് ലഭിച്ച രഹസ്യ വിവരത്തിന്‍റെ അടിസ്ഥാനത്തിലായിരുന്നു പരിശോധന. പ്രതിയെ കോടതിയിൽ ഹാജരാക്കി റിമാൻഡ്് ചെയ്തു.

48കാരനെ കൊലപ്പെടുത്താൻ ശ്രമിച്ച പ്രതി അറസ്റ്റിൽ

കൊല്ലം: മധ്യവയസ്‌കനെ വെട്ടി കൊലപ്പെടുത്താൻ ശ്രമിച്ച പ്രതി പിടിയിൽ. പള്ളിത്തോട്ടം വെളിച്ചം നഗർ-29ൽ സ്റ്റാലിനെ (37) യാണ് പള്ളിത്തോട്ടം പോലീസ് അറസ്റ്റ് ചെയ്തത്. സ്‌നേഹതീരം നഗർ സ്വദേശി നിഷാദി(48) നെയാണ് ഇയാൾ വെട്ടി പരിക്കേൽപ്പിച്ചത്. 13ന് ഉച്ചകഴിഞ്ഞ് രണ്ടോടെ മദ്യപിച്ചെത്തിയ സ്റ്റാലിൻ പള്ളിത്തോട്ടത്തെ ഐസ് പ്ലാന്‍റിന് സമീപം നിൽക്കുകയായിരുന്ന നിഷാദുമായി വഴക്കുണ്ടാക്കുകയായിരുന്നു. പിൻതിരിപ്പിക്കാൻ ശ്രമിച്ചതോടെ പ്രകോപിതനായ പ്രതി സ്ഥലത്ത് നിന്നും പോയ ശേഷം വാളുമായി മടങ്ങി വന്ന് നിഷാദിനെ വെട്ടി പരിക്കേൽപ്പിക്കുകയായിരുന്നു. പ്രതിയുടെ ആക്രമണത്തിൽ നിഷാദിന്‍റെ തലയിലും നെറ്റിയിലും ആഴത്തിൽ മുറിവേറ്റു. ഇയാൾക്കെതിരെ നരഹത്യാശ്രമത്തിന് കേസ് രജിസ്റ്റർ ചെയ്ത ശേഷം അറസ്റ്റ് ചെയ്യുകയായിരുന്നു.

അമൃത പുരിയിൽ വിഷു ആഘോഷം

അമൃതപുരി (കൊല്ലം): മനുഷ്യനും പ്രകൃതിയും ഈശ്വരനും തമ്മിലുള്ള അഭേദ്യമായ ബന്ധത്തിന്‍റെ പ്രതീകമാണ് വിഷുവെന്ന് മാതാ അമൃതാനന്ദമയി. അമൃതപുരി ആശ്രമത്തിൽ നടന്ന വിഷുദിനാഘോഷത്തിൽ വിഷുദിന സന്ദേശം നൽകുകയായിരുന്നു അവർ. മാതാ അമൃതാനന്ദമയി മഠത്തിൽ നടന്ന വിഷുദിനാഘോഷത്തിൽ മുതിർന്ന സന്ന്യാസി - സന്ന്യാസിനിമാരും ബ്രഹ്മചാരിമാരും ആശ്രമവാസികളും പങ്കെടുത്തു.വിഷുദിനാഘോഷങ്ങളുടെ ഭാഗമായി സംഘടിപ്പിക്കുന്ന വിഷുത്തൈനീട്ടം പദ്ധതിയിലൂടെ വിതരണം ചെയ്യുന്ന വൃക്ഷതൈകൾ മാതാ അമൃതാനന്ദമയി മഠത്തിന്‍റെ യുവജന സംഘടനയായ അയുദ്ധ് പ്രതിനിധികൾ അമൃതാനന്ദമയിയിൽ നിന്നും ഏറ്റുവാങ്ങി. പ്ലാസ്റ്റിക്ക് സമ്പൂർണ്ണമായി ഒഴിവാക്കിക്കൊണ്ട് പൂർണമായും ജൈവരീതിയിൽ തയാറാക്കിയ ചെടിച്ചട്ടികളിലാണ് തൈകൾ വിതരണം ചെയ്യുന്നത്.

ബംഗളുരു -കൊല്ലം റൂട്ടിൽ സമ്മർ സ്പെഷൽ ട്രെയിൻ

കൊല്ലം: അവധിക്കാല തിരക്ക് പരിഗണിച്ച് ബംഗളുരു - കൊല്ലം റൂട്ടിൽ സ്പെഷൽ എക്സ്പ്രസ് ട്രെയിൻ അനുവദിച്ച് റെയിൽവേ. നമ്പർ 06577 എസ്എംവിടി ബംഗളുരു - കൊല്ലം ട്രെയിൻ നാളെ ഉച്ചകഴിഞ്ഞ് 3.50 ന് ബംഗളുരുവിൽ നിന്ന് പുറപ്പെട്ട് പിറ്റേ ദിവസം രാവിലെ 6.20 ന് കൊല്ലത്ത് എത്തും. തിരികെയുള്ള 06578 നമ്പർ ട്രെയിൻ 18 ന് രാവിലെ 10.45 ന് കൊല്ലത്ത് നിന്ന് പുറപ്പെട്ട് പിറ്റേ ദിവസം രാവിലെ 1.30 ന് എസ്എംവിടി ബംഗളുരുവിൽ എത്തും. ഒരു എസി ത്രീ ടയർ, ഒരു എസി ടൂടയർ, എട്ട് സ്ലീപ്പർ ക്ലാസ്, നാല് ജനറൽ സെക്കൻഡ് ക്ലാസ്, രണ്ട് അംഗപരിമിതർ എന്നിങ്ങനെയാണ് കോച്ച് പൊസിഷൻ. കായംകുളം, മാവേലിക്കര, ചെങ്ങന്നൂർ, തിരുവല്ല, ചങ്ങനാശേരി, കോട്ടയം, എറണാകുളം നോർത്ത്, ആലുവ, തൃശൂർ, പാലക്കാട് എന്നിവയാണ് കേരളത്തിലെ സ്റ്റോപ്പുകൾ.

കടം എടുത്ത് കേരളത്തിൽ ഇടത് സർക്കാർ എത്ര നാൾ ഭരിക്കും: രാജീവ്‌ ചന്ദ്രശേഖർ

കൊട്ടാരക്കര: കടം എടുത്തില്ലേൽ കേരളത്തിൽ ഇടതു പക്ഷസർക്കാർ ഇല്ലാതെയാകുമെന്ന് ബിജെപി സംസ്ഥാന അധ്യക്ഷൻ രാജീവ്‌ ചന്ദ്ര ശേഖർ പറഞ്ഞു. കൊട്ടാരക്കരയിൽ ബിജെപി കൊല്ലം ഈസ്റ്റ്‌ ജില്ലാ ഓഫീസിന്‍റെ ഉദ്ഘാടനം നിർവഹിച്ച് പ്രസംഗിക്കുകയായിരുന്നു അദ്ദേഹം. കിട്ടിയ അവസരങ്ങളിൽ ജനങ്ങളെ വഞ്ചിച്ച് വിവിധ സംസ്ഥാനങ്ങളിൽ അഴിമതി ഭരണം നടത്തുകയാണ് കോൺഗ്രസ്. കേരളത്തിൽ മാറ്റം വരണമെന്ന് ജനങ്ങൾ ആഗ്രഹിക്കുന്നു. അതിനായി ബിജെപി എൻ ഡി എ അധികാര കേന്ദ്രങ്ങളിൽ എത്തണമെന്നും ജനം ആശിക്കുന്നു. ബിജെപി കൊല്ലം ഈസ്റ്റ്‌ ജില്ലാ പ്രസിഡന്‍റ് രാജി പ്രസാദ് അധ്യക്ഷത വഹിച്ചു. രാഷ്രീയസ്വയം സേവക സംഘം ജില്ലാ സംഘ ചാലക് ആർ ദിവാകരൻ, കൊല്ലം വെസ്റ്റ് ജില്ലാ പ്രസിഡന്‍റ് എസ്. പ്രശാന്ത്, ബിജെപി മുൻ സംസ്ഥാന സെക്രട്ടറി അഡ്വ. സുരേഷ്, മേഖല സംഘടന സെക്രട്ടറി കുവേ സുരേഷ്, മുൻ ജില്ലാ പ്രസിഡന്‍റുമാരായ കെ. ശിവദാസൻ പിള്ള, ബി. ബി. ഗോപകുമാർ, ജി. ഗോപിനാഥ്‌, തുരുത്തിക്കര രാമകൃഷ്ണപിള്ള, കിഴക്കേ നെല സുധാകരൻ, പട്ടത്താനം രാധാകൃഷ്ണപിള്ള, മുൻ തിരുവനതപുരം ജില്ലാ പ്രസിഡന്‍റ് വി.വി. രാജേഷ്, സംസ്ഥാന സമിതി അംഗങ്ങളായ ബി. രാധാമണി, പി .എം .വേലായുധൻ, കൗൺസിൽ അംഗങ്ങളായ വയക്കൽ സോമൻ, എം. എസ് ശ്യാം കുമാർ, പൂർവ സൈനിക പരിഷത്ത് രക്ഷധികാരി കേണേൽ ഡിന്നി, മണ്ഡലം ജനറൽ സെക്രട്ടറി പ്രസാദ് പള്ളിക്കൽ എന്നിവർ പ്രസംഗിച്ചു.

മികവഴക് പുരസ്കാരം സൗമ്യ. എസ്. നായർക്ക്

കൊട്ടാരക്കര: ഒന്നാം ക്ലാസിലെ അധ്യാപകർക്ക് ഒന്നഴക് കൂട്ടായ്മ ഏർപ്പെടുത്തിയ സംസ്ഥാന മികവഴക് പുരസ്കാരം ഗവ: ടൗൺ യുപി സ്കൂൾ അധ്യാപിക സൗമ്യ .എസ്. നായർക്ക് സ്വന്തമാക്കി. ക്ലാസ്തലത്തിൽ മികവാർന്ന പ്രവർത്തനങ്ങൾ നടത്തിയ വിവിധ ജില്ലകളിലെ 46 അധ്യാപകരെയാണ് പുരസ്കാരത്തിന് തെരഞ്ഞെടുത്തത്. കുട്ടികളെ സ്വതന്ത്ര വായനക്കാരും എഴുത്തുകാരും ആക്കുന്നതിനുള്ള വ്യത്യസ്ത പ്രവർത്തനങ്ങൾ നടത്തി വിജയിക്കുകയും കുട്ടികളുടെ പഠനത്തെളിവുകൾ നവമാധ്യമങ്ങളിൽ പങ്കിടുകയും ചെയ്തത് സൗമ്യ.എസ്.നായർ ശ്രദ്ധ പിടിച്ചുപറ്റി. കുട്ടികൾ എഴുതിയ കഥകളും കുട്ടികളുടെ ഡയറിക്കുറിപ്പുകളും പുസ്തകരൂപത്തിൽ അച്ചടിച്ചു. തിരുവനന്തപുരം നേമം ഗവ.യുപി സ്കൂളിൽ നടന്ന സംസ്ഥാന അധ്യാപക സംഗമത്തിൽ കൊട്ടാരക്കര ഗവ.ടൗൗൺ യുപി സ്കൂളിലെ ഒന്നാം ക്ലാസ് കുട്ടികളുടെ ഡയറിക്കുറിപ്പുകൾ' ഒന്നഴക് ' പ്രകാശനം ചെയ്തിരുന്നു. എസ്‌സിഇആർ ടി റിസർച്ച് ഓഫീസർ രാജേഷ് വളളിക്കോട്, വിദ്യാകിരണം സംസ്ഥാന കോ-ഓർഡിനേറ്റർ ഡോ.രാമകൃഷ്ണൻ, ഡയറ്റ് പ്രിൻസിപ്പൽ ഗീതാകുമാരി, ഡോ. കലാധരൻ, അമുൽ ദേവ്, സൈജ തുടങ്ങിയ വിദ്യാഭ്യാസ മേഖലയിലെ പ്രമുഖർ പങ്കെടുത്ത ചടങ്ങിൽ എസ് സിഇആർടി ഡയക്ടർ മൊമെന്‍റോയും പ്രശസ്തിപത്രവും സൗമ്യ.എസ്.നായർക്ക് കൈമാറി.

ലഹരിക്കെതിരേ സൗഹൃദ ഫുട്ബോൾ മത്സരമൊരുക്കി കുട്ടി പോലീസ്

കൊല്ലം: പേരൂർ മീനാക്ഷിവിലാസം ഗവ വൊക്കേഷണൽ ഹയർ സെക്കൻഡറി സ്റ്റുഡന്‍റ്് പോലീസ് കേഡറ്റ് യൂണിറ്റിന്‍റെ ആഭിമുഖ്യത്തിൽ ലഹരിക്കെതിരേയുള്ള ഫുട്ബോൾ മത്സരം സംഘടിപ്പിച്ചു. വെള്ളമണൽ ഹയർ സെക്കൻഡറി സ്കൂളിലെ കേഡറ്റുകളും മത്സരത്തിൽ പങ്കെടുത്തു. കൗമാരപ്രായക്കാരായ കുട്ടികളിലെ ലഹരി ഉപയോഗത്തെയും അക്രമ വാസനകളെയും ഫുട്ബോൾ ലഹരിയിലേക്ക് തിരിച്ചുവിടുക എന്ന ലക്ഷ്യത്തോടെയാണ് സൗഹൃദമത്സരം സംഘടിപ്പിച്ചത്. മത്സരത്തിൽ പങ്കെടുത്ത ടീമുകൾക്ക് അസി.സബ്ഇൻസ്പെക്ടർ സാബു ഉപഹാരങ്ങൾ നൽകി. ഡ്രിൽ ഇൻസ്‌ട്രക്ടർമാരായ സംഗീത്, സജിൻ, അൽ സഫീർ കമ്മ്യൂണിറ്റി പോലീസ് ഓഫീസർമാരായ സജി, ബിന്ദു മോൾ, സുജിത്, വിക്രമൻപിള്ള, സ്കൂൾ ഫുട്ബോൾ പരിശീലകൻ രാജേന്ദ്രൻ, രക്ഷകർത്താക്കൾ, കേഡറ്റുകൾ, പി ടി എ പ്രതിനിധികൾ തുടങ്ങിയവർ പരിപാടിയിൽ പങ്കെടുത്തു.

അംബേദ്കർ ഇന്ത്യയ്ക്ക് നട്ടെല്ല് നൽകി: പി.പ്രസാദ്

കൊല്ലം: സ്വതന്ത്ര ഇന്ത്യയ്ക്ക് നിവർന്നു നിൽക്കാൻ നട്ടെല്ല് നൽകിയത് ഭരണഘടനാ ശിൽപ്പി ഡോ.ബി.ആർ.അംബേദ്കറാണെന്നും അധ:സ്ഥിതരായി കണ്ടിരുന്ന ജനതയ്ക്ക് മുഖ്യധാരയിലേക്ക് കടന്നുവരാൻ ഊർജ്ജമായതും അംബേദ്കറിന്‍റെ സാമൂഹിക ഇടപെടീലുകളുമായിരുന്നുവെന്നും മന്ത്രി പി.പ്രസാദ്. അഖിലേന്ത്യാ ദളിത് അവകാശ സമിതി (എഐഡിആർഎം), കേരള സ്റ്റേറ്റ് കർഷക തൊഴിലാളി ഫെഡറേഷൻ (ബികെഎംയു) ജില്ലാ കമ്മിറ്റികൾ സംയുക്തമായി കടപ്പാക്കട സ്പോർട്സ് ക്ലബ് ഹാളിൽ സംഘടിപ്പിച്ച ഡോ.ബി.ആർ.അംബേദ്കർ ജയന്തിയോടനുബന്ധിച്ചുള്ള സെമിനാർ ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. സെമിനാറിൽ എഐഡിആർഎം ജില്ലാ പ്രസിഡന്‍റ്് ഷാജി പെരുങ്കുളം മോഡറേറ്ററായിരുന്നു. ബികെഎംയു ജില്ലാ സെക്രട്ടറി കെ.ദിനേശ്ബാബു, സിപിഐ സംസ്ഥാന കൗൺസിലംഗങ്ങളായ ആർ.വിജയകുമാർ, ആർ.എസ്.അനിൽ, ബികെഎംയു ദേശീയ കൗൺസിലംഗം എ.മുസ്തഫ, ജി.സരസ്വതി,വി.വിനിൽ, എൻ.രവീന്ദ്രൻ, ബി.വിജയമ്മ, രമേശൻ ചെറുവല്ലൂർ, സി.ഹരി എന്നിവർ പ്രസംഗിച്ചു.

ദുഃഖവെള്ളി: നീണ്ടകര ഹാര്‍ബറില്‍ ഗതാഗതനിയന്ത്രണം

കൊല്ലം: ദുഃഖവെള്ളി ദിനത്തില്‍ കുരിശിന്‍റെ വഴി ഘോഷയാത്ര ആരംഭിക്കുന്ന സമയത്ത് നീണ്ടകര ഹാര്‍ബറില്‍ ഗതാഗത നിയന്ത്രണം ഏര്‍പ്പെടുത്തും. ജോയിന്‍റ് ജംഗ്ഷനിലാണ് വാഹനങ്ങള്‍ താത്കാലികമായി നിയന്ത്രിക്കുക. നീണ്ടകര പാലത്തിന്‍റെ തുടക്കഭാഗത്തുനിന്ന് തിരിഞ്ഞ് ഹാര്‍ബറിന്‍റെ എന്‍ട്രി ഗേറ്റ് വഴി ഹാര്‍ബറിലേക്കും പുറത്തേക്കും പോകാം. ഘോഷയാത്രയുടെ മുന്‍നിര ഹാര്‍ബറിന്‍റെ മുന്‍വശത്തെത്തുമ്പോള്‍ ഗേറ്റുകള്‍ ബ്ലോക്ക് ചെയ്യുന്നതിനാല്‍ ജോയിന്‍റ് ജംഗ്ഷൻ വഴി ഹാര്‍ബറിന്‍റെ പടിഞ്ഞാറെ ഭാഗത്തുള്ള മിനിഗേറ്റിലൂടെ ഹാര്‍ബറില്‍ പ്രവേശിക്കാം. വലിയ വാഹനങ്ങള്‍ക്ക് പടിഞ്ഞാറെ ഗേറ്റ് വഴി പോകാന്‍ തടസംനേരിട്ടാല്‍ താത്്കാലിക പാര്‍ക്കിങ് സൗകര്യം ഒരുക്കുമെന്ന് കൊല്ലം ഫിഷറീസ് ഡപ്യൂട്ടി ഡയറക്ടര്‍ അറിയിച്ചു.

അബ്ദുൽ കലാം അക്കാദമി സംഗീത ശില്പശാലയും സെമിനാറും നടത്തി

ഓടനാവട്ടം: ഡോ.എപിജെ അബ്ദുള്‍ കലാം വൊക്കേഷനല്‍ അക്കാദമി, കോസ്മിക് മ്യൂസിക് റിസർച്ച് സെന്‍റർ എന്നിവ സംയുക്തമായി സംഘടിപ്പിച്ച സംഗീത ശില്പശാലയും സെമിനാറും ഡയറ്റ് മുൻ പ്രിൻസിപ്പൽ ഡോ.പി. ബാബുക്കുട്ടൻ ഉദ്ഘാടനം ചെയ്തു. സംഗീതസംവിധായകൻ രാജൻ കോസ്മിക് അധ്യക്ഷത വഹിച്ചു. കെ.ഒ. രാജുക്കുട്ടി മുഖ്യപ്രഭാഷണം നടത്തി. ദീപാഹരി, ടി.എസ്.ആഭ, ഹരീന്ദ്ര ലാൽ, ആർ. ബിജുരാജ് ,എസ്.ഷീന അനിൽകുമാർ, ആരതി ജയകുമാർ, അശ്വിനി പ്രശാന്ത് എന്നിവർ പ്രസംഗിച്ചു.

അയൽക്കൂട്ടം അംഗങ്ങൾക്ക് വായ്പ

കൊല്ലം: കുടുംബശ്രീ സിഡിഎസ് മുഖേന അയൽക്കൂട്ടം അംഗങ്ങൾക്കായുള്ള കേരള സംസ്ഥാന പട്ടികജാതി പട്ടികവർഗ വികസന കോർപ്പറേഷൻ വായ്പ വിതരണത്തിന്‍റെ ജില്ലാ തല ഉദ്ഘാടനം കോവൂർ കുഞ്ഞുമോൻ എംഎൽഎ നിർവഹിച്ചു. ശാസ്താംകോട്ട ബ്ലോക്ക് പഞ്ചായത്ത് ഹാളിൽ നടന്ന ചടങ്ങിൽ കുന്നത്തൂർ നിയോജക മണ്ഡലത്തിന് കീഴിലുള്ള ആറ് പഞ്ചായത്തുകളിലെ സിഡിഎസ്മാർക്ക് രണ്ട് കോടി 46 ലക്ഷത്തിന്‍റെ ചെക്ക് ചടങ്ങിൽ കൈമാറി. കേരള സംസ്ഥാന പട്ടിക ജാതി പട്ടികവർഗ വികസന കോർപ്പറേഷന്‍റെ കൊല്ലം ഉപജില്ലാ ഓഫീസ് കുന്നത്തൂർ പഞ്ചായത്തിൽ ഉടൻ പ്രവർത്തനം ആരംഭിക്കുമെന്ന് എംഎൽഎ അറിയിച്ചു. ബ്ലോക്ക് പഞ്ചായത്ത് പ്രസിഡന്‍റ് ആർ. സുന്ദരേശൻ അധ്യക്ഷത വഹിച്ച ചടങ്ങിൽ കെഎസ്ഡിസി മാനേജിംഗ് ഡയറക്ടർ വി. പി. സുബ്രഹ്മണ്യൻ, കെഎസ്ഡി സി ജില്ലാ മാനേജർ എസ്. നന്ദകുമാർ, ജില്ലാ പഞ്ചായത്ത് അംഗം ശ്യാമളയമ്മ, ബ്ലോക്ക് പഞ്ചായത്ത് വികസനകാര്യ സ്ഥിരം സമിതി അധ്യക്ഷൻ അഡ്വ.അൻസാർ ഷാഫി, ബ്ലോക്ക് ഡെവലപ്മെന്‍റ് ഓഫീസർ കെ.ചന്ദ്രബാബു എന്നിവർ പ്രസംഗിച്ചു. അയൽക്കൂട്ടങ്ങളിലെ ഓരോ എസ്‌സി-എസ്ടി അംഗങ്ങൾക്കും ഒരു ലക്ഷം രൂപ വീതമാണ് നൽകുന്നത്.

വർണപ്പകിട്ടിൽ കൊല്ലം പൂരം; ദേശിംഗ നാടിന്‍റെ ഉത്സവമായി

കൊല്ലം: വർണപ്പകിട്ട് വാരി വിതറിയ കുടമാറ്റവും താളമേളങ്ങളുടെ പെരുക്കവും കൊട്ടിക്കയറിയ കൊല്ലം പൂരം അക്ഷരാർഥത്തിൽ ദേശിംഗ നാടിന്‍റെ ഉത്സവമായി. ആശ്രാമം മൈതാനിയിൽ തിങ്ങി നിറഞ്ഞ ആയിരക്കണക്കിന് പൂരപ്രേമികൾക്ക് കാഴ്ചയുടെ വിസ്മയമാണ് കൊല്ലം പൂരം സമ്മാനിച്ചത്. ആശ്രാമം ശ്രീകൃഷ്ണ സ്വാമി ക്ഷേത്രത്തിലെ ഉത്സവത്തിന്‍റെ ഭാഗമായാണ് വിഷുപിറ്റേന്ന് കുടമാറ്റവും പൂരവും അരങ്ങേറിയത്. താമരക്കുളം മഹാഗണപതിയും പുതിയകാവ് ഭഗവതിയും മുഖാമുഖം അണിനിരന്നതോടെയാണ് പൂരത്തിന്‍റെ പ്രധാന ആകർഷണമായ കുടമാറ്റത്തിന് തുടക്കമായത്. ഇരുവശങ്ങളിലുമായി അണിനിരന്ന ഗജവീരന്മാരുടെ മുകളിൽ വിവിധ നിറങ്ങളിലും ഡിസൈനുകളിലുമുള്ള മുത്തുക്കുടകളാണ് നിമിഷങ്ങളുടെ ഇടവേളകളിൽ മിന്നിമറഞ്ഞത്. ആനപ്പുറത്ത് ഇരിക്കുന്നവർ ആലവട്ടവും വെഞ്ചാമരവും വീശി കുടമാറ്റത്തിന്‍റെ വർണ വസന്തത്തിന് കൊഴുപ്പേകി. ഒപ്പം ഇലഞ്ഞിത്തറ മേളവും ചെണ്ടമേളവും മുറുകിയപ്പോൾ മൈതാനത്തെ പുരുഷാരം ആരവം മുഴക്കി ആവേശത്താൽ ഇളകി മറിഞ്ഞു. മേള പ്രേമികൾക്ക് താളം പിടിക്കാൻ കല്ലൂർ ഉണ്ണികൃഷ്ണൻ മാരാരുടെയും തൃക്കടവൂർ അഖിലിന്‍റെയും നേതൃത്വത്തിലുള്ള ഇരുന്നൂറോളം മേളക്കാരാണ് പൂരപ്പറമ്പിനെ ഇളക്കിമറിച്ചത്. ഇന്നലത്തെ പകലിൽ ആദ്യം കൊല്ലം നഗരം സാക്ഷ്യം വഹിച്ചത് ചെറുപൂരങ്ങളുടെ വരവിനാണ്. നഗരത്തിലെ 13 ക്ഷേത്രങ്ങളിൽ നിന്നുള്ള ചെറുപൂരം എഴുന്നെള്ളിപ്പ് ഉച്ചയോടെ ആശ്രാമം ശ്രീകൃഷ്ണ സ്വാമി ക്ഷേത്രത്തിൽ എത്തി. തുടർന്ന് ആചാരപരമായ ആന നീരാട്ടും ആനയൂട്ടും നടന്നു. വൈകുന്നേരം ആറാട്ടിന് പുറപ്പെടും മുമ്പ് ക്ഷേത്രാങ്കണത്തിൽ തിരുമുമ്പിൽ മേളവും കുടമാറ്റവും അരങ്ങേറി. തുടർന്നാണ് ആശ്രാമം മൈതാനിയിൽ കുടമാറ്റ പ്പൂരത്തിന് തുടക്കമായത്. പൂരത്തിന്‍റെ ഭാഗമായി സാംസ്കാരിക സമ്മേളനവും നടന്നു.

പൗരോഹിത്യം ദിവ്യദാനം: റവ.ഡോ.സെൽവിസ്റ്റർ പൊന്നുമുത്തൻ

പുനലൂർ: വിശുദ്ധ വാരത്തിന്‍റെ ഭാഗമായ സെന്‍റ് മേരീസ് കത്തീഡ്രൽ ദേവാലയത്തിൽ തൈലപരികർമ ദിവ്യബലിയും പൗരോഹിത്യവ്രത വാഗ്ദാന നവീകരണവും നടന്നു. പുനലൂർ ബിഷപ് റവ. ഡോ. സെൽവിസ്റ്റർ പൊന്നുമുത്തനൻ മുഖ്യ കാർമികത്വം വഹിച്ചു. പൗരോഹിത്യം ദിവ്യദാനമാണെന്നും പൗരോഹിത്യ ജീവിതം വിശ്വാസയാത്രയാണെന്നും വിശ്വാസയാത്ര പ്രത്യാശയുടെ തീർഥാടനമാണെന്നും ബിഷപപ് വചന സന്ദേശത്തിൽ പറഞ്ഞു. പുനലൂർ രൂപത വികാരി ജനറൽ മോൺ സെബാസ്റ്റ്യൻ വാസ്, മോൺ ജോസഫ് റോയി, എപ്പിസ്കോപ്പൽ വികാരി രൂപത ചാൻസിലർ റവ ഡോ. റോയി .ബി. സിംസൺ, രൂപതയിലെ വിവിധ ഇടവകകളിൽ സേവനം ചെയ്യുന്ന വൈദികർ എന്നിവർ സഹകാർമികരായിരുന്നു. റവ ഫാ. ജീസൻ മാസധ്യാനം നടത്തി. തുടർന്ന് നോമ്പുകാല കുമ്പസാരവും നടന്നു.രൂപതയിലെ വിവിധ ഇടവകകളിൽനിന്ന് സന്യസ്തരും അൽമായരും പങ്കെടുത്തു.

പാചക വാതക വിലവർധന: തീ വീട്ടമ്മമാരുടെ മനസിൽ- എൽ.കെ.ശ്രീദേവി

ചവറ : നിത്യോപയോഗ സാധനങ്ങളുടെ തീ വിലക്കൊപ്പം പാചക വാതകത്തിന്‍റെ ഭീമമായ വർദ്ധനവ് കുടുംബ ബഡ്‌ജറ്റിനെ താളം തെറ്റിക്കുമെന്നും, ഇത് ജനങ്ങളെ കൊള്ള അടിക്കുന്നതിനു തുല്യമാണെന്നും കെപിസി സി സെക്രട്ടറി എൽ. കെ. ശ്രീദേവി. പാചക വാതക വില വർധനയുടെ മറവിൽ കേന്ദ്ര - സംസ്ഥാന സർക്കാരുകളുടെ തീ വെട്ടി കൊള്ളക്ക് എതിരേ ഐ ൻ ടി യു സി ചവറ റീജണൽ കമ്മിറ്റിയുടെ നേതൃത്വത്തിൽ കുറ്റിവട്ടം ജംഗ്ഷനിൽ നിന്നും ആരംഭിച്ച തീ പന്ത സമരം ഉദ്ഘാടനം ചെയ്ത് പ്രസംഗിക്കുകയായിരുന്നു അവർ. അടിക്കടിയുള്ള വില വർധന സാധാരണക്കാരുടെ ജീവിതത്തിന് ഇരുട്ടടിയാണെന്നും, സംസ്ഥാന സർക്കാറിന് പെട്രോളിനും ഡീസലിനും അധിക നികുതി ഇനത്തിൽ ലഭിക്കുന്ന വരുമാനം ജനങ്ങൾക്ക് ലഭ്യമാക്കണമെന്നും കേന്ദ്ര - സംസ്ഥാന സർക്കാരുകൾ നയം തിരുത്തണമെന്നും ശ്രീദേവി ആവശ്യപെട്ടു.റീജണൽ പ്രസിഡന്‍റ്്‌ ജോസ് വിമൽരാജ് അധ്യക്ഷത വഹിച്ചു. ആർ. ജയകുമാർ, സന്തോഷ്‌ തുപ്പാശേരി, യൂസഫ് കുഞ്ഞു, ഷമീർ പുതുക്കുളം, പ്രശാന്ത് പൊന്മന, സെബാസ്റ്റ്യൻ ആംബ്രോസ്, നിഷാ സുനീഷ്, പി.നിസാർ കൊല്ലക, ബീന, ജോസഫ് ജോൺ, ടൈറ്റ്‌സ് തെക്കുംഭാഗം, കുറ്റയിൽ നിസ്സാം, സരിത അജിത്, അനിൽ മാമൂലയിൽ, മീനാക്ഷി, ശാലിനി എന്നിവർ പ്രസംഗിച്ചു.

അച്ഛനെത്തിയില്ല, കുഞ്ഞിനെ ചൊറൂട്ടി ഗാന്ധിഭവൻ

പത്തനാപുരം: ഡല്‍ഹി ആനന്ദ് വിഹാര്‍ സ്വദേശിനി റൂഹി ശര്‍മ്മയുടെ കുഞ്ഞിനാണ് വിഷുദിനത്തില്‍ പത്തനാപുരം ഗാന്ധിഭവനില്‍ ചോറൂണ് നടന്നത്. ഗാന്ധിഭവന്‍ ട്രസ്റ്റി പ്രസന്നാരാജന്‍, നീതിഭവന്‍ എക്‌സിക്യൂട്ടീവ് മാനേജര്‍ മായ അമല്‍, കൗണ്‍സിലര്‍ ആര്യ, സ്റ്റാഫ് സെക്രട്ടറി ശ്രീദേവി ടി.ആര്‍ എന്നിവരുടെ നേതൃത്വത്തില്‍ ഗാന്ധിഭവന്‍ സ്‌നേഹമന്ദിര്‍ ഓഡിറ്റോറിയത്തിലായിരുന്നു ചടങ്ങ്.് ആറുമാസം മുമ്പാണ് കൊല്ലം വനിതാ ശിശു സംരക്ഷണ വകുപ്പിന്‍റെ ശുപാര്‍ശപ്രകാരം എട്ടുവയസുകാരനായ മകന്‍ പൃഥ്വിരാജിനൊപ്പം ഗര്‍ഭിണിയായ റൂഹി ശര്‍മ്മയെ പോലീസ് ഗാന്ധിഭവനിലെത്തിച്ചത്. ഭര്‍ത്താവിന്‍റെ വരവും പ്രതീക്ഷിച്ച് ഗാന്ധിഭവനില്‍ കാത്തിരുന്ന റൂഹിയുടെ കഥ മാധ്യമങ്ങളില്‍ വാര്‍ത്തയായതിനു പിന്നാലെ ഭര്‍ത്താവിനെ തേടി അന്വേഷണമുണ്ടായെങ്കിലും ഫലമുണ്ടായില്ല. ഇന്‍സ്റ്റാഗ്രാമിലൂടെയായിരുന്നു ഡല്‍ഹി സ്വദേശിയായ മുഹമ്മദ് ബിലാലിനെ റൂഹി പരിചയപ്പെട്ടതും വിവാഹം ചെയ്തതും. തുടര്‍ന്ന് ഡല്‍ഹിയിലേക്ക് താമസം മാറിയ റൂഹി ആറുവര്‍ഷത്തോളം ഒരു സ്വകാര്യ കമ്പനിയില്‍ ജോലിചെയ്തു. കേരളത്തില്‍ ജോലിചെയ്തിരുന്ന ഭര്‍ത്താവിന്‍റെ നിര്‍ദ്ദേശപ്രകാരം ട്രെയിന്‍ കയറി കൊല്ലത്തെത്തിയ റൂഹിയെയും മകനെയും കൂട്ടിക്കൊണ്ടുപോകാന്‍ ഭര്‍ത്താവ് എത്തിയില്ല. യാത്രയ്ക്കിടയില്‍ മൊബൈല്‍ ഫോണും ചികിത്സാഫയലുകളും കൂടി നഷ്ടപ്പെട്ടതിനാല്‍ എന്തുചെയ്യണമെന്നറിയാതെ റെയില്‍വേസ്റ്റേഷനില്‍ തളര്‍ന്നിരുന്ന ഗര്‍ഭിണിയായ റൂഹിയെയും മകനെയും പോലീസ് ഗാന്ധിഭവനിലേക്ക് കൊണ്ടുവരിക യായിരുന്നു. നവംബര്‍ മാസം അഞ്ചിനായിരുന്നു പുനലൂര്‍ താലൂക്ക് ആശുപത്രിയില്‍ റൂഹി കുഞ്ഞിന് ജന്മം നല്‍കിയത്. ഗാന്ധിഭവനില്‍ നടന്ന നൂലുകെട്ട് ചടങ്ങില്‍ ഗാന്ധിഭവന്‍ സെക്രട്ടറി പുനലൂര്‍ സോമരാജന്‍ കുഞ്ഞിന് റോഹന്‍ എന്ന് പേരു നല്‍കിയിരുന്നു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact editor@deepika.com