ADVERTISEMENT

ADVERTISEMENT

കെഎസ്എസ്പിഎ ധർണ നടത്തി

ആലക്കോട്: കേരള സ്റ്റേറ്റ് സർവീസ് പെൻഷനേഴ്സ് അസോസിയേഷൻ (കെഎസ്എസ്പിഎ) ആഭിമുഖ്യത്തിൽ ആലക്കോട് സബ് ട്രഷറിക്ക് മുന്നിൽ പ്രതിഷേധ ധർണ നടത്തി. സംസ്ഥാന കമ്മിറ്റിയംഗം പി.അബ്‌ദുൾഖാദർ ഉദ്ഘാടനം ചെയ്തു. പെൻഷൻ പരിഷ്ക്കരണ കമ്മീഷനെ നിയമിക്കുക, ക്ഷാമാശ്വാസ കുടിശിക തീർത്ത് നൽകുക, മെഡിസെപ്പ് പദ്ധതിയുടെ ന്യൂനതകൾ പരിഹരിക്കുക, ലഹരി വ്യാപനം തടയുക തുടങ്ങിയ ആവശ്യങ്ങളാണ് ഉന്നയിച്ചായിരുന്നു ധർണ.

ആലക്കോട് മണ്ഡലം പ്രസിഡന്‍റ് ചാക്കോ വർഗീസ് അധ്യക്ഷത വഹിച്ചു. കെ.ബാബു, സി.എം. മാത്യു, ജേക്കബ് വളയത്ത്, പി.കെ. മോഹനൻ, പി.കെ. ഗിരിജാമണി, കെ.എം.ഡൊമിനിക് എന്നിവർ പ്രസംഗിച്ചു.

ADVERTISEMENT

മാലിന്യ സംസ്കരണത്തിനുള്ള പുരസ്കാരം കണ്ണൂരിന് മന്ത്രി എം.ബി. രാജേഷ് സമ്മാനിച്ചു

കണ്ണൂർ: മാലിന്യ സംസ്കരണ രംഗത്ത് സംസ്ഥാനത്ത് ഒന്നാം സ്ഥാനം നേടിയ കണ്ണൂർ ജില്ലയ്ക്കുള്ള പുരസ്കാരം മന്ത്രി എം.ബി രാജേഷ് സമ്മാനിച്ചു. തിരുവനന്തപുരം നിശാഗന്ധി ഓഡിറ്റോറിയത്തിൽ നടന്ന ദേശീയ ക്ലീൻ കേരള കോൺക്ലേവ് 'വൃത്തി 2025'ന്‍റെ ഉദ്ഘാടന വേദിയിൽ വച്ച് ജില്ലാ പഞ്ചായത്ത് പ്രസിഡന്‍റ് കെ.കെ. രത്നകുമാരി, ജില്ലാ കളക്ടർ അരുൺ കെ. വിജയൻ, ജില്ലാ പഞ്ചായത്ത് വൈസ് പ്രസിഡന്‍റ് ബിനോയ് കുര്യൻ, കേരള മിഷൻ ജില്ലാ കോ-ഓർഡിനേറ്റർ ഇ.കെ. സോമശേഖരൻ മന്ത്രിയിൽ നിന്ന് പുരസ്കാരം ഏറ്റു വാങ്ങി. ഒറ്റക്കെട്ടായ പ്രവർത്തനത്തിന്‍റെ വിജയമാണ് കണ്ണൂരിന്‍റേതെന്ന് ജില്ലാ കളക്ടർ അരുൺ കെ. വിജയൻ പറഞ്ഞു. മാലിന്യ സംസ്‌കരണവുമായി ബന്ധപ്പെട്ട് ഇനിയും ഒരുപാട് മികവാർന്ന പ്രവർത്തനങ്ങൾ വർദ്ധിത വീര്യത്തോടെ ഏറ്റെടുക്കേണ്ടതുണ്ട്. കണ്ണൂരിനെ ഹരിത ശുചിത്വ മാതൃകാ ജില്ലയായി വളർത്തിയെടുക്കുന്നതിന് അക്ഷീണം പ്രയത്‌നിച്ച മുഴുവൻ തദ്ദേശസ്വയംഭരണ സ്ഥാപനങ്ങൾക്കും മിഷനുകൾക്കും വകുപ്പുകൾക്കും വ്യക്തികൾക്കും സ്ഥാപനങ്ങൾക്കും കളക്ടർ നന്ദി രേഖപ്പെടുത്തി.

കെ.എം. മാണി അസാമാന്യ വ്യക്തിത്വത്തിന് ഉടമ: ഫാ. ജോസഫ് കാവനാടി

എടൂർ: രാഷ്ട്രീയ നേതാവ്, നിയമസഭാ സമാജികൻ, ഭരണാധികാരി എന്നീ നിലകളിലെല്ലാം പ്രവർത്തിച്ച അസാമന്യ വ്യക്തിത്വത്തിന്‍റെ ഉടമയായിരുന്നു കെ.എം. മാണിയെന്ന് ഇൻഫാം ദേശീയ ജനറൽ സെക്രട്ടറി ഫാ. ജോസഫ് കാവനാടി. കെ.എം.മാണിയുടെ ആറാം ചരമവാർഷികദിനാചരണം എടൂർ മൈത്രീഭവനിൽ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. കേരള നിയമസഭയിൽ തുടർച്ചയായി അമ്പത് വർഷം സമാജികനായി ജനസേവനം ചെയ്ത കെ.എം. മാണി കർഷകത്തൊഴിലാളി പെൻഷൻ, റബർ സബ്സിഡി, സാമൂഹ്യ ജലസേചന പദ്ധതി, വെളിച്ച വിപ്ലവം തുടങ്ങി നിരവധി ജനക്ഷേമ പരിപാടികളിലൂടെ കേരളം കണ്ട ഏറ്റവും വലിയ കർഷക സ്നേഹിയും ഭരണാധികാരി ആയിരുന്നുവെന്നും ഫാ. ജോസഫ് കാവനാടി പറഞ്ഞു. ബയോമൗണ്ടൻ പ്രൊഡ്യൂസേഴ്‌സ് കമ്പനി മാനേജിംഗ് ഡയറക്ടർ ഫാ. ബെന്നി നിരപ്പേൽ അധ്യക്ഷത വഹിച്ചു. ഇരിട്ടി ബ്ലോക്ക് പ്രസിഡന്‍റ് കെ.വേലായുധൻ മുഖ്യപ്രഭാഷണം നടത്തി. കത്തോലിക്ക കോൺഗ്രസ് രൂപതാ വൈസ് പ്രസിഡന്‍റ് ബെന്നിച്ചൻ മഠത്തിനകം, ഏബ്രഹാം പാരിക്കാപ്പള്ളി, മുൻ ജില്ലാ പഞ്ചായത്തംഗം തോമസ് വർഗീസ്, ബോസ് കൊച്ചുമല, ഔസേപ്പച്ചൻ തുണ്ടത്തിൽ, അധ്വാനവർഗ സിദ്ധാന്ത പഠന വേദി ചെയർമാൻ പി.ടി.ജോസ്, സെക്രട്ടറി വിൽസൺ കാവുങ്കൽഎന്നിവർ പ്രസംഗിച്ചു. എടൂർ മൈത്രീഭവന അംഗങ്ങളോടൊപ്പം ഉച്ച ഭക്ഷണവും ഉണ്ടായിരുന്നു.

രണ്ടു വർഷം മുന്പ് പൊളിച്ചിട്ട വീട്ടിലേക്കുള്ള വഴി ശരിയാക്കി

ഇരിട്ടി: കച്ചേരിക്കടവിൽ നിർമാണം നടക്കുന്ന എടൂർ-പാലത്തുംകടവ് കെഎസ്ടിപി റോഡിന്‍റെ കരാറുകാരന്‍റെ വാഹനം തടഞ്ഞു. റോഡ് നിർമാണത്തിന്‍റെ ഭാഗമായി രണ്ടുവർഷം മുന്പ് പൊളിച്ചിട്ട പാലമറ്റത്തിൽ സൈമണിന്‍റെ വീട്ടിലേക്കുള്ള വഴി ശരിയാക്കി കൊടുക്കാത്തതിൽ പ്രതിഷേധിച്ചായിരുന്നു നാട്ടുകാരും പഞ്ചായത്ത് പ്രസിഡന്‍റ്, പഞ്ചായത്ത് അംഗങ്ങളും ചേർന്ന് കരാറുകാരന്‍റെ വാഹനം തടഞ്ഞത്. വയസായ ദമ്പതികൾ താമസിക്കുന്ന വീട്ടിൽ വാഹനങ്ങൾ കയറ്റാൻ കഴിയാത്തവിധം പൊളിച്ചിട്ട ശേഷം കരാറുകാർ ആരും ഇവിടേക്ക് തിരിഞ്ഞു നോക്കിയില്ല. നിരവധി തവണ നാട്ടുകാരും വീട്ടുടമസ്ഥനം ആവശ്യം അറിയിച്ചെങ്കിലും യാതൊരു നടപടിയും ഉണ്ടായിട്ടില്ല. വാഹനം തടഞ്ഞതോടെ ജെസിബിയുമായി എത്തിയ കരാറുകാരന്‍റെ തൊഴിലാളികൾ മണ്ണും കല്ലും മാറ്റി വീട്ടിലേക്ക് കയറുന്ന റോഡിന്‍റെ പണി ആരംഭിച്ചു. കച്ചേരിക്കടവിൽ പണി പൂർത്തിയാക്കാനുള്ള മൂന്ന് വീടുകളിലേക്കുള്ള റോഡിന്‍റെ നിർമാണം ശനിയാഴ്ചക്കുള്ളിൽ പൂർത്തിയാക്കാമെന്ന് കരാറുകാരൻ ഉറപ്പ് നൽകിയതോടെയാണ് തടഞ്ഞുവച്ച വാഹനം വിട്ടത്. പഞ്ചായത്തിന്‍റെ വിവിധ ഭാഗങ്ങളിൽ വീടുകളിലേക്കുള്ള റോഡും ഓവുചാൽ ഉൾപ്പെടെ നിർമിക്കാനുണ്ടെന്നും മഴ ആരംഭിക്കുന്നതിന് മുന്പ് ഇവയെല്ലാം പൂർത്തീകരിച്ചില്ലെങ്കിൽ കരാറുകാരന്‍റെ മുഴുവൻ വാഹങ്ങളും തടയുമെന്നും നിർമാണം നടത്താൻ അനുവദിക്കില്ലെന്നും പഞ്ചായത്ത് പ്രസിഡന്‍റ് കുര്യാച്ചൻ പൈമ്പള്ളിക്കുന്നേൽ പറഞ്ഞു. ജനങ്ങൾക്ക് ബുദ്ധിമുട്ട് സൃഷ്ടിക്കുന്ന നിരവധി പ്രവർത്തനങ്ങൾ കരാറുകാരന്‍റെ ഭാഗത്തുനിന്നും ഉണ്ടാകുന്നതായും പ്രശ്നം ഉടൻ പരിഹരിക്കാൻ നടപടി സ്വീകരിച്ചില്ലെങ്കിൽ ശക്തമായ സമര പരിപാടികൾ സംഘടിപ്പിക്കുമെന്നും പ്രസിഡന്‍റ് പറഞ്ഞു. പഞ്ചായത്ത് സ്റ്റാന്‍ഡിംഗ് കമ്മിറ്റി ചെയർമാൻ ഐസക് ജോസഫ്, പഞ്ചായത്ത് അംഗങ്ങളായ ബിജോയി പ്ലാത്തോട്ടം, സെലീന ബിനോയി, ടോമി ചെരിയംമ്പുറം, ജോൺസൺ ചാലിൽ, ജോസ് മണികൊമ്പേൽ, വിത്സൺ കുറുപ്പംപറമ്പിൽ എന്നിവർ നേതൃത്വം നൽകി.

ബിജെപി പ്രവർത്തകർ പുനഃസ്ഥാപിച്ച കൊടിമരം പോലീസ് നീക്കംചെയ്തു

പഴയങ്ങാടി: കണ്ണപുരം-ചൈനാ ക്ലേ റോഡിൽ പോലീസ് പിഴുതുമാറ്റിയതിനെ തുടർന്ന് ബിജെപി പ്രവർത്തകർ പുനഃസ്ഥാപിച്ച പാർട്ടി കൊടിമരം പോലീസ് നീക്കം ചെയ്തു. സംഘർഷ സാധ്യത കണക്കിലെടുത്ത് വൻ സന്നാഹത്തോടെയായിരുന്നു പോലീസ് എത്തിയത്. ഇതോടൊപ്പം റോഡരികിലെ മറ്റ് രാഷ്‌ട്രീയ പാർട്ടികളുടെയും കൊടിമരങ്ങളും തോരണങ്ങളും നീക്കം ചെയ്തു. കണ്ണപുരം സിഐ ബാബുമോൻ, മയ്യിൽ സിഐ സഞ്ജയ്കുമാർ എന്നിവരുടെ നേതൃത്വത്തിലുള്ള വൻ പോലീസ് സംഘത്തിന്‍റെ നേതൃത്വത്തിലാണ് കൊടിമരങ്ങളും തോരണങ്ങളും അഴിച്ചു മാറ്റിയത്. പ്രദേശത്ത് പോലീസ് ക്യാമ്പ് ചെയ്യുന്നുണ്ട്. പ്രവർത്തകർ കൊടിമരം വീണ്ടും പുനഃസ്ഥാപിച്ചു പഴയങ്ങാടി: നേരത്തെ പോലീസ് നീക്കം ചെയ്തതിനെ തുടർന്ന് ബിജെപി പ്രവർത്തകർ പുനഃസ്ഥാപിച്ച കൊടിമരം വീണ്ടും പോലീസ് നീക്കം ചെയ്തതിനു പിന്നാലെ പ്രവർത്തകർ പുനഃസ്ഥാപിച്ചു. കണ്ണപുരം ചൈനാക്ലേ റോഡിൽ കല്യാശേരി മണ്ഡലം ജനറൽ പ്രസിഡന്‍റ് സി.വി. സുമേഷിന്‍റെ നേതൃത്വത്തിലാണ് കൊടിമരം രണ്ടാമതും സ്ഥാപിച്ച് കൊടിയേറ്റിയത്. നേതാക്കളായ കെ.വിജു ചെറുകുന്ന്, ജിജേഷ് അണ്ണാമല, രതീഷ് പൂക്കോട്ടി, ഹരിദാസ് കവിണിശേരി, ശ്രീനിവാസൻ പുഞ്ചവയൽ, മനു കൃഷ്ണ സത്യൻ കരിക്കൻ, അർജുൻ മാവിലക്കണ്ടി യുവമോർച്ച ജില്ലാ ജനറൽ സെക്രട്ടറി അർജുൻ ദാസ് എന്നിവർ പങ്കെടുത്തു.

കാർ നിയന്ത്രണംവിട്ട് കലുങ്കിന്‍റെ കുഴിയിലേക്ക് വീണു

ഇരിട്ടി: തലശേരി - മൈസൂരു അന്തർ സംസ്ഥാന പാതയിൽ മാടത്തിൽ പള്ളിക്ക് സമീപം ഇന്നോവ കാർ നിയന്ത്രണം വിട്ട് കലുങ്കിന്‍റെ കുഴിയിലേക്ക് വീണ് അപകടം. അപകടത്തിൽ വടകര സ്വദേശികൾക്ക് പരിക്കേറ്റു. കഴിഞ്ഞദിവസം പുലർച്ചെ കർണാടകയിൽ നിന്ന് ഇരിട്ടി ഭാഗത്തേക്ക് പോകുകയായിരുന്ന കാറാണ് അപകടത്തിൽപ്പെട്ടത്. നിയന്ത്രണം വിട്ട കാർ റോഡിന്‍റെ സൈഡിലെ സുരക്ഷാ പില്ലറുകൾ ഇടിച്ച് തകർത്ത ശേഷം ഇലട്രിക് പോസ്റ്റിന് ഇടയിലൂടെ കലുങ്കിന്‍റെ കുഴിയിലേക്ക് വാഹനം ഇടിച്ചിറങ്ങുകയായിരുന്നു. സ്ത്രീകളും കുട്ടികളും ഉൾപ്പെടെ വാഹനത്തിൽ ഉണ്ടയിരുന്ന യാത്രക്കാർക്ക് പരിക്കേറ്റു. ശബ്ദം കേട്ട് എത്തിയ പ്രദേശവാസികളാണ് അപകടത്തിൽ പെട്ടവരെ ആശുപത്രിയിൽ എത്തിച്ചത്. ഡ്രൈവർ ഉറങ്ങിപോയതാണ് അപകടകാരണം എന്നാണ് പ്രാഥമിക നിഗമനം.

കൃഷി വകുപ്പ് സംഘം നിർമാണം വിലയിരുത്തി

ഇരിട്ടി: അയ്യൻകുന്ന് പഞ്ചായത്തിൽ ത്രിതല പഞ്ചായത്തുകളും കൃഷി വകുപ്പും ചേർന്ന് നടത്തുന്ന സോളാർ തൂക്കുവേലിയുടെ നിർമാണ പുരോഗതി കൃഷി വകുപ്പിലെ ഉന്നത സംഘം സ്ഥലത്തെത്തി പരിശോധിച്ചു വിലയിരുത്തി. പാലത്തുംകടവ് മുതൽ അയ്യൻകുന്ന് പഞ്ചായത്തിന്‍റെ അതിർത്തിയായ വാളത്തോട് വരെയുള്ള 20.5 കിലോമീറ്റർ ദൂരത്തിലായി 1.45 കോടി രൂപ ചെലവിലാണ് സോളാർ തൂക്കുവേലി നിർമിക്കുന്നത്. പാലത്തുംകടവിൽ നിന്നാണ് പ്രവൃത്തി ആരംഭിച്ചിരിക്കുന്നത്. പാലത്തുംകടവ് കരിമലയിൽ വനാതിർത്തിയിൽ രണ്ട് കിലോമീറ്റർ നിർമാണമാണ് പൂർത്തിയായത്. വാണിയപ്പാറതട്ട്, രണ്ടാംകടവ് , ഉരുപ്പുംകുറ്റി എന്നിവിടങ്ങളിൽ ജനകീയ സമിതിയുടെ നേതൃത്വത്തിൽ വേലി നിർമാണത്തിനായി അടിക്കാടുകൾ വെട്ടിത്തെളിച്ചു കഴിഞ്ഞു. ഉളിക്കൽ, പായം, അയ്യൻകുന്ന്, ആറളം പഞ്ചായത്തുകളിലാണ് അതിർത്തിയിൽ സോളാർ തൂക്കുവേലി നിർമിക്കുന്നത്. ഉളിക്കൽ, അയ്യൻകുന്ന് പഞ്ചായത്തുകളിലെ തൂക്കുവേലി നിർമാണത്തിനായി കൃഷിവകുപ്പ് ഇതിനകം 2.18 കോടി രൂപ വനം വകുപ്പിന് കൈമാറിയിട്ടുണ്ട്. ഉളിക്കൽ പഞ്ചായത്തിന്‍റെ അഞ്ച് കിലോമീറ്ററും അയ്യൻകുന്നിൽ രണ്ട് കിലോമീറ്റർ ദൂരവുമാണ് പ്രവൃത്തി പൂർത്തീകരിച്ച് ചാർജ് ചെയ്തു. മറ്റുള്ള ഭാഗങ്ങളിലെ പ്രവൃത്തി ഇഴയുകയാണ്. പ്രവൃത്തിയുടെ പുരോഗതി വിലയിരുത്തിയ ശേഷം ഒരു കോടി രൂപകൂടി കൈമാറുമെന്ന് കൃഷിവകുപ്പ് അധികൃതർ അറിയിച്ചു. കൃഷി വകുപ്പ് ഡെപ്യൂട്ടി ഡയറക്ടർ തുളസി ചെങ്ങാട്ട്, ഡെപ്യൂട്ടി ഡയറക്ടർ പദ്ധതി ഇൻ ചാർജ് ബിന്ദു കെ. മാത്യു , അയ്യൻകുന്ന് കൃഷി ഓഫീസർ ഷെറിൻ ജോസ് , ബീറ്റ് ഫോറസ്റ്റ് ഓഫീസർ അമൽ എന്നിവരടങ്ങുന്ന സംഘമാണ് പരിശോധന നടത്തിയത്. സംഘത്തിൽ പഞ്ചായത്ത് സ്റ്റാൻഡിംഗ് കമ്മിറ്റി ചെയർമാൻ ഐസക് ജോസഫ് പഞ്ചായത്തംഗങ്ങളായ ബിജോയി പ്ലാത്തോട്ടം , സെലീന ബിനോയി , എന്നിവരുമുണ്ടായിരുന്നു. പ്രവൃത്തി മന്ദഗതിയിലെന്ന് പഞ്ചായത്ത് അതിനിടെ തൂക്കുവേലി നിർമാണം മന്ദഗതിയിലാണെന്ന് ആരോപണം ഉയരുന്നുണ്ട്. ജനകീയ സമിതിയുടെ നേതൃത്വത്തിൽ വനമേഖലയോട് ചേർന്ന അടിക്കാടുകൾ വെട്ടുന്നതുൾപ്പടെയുള്ള അടിസ്ഥാന സൗകര്യങ്ങൾ ചെയ്തു കൊടുക്കുന്നുണ്ടെങ്കിലും നിർമാണ പ്രവൃത്തികൾ അനിശ്ചിതമായി വൈകുകയാണെന്ന് പഞ്ചായത്ത് പ്രസിഡന്‍റ് കുര്യാച്ചൻ പൈന്പള്ളിക്കുന്നേൽ ആരോപിച്ചു. അടിക്കാടുകൾ വെട്ടി സൗകര്യമൊരുക്കിയ ഇടങ്ങളിൽ വീടും കാട് വളർന്ന അവസ്ഥയാണ്. മഴ ആരംഭിച്ചാൽ പ്രവൃത്തി അസാധ്യകുകയും ചെയ്യും. ഈ സാഹചര്യത്തിൽ നിർമാണ ചുമതലയുള്ള കെൽ അധികൃതർ പ്രവൃത്തി വേഗത്തിലാക്കണമെന്നും പഞ്ചായത്ത് പ്രസിഡന്‍റ് ആവശ്യപ്പെട്ടു. സഹകരിക്കാതെ വനംവകുപ്പ് സോളാർ തൂക്ക് വേലി നിർമാണമവുമായി ബന്ധപ്പെട്ട് വനംവകുപ്പിന്‍റെ ഭാഗത്ത് നിന്ന് സഹകരണം ഉണ്ടാകുന്നില്ലെന്ന പരാതിയും ഉയരുന്നുണ്ട്. വനംവകുപ്പ് നിസഹകരണ നിലപാട് തിരുത്തിയില്ലെങ്കിൽ ഡിഎഫ്ഒ ഓഫീസ് ഉപരോധമുൾപ്പടെയുള്ള പ്രക്ഷോഭം സംഘടിപ്പിക്കുമെന്ന് പഞ്ചായത്ത് പ്രസിഡന്‍റ് കുര്യാച്ചൻ പൈന്പള്ളിക്കുന്നേൽ പറഞ്ഞു. വേലി കടന്നു പോകുന്ന ഭാഗത്തെ മരങ്ങൾ മുറിച്ചു നീക്കേണ്ടത് വനംവകുപ്പാണ്. എന്നാൽ ഇതുമായി ബന്ധപ്പെട്ട നടപടികൾ സ്വീകരിച്ചിട്ടില്ല. വന്യമൃഗാ ക്രമണം രൂക്ഷമായ സാഹചര്യത്തിൽ കർഷകർ കൃഷിയും സ്ഥലവും ഉപേക്ഷിച്ച് പോകുന്ന അവസ്ഥയാണ്. പാലത്തുംകടവു മുതൽ കേരള വനാതിർത്തി വരെ വരുന്ന ഒന്നര കിലോമീറ്റർ വരുന്ന സ്ഥലത്ത് സോളാർ തൂക്ക് വേലി നിർമിക്കാൻ പഞ്ചായത്ത് വിഹിതം വനംവകുപ്പിന്‍റെ അക്കൗണ്ടിലേക്ക് കൈമാറിയിട്ടും ടെൻഡർ നടപടികൾ പോലും ആരംഭിച്ചിട്ടില്ല. പ്രവൃത്തിക്ക് ടെൻഡർ നടപടികൾ പോലും വനം വകുപ്പ് ആരംഭിക്കാത്തത് ജനങ്ങളോടുള്ള വെല്ലുവിളിയാണെന്ന് കുര്യാച്ചൻ പൈമ്പള്ളിക്കുന്നേൽ പറഞ്ഞു .

ലഹരി വേട്ടയിൽ സർക്കാർ ആത്മാർഥത തെളിയിക്കണം: മദ്യവിരുദ്ധ സമിതി

ഇരിട്ടി : ലഹരി വ്യാപനം നിയന്ത്രിക്കുന്നതിനുള്ള ശ്രമങ്ങൾ ആത്മാർഥതയുള്ളതാണെന്ന് തെളിയിക്കണമെന്ന് അതിരൂപത മദ്യവിരുദ്ധസമിതിയുടെയും മുക്തിശ്രീയുടെയും തലശേരി അതിരൂപത എക്സിക്യുട്ടീവ് യോഗം. ശിക്ഷാ നിയമങ്ങളിലെ ലാഘവത്വത്തിന്‍റെ മറവിൽ കുറ്റവാളികൾ രക്ഷപ്പെടുന്നത് ഒഴിവാക്കാൻ കഠിന ശിക്ഷ ഉറപ്പാക്കാൻ നിയമ ഭേദഗതി നടപ്പാക്കണമെന്നും വെളിമാനത്ത് ചേർന്ന അതിരൂപത എക്സിക്യുട്ടീവ് യോഗം സർക്കാരിനോടാവശ്യപ്പെട്ടു. ലഹരി വ്യാപനം തടയാൻ സംഘടിതപ്രവർത്തനങ്ങളും ജാഗ്രതാ സമിതികൾ രൂപീകരിക്കാനും യോഗം തീരുമാനിച്ചു. ഇതിന്‍റെ ഭാഗമായി രൂപതയിലെ എല്ലാ ഇടവകകളോടും അനുബന്ധിച്ച വാർഡ് കൂട്ടായ്മകളും സ്കൂളുകളിൽ ബോധവത്കരണ ക്ലാസുകളും ജാഗ്രതാ സമിതികളും രൂപീകരിക്കും. രൂപതാ തലത്തിൽ ഇതിനായി റിസോഴ്സ് ടീമും ഹെൽപ്പ് ഡസ്കും രൂപീകരിച്ചു. എക്സിക്യുട്ടീവ് യോഗം ഫാ. മാർട്ടിൻ കിഴക്കേതലയ്ക്കൽ ഉദ്ഘാടനം ചെയ്തു. മദ്യവിരുദ്ധ സമിതി അതിരൂപത പ്രസിഡന്‍റ് ടോമി വെട്ടിക്കാട്ട്, മുക്തിശ്രീ പ്രസിഡന്‍റ് ഷിനോ പാറയ്ക്കൽ, ആനിമേറ്റർ സിസ്റ്റർ ജോസ് മരിയ സിഎംസി, ജോസ് ചിറ്റേട്ട്, വിൻസെന്‍റ് മുണ്ടാട്ടുചുണ്ടയിൽ, പൈലി വലിയകണ്ടം, ടി.ഡി. ദേവസ്യ, സോയി ജോസഫ്, സോളി രാമച്ചനാട്ട്, മേരി ആലക്കാമറ്റത്തിൽ എന്നിവർ പ്രസംഗിച്ചു .

പ്രതിക്ക് ജീവപര്യന്തവും അരലക്ഷം പിഴയും

തലശേരി: മാതാപിതാക്കളുടെ മുന്നിൽ മകനെ കൊലപ്പെടുത്തിയെന്ന കേസിലെ പ്രതിക്ക് ജീവപര്യന്തവും അര ലക്ഷം രൂപ പിഴയും കോടതി ശിക്ഷ വിധിച്ചു. തിമിരി ചെക്കിച്ചേരിയിലെ കളമ്പുംകൊട്ട് വീട്ടിൽ ശരത്കുമാറിനെ (28) കൊലപ്പെടുത്തിയ കേസിലെ പ്രതിയും അയൽവാസിയായ പുത്തൻപുരക്കൽ ജോസ് ജോർജ് എന്ന കൊല്ലൻ ജോസിനെയാണ് (63) അഡീഷണൽ ജില്ലാ സെഷൻസ് ജഡ്ജ് ടിറ്റി ജോർജ് ശിക്ഷിച്ചത്. ലോറി ഡ്രൈവറായ ശരത് കുമാറിനെ മാതാപിതാക്കളായ രാജൻ, ശാന്ത എന്നിവരുടെ മുന്നിൽവച്ച് 2015 ജനുവരി ഒന്നിന് രാത്രി പത്തിനാണ് കൊലപ്പെടുത്തിയത്. പ്രതിയുടെ കിണറ്റിൽ നിന്നുമാണ് ശരത്കുമാറിന്‍റെ കുടുംബം വീട്ടാവശ്യത്തിനുള്ള വെള്ളമെടുത്തിരുന്നത്. സംഭവത്തിന്‍റെ തലേ ദിവസം വെള്ളമെടുക്കുന്നത് പ്രതി തടഞ്ഞു. ഇത് സംബന്ധിച്ചുണ്ടായ വാക്ക് തർക്കമാണ് കൊലയിൽ കലാശിച്ചത്. പ്രോസിക്യൂഷനു വേണ്ടി അഡ്വ. ജയശ്രീ ഹാജരായി.

ഗോപിനാഥ് രവീന്ദ്രൻ കേസിൽ സർക്കാരും സർവകലാശാലയും മുടക്കിയത് നാലല്ല, 68 ലക്ഷം

കണ്ണൂർ: കണ്ണൂർ സർവകലാശാല മുൻ വൈസ് ചാൻസലർ ഗോപിനാഥ് രവീന്ദ്രൻ കേസിൽ സർവകലാശാല ഫണ്ടിൽനിന്നു ചെലവായ തുക തിരിച്ചടച്ചു എന്നുള്ള സർവകലാശാലയുടെ വാദഗതി തെറ്റിദ്ധരിപ്പിക്കുന്നതെന്ന് കണ്ണൂർ സർവകലാശാല യുഡിഎഫ് സെനറ്റേഴ്സ് ഫോറം. കേസിൽ സർക്കാരും സർവകലാശാലയും ചെലവാക്കിയത് 68 ലക്ഷത്തോളം രൂപയാണെന്ന് മന്ത്രി ആർ. ബിന്ദു 2024 ജൂൺ മാസത്തിൽ നിയമസഭയിൽ നൽകിയ മറുപടിയിൽ വ്യക്തമാക്കിയിട്ടുണ്ട്. 30 ലക്ഷത്തോളം രൂപ സർവകലാശാലയും 38 ലക്ഷത്തോളം രൂപ സർക്കാരും ചെലവഴിച്ചു എന്നത് രേഖകളിൽ നിന്നും സ്പഷ്ടവുമാണ്. എന്നാൽ, വെറും നാലുലക്ഷം രൂപ ഗോപിനാഥ് രവീന്ദ്രൻ തിരിച്ചടച്ചു എന്നുള്ള വാദഗതി അദ്ദേഹത്തിന് വേണ്ടി ചെലവായ മുഴുവൻ തുകയും തിരിച്ചടച്ചു എന്ന പ്രതീതി സൃഷ്ടിക്കാൻ സർവകലാശാല ഉപയോഗിക്കുന്നതായി യുഡിഎഫ് സെനറ്റ് അംഗങ്ങൾ അറിയിച്ചു. വിസി കേസുമായി ബന്ധപ്പെട്ട് ചാൻസിലറായ ഗവർണർ നൽകിയ കാരണം കാണിക്കൽ നോട്ടീസ് നേരിടുവാൻ തന്‍റെ കേസ് സുപ്രീംകോടതിയുടെ പരിഗണനയിൽ ആയതിനാൽ ബാധിക്കുന്നതല്ല എന്ന നിലപാടുമായി ഗോപിനാഥ് രവീന്ദ്രൻ ഹൈക്കോടതിയെ സമീപിച്ച ഇനത്തിൽ ചിലവായ തുക മാത്രമാണ് നാലു ലക്ഷം രൂപ എന്നിരിക്കെ അദ്ദേഹത്തിന്‍റെ പുനർ നിയമനവുമായി ബന്ധപ്പെട്ട് സുപ്രീംകോടതിയിലടക്കം സർക്കാരും സർവകലാശാലയും ചെലവാക്കിയ തുക പൂർണമായും തിരിച്ചടച്ചു എന്നുള്ള തെറ്റിദ്ധാരണ സർവകലാശാല കേന്ദ്രങ്ങൾ മനഃപൂർവം സൃഷ്ടിക്കുകയാണ്. സർക്കാരും സർവകലാശാലയും പ്രസ്തുത കേസിൽ ചെലവാക്കിയ തുക പൂർണമായും ഗോപിനാഥ് രവീന്ദ്രൻ തിരിച്ചടച്ചില്ലെങ്കിൽ നിയമനടപടിയുമായി മുന്നോട്ടു പോകുമെന്ന് സെനറ്റേഴ്സ് ഫോറം കൺവീനർ ഡോ.ഷിനോ പി. ജോസ് അറിയിച്ചു.

വ്യാപാര സ്ഥാപനത്തിലെ ചില്ലുകൂട്ടിൽ കുടുങ്ങിയ അങ്ങാടിക്കുരുവി നിയമത്തിന്‍റെ കനിവ് തേടുന്നു

ബിജു പാരിക്കാപ്പള്ളി ഉളിക്കൽ: പൂട്ടിയവ്യാപാര സ്ഥാപനത്തിന്‍റെ ചില്ലുകൂട്ടിൽ കുടുങ്ങിയ അങ്ങാടിക്കുരുവിയെ ജീവിതത്തിലേക്ക് പറത്തി വിടാൻ കോടതി തന്നെ ഇടപെടേണ്ടി വന്നേക്കും. രണ്ടു ദിവസം മുന്പാണ് വ്യാപാരികൾ തമ്മിലുണ്ടായ തർക്കത്തെത്തുടർന്ന് കോടതി പൂട്ടിച്ച് സീൽ ചെയ്ത സ്ഥാപനത്തിലെ ഷട്ടറിനു മുന്നിലെ ചില്ലുകൂട്ടിൽ അങ്ങാടിക്കുരുവി കുടുങ്ങിയത്. വംശനാശ ഭീഷണി നേരിടുന്ന പക്ഷികളുടെ പട്ടികയിലാണ് അങ്ങാടിക്കുരുവികൾ. ചില്ലുകൂട്ടിൽ നിന്ന് രക്ഷപ്പെടാനായി പറക്കുന്ന കുരുവി കൂട്ടിലിടിച്ച് വീഴുന്ന കാഴ്ച ദയനീയമാണ്. സമീപത്തെ മറ്റു വ്യാപാരികളും ഓട്ടോറിക്ഷാ ഡ്രൈവർമാരും കുരുവിക്ക് ഭക്ഷണവും വെള്ളവും നൽകാൻ ശ്രമിക്കുന്നുണ്ടെങ്കിലും എത്രനാൾ കൂട്ടിനുള്ളിൽ കുരുവി ജീവനോടെയിരിക്കുമെന്ന ആശങ്കയും ഉയരുന്നുണ്ട്. കണ്ണാടിക്കൂട്ടിൽ അകപ്പെട്ട നിലയിൽ കുരുവിയെ കണ്ട പ്രദേശവാസിയായ മനോജ് എന്നയാൾ അഗ്നിരക്ഷാ സേനയെ വിവരമറിയിച്ചിരുന്നു. എന്നാൽ കോടതി സീൽ ചെയ്ത സ്ഥാപനത്തിൽ കടന്നു ചെല്ലുന്നത് നിയമവിരുദ്ധമായതിനാൽ അഗ്നിരക്ഷാ സേനയ്ക്ക് ഒന്നും ചെയ്യാനാകാത്ത അവസ്ഥയാണ്. തുടർന്ന് കളക്‌ടറെ സമീപിച്ചെങ്കിലും കോടതി നിയമവശങ്ങൾ തടസമായി. വില്ലേജ് ഓഫീസർ സ്ഥലം സന്ദർശിച്ചെങ്കിലും ഉത്തവ് ലഭിക്കാതെ ഒന്നും ചെയ്യാനാകാത്തതിനാൽ മടങ്ങുകയായിരുന്നു. ഇന്ന് കളക്ടറുടെ ഉത്തരവ് ലഭിച്ചേക്കുമെന്നാണ് വിവരം.

തലശേരി അതിരൂപത 40-ാം വെള്ളി തീർഥാടനം നാളെ ചെറുപുഴയിൽ

ചെറുപുഴ : തലശേരി അതിരൂപതയിലെ ചെറുപുഴ, തോമാപുരം, മേരിഗിരി എന്നീ ഫൊറോനകളിലെ ഇടവകകളുടെ പങ്കാളിത്തത്തോടെ വലിയ നോമ്പിന്‍റെ 40 ദിവസങ്ങൾ പിന്നിടുന്ന നാല്പതാം വെള്ളിയാഴ്ച ചെറുപുഴ സെന്‍റ് മേരീസ് ഫൊറോന പള്ളിയിലേക്ക് തീർഥാടനം നടത്തും. ഈ വർഷം മുതൽ തലശേരി അതിരൂപതയിൽ നാല്പതാം വെള്ളി കൂടുതൽ ദൈവജനത്തെ പങ്കെടുപ്പിച്ചുകൊണ്ട് തീർഥാടനമായിട്ടാണ് നടത്തുന്നത്. നാളെ ഉച്ചകഴിഞ്ഞ് മൂന്നിന് വിവിധ കേന്ദ്രങ്ങളിൽനിന്ന് രക്ഷയുടെ അടയാളമായ വിശുദ്ധ കുരിശ് കൈകളിൽ വഹിച്ചുകൊണ്ട് കാൽനടയായാണ് തീർഥാടനം. തോമാപുരം ഫൊറോനയിലെ ഇടവകകളിൽ നിന്നുള്ള ആളുകൾ തോമാപുരം സെന്‍റ് തോമസ് ഫൊറോന ദേവാലയത്തിൽ സമ്മേളിക്കുകയും വെള്ളിയാഴ്ച ഉച്ചകഴിഞ്ഞ് മൂന്നരയോടുകൂടി തലശേരി അതിരൂപത ആർച്ച്ബിഷപ് മാർ ജോസഫ് പാംപ്ലാനിയുടെ നേതൃത്വത്തിൽ കുരിശിന്‍റെ വഴി പ്രാർത്ഥനകൾ ചൊല്ലി ചെറുപുഴയിലേക്ക് തീർഥാടനം ആരംഭിക്കും. മേരിഗിരി ഫൊറോനയിലെ പള്ളികളിലെ തീർഥാടകർ പെരിങ്ങാല പള്ളിയിൽ സമ്മേളിച്ച് വൈകുന്നേരം നാലിന് ചെറുപുഴയിലേക്ക് തീർഥാടനമാരംഭിക്കും. താബോർ, തിരുമേനി എന്നീ ഇടവകകളിൽ നിന്നുള്ള തീർഥാടകർ മഞ്ഞക്കാട് വച്ച് മേരിഗിരിയിൽ നിന്ന് വരുന്ന തീർഥാടകരോടൊപ്പം ചേർന്ന് ചെറുപുഴയിലേക്ക് തീർഥാടനമായെത്തും. ‌‌‌‌‌‌‌‌‌ പാലാവയൽ, തയ്യേനി, ജോസ്ഗിരി, രാജഗിരി, കോഴിച്ചാൽ, ചൂരപ്പടവ് എന്നീ ഇടവകകളിൽ നിന്നുള്ള തീർഥാടകർ പുളിങ്ങോം ഇടവകയിലെ തീർഥാടകരോടൊപ്പം ചെറുപുഴയിലേക്ക് എത്തും. അരവഞ്ചാൽ, പാടിച്ചാൽ എന്നീ ഇടവകകളിലെ തീർഥാടകർ ചെറുപുഴ പള്ളിയിലേക്ക് തീർഥാടനം നടത്തും. വെള്ളിയാഴ്ച വൈകുന്നേരം 5.45 ന് ചെറുപുഴ ബസ്‌സ്റ്റാൻഡ് പരിസരത്ത് എത്തുന്ന തീർഥാടകർ ഒരുമിച്ച് ചെറുപുഴ ടൗണിലൂടെ വിശുദ്ധ കുരിശ് കൈകളിലേന്തി ചെറുപുഴ സെന്‍റ് മേരീസ് ഫൊറോന ദേവാലയത്തിലേക്ക് തീർഥാടനം നടത്തും. ചെറുപുഴ ടൗണിൽ യേശുവിന്‍റെ പീഡാനുഭവങ്ങളെ ചിത്രീകരിക്കുന്ന പ്ലോട്ടുകൾ തയാറാക്കിയിട്ടുണ്ട്. ഏഴിന് ചെറുപുഴ സെന്‍റ് മേരീസ് ദേവാലയത്തിന് സമീപത്തുള്ള ഗ്രൗണ്ടിൽ തീർഥാടകർ എത്തിച്ചേരും. തുടർന്ന് വിശുദ്ധ കുരിശിന്‍റെ വണക്കം. മാർ ജോസഫ് പാംപ്ലാനി നാല്പതാം വെള്ളിയുടെ സന്ദേശം നൽകും. വികാരി ജനറാൾമാരായ മോൺ. ആന്‍റണി മുതുകുന്നേൽ, മോൺ. സെബാസ്റ്റ്യൻ പാലാക്കുഴി, മോൺ. മാത്യു ഇളംതുരുത്തിപ്പടവിൽ എന്നിവരും ചെറുപുഴ ഫൊറോന വികാരി ഫാ.ഫിലിപ്പ് ഇരുപ്പക്കാട്ട്, തോമാപുരം ഫോറോന വികാരി ഫാ. മാണി മേൽവട്ടം, മേരിഗിരി ഫൊറോന വികാരി ഫാ. ഏബ്രഹാം മഠത്തിമ്യാലിൽ എന്നിവരുടേയും ചെറുപുഴ, മേരിഗിരി, തോമാപുരം എന്നീ ഫൊറോനകളിലെ ബഹുമാനപ്പെട്ട വൈദികരുടെയും നേതൃത്വത്തിലാണ് തീർഥാടനത്തിൽ വേണ്ട ക്രമീകരണങ്ങൾ നടക്കുന്നത്. മലയോരത്തെ പ്രധാന പട്ടണമായ ചെറുപുഴയിൽ ആയിരക്കണക്കിന് വിശ്വാസികളാണ് തീർഥാടനത്തിന് എത്തിച്ചേരും. വാഹനങ്ങൾ കുണ്ടംതടം ഭാഗത്തും പള്ളിയങ്കണത്തിലും പാർക്ക് ചെയ്യാൻ സൗകര്യമുണ്ട്. തീർഥാടനത്തിനായുള്ള അന്തിമഘട്ട ഒരുക്കങ്ങൾ അസിസ്റ്റന്‍റ് വികാരി ഫാ. ബോഡ്‌വിൻ അട്ടാറയ്ക്കൽ, കൈക്കാരന്മാരായ ജോയി പുൽത്തകിടിയേൽ, മാനുവൽ മാപ്പിളപ്പറമ്പിൽ, ജോളി കൈപ്പള്ളിപ്പാറ, പാപ്പച്ചൻ അതിരകുളങ്ങര, ഇടവക കോ-ഓർഡിനേറ്റർ ബിനോയി സോപാനം എന്നിവരുടെ നേതൃത്വത്തിൽ നടക്കുന്നു. സൺഡേ സ്കൂൾ അധ്യാപകർ, കെസിവൈഎം, മാതൃവേദി, കത്തോലിക്കാ കോൺഗ്രസ് എന്നീ സംഘടനകളും പ്രവർത്തനങ്ങളിൽ സജീവമായുണ്ട്.

കായാട്ടുപാറയിൽ കാർ നിയന്ത്രണംവിട്ട് അപകടം

നാടുകാണി: കായാട്ടുപാറയിൽ കാറ് നിയന്ത്രണം വിട്ട് ഇടിച്ച് ജീപ്പിനും ബുള്ളറ്റിനും തട്ടുകടക്കും കേടുപാടുകൾ സംഭവിച്ചു. ഇന്നലെ ഉച്ചയ്ക്ക് ഒന്നോടെയാണ് സംഭവം. കായാട്ടുപാറയിലെ മലബാർ തട്ടുകടയ്ക്ക് സമീപം പാർക്ക് ചെയ്ത ജീപ്പിലാണ് മടക്കാട് ഭാഗത്ത് നിന്ന് വന്ന കാർ നിയന്ത്രണം വിട്ട് ഇടിച്ചത്. ജീപ്പ് മുന്നോട്ടു നീങ്ങി ബുള്ളറ്റിൽ ഇടിക്കുകയും ബുള്ളറ്റ് മറിയുകയും ചെയ്തു. മലബാർ തട്ടുകടക്കും കേടുപാടുകൾ സംഭവിച്ചിട്ടുണ്ട്. കാർ യാത്രക്കാരെ തളിപ്പറമ്പിലെ സ്വകാര്യ ആശുപത്രിയിൽ പ്രവേശിപ്പിച്ചു. ഈ പ്രദേശത്ത് നിരന്തരം അപകടങ്ങൾ ഉണ്ടാകാറുണ്ടെന്ന് നാട്ടുകാർ പറയുന്നു.

ലൈസൻസില്ലാതെ സ്വകാര്യ ബസ്‌ ഓടിച്ച ഡ്രൈവർ പിടിയിൽ

കണ്ണൂർ: ഡ്രൈവിംഗ് ലൈസൻസില്ലാതെ സ്വകാര്യ ബസ് ഓടിച്ച ഡ്രൈവറെയും ലൈസൻസില്ലാതെ ജോലി ചെയ്ത കണ്ടക്ടറെയും മോട്ടോർവാഹന വകുപ്പ് പിടികൂടി ബസ് കസ്റ്റഡിയിലെടുത്തു. മുന്നു പെരിയയിൽ നടത്തിയ പരിശോധനയിൽ ചക്കരക്കൽ-തലശേരി റൂട്ടിലോടുന്ന സ്വകാര്യ ബസ് ജീവനക്കാരെയാണ് പിടികൂടിയത്. കണ്ണൂർ ആർടിഒ ഇ.എസ്. ഉണ്ണികൃഷ്ണന്‍റെ നിർദേശാനുസരണം നടത്തിയ വാഹന പരിശോധയിലാണ് സംഭവം. പിടികൂടിയ ബസിന് 11,000 രൂപ പിഴ ചുമത്തുകയും ഫിറ്റ്നസ് റദ്ദാക്കുകയും ചെയ്തു. ലൈസൻസുകളില്ലാതെ പലരും സ്വകാര്യ ബസുകൾ ഓടിക്കുകയും കണ്ടക്ടർ ജോലി ചെയ്യുകയും ചെയ്യുന്നുണ്ടെന്ന വിവരത്തിന്‍റെ അടിസ്ഥാനത്തിലായിരുന്നു പരിശോധന. പരിശോധയിൽ 20 കേസുകൾ രജിസ്റ്റർ ചെയ്തു.55000 രൂപ പിഴ ഈടാക്കി. വാഹന പരിശോധനയിൽ എഎംവിഐമാരായ സജി ജോസഫ്, വരുൺ ദിവാകരൻ, അരുൺകുമാർ, രാഗേഷ് എന്നിവർ പങ്കെടുത്തു. എഎംവിഐ ബസ് ഡ്രൈവറായി കണ്ണൂർ: ലൈസൻസില്ലാതെ സ്വകാര്യ ബസ് ഓടിച്ച ഡ്രൈവർ പിടിയിലായപ്പോൾ യാത്രക്കാരെ പെരുവഴിയിലിറക്കി വിടാതെ ലക്ഷ്യസ്ഥാനത്തെത്തിക്കാൻ മോട്ടോർവാഹന വകുപ്പ് ഉദ്യോഗസ്ഥൻ ഡ്രൈവറായി. എഎംവിഐ സജി ജോസഫാണ് ബസ് ഡ്രൈവറുടെ ജോലി സ്വമേധയാ ഏറ്റെടുത്തത്. ചക്കരക്കല്ലിൽ നിന്ന് പെരളശേരി, മൂന്നു പെരിയ, പാറപ്പുറം, അണ്ടലൂർ, ബ്രണ്ണൻ കോളജ് വഴി തലശേരിയിലേക്കു പോകുന്ന ബസായിരുന്നു മോട്ടോർ വാഹന വകുപ്പ് പിടികൂടിയത്. ബസിൽ കൂടുതലായും പാറപ്രം വരെയുള്ള യാത്രക്കാരായിരുന്നു ഉണ്ടായിരുന്നത്. തുടർന്ന് സജി ജോസഫ് പാറപ്രം വരെ ബസ് ഓടിച്ച് യാത്രക്കാരെ ഇറക്കുകയായിരുന്നു. ഇതിനു ശേഷമാണ് ബസ് കസ്റ്റഡിയിലെടുത്ത് നടപടികൾ സ്വീകരിച്ചത്.

മാലിന്യ സംസ്കരണത്തിനുള്ള പുരസ്കാരം കണ്ണൂരിന് മന്ത്രി സമ്മാനിച്ചു

കണ്ണൂർ: മാലിന്യ സംസ്കരണ രംഗത്ത് സംസ്ഥാനത്ത് ഒന്നാം സ്ഥാനം നേടിയ കണ്ണൂർ ജില്ലയ്ക്കുള്ള പുരസ്കാരം മന്ത്രി എം.ബി രാജേഷ് സമ്മാനിച്ചു. തിരുവനന്തപുരം നിശാഗന്ധി ഓഡിറ്റോറിയത്തിൽ നടന്ന ദേശീയ ക്ലീൻ കേരള കോൺക്ലേവ് 'വൃത്തി 2025'ന്‍റെ ഉദ്ഘാടന വേദിയിൽ വച്ച് ജില്ലാ പഞ്ചായത്ത് പ്രസിഡന്‍റ് കെ.കെ. രത്നകുമാരി, ജില്ലാ കളക്ടർ അരുൺ കെ. വിജയൻ, ജില്ലാ പഞ്ചായത്ത് വൈസ് പ്രസിഡന്‍റ് ബിനോയ് കുര്യൻ, കേരള മിഷൻ ജില്ലാ കോ-ഓർഡിനേറ്റർ ഇ.കെ. സോമശേഖരൻ മന്ത്രിയിൽ നിന്ന് പുരസ്കാരം ഏറ്റു വാങ്ങി. ഒറ്റക്കെട്ടായ പ്രവർത്തനത്തിന്‍റെ വിജയമാണ് കണ്ണൂരിന്‍റേതെന്ന് ജില്ലാ കളക്ടർ അരുൺ കെ. വിജയൻ പറഞ്ഞു. മാലിന്യ സംസ്‌കരണവുമായി ബന്ധപ്പെട്ട് ഇനിയും ഒരുപാട് മികവാർന്ന പ്രവർത്തനങ്ങൾ വർദ്ധിത വീര്യത്തോടെ ഏറ്റെടുക്കേണ്ടതുണ്ട്. കണ്ണൂരിനെ ഹരിത ശുചിത്വ മാതൃകാ ജില്ലയായി വളർത്തിയെടുക്കുന്നതിന് അക്ഷീണം പ്രയത്‌നിച്ച മുഴുവൻ തദ്ദേശസ്വയംഭരണ സ്ഥാപനങ്ങൾക്കും മിഷനുകൾക്കും വകുപ്പുകൾക്കും വ്യക്തികൾക്കും സ്ഥാപനങ്ങൾക്കും കളക്ടർ നന്ദി രേഖപ്പെടുത്തി.

അവധിക്കാല കായിക പരിശീലന ക്യാമ്പ് ആരംഭിച്ചു

ചെറുപുഴ: പ്രാപ്പൊയിൽ ഗവ. ഹയർ സെക്കൻഡറി സ്കൂളിൽ അവധിക്കാല കായിക പരിശീലന ക്യാമ്പ് ആരംഭിച്ചു. ചെറുപുഴ പഞ്ചായത്ത് പ്രസിഡന്‍റ് കെ.എഫ്. അലക്സാണ്ടർ ഉദ്ഘാടനം ചെയ്തു. പിടിഎ പ്രസിഡന്‍റ് കെ.സി. ലക്ഷ്മണൻ അധ്യക്ഷത വഹിച്ചു. കായികാധ്യാപകൻ സുനീഷ് ജോർജ്, പ്രിൻസിപ്പൽ കെ.വി. സജി, പിടിഎ വൈസ് പ്രസിഡന്‍റ് അലിയാർ കുട്ടി, മുഖ്യാധ്യാപകൻ കെ.ഐ. ശങ്കരൻ, പിടിഎ എക്സിക്യുട്ടിവ് അംഗങ്ങളായ മെജോ വർഗീസ്, എം.ആർ. രതീഷ്, വി. ശ്രീജ എന്നിവർ പ്രസംഗിച്ചു. അത്‌ലറ്റിക്സ്, വോളിബോൾ, ടെന്നികോയ്റ്റ്, വടംവലി എന്നീ ഇനങ്ങളിലായി 130 കുട്ടികൾ പങ്കെടുക്കുന്ന പരിശീലന ക്യാമ്പാണ് ആരംഭിച്ചിരിക്കുന്നത്. കായികാധ്യാപകൻ സുനീഷ് ജോർജ്, രമേശൻ കക്കോട്, ഗോഡ്‌വിൻ ജോസഫ്, അതുൽ കൃഷ്ണ, അലൻ രാജേഷ്, ടോബി അഗസ്റ്റ്യൻ എന്നിവരാണ് പരിശീലകർ. അധ്യാപകരായ കെ. അനിത, ഡോ. പി. പ്രസീത, ജിൻസി തോമസ്, ഓഫീസ് സ്റ്റാഫ് എസ്.എസ്. അഭിൻ എന്നിവർ നേതൃത്വം നൽകി.

ചിത്രശലഭം കൂട്ടായ്മ ഉദ്ഘാടനം ചെയ്തു

ആലക്കോട്: മലയോര മേഖലയിലെ ഭിന്നശേഷിക്കാരായ കുട്ടികളുടെയും അവരുടെ മാതാപിതാക്കളുടെയും കൂട്ടായ്‌മയായ ചിത്രശലഭത്തിന്‍റെ ഉദ്ഘാടനം സജീവ് ജോസഫ് എംഎൽഎ നിർവഹിച്ചു. ഉദയഗിരി പഞ്ചായത്ത് പ്രസിഡന്‍റ് കെ.എസ്. ചന്ദ്രശേഖരൻ അധ്യക്ഷത വഹിച്ചു.ആലക്കോട് വ്യാപാര ഭവനിൽ എംഎൽഎ, ജനപ്രതിനിധികൾ എന്നിവരുമായി മുഖാമുഖവും സംഘടിപ്പിച്ചു. മുഖാമുഖത്തിൽ ഭിന്നശേഷിക്കാരായ കുട്ടികളും അവരുടെ രക്ഷിതാക്കളും നേരിടുന്ന പ്രശ്നങ്ങൾ ഇതിനുള്ള പരിഹാരങ്ങൾ എന്നിവ ചർച്ച ചെയ്തു. ഭിന്നശേഷിക്കാർക്കായി മലയോരത്ത് ബഡ്‌സ് സ്‌കൂൾ, തെറാപ്പി സെന്‍റർ എന്നിവ ആരംഭിക്കണമെന്ന് ആവശ്യപ്പെട്ടു. ആലക്കോട് പഞ്ചായത്ത് പ്രസിഡന്‍റ് ജോജി കന്നിക്കാട്ട്, ഉദയഗിരി വൈസ് പ്രസിഡന്‍റ് ബിന്ദു ഷാജു , ആലക്കോട് പഞ്ചായത്ത് മുൻ പ്രസിഡന്‍റ് മോളി മാനുവൽ, സോണിയ മുഞ്ഞനാട്ട്, സിജി റോയ്, ജയിൻ , ഇഗ്നേഷ്യസ് എന്നിവർ പ്രസംഗിച്ചു.

സംസ്ഥാനത്തെ മികച്ച കുടുംബാരോഗ്യ കേന്ദ്രങ്ങളുടെ പട്ടികയിൽ പുളിങ്ങോം

ചെറുപുഴ: സംസ്ഥാന സർക്കാരിന്‍റെ ആരോഗ്യം ആനന്ദം കാൻസർ പ്രതിരോധ ജനകീയ കാമ്പയിനിന്‍റെ ഭാഗമായി കൂടുതൽ ആളുകളെ പരിശോധന നടത്തിയ മികച്ച കേന്ദ്രങ്ങളുടെ പട്ടികയിൽ പുളിങ്ങോം കുടുംബാരോഗ്യ കേന്ദ്രവും. ആദ്യ 10 സ്ഥാപനങ്ങളിലൊന്നായാണ് പുളിങ്ങോം കുടുംബാരോഗ്യ കേന്ദ്രം പട്ടികയിൽ ഇടം നേടിയത്. പഞ്ചായത്തിന്‍റെ സഹകരണത്തോടെ പുളിങ്ങോം എഫ്എച്ച്സിയിലും ജനകീയരോഗ്യ കേന്ദ്രങ്ങളിലും,പഞ്ചായത്തിലെ മറ്റ് 13 കേന്ദ്രങ്ങളിലുമാണ് പരിശോധന സംഘടിപ്പിച്ചത്. ക്യാന്പുകളിൽ 6163 പേരെ പരിശോധനയക്ക് വിധേയരാക്കി. 6000 പേരുടെ സ്തന പരിശോധനയും 5144 പേരുടെ ഗർഭശയഗള പരിശോധനയും നടത്തി. പഞ്ചായത്ത് ജനകീയാസൂത്രണ പദ്ധതിയിലൂടെ ഒരു ലക്ഷം രൂപയാണ് കാൻസർ പരിശോധനക്കായി ചെലവഴിച്ചത്. പുളിങ്ങോം കുടുംബാരോഗ്യ കേന്ദ്രത്തിൽ മാത്രം നടത്തിയിരുന്ന പാപ്സ്മിയർ പരിശോധന സൗജന്യമായി ക്യാമ്പുകളിലും ജനകീയാരോഗ്യ കേന്ദ്രങ്ങളിലും നടത്തിയിരുനനു. 350 പേർക്ക് പാപ്സ്മിയർ പരിശോധന നടത്തിയതിൽ 106 പേരെ റഫർ ചെയ്യുകയും ഇതിൽ ഒരാൾക്ക് കാൻസർ കണ്ടെത്തുകയും ചെയ്തു. കൂടാതെ ചെറുപുഴ പഞ്ചായത്തിലെ കുടുംബശ്രീ, സിഡിഎസിന്‍റെ സഹകരണത്തോടെ കുടുംബശ്രീ പ്രവർത്തകർക്ക് കാൻസർ സാധ്യത സർവേ ചോദ്യങ്ങൾ ഗൂഗിൾ ഫോമിൽ നൽകുകയും ഇതിൽ സാധ്യത ഉള്ളവരെ കണ്ടെത്തി പരിശോധന നടത്തുകയും ചെയ്തു. സ്വയം സ്തന പരിശോധന സംബന്ധിച്ച് കുടുംബശ്രീ പ്രവർത്തകർക്ക് പരിശീലനം നൽകുകയും ചെയ്തിരുന്നു. അങ്കണവാടികൾ, സന്നദ്ധ സംഘടനകൾ, ക്ലബുകൾ എന്നിവയുടെ സഹകരണത്തോടെ ബോധവൽക്കരണ പരിപാടികളും സംഘടിപ്പിച്ചു.ചെറുപുഴ പഞ്ചായത്ത് പ്രസിഡന്‍റ് കെ.എഫ് അലക്സാണ്ടർ ചെയർമാനായും മെഡിക്കൽ ഓഫീസർ ഡോ. അരുൺ അഭിലാഷ് കൺവീനറുമായ കമ്മിറ്റിയാണ് പ്രവർത്തനങ്ങൾക്ക് നേതൃത്വം വഹിച്ചത്. ഹെൽത്ത്‌ ഇൻസ്‌പെക്ടർ വി. മുഹമ്മദ്‌ ഷെരീഫ് കോ-ഓർഡിനേറ്ററായിരുന്നു. പിഎച്ച്എൻ എം.എൽ. മനീഷ, നഴ്സിംഗ് ഓഫീസർ ഷജ്ന ജോസ് എന്നിവർ ജോയിന്‍റ് കൺവീനർമാരും പഞ്ചായത്തംഗങ്ങൾ, ആശ - ആരോഗ്യ പ്രവർത്തകർ, അങ്കണവാടി, കുടുംബശ്രീ, സന്നദ്ധ പ്രവർത്തകർ എന്നിവർ അംഗങ്ങളുമായ സമിതിയാണ് പ്രവർത്തനങ്ങൾ നടത്തിയത്.

ഓള്‍ ഇന്ത്യ യൂണിവേഴ്‌സിറ്റി വടംവലി: കണ്ണൂര്‍ വാഴ്സിറ്റിക്ക് രണ്ടാംസ്ഥാനം

കാഞ്ഞങ്ങാട്: പഞ്ചാബില്‍ നടന്ന ഓള്‍ ഇന്ത്യ യൂണിവേഴ്‌സിറ്റി വടംവലി ചാമ്പ്യന്‍ഷിപ്പില്‍ പെണ്‍കുട്ടികളുടെ വിഭാഗത്തില്‍ കണ്ണൂര്‍ യൂണിവേഴ്‌സിറ്റിക്ക് രണ്ടാം സ്ഥാനം. അവസാന റൗണ്ടില്‍ ഡല്‍ഹി യൂണിവേഴ്‌സിറ്റിയെയും കോട്ടയം എംജി യൂണിവേഴ്‌സിറ്റിയെയും പരാജയപ്പെടുത്തിയാണ് കണ്ണൂര്‍ തിളങ്ങുന്ന വിജയം നേടിയത്. വിവിധ സംസ്ഥാനങ്ങളിലെ 54 യൂണിവേഴ്‌സിറ്റികള്‍ മത്സരത്തില്‍ പങ്കെടുത്തു. കെ.കെ. അജിന, എയ്ഞ്ചല്‍ പോള്‍, മിത മാമന്‍ (മുന്നാട് പിപ്പീള്‍സ് കോളജ്), എം.ഡി.വിശ്രുദ, എസ്.പി.കൃതി (കാസര്‍ഗോഡ് ഗവ.കോളജ്), ഗോപിക രവീന്ദ്രന്‍, ഗായത്രി വിനോദ്,(കാഞ്ഞങ്ങാട് നെഹ്‌റു കോളജ്), അഭിരാമി മനോജ് (അങ്ങാടിക്കടവ് ഡോണ്‍ ബോസ്‌കോ കോളജ്),കെ.ആദിഷ(തലശേരി ബ്രണ്ണന്‍ കോളജ്), ജി.എ.അമൃത(തലശേരി ഗവ.ബ്രണ്ണന്‍ കോളജ് ഓഫ് ടീച്ചര്‍ എഡ്യുക്കേഷന്‍) എന്നിവരായിരുന്നു ടീമംഗങ്ങള്‍. രതീഷ് വെള്ളച്ചാല്‍, ബാബു കോട്ടപ്പാറ എന്നിവരാണ് പരിശീലകര്‍. ടീം മാനേജര്‍: ടി.അനഘ ചന്ദ്രന്‍.

പതിനാറുകാരിയെ സ്വര്‍ണമോതിരം നല്‍കി പീഡിപ്പിച്ച മദ്രസാധ്യാപകന് 187 വര്‍ഷം തടവ്

തളിപ്പറമ്പ്: സ്വര്‍ണമോതിരം സമ്മാനം നല്കി പ്രലോഭിപ്പിച്ച് പതിനാറുകാരിയെ ലൈംഗികമായി പീഡിപ്പിച്ച മദ്രസ അധ്യാപകന് വിവിധ വകുപ്പുകളിലായി 187 വര്‍ഷം തടവും 9,10,000 രൂപ പിഴയും വിധിച്ചു. ആലക്കോട് ഉദയഗിരി സ്വദേശി കീച്ചേരി മുഹ്‌യുദീന്‍ ജുമാമസ്ജിദിന് സമീപം താമസിക്കുന്ന കക്കാട്ട് വളപ്പില്‍ മുഹമ്മദ് റാഫി (41) യെയാണ് തളിപ്പറമ്പ് അതിവേഗ പോക്‌സോ കോടതി ജഡ്ജി ആര്‍. രാജേഷ് ശിക്ഷിച്ചത്. 2020 ൽ ലോക്ഡൗണ്‍ സമയം മുതല്‍ 2021 ഡിസംബര്‍ വരെയുള്ള കാലയളവിലാണ് പഴയങ്ങാടി പോലീസ് സ്റ്റേഷന്‍ പരിധിയിലെ പതിനാറുകാരിയെ ഇയാള്‍ പീഡിപ്പിച്ചത്. പ്രദേശത്ത് മദ്രസ അധ്യാപകനായ ഇയാള്‍ പതിനാറുകാരിയെ സ്വര്‍ണമോതിരം സമ്മാനമായി നല്കി വശീകരിച്ചായിരുന്നു തടുർച്ചയായ പീഡനം. വിവരം പുറത്തുപറഞ്ഞാല്‍ ശപിക്കുമെന്ന് ഭീഷണിപ്പെടുത്തുകയും ചെയ്തിരുന്നു. അന്നത്തെ പഴയങ്ങാടി എസ്ഐ രൂപ മധുസൂദനനാണ് സംഭവത്തില്‍ കേസ് രജിസ്റ്റര്‍ ചെയ്തത്. സ്റ്റേഷൻ എസ്എച്ചഒ ടി.എന്‍. സന്തോഷ്‌ കുമാറാണ് അന്വേഷണം നടത്തി പ്രതിയെ അറസ്റ്റ് ചെയ്ത് കുറ്റപത്രം സമര്‍പ്പിച്ചത്. ഇയാൾക്കെതിരേ വളപട്ടണം സ്റ്റേഷനിലും ഒരു പോക്സോ കേസ് ഉണ്ട്. ഈ കേസിൽ ജാമ്യത്തിലിറങ്ങിയപ്പോഴാണ് ഈ ശിക്ഷയ്ക്ക് ആസ്പദമായ പീഡനം നടത്തിയത്.

സാന്‍റാ മോണിക്ക വിദേശ വിദ്യാഭ്യാസ മഹാസഭ 11ന് കണ്ണൂരിൽ

കണ്ണൂർ: സാന്‍റാ മോണിക്ക സ്റ്റഡി എബ്രോഡ് സംഘടിപ്പിക്കുന്ന വിദേശ വിദ്യാഭ്യാസ മഹാസഭ 11ന് കണ്ണൂരിൽ നടക്കും. താവക്കര ബ്രോഡ്ബീൻ ഹോട്ടലിൽ രാവിലെ പത്തു മുതൽ വൈകുന്നേരം അഞ്ചു വരെ നടക്കുന്ന വിദേശ വിദ്യാഭ്യാസ മഹാസഭയിൽ നൂറലധികം വിദേശ സർവകലാശാലകളിലും കോളജുകളിലും സ്പോട്ട് അഡ്മിഷൻ നേടാനുള്ള അവസരമൊരുക്കും. വിദേശ വിദ്യാഭ്യാസ മഹാസഭയിൽ ഓസ്ട്രേലിയ, ജർമനി, യുഎസ്എ, കാനഡ, ഫ്രാൻസ്, ഇറ്റലി, സ്വിറ്റ്സർലാൻഡ്, യുഎഇ, ഉൾപ്പെടെയുള്ള രാജ്യങ്ങളിൽ നിന്നുള്ള പ്രതിനിധികളുമായി വിദ്യാർഥികൾക്കും രക്ഷിതാക്കൾക്കും നേരിൽ കണ്ട് വിവരങ്ങൾ മനസിലാക്കാം. ‌പ്ലസ്ടു, ഡിഗ്രി, മാസ്റ്റേഴ്സ് കഴിഞ്ഞവർക്ക് 50,000 ലേറെ കോഴ്സുകളില്‍ നിന്ന് അനുയോജ്യമായ തെരഞ്ഞെടുക്കാനുള്ള സൗകര്യം വിദേശ വിദ്യാഭ്യാസ മഹാസഭയിൽ ലഭ്യമാണ്. പങ്കെടുക്കുന്ന വിദ്യാർഥികൾക്ക് ഒരു മില്യനിലേറെ സ്കോളർഷിപ്പ് നേടാനും ഒരു ലക്ഷം വരെ മൂല്യമുള്ള റിഡീമബിൾ കൂപ്പണുകൾ നേടാനുള്ള അവസരമൊരുക്കിയിട്ടുണ്ട്. പങ്കെടുക്കുന്ന വിദ്യാർഥികൾക്ക് നിബന്ധനകൾക്കു വിധേയമായി ഐഇഎൽടിഎസ്, പിടിഇ, ടിഒഇഎഫ്എൽ,ജിആർഇ, ഒയിറ്റി, ജർമൻ ഭാഷ, സ്പോക്കൺ ഇംഗ്ലീഷ്, ഫ്രഞ്ച് ലാംഗ്വേജ് സെർറ്റു (ലാംഗ്വേജ് സെർട്ട്), സ്പാനിഷ് ക്ലാസുകൾ എന്നിവയ്ക്ക് 30 ശതമാനം ഫീസ് ഇളവും ലഭിക്കും. പ്രമുഖ ബാങ്കുകളുടെ വിദ്യാഭ്യാസ വായ്പ കൗണ്ടറുകളും വിദ്യാഭ്യാസ വിദഗ്ധർ നയിക്കുന്ന വിദേശ വിദ്യാഭ്യാസ സെമിനാറുകളും മഹാസഭയിൽ ഉണ്ടായിരിക്കും. പ്രവേശനം സൗജന്യമാണ്. പങ്കെടുക്കുന്നവർ www. santamonicaedu.inഎന്ന വെബ്സൈറ്റിൽ മുൻകൂട്ടി രജിസ്റ്റർ ചെയ്താൽ ഇ -മെയിൽ വഴി ലഭിക്കുന്ന എൻട്രി പാസ് ഉപയോഗിച്ച് പ്രവേശനം നേടാം. സ്പോട്ട് രജിസ്ട്രേഷൻ സൗകര്യവുമുണ്ട്. ഫോൺ: 0484 4150999, 9645 222999.

ബിന്ദു ജ്വല്ലറി നവീകരിച്ച ഷോറൂം ഉദ്ഘാടനം ചെയ്തു

കാസര്‍ഗോഡ്: അശ്വിനി നഗറില്‍ പ്രവര്‍ത്തിക്കുന്ന ബിന്ദു ജ്വല്ലറിയുടെ നവീകരിച്ച ഷോറൂം ഉദ്ഘാടനം ചെയ്തു. ബിന്ദു ജ്വല്ലറി സ്ഥാപകന്‍ പരേതനായ കെ.വി. കുഞ്ഞിക്കണ്ണന്‍റെ പത്‌നി പി. ശോഭന ഭദ്രദീപം കൊളുത്തി ഉദ്ഘാടനം നിര്‍വഹിച്ചു. ഒപ്പം ഡയമണ്ട് സെക്ഷന്‍റെയും ഗ്രൂപ്പിന്‍റെ മറ്റൊരു സംരംഭമായ എക്‌സ്‌ക്ലൂസീവ് ഹാന്‍ഡ് പിക്ക്ഡ് സില്‍ക്ക് സാരി ബൂട്ടിക്ക് "സഹസ്ര'യുടെയും ഉദ്ഘാടനം ചലച്ചിത്രതാരം ശ്വേതാ മേനോന്‍ നിര്‍വഹിച്ചു. ഷോറൂം നവീകരണത്തിന്‍റെ ഭാഗമായി അത്യാകര്‍ഷകമായ ഓഫറുകളാണു ബിന്ദു ജ്വല്ലറി ഉപഭോക്താക്കള്‍ക്കായി കാഴ്ചവയ്ക്കുന്നത്. ഏപ്രില്‍ 13 വരെ പണിക്കൂലിയില്‍ 35 ശതമാനം ഡിസ്‌കൗണ്ട് ഉപഭോക്താക്കള്‍ക്ക് നല്‍കും. കൂടാതെ ജൂണ്‍ 30 വരെ കല്യാണ പര്‍ച്ചേസ് ചെയ്യുന്നവരില്‍ നിന്ന് തെരഞ്ഞെടുക്കപ്പെടുന്ന മൂന്ന് ദമ്പതികള്‍ക്ക് മലേഷ്യയിലേക്ക് ഹണിമൂണ്‍ ട്രിപ്പും ഏര്‍പ്പെടുത്തിയിട്ടുണ്ട്. ഏപ്രില്‍ 30ന് അക്ഷയ തൃതീയയോടനുബന്ധിച്ചുള്ള അഡ്വാന്‍സ് ബുക്കിംഗും ആരംഭിച്ചിട്ടുണ്ട്.

ഫിഡസ് എക്സ്ക്ലുസീവ് ഷോറൂം നടുവിലിൽ പ്രവർത്തനമാരംഭിച്ചു

നടുവിൽ: ഫിഡസ് വാച്ചിന്‍റെ മലബാറിലെ ഏറ്റവും വലിയ എക്സ്ക്ലുസീവ് ഷോറും നടുവിൽ ടൗണിൽ പ്രവർത്തനമാരംഭിച്ചു. 16 വർഷമായി നടുവിലിൽ പ്രവർത്തിച്ചുവരുന്ന ഡോൺ വാച്ച് കന്പനിയുടെ പുതിയ ഓഫീസ് സ്വന്തം ബിൽഡിംഗിലേക്ക് മാറി പ്രവർത്തിക്കുന്നതിന്‍റെ ഉദ്ഘാടനവും നടന്നു. തലശേരി ആർച്ച്ബിഷപ് എമിരിറ്റസ് മാർ ജോർജ് ഞറളക്കാട്ട് വെഞ്ചരിപ്പ് കർമം നിർവഹിച്ചു. ഷോറൂമിന്‍റെ ഉദ്ഘാടനം സജീവ് ജോസഫ് എംഎൽഎയും ഓഫീസ് ഉദ്ഘാടനം കേരള വ്യാപാരി വ്യവസായി ഏകോപന സമിതി സംസ്ഥാന ജനറൽ സെക്രട്ടറി ദേവസ്യ മേച്ചേരിയും ഡോൺ വാച്ച് കമ്പനി യൂണിറ്റ് ഉദ്ഘാടനം നടുവിൽ പഞ്ചായത്ത് പ്രസിഡന്‍റ് ബേബി ഓടമ്പള്ളിയിലും നിർവഹിച്ചു. വ്യാപാരി വ്യവസായി ഏകോപനസമിതി നടുവിൽ യൂണിറ്റ് പ്രസിഡന്‍റ് ഷിബു തെക്കേകൊട്ടാരത്തിൽ അധ്യക്ഷത വഹിച്ചു. പരിയാരം എസ്എച്ച്ഒ എം.പി വിനീഷ്കുമാർ ആദ്യവില്പന നിർവഹിച്ചു. ‌ ഫാ. ജോസഫ് കൊളുത്താപ്പള്ളി, സോണി സെബാസ്റ്റ്യൻ, സി.എച്ച്. സീനത്ത്, സാജു ജോസഫ്, പി. ധന്യമോൾ, രേഖാ രഞ്ജിത്ത്, എ.വി. മണികണ്ഠൻ, സാബു പരപരാകത്ത്, ജോബി ചെരുവിൽ, ജോമോൻ ജോസഫ് കരോട്ടുകുന്നേൽ എന്നിവർ പ്രസംഗിച്ചു.

കാട്ടുതേനീച്ചക്കൂട്ടം അങ്കണവാടി അധ്യാപികയെ ആക്രമിച്ചു; കുളത്തിൽ ചാടി, അദ്ഭുത രക്ഷപ്പെടൽ

കൂത്തുപറമ്പ്: വനപാതയിലൂടെ ജോലിക്കായി അങ്കണവാടിയിലേക്ക് പോകുകയായിരുന്ന അധ്യാപികയെ കാട്ടുതേനിച്ചകൂട്ടം ആക്രമിച്ചു. അധ്യാപിക കുളത്തിൽ ചാടി രക്ഷപ്പെട്ടു. പന്നിയോട് അങ്കണവാടി അധ്യാപികയായ ചെന്നപ്പൊയിൽ സ്വദേശിനി എൻ. ശ്രീദേവിയെയാണ് കാട്ടുതേനീച്ചക്കൂട്ടം ആക്രമിച്ചത്. തേനീച്ചകളിൽനിന്ന് രക്ഷപ്പെടാൻ ഏറെ നേരം കുളത്തിൽ മുങ്ങിയും പൊങ്ങിയും നിന്ന ഇവർ തേനീച്ചക്കൂട്ടം പിൻവാങ്ങിയ ശേഷമാണ് കുളത്തിൽനിന്നും കയറിയത്. തുടർന്ന് സഹോദരനെ ഫോണിൽ വിളിച്ച് വിവരമറിയിക്കുകയായിരുന്നു. സഹോദരൻ അറിയിച്ചതിനെ തുടർന്ന് അങ്കണവാടിക്ക് സമീപത്തെ പ്രദേശവാസികൾ എത്തിയപ്പോൾ അബോധാവസ്ഥയിലാണ് ശ്രീദേവിയെ കണ്ടെത്തിയത്. വാഹന സൗകര്യമില്ലാത്തതിനാൽ രണ്ടു യുവാക്കൾ ബൈക്കിൽ കയറ്റി കണ്ണവം ചങ്ങല ഗേറ്റിലെത്തിക്കുകയും ഇവിടെനിന്ന് കൂത്തുപറന്പ് താലൂക്ക് ആശുപത്രിയിലേക്ക് കൊണ്ടു പോകുകയുമായിരുന്നു. സാരമായി പരിക്കേറ്റ ശ്രീദേവി ആശുപത്രിയിൽ ചികിത്സയിലാണ്. കഴുത്തിലും പുറത്തുമാണ് പരിക്ക്. കാട്ടാന ഉള്‍പ്പെടെ വന്യമൃഗങ്ങള്‍ ഇറങ്ങുന്ന കാട്ടുവഴിയിലൂടെയാണ് ശ്രീദേവി എല്ലാ ദിവസവും അതിസാഹസികമായി അങ്കണവാടിയിലേക്കും തിരിച്ച് വീട്ടിലേക്കും കാൽനടയായി സഞ്ചരിക്കുന്നത്.

ബോധവത്കരണ ക്ലാസ് നടത്തി

ഇരിട്ടി: അലയന്‍സ് ക്ലബ്, മുഴക്കുന്ന് പിടിഎച്ച് സഹചാരി എന്നിവയുടെ സംയുക്താഭിമുഖ്യത്തിൽ ലോക ആരോഗ്യദിനാചരണവും ബോധവത്കരണ ക്ലാസും നടത്തി. മുഴക്കുന്ന് പോലീസ് ഇൻസ്പെക്ടർ എ.വി. ദിനേശ് ഉദ്ഘാടനം ചെയ്തു. ഇരിട്ടി അലയൻസ് ക്ലബ് പ്രസിഡന്‍റ് എ.കെ. ഹസൻ അധ്യക്ഷത വഹിച്ചു. മാനസിക, ശാരീരിക ആരോഗ്യം എന്ന വിഷയത്തില്‍ ഡോ. ജി. ശിവരാമകൃഷ്ണന്‍ ക്ലാസെടുത്തു. സി. ഷമീര്‍, ടി.കെ.നസീര്‍, മൊയ്തീന്‍, ടി.ജെ. അഗസ്റ്റിന്‍, ജയിംസ് പ്ലാക്കിയില്‍, പി. ബെന്നി, കെ.പി. വേണുഗോപാല്‍, വി.എം. നാരായണന്‍ എന്നിവര്‍ പ്രസംഗിച്ചു.

ലഹരി വിരുദ്ധ ജാഗ്രതാ സമിതി

ഇരിട്ടി: വീർപ്പാട ഗാന്ധി ഗ്രാമീണ വായനശാലയുടെ നേതൃത്വത്തിൽ ലഹരി വിരുദ്ധജാഗ്രതാ സമിതി രുപീകരിച്ചു. വായനശാലയുടെ നേതൃത്വത്തിൽ പ്രദേശത്തുള്ള രാഷ്‌ട്രീയ പാർട്ടി പ്രതിനിധികൾ, വായനശാല പ്രതിനിധികൾ, ക്ലബ് പ്രതിനിധികൾ, ക്ഷേത്രം ഭാരവാഹികൾ എന്നിവർ പങ്കെടുത്തു. ആറളം സ്റ്റേഷൻ എസ്ഐ അരുൺ ഉദ്ഘാടനം ചെയ്തു. വായനശാല പ്രസിഡന്‍റ് എം.ഒ. പവിത്രൻ അധ്യക്ഷത വഹിച്ചു. ഇരിട്ടി എക്സൈസ് ഓഫീസർ നെൽസൻ ലഹരി ഉപയോഗത്തിന്‍റെ ദൂഷ്യഫലങ്ങളെ കുറിച്ച് വിശദീകരിച്ചു. പഞ്ചായത്ത് അംഗം യു.കെ. സുധാകരൻ, യു.എസ്. ബിന്ദു, മാത്തുക്കുട്ടി പന്തപ്ലാക്കൽ, എം. ആർ. ഷാജി , സുരേന്ദ്രൻ തുടങ്ങിയവർ പ്രസംഗിച്ചു . പഞ്ചായത്ത് അംഗം യു കെ സുധാകരൻചെയർമാനായ 41 അംഗ ജാഗ്രതാ സമിതി രൂപീകരിച്ചു. കൺവീനറായി എം.ഒ. പവിത്രൻ മാസ്റ്ററെയും രക്ഷാധികാരികളായി ഇരിട്ടി ബ്ലോക്ക് പ്രസിഡന്‍റ് കെ. വേലായുധൻ, ആറളം പഞ്ചായത്ത് പ്രസിഡന്‍റ് കെ.പി. രാജേഷ്, ആറളം സിഐ ആൻഡ്രിക് ഗ്രോമിക്, നെൽസൺ തോമസ് (ഇരിട്ടി എക്സൈസ്), എം.ആർ. ഷാജി എന്നിവരെ തെരഞ്ഞെടുത്തു. വീർപ്പാട് പ്രദേശം കേന്ദ്രീകരിച്ച് ഒരു ബോധവത്കരണ ക്ലാസ് നടത്താനും തീരുമാനിച്ചു.

കണ്ണൂർ ഗവ. മെഡിക്കൽ കോളജിൽ പബ്ലിക് ലൈബ്രറി ഉദ്ഘാടനം ചെയ്തു

പരിയാരം: കണ്ണൂർ ഗവ. മെഡിക്കൽ കോളജിൽ ദയ ചാരിറ്റബിൾ സൊസൈറ്റിയുടെ നേതൃത്വത്തിൽ അക്ഷര സാന്ത്വനം -പബ്ലിക്ക് ലൈബ്രറി പ്രവർത്തനം തുടങ്ങി. വി. ശിവദാസൻ എംപി ഉദ്ഘാടനം ചെയ്തു. ദയ ചെയർമാൻ കെ. പദ്മനാഭൻ അധ്യക്ഷത വഹിച്ചു. മദ്രാസ് ഹൈക്കോടതി മുൻ ചീഫ് ജസ്റ്റിസ് ജസ്റ്റിസ് കെ. ചന്ദ്രു മുഖ്യാതിഥിയായിരുന്നു. മെഡിക്കൽ കോളജ് പ്രിൻസിപ്പൽ ഡോ. സൈറു ഫിലിപ്പ്, മെഡിക്കൽ സൂപ്രണ്ട് ഡോ. കെ.സുദീപ് ലൈബ്രറി കൗൺസിൽ താലൂക്ക് കമ്മിറ്റി അംഗം വി.വി ചന്ദ്രശേഖരൻ എന്നിവർ പ്രസംഗിച്ചു. ലൈബ്രറിയിൽ ചുമർ ചിത്രം വരച്ച ചിത്രകാരൻമാരായ ബിജു പാണപ്പുഴ, റിഗേഷ് പുളിയൂൽ എന്നിവരെ ഉപഹാരം നൽകി ആദരിച്ചു. സെക്രട്ടറി സീബാ ബാലൻ, വൈസ് ചെയർമാൻ എം.വി രാജീവൻ എന്നിവർ പ്രസംഗിച്ചു. സ്ഥിരമായി ഡയാലിസിസിന് വരന്നവർക്കും കൂട്ടായി വരുന്നവർക്കം ഇവിടെ നിന്ന് പുസ്തകം വായിക്കാനെടുക്കാം. വാർഡുകളിൽ രോഗികൾക്കും പുസ്തകങ്ങൾ നൽകും. ആശുപത്രി ബ്ലോക്കിലെ ന്യൂ ബോൺ ഐസിയു, പ്രസവവാർഡ് എന്നിവ പ്രവർത്തിക്കുന്ന അഞ്ചാം നിലയിലാണ് അക്ഷര സാന്ത്വനം ലൈബ്രറി. പ്രമുഖരായ എഴുത്തുകാരിൽ നിന്നുൾപ്പെടെ വൈവിധ്യമാർന്ന പുസ്തകങ്ങൾ സംഭാവനയായി ശേഖരിച്ചാണ് ലൈബ്രറി ഒരുക്കിയത്.

അവധിക്കാല കായിക പരിശീലനം

ഇരിട്ടി: അങ്ങാടിക്കടവ് സേക്രഡ് ഹാർട്ട് യുപി സ്കൂളിലെ വിദ്യാർഥികൾക്കുവേണ്ടിയുള്ള ബാസ്ക്കറ്റ് ബോൾ, കബഡി, അത്‌ലറ്റിക്സ് തുടങ്ങിയ കായിക ഇനങ്ങളുടെ അവധിക്കാല പരിശീലന പരിപാടി സ്കൂൾ മാനേജർ ഫാ. ഫ്രാൻസിസ് റാത്തപ്പള്ളി ഉദ്ഘാടനം ചെയ്തു. ഹൈസ്കൂൾ പിടിഎ പ്രസിഡന്‍റ് സോയി സെബാസ്റ്റ്യൻ അധ്യക്ഷത വഹിച്ചു. ഹൈസ്കൂൾ മുഖ്യാധ്യാപിക ലിൻസി ജോസ്, യുപി സ്കൂൾ മുഖ്യാധ്യാപിക ഷൈനി മാത്യു, ഹൈസ്കൂൾ കായികാധ്യാപകൻ സി. ജോർജ് ജോസഫ്, അധ്യാപകരായ ജോഷി തോമസ്, ആശ റിജോ, സിജി ജോസഫ് തുടങ്ങിയവർ പ്രസംഗിച്ചു. ബാസ്ക്കറ്റ്ബോൾ, കബഡി, അത്‌ലറ്റിക്സ് പരിശീലകരായ എം.എ. നിക്കോളാസ്, എം.കെ. മുഹമ്മദലി, ടോണി സെബാസ്റ്റ്യൻ, കുട്ടികൾ, രക്ഷിതാക്കൾ തുടങ്ങിയവർ പരിപാടിയിൽ പങ്കെടുത്തു. ദിവസവും രാവിലെ 6.30 മുതൽ 8.30 വരെ യുപി സ്കൂൾ ഗ്രൗണ്ടിലാണു പരിശീലനം.

അറബി-കോളിത്തട്ട് റോഡരികിലെ കുഴികൾ 20നകം നികത്തുമെന്ന് അധികൃതർ

ഉളിക്കൽ: അറബി-കോളിത്തട്ട് റോഡരിക് ജൽജീവൻ മിഷന്‍റെ പൈപ്പിടാനായി ന‌ടത്തിയ പ്രവൃത്തിയ തുടർന്ന് റോഡരികുകൾ തകർന്നും കുഴിയായും കിടക്കുന്ന അവസ്ഥ 20നകം പരിഹരിക്കുമെന്ന് അധികൃതരുടെ ഉറപ്പ്. പൈപ്പിടാനായി റോഡരിക് കീറിയതിനു പിന്നാലെയുണ്ടായ ശക്തമായ മഴയിൽ റോഡരിക് ഒലിച്ചു പോയി കുഴികൾ രൂപപ്പെട്ടിരുന്നു. റോഡരിക് എത്രയും പെട്ടെന്ന് അറ്റകുറ്റപണി നടത്തി പൂർവസ്ഥിതിയിലാക്കണമെന്നാവശ്യപ്പെട്ട് പ്രദേശവാസികൾ പ്രക്ഷോഭത്തിനായി തയാറെടുക്കുകയായിരുന്നു. പ്രക്ഷോഭ പരിപാടികൾ ആസൂത്രണം ചെയ്യുന്നതിനായി ഇന്നലെ അറബി സെന്‍റ് ജോസഫ്സ് പള്ളി വികാരി ഫാ. എഡ്വിൻ കോയിപ്പുറത്തിന്‍റെ അധ്യക്ഷതയിൽ ബഹുജന കൺവൻഷൻ ചേർന്നതിനു പിന്നാലെയാണ് റോഡരിക് എത്രയും പെട്ടെന്ന് പൂർവസ്ഥിതിയിലാക്കുമെന്ന് ബന്ധപ്പെട്ടവർ അറിയിച്ചത്. ഇതേ തുടർന്ന പ്രക്ഷോഭ പരിപാടികൾ താത്കാലികമായി നിർത്തി വച്ചു. അധികൃതർ ഉറപ്പ് പാലിച്ചില്ലെങ്കിൽ ശക്തമായ സമരം സംഘടിപ്പിക്കാൻ യോഗം തീരുമാനിച്ചു. യോഗത്തിൽ പഞ്ചായത്തംഗങ്ങളായ ടോമി മുക്കനോലി, നിഷ, ഇന്ദിരാ പുരുഷോത്തമൻ, എന്നിവർ പങ്കെടുത്തു.

എട്ടു വയസുകാരിയടക്കം രണ്ടുപേർക്ക് തെരുവുനായയുടെ കടിയേറ്റു

കൂത്തുപറമ്പ്: എട്ടു വയസുകാരി ഉള്‍പ്പെടെ രണ്ടുപേര്‍ക്ക് തെരുവുനായയുടെ കടിയേറ്റു. മമ്പറം പൊയനാട് എൽപി സകൂൾ വിദ്യാർഥിനി അജ്വ ഫാത്തിമ (എട്ട്), ജസ്മിന(38) എന്നിവര്‍ക്ക് നേരേയാണ് തെരുവുനായയുടെ ആക്രമണം ഉണ്ടായത്. പൊയനാട് മാപ്പിള എല്‍പി സ്‌കൂള്‍ പരിസരത്ത് ഇന്നലെ രാവിലെ 9.30 ഓടെയായിരുന്നു സംഭവം. സ്കൂളിലേക്ക് പോവുകയായിരുന്ന അജ്വ ഫാത്തിമയ്ക്കും മറ്റൊരു വിദ്യാര്‍ഥിയെ സ്‌കൂളിലേക്ക് കൊണ്ടുവിടുകയായിരുന്ന ജസ്മിനയ്ക്കുമാണ് തെരുവുനായയുടെ കടിയേറ്റത്. കാലിനും കൈയ്ക്കും സാരമായി പരിക്കേറ്റ ഇരുവരേയും സ്‌കൂള്‍ ജീവനക്കാരും നാട്ടുകാരും ചേര്‍ന്ന് കൂത്തുപറമ്പ് താലൂക്ക് ആശുപത്രിയില്‍ എത്തിക്കുകയായിരുന്നു. പൊയനാട് സ്വദേശി എന്‍.കെ സനീര്‍- കെ.പി. ഫൗസിയ ദമ്പതികളുടെ മകളാണ് അജ്വ ഫാത്തിമ.

ജൽജീവൻ മിഷന്‍റെ പൈപ്പിടാനുള്ള ശ്രമം തടഞ്ഞു

ഉളിക്കൽ: അറബി - കോളിത്തട്ട് റോഡിൽ ജൽജീവൻ മിഷന്‍റെ ഭാഗമായി പൈപ്പിട്ട ഭാഗം ആദ്യവേനൽ മഴയിൽ തന്നെ ഇടിഞ്ഞ് റോഡരിക് കുഴികളായത് നികത്താതെ മറ്റിടങ്ങളിൽ പൈപ്പിടാനുള്ള നീക്കം കോൺഗ്രസ് പ്രവർത്തകർ തടഞ്ഞു. അറബി കോളിത്തട്ട് വാർഡ് കോൺഗ്രസ് കമ്മിറ്റികളുടെ നേതൃത്വത്തിൽ അറബികുളത്തിന് സമീപത്തെ പ്രവൃത്തിയാണ് തടഞ്ഞത്. തുടർന്ന് കരാർ കമ്പനിക്കാരും വാട്ടർ അഥോറിറ്റി അധികൃതരും സമരക്കാരുമായി ചർച്ച നടത്തി. മണ്ണ് ഒഴുകി പോയ ഭാഗം മണ്ണിട്ട് നികത്തി വൈബ്രേറ്റർ ഉപയോഗിച്ച് ഉറപ്പിക്കുമെന്നും മഴവെള്ളം ഒഴുകി പോകാൻ ഓവുചാൽ നിർമിക്കുമെന്നും ഉറപ്പ് നൽകി. കൂടാതെ ഇറക്കവും വളവും ഉള്ള സ്ഥലങ്ങളിൽ കോൺക്രീറ്റ് ചെയ്ത് മണ്ണാലിച്ച് പോകുന്നത് തടയാനുള്ള നടപടി സ്വീകരിക്കും. ഇക്കാര്യങ്ങൾ നടപ്പാക്കിയ ശേഷമേ ബാക്കി വരുന്ന പൈപ്പിടൽ പ്രവൃത്തി ആരംഭിക്കുകയുള്ളൂവെന്നും ഉറപ്പ് നൽകി. പ്രതിഷേധക്കാരുടെ ആവശ്യാനുസരണം ഇന്നലെ എടുത്ത കുഴി പൈപ്പിടാതെ മൂടുകയും ചെയ്തു. ഉറപ്പ് പാലിക്കാത്തപക്ഷം അറബി റോഡിലെ ജലജീവൻ മിഷന്റെ യാതൊരു നിർമാണപ്രവവൃർത്തങ്ങളും അനുവദിക്കില്ലെന്ന് സമരക്കാർ പറഞ്ഞു. സമരത്തിന് നേതാക്കളായ ബിജു ഇടമണ്ണിൽ, മാത്യു നടക്കൽ എന്നിവർ നേതൃത്വം നൽകി. സജി പൊടിപ്പാറ, രാജു പറുങ്ങാമൂട്ടിൽ, യൂത്ത് കോൺഗ്രസ് നേതാക്കളായ രഞ്ജി അറബി, ആൽബിൻ അരികിനേത്ത്, ബിജോയ്‌, ബിൻസു, കുഞ്ഞുമോൻ ആർപ്പേരിൽ എന്നിവർ പങ്കെടുത്തു .

സൗജന്യ ഹൃദയ-വൃക്ക രോഗ മെഗാ മെഡിക്കല്‍ ക്യാമ്പ്

എടൂര്‍: സമരിറ്റന്‍ കിഡ്‌നി ഡയാലിസിസ് ഹെല്‍പ്പ് ഗ്രൂപ്പ് ട്രസ്റ്റിന്‍റെയും ഇരിട്ടി അമല മള്‍ട്ടി സ്‌പെഷ്യാലിറ്റി ഹോസ്പിറ്റലിന്‍റെയും നേതൃത്വത്തില്‍ സൗജന്യ ഹൃദയ-വൃക്ക രോഗ മെഗാ മെഡിക്കല്‍ ക്യാംപ് നടത്തി. സണ്ണി ജോസഫ് എംഎല്‍എ ഉദ്ഘാടനം ചെയ്തു. സമരിറ്റന്‍ ട്രസ്റ്റ് രക്ഷാധികാരി ഫാ.തോമസ് വടക്കേമുറിയില്‍ അധ്യക്ഷത വഹിച്ചു. സമരിറ്റന്‍ ട്രസ്റ്റ് ചെയര്‍മാന്‍ മൈക്കിള്‍ കെ.മൈക്കിള്‍, സെക്രട്ടറി ടി.വി. ജോസഫ്, ട്രഷറര്‍ പി.വി. ജോസഫ്, അമല ഹോസ്പിറ്റല്‍ എംഡി മാത്യു കുന്നപ്പള്ളി, കാര്‍ഡിയോളജിസ്റ്റ് ഡോ.ആന്‍ജോസ് പി. തങ്കച്ചന്‍, നെഫ്രോളജിസ്റ്റ് ഡോ.ടോം ജോസ് കാക്കനാട്ട് എന്നിവര്‍ പ്രസംഗിച്ചു. 150 ഓളം പേര്‍ ക്യാന്പിൽ പങ്കെടുത്തു.

യാത്രാ ദുരിതത്തിൽ വലഞ്ഞ് എടപ്പുഴ-വാളത്തോട് പ്രദേശം

ഇരിട്ടി: അയ്യൻകുന്ന് പഞ്ചായത്തിലെ അതിർത്തി ഗ്രാമങ്ങളായ എടപ്പുഴ - വാളത്തോട് പ്രദേശങ്ങൾ യാത്രാ ക്ലേശത്തിൽ വലയുന്നു. 30ൽ അധികം ബസുകൾ സർവീസ് നടത്തിയിരുന്ന പ്രദേശത്ത് ഇപ്പോൾ പത്തിൽ താഴെ ബസുകൾ മാത്രമാണ് സർവീസ് നടത്തുന്നത്. ഏഴിൽ അധികം കെ എസ്ആർടി സി ബസുകൾ സർവീസ് നടത്തിയിരുന്നിടത്ത് രണ്ടു ബസുകളായും കുറഞ്ഞു. അതാകട്ടെ രാവിലെയും രാത്രിയും മാത്രം. രാവിലെ ഇവിടെ നിന്ന് പുറപ്പെടുന്ന ബസുകൾ രാത്രി തിരിച്ചു വരുന്ന സർവീസിൽ ട്രിപ്പ് ഒതുക്കുകയാണ്. കാർഷികവൃത്തിയിലും മറ്റ് സാധാരണ കൂലി തൊഴിലും ചെയ്തു ജീവിതം കഴിച്ചു കൂട്ടുന്ന ജനത്തിന് ജോലിക്ക് പോകാൻ കൃത്യസമയത്ത് ബസ് ഇല്ലാത്തത് വലിയ പ്രതിസന്ധിയാണ് സൃഷ്ടിക്കുന്നത്. ജോലിക്ക് ദിവസവും പുറത്ത് പോകുന്നവർ വലിയ തുക മുടക്കി വാഹനം വിളിച്ച് പോകേണ്ട അവസ്ഥയാണ്. ആദിവാസികൾ ഉൾപ്പെടെ ആയിരകണക്കിന് ജനങ്ങൾ താമസിക്കുന്ന മലയോര മേഖല മഴക്കാലം കൂടി ആരംഭിക്കുന്നതോടെ തികച്ചും ഒറ്റപ്പെടുകയും ചെയ്യും. അപര്യാപതമായ റോഡുകൾ വികസനമില്ലാത്ത റോഡുകളാണ് മേഖല നേരിടുന്ന പ്രധാന വെല്ലുവിളി. ഒരു വാഹനം മാത്രം കടന്നുപോകാൻ കഴിയുന്ന റോഡുകൾ വീതികൂട്ടി മെക്കാഡം ടാറിംഗ് നടത്തണമെന്ന നാട്ടുകാരുടെ ആവശ്യത്തിന് വർഷങ്ങളുടെ പഴക്കമുണ്ട്. പൊതു മരാമത്തിന്‍റെ കീഴിലുള്ള റോഡുകൾക്ക് കുറഞ്ഞത് 50 വർഷത്തെ പഴക്കം ഉണ്ടെന്നാണ് പ്രദേശവാസികൾ പറയുന്നത്. നാട്ടുകാരുടെ പ്രതിഷേധം കനക്കുമ്പോൾ കുഴികൾ അടച്ച് നാട്ടുകാരുടെ പ്രതിഷേധം തണുപ്പിക്കുന്ന നടപടികളാണ് കാലാകാലങ്ങളായി തുടരുന്നത്. വലിയ കയറ്റവും ഇറക്കവും വളവുകളും നിറഞ്ഞ ഇടുങ്ങിയ റോഡിൽ ജീവൻപണയം വച്ചാണ് യാത്ര ചെയ്യുന്നതെന്ന് പ്രദേശവാസികൾ പറയുന്നു. യാത്രാ ക്ലേശത്തിൽ വലഞ്ഞ് വിദ്യാർഥികളും വാളത്തോട് ഇരുപ്പും കുറ്റി മേഖലയിൽ യാത്രാ ക്ലേശത്തിൽ ഏറെ ബുദ്ധിമുട്ടനുഭവിക്കുന്നത് വിദ്യാർഥികളാണ്. നേരത്തെ സ്കൂൾ സമയത്ത് സർവീസ് നടത്തിയിരുന്ന ബസുകൾ പലതും ഇപ്പോൾ ഓടുന്നില്ല. ബസില്ലാത്തത് കാരണം വിദ്യാർഥികളെ സ്കൂളിലെത്തിക്കുന്നതിനായി രക്ഷിതാക്കൾ വലിയ സാന്പത്തിക ബാധ്യത ഉണ്ടാകുന്നുണ്ട്. മാവോയിസ്റ്റ് ഭീഷണി നിലനിന്നിരുന്ന അയ്യൻകന്ന് പഞ്ചായത്തിലെ പ്രദേശങ്ങളിൽ ഒന്നാണിത്. വന്യമൃഗ ശല്യംവും രൂക്ഷമാണ്. കൃഷി നാശം, ഗതാഗത സൗകര്യം എന്നിവ ഇല്ലാതെ വീടും സ്ഥലവും ഉപക്ഷിച്ച് മറ്റ് പല സ്ഥലങ്ങളിലേക്കും വാടകക്ക് താമസം മാറുന്ന സഹചര്യമാണെന്ന് പ്രദേശ വാസികൾ പറയുന്നു. പരാതി നൽകാൻ ഇനിയൊരിടം ബാക്കിയില്ല "കരിക്കോട്ടക്കരി മുതൽ വാളത്തോട് വരെ 700 ൽ അധികം കുടുംബങ്ങളാണ് യാത്രാസൗകര്യം ഇല്ലാതെ ബുദ്ധിമുട്ടുന്നത്. റോഡിനും ബസിനുമായി ഇനി ഒരധികാര കേന്ദ്രത്തിലും പരാതി നൽകാൻ ബാക്കിയില്ല. മലയോര മേഖലയിൽ നിന്നും ജനങ്ങൾ കുടിയിറങ്ങുമ്പോൾ എടപ്പുഴ വാളത്തോട് മേഖലയിൽ മാത്രമാണ് ജനം കുടിയിറങ്ങാതെ കഴിയുന്നത്. ജനവികാരത്തെ അധികാരികൾ മാനിച്ചില്ലെങ്കിൽ ശക്തമായ ജനകീയ പ്രക്ഷോഭങ്ങൾ നേരിടേണ്ടിവരും’.

മരത്തിൽനിന്ന് വീണ് ഗുരുതര പരിക്കേറ്റ യുവാവ് ചികിത്സാ സഹായം തേടുന്നു

ഇരിട്ടി: മരത്തിൽനിന്ന് വീണ് നട്ടെല്ലിന് ഉൾപ്പെടെ ഗുരുതര പരിക്കേറ്റ് ചികിത്സയിൽ കഴിയുന്ന യുവാവ് കാരുണ്യമതികളുടെ സഹായം തേടുന്നു. ഇരിട്ടിക്കടുത്ത് കീഴൂർക്കുന്ന് പാലാപ്പറമ്പിലെ കെ.സുനിൽകുമാറാണ് (48) ഉദാരമതികളുടെ സഹായം തേടുന്നത്. രണ്ട് മാസം മുന്പ് തന്‍റെ വീട്ടുപറമ്പിലെ മരത്തിൽ നിന്ന് വീണ് തലയ്ക്കും നട്ടെല്ലിനും ഗുരുതരമായിപരുക്കേറ്റ സുനിൽകുമാറിനെ കണ്ണൂരിലെ സ്വകാര്യ ആശുപത്രിയിൽ അടിയന്തിര ശസ്ത്രക്രിയയ്ക്ക് വിധേയമാക്കിയെങ്കിലും ചലനശേഷിയും സംസാരശേഷിയുമുൾപ്പെടെ നഷ്ടമായ നിലയിലാണ്. സുനിൽകുമാറിനെ സാധാരണ ജീവിതത്തിലേക്ക് തിരിച്ചെത്തിക്കാൻ വിദഗദ്ധ ചികിത്സ ആവശ്യമാണ്. തുടർ ചികിത്സയക്ക് 25 ലക്ഷത്തോളം രൂപ വേണ്ടിവരുമെന്നാണ് ഡോക്ടർമാർ പറഞ്ഞത്. നിർധനകുടുബാംഗമായ സുനിൽ കുമാറിന്‍റെ ചികിത്സയ്ക്കായി ഇരിട്ടി നഗരസഭ ചെയർപേഴ്സൺ കെ. ശ്രീലത രക്ഷാധികാരിയായും വാർഡ് കൗൺസിലർ എൻ. സിന്ധു ചെയർമാനായും ചികിത്സാ സഹായ സമിതി രൂപീകരിച്ചു പ്രവർത്തനം ആരംഭിച്ചിട്ടുണ്ട്. സാന്പത്തിക സഹായംസ്വീകരിക്കുന്നതിനായി ഇന്ത്യൻ ബാങ്ക് ഇരിട്ടി ശാഖയിൽ 80053 15167 നന്പർ അക്കൗണ്ട് തുറന്നിട്ടുണ്ട്. ഐ.എഫ്.എസ്.സി കോഡ്: IDIB000I113. ഗൂഗിൾ പേ നമ്പർ: 9562402502. ഫോൺ: 8156856972, 9846144157.

സമ്മർ കോച്ചിംഗ് ക്യാമ്പ്

ചെമ്പേരി: ജില്ലാ അമേച്വർ അത്‌ലറ്റിക്ക് അസോസിയേഷന്‍റെ ആഭിമുഖ്യത്തിൽ വിദ്യാർഥികൾക്കായി സംഘടിപ്പിച്ച സമ്മർ കോച്ചിംഗ് ക്യാമ്പിന് ചെമ്പേരി നിർമല ഹയർ സെക്കൻഡറി സ്‌കൂളിൽ തുടക്കമായി. സായിയുടെ മുൻ കോച്ചും ജില്ലാ അമേച്വർ അത്‌ലറ്റിക്ക് അസോസിയേഷൻ പ്രസിഡന്‍റുമായ ജോസ് മാത്യു ക്യാമ്പ് ഉദ്‌ഘാടനം ചെയ്തു. സ്‌കൂൾ അസിസ്റ്റന്‍റ് മാനേജർ ഫാ. സിറിൽ ചെറുകരക്കുന്നേൽ അധ്യക്ഷത വഹിച്ചു. സ്കൂൾ പ്രിൻസിപ്പൽ സി.ഡി. സജീവ് ആമുഖ പ്രഭാഷണം നടത്തി. ഏരുവേശി പഞ്ചായത്ത് ആരോഗ്യ, വിദ്യാഭ്യാസകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ പൗളിൻ തോമസ്, സ്കൂൾ മുഖ്യാധ്യാപകൻ എം.ജെ. ജോർജ്, സ്‌കൂൾ കായികാധ്യാപകൻ വിനോദ് അഗസ്റ്റിൻ എന്നിവർ പ്രസംഗിച്ചു. അത്‌ലറ്റിക്സ്, വോളിബാൾ, നെറ്റ്‌ബോൾ, ഹാൻഡ് ബോൾ എന്നീ ഇനങ്ങളിലാണു പരിശീലനം. കായികാധ്യാപകൻ വിനോദ് അഗസ്റ്റ്യന്‍റെ നേതൃത്വത്തിൽ പ്രഗത്ഭ പരിശീലകരായ ബെന്നി പരിന്തിരിക്കൽ, ആതിര റോയ്, ഷൈജു സെബാസ്റ്റ്യൻ എന്നിവരാണു പരിശീലനം നൽകുന്നത്.

ചെങ്ങളായി-അഡൂർകടവ് പാലം പ്രവൃത്തി പുനരാരംഭിച്ചു

ചെങ്ങളായി: ചെങ്ങളായി, മലപ്പട്ടം പഞ്ചായത്തുകളെ ബന്ധിപ്പിക്കുന്ന ചെങ്ങളായി-അഡൂർകടവ് പാലം പ്രവൃത്തി വീണ്ടും തുടങ്ങി. നിർമാണ സാമഗ്രികൾ എത്തിക്കാൻ വൈകിയതിനെ തുടർന്ന് കഴിഞ്ഞ ഫെബ്രുവരിയിൽ നിർത്തി വച്ച പണിയാണ് ഇപ്പോൾ തുടങ്ങിയത്. പ്രവൃത്തി നിലച്ചത് ദീപിക റിപ്പോർട്ട് ചെയ്തിരുന്നു. ചെങ്ങളായിയിലും അഡൂർ ഭാഗത്തും പ്രവൃത്തി ആരംഭിച്ചിട്ടുണ്ട്.തളിപ്പറമ്പ്-ഇരിട്ടി സംസ്ഥാനപാതയിൽ ചെങ്ങളായി ഭാഗത്തുനിന്ന് കടവിലേക്കുള്ള അനുബന്ധറോഡ് നിർമാണത്തിന് പിന്നാലെ തൂൺ നിർമാണവും തുടങ്ങി. 12 കോടിയാണ് നിർമാണ ചെലവ്. ഊരാളുങ്കൽ സൊസൈറ്റിക്കാണ് നിർമാണ ചുമതല. നിലവിൽ ഇവിടെ യാത്രയക്ക് തൂക്കുപാലത്തെയാണ് ആളുകൾ ആശ്രയിക്കുന്നത്. ഇതാകട്ടെ തുരുമ്പെടുത്ത് അപകടാവസ്ഥയിലുമാണ്.

നവീകരിച്ച കരിമരുതുംകിരി റോഡ് ഉദ്ഘാടനം ചെയ്തു

ആലക്കോട്: എംഎൽഎയുടെ 2024 -25 വർഷത്തെ ആസ്തി വികസന ഫണ്ട് ഉപയോഗിച്ച് നവീകരിച്ച വെട്ടിക്കാലാമുക്ക് - കരിമരുതുംകിരി റോഡ് സജീവ് ജോസഫ് എംഎൽഎ ഉദ്ഘാടനം ചെയ്തു. ആലക്കോട് പഞ്ചായത്ത് പ്രസിഡന്‍റ് ജോജി കന്നിക്കാട്ട് അധ്യക്ഷത വഹിച്ചു. നൗഷാദ് ബ്ലാത്തൂർ, ബാബു പള്ളിപ്പുറം, ജോൺസൺ ചിറവയൽ, ജാനേഷ്, സാലി ജെയിംസ്, എന്നിവർ പ്രസംഗിച്ചു.

മഹാത്മാഗാന്ധി കുടുംബ സംഗമം

പയ്യാവൂർ: കോൺഗ്രസ് ശ്രീകണ്ഠപുരം മണ്ഡലത്തിലെ പതിനഞ്ചാം വാർഡ് (മടമ്പം) മഹാത്മാഗാന്ധി കുടുംബ സംഗമം ഡിസിസി ജനറൽ സെക്രട്ടറി ജോഷി കണ്ടത്തിൽ ഉദ്ഘാടനം ചെയ്തു. വാർഡ് പ്രസിഡന്‍റ് അഗസ്റ്റിൻ അധ്യക്ഷത വഹിച്ചു. കോൺഗ്രസ് ശ്രീകണ്ഠപുരം ബ്ലോക്ക് കമ്മിറ്റി പ്രസിഡന്‍റ് ഇ.വി. രാമകൃഷ്ണൻ മുഖ്യപ്രഭാഷണം നടത്തി. യൂത്ത് കോൺഗ്രസ് ജില്ലാ പ്രസിഡന്‍റ് വിജിൽ മോഹനൻ, കോൺഗ്രസ് മണ്ഡലം കമ്മിറ്റി പ്രസിഡന്‍റ് എൻ.ജെ. സ്റ്റീഫൻ, പി.ടി. കുര്യാക്കോസ്, വാർഡ് കൗൺസിലർ പി. മീന, കെ. ബിനോയി, കെ. പ്രഭാകരൻ എന്നിവർ പ്രസംഗിച്ചു.

മലയോരത്ത് കാറ്റിലും മഴയിലും വ്യാപക നാശം

ചെറുപുഴ: മഴയിലും കനത്ത കാറ്റിലും മലയോരത്ത് വ്യാപക നാശനഷ്‌ടം. തിരുമേനി കോറാളിയിലെ കുഴിഞ്ഞാലിൽ ജോർജിന്‍റെ വീടിന്‍റെ മേൽക്കൂര കമുക് വീണു തകർന്നു. വീടിന്‍റെ ഓടിട്ട ഭാഗവും ബാത്ത്‌റൂമും തകർന്നു. അഞ്ച് റബറും മൂന്ന് കമുകും ഒടിഞ്ഞുവീണു. അമ്പലവയലിൽ തങ്കപ്പന്‍റെ പ്ലാവ്, വളവനാട്ട് പൊന്നമ്മയുടെ റബർ, കമുക്, കൊച്ചിലാത്ത് ബേബിയുടെ തേക്ക് എന്നിവ കാറ്റിൽ ഒടിഞ്ഞുവീണു. തിരുമേനി-കോറാളി റോഡിൽ വൈദ്യുത ലൈനിലേക്കു കമുക് പൊട്ടിവീണ് വൈദ്യുതി ബന്ധം തകരാറിലായി. പെടേനയിലെ കൊമ്മച്ചി കുഞ്ഞാമിനയുടെ വീടിന്‍റെ മുകളിൽ മാവ് വീണു ഭാഗികമായി നാശമുണ്ടായി. പെരിങ്ങോം അഗ്നിരക്ഷാസേന, കെഎസ്ഇബി ജീവനക്കാർ, നാട്ടുകാർ എന്നിവർ രക്ഷാപ്രവർത്തനങ്ങൾക്കു നേതൃത്വം നൽകി. പാടിയോട്ടുചാൽ പൊന്നംവയൽ ഭാഗത്തും കാറ്റ് നാശം വിതച്ചു. പെരുമ്പടവ്: ചപ്പാരപ്പടവ്, എരമം-കുറ്റൂർ, ആലക്കോട്, നടുവിൽ, ഉദയഗിരി പഞ്ചായത്തുകളിലാണ് ശക്തമായ കാറ്റ് നാശം വിതച്ചത്. നിരവധി റബർ മരങ്ങളും തെങ്ങ്, കവുങ്ങ്, ജാതി, വാഴ തുടങ്ങിയ കാർഷിക വിളകളും നശിച്ചു. പലയിടങ്ങളിലും മരങ്ങൾ പൊട്ടിവീണ് ഗതാഗതം തടസപ്പെട്ടു. വൈദ്യതു തൂണുകൾ തകർന്നതിനെ തുടർന്ന് വൈദ്യുതിബന്ധം വി‍ഛേദിക്കപ്പെട്ടു. രാത്രി വൈകിയും വൈദ്യുതി പുനസ്ഥാപിക്കാനുള്ള ശ്രമങ്ങൾ നടത്തി വരികയാണ്. വേനൽ മഴയിൽ ഉണ്ടായ ശക്തമായ കാറ്റിൽ കാർഷിക വിളകൾ നശിച്ചവർക്ക് എത്രയും വേഗം നഷ്ടപരിഹാരം ലഭ്യമാക്കാൻ നടപടികൾ വേണമെന്ന് കെപിസിസി ജനറൽ സെക്രട്ടറി സോണി സെബാസ്റ്റ്യൻ ആവശ്യപ്പെട്ടു. തേർത്തല്ലി: വീശിയടിച്ച ശക്തമായ ചുഴലിക്കാറ്റിൽ തേർത്തല്ലി മേഖലയിൽ കനത്ത നാശം. നിരവധി കർഷകരുടെ റബർ, തെങ്ങ്, കമുക്, തേക്ക്, മഹാഗണി, മറ്റു മരങ്ങൾ എന്നിവ കടപുഴകി വീണു. നിരവധി വൈദ്യുത തൂണുകൾ ഒടിഞ്ഞു വീണു. പലസ്ഥലത്തും മണിക്കൂറുകളോളം ഗതാഗതം തടസപ്പെട്ടു. മേരിഗിരി ചെറുപുഷ്പം ഫൊറോന പള്ളി പരിസരത്ത് ആഞ്ഞടിച്ച കാറ്റിൽ നിരവധി റബർ മരങ്ങൾ തെങ്ങ്, മാവ്, മഹാഗണി എന്നിവ കടപുഴകി വീണു. മൗവ്വത്താനിയിലെ തൈവെപ്പിൽ ഗോപാലകൃഷ്ണൻ, താന്നിക്കൽ ജിന്‍റോ, ജിമ്മി, ബേബി, മറ്റത്തിൽ ഔസേപ്പച്ചൻ, ജോസ്, പാമ്പക്കൽ സണ്ണി നമ്പ്യാപറമ്പിൽ, ജോർജ്, ജോസ്, ബേബി, കൂട്ടുങ്കൽ ജിമ്മി, പോൾ, ഫ്രാൻസിസ്, മേരിഗിരിയിലെ മാടപ്പള്ളി ജോയി, പുതുപ്പറമ്പിൽ ഷൈൻ തുടങ്ങി നിരവധി ആളുകൾക്കാണു നാശനഷ്‌ടം നേരിട്ടത്. ഷൈൻ പുതുപ്പറമ്പിലിന്‍റെ വീടിനു മുകളിൽ റബർ, കമുക്, പുളി എന്നിവ കടപുഴകി വീണ് മേൽക്കൂരയും തകർന്നു വീണു. പയ്യാവൂർ: ഉപ്പുപടന്ന മേഖലയിൽ ഇന്നലെ ഉച്ചകഴിഞ്ഞുണ്ടായ ശക്തമായ ചുഴലിക്കാറ്റിൽ മരം വീണ് വീട് തകർന്നു. ചിറവാലേൽ സജിയുടെ വീടിനാണ് നാശം സംഭവിച്ചത്. മകളുടെ കല്യാണത്തിനായി അടുത്തിടെ നവീകരണം നടത്തിയ വീടാണ് തകർന്നത്. ഓടുകളും ആസ്ബസ്റ്റോസ് ഷീറ്റുകളും ഉൾപ്പെടുന്ന മേൽക്കൂര തകർന്നു. അഞ്ച് ലക്ഷം രൂപയുടെ നഷ്ടം കണക്കാക്കുന്നു. പയ്യാവൂർ പഞ്ചായത്ത് പ്രസിഡന്‍റ് സാജു സേവ്യർ തകർന്ന വീടും നാശനഷ്ടങ്ങളുണ്ടായ മറ്റു പ്രദേശങ്ങളും സന്ദർശിച്ചു. നിരവധി മരങ്ങൾ ഒടിഞ്ഞും കടപുഴകിയും വീണതിനെ തുടർന്ന് ഉപ്പുപടന്ന-ചമതച്ചാൽ റോഡിലെ ഗതാഗതവും തടസപ്പെട്ടു. വൈദ്യുത തൂണുകൾ തകർന്നതു കാരണം പ്രദേശത്തെ വൈദ്യുത ബന്ധം വിഛേദിക്കപ്പെട്ട നിലയിലാണ്. പ്രകൃതിക്ഷോഭത്തിനിരയായ വീടും കൃഷിയിടങ്ങളും ജില്ലാ കളക്ടർ സന്ദർശിച്ച് ദുരന്തബാധിതർക്ക് മതിയായ നഷ്ടപരിഹാരം ലഭ്യമാക്കാനുള്ള നടപടികൾ സ്വീകരിക്കണമെന്ന് കേരള കോൺഗ്രസ്-എം ജില്ലാ ജനറൽ സെക്രട്ടറി പി.എസ്.ജോസഫ് ആവശ്യപ്പെട്ടു. കാർത്തികപുരം: ഇന്നലെ വൈകുന്നേരം നാലോടെ ഉദയഗിരി പഞ്ചായത്തിൽ വേനൽ മഴയക്കൊപ്പമുണ്ടായ ശക്തമായ കാറ്റിൽ വ്യാപക നാശ നഷ്ടം. മുക്കടയിൽ മരം വീണും മറ്റും നിരവധി വീടുകൾ തകർന്നു. റബർ, തെങ്ങ്, കവുങ്ങ് ഉൾപ്പടെയുള്ളവയും വ്യാപകമായി നശിച്ചു. മരങ്ങൾ വീണ് മുക്കടയിലെ മണ്ണൂർ സുമതിയുടെ കോൺക്രീറ്റ് വീട് പൂർണമായും തകർന്നു. നാലു ലക്ഷത്തിലേറെ രൂപയുടെ നഷ്ടം കണക്കാക്കുന്നു. അപകട സമയത്ത് സുമതി വീട്ടിലുണ്ടായിരുന്നെങ്കിലും പരിക്കാൽക്കാതെ രക്ഷപ്പെട്ടു. പുത്തൻപുരയിൽ ബിജിത്തിന്‍റെ വീട് തെങ്ങു വീണ് തകർന്നു. മേൽക്കൂര പൂർണമായും തകർന്നു. വീട്ടിലുണ്ടായിരുന്ന ബിജിത്തിന്‍റെ ഭാര്യ സുമയും മക്കളും പരിക്കേൽക്കാതെ രക്ഷപ്പെട്ടു. രണ്ടു ലക്ഷം രൂപയുടെ നഷ്ടം കണക്കാക്കുന്നു. മുകളേൽ സജിമോൻ, മീത്തലെ പുരയിൽ രാജി സുഭാഷ് എന്നിവരുടെ വീടുകൾക്ക് മുകളിൽ പ്ലാവും റബർ മരങ്ങളും വീണ് മേൽക്കൂരകൾ പൂർണമായും തകർന്നു. സുധീഷ് കുമാർ, നെല്ലിക്കുന്നേൽ, എമിലി തോമസ്, കുന്നുപുറത്ത് മാത്യു എന്നിവരുടെ വീടുകളും മരങ്ങൾ വീണ് തകർന്നു. ബെന്നി പീടകക്കലിന്‍റെ കാലിത്തൊഴുത്തിന്‍റെ മേൽക്കൂര കാറ്റിൽ പറന്നു പോയി. പുത്തൻവീട്ടിൽ മധുസൂദനൻ, പറോത്തുമലയിൽ നിരവേലിൽ ഹരിദാസൻ എന്നിവരുടെ വീടുകളും തകർന്നു. ഹരിദാസന്‍റെ വീട്ടിലുണ്ടായിരുന്ന രോഗികളായ മാതാപിതാക്കൾ ചന്ദ്രശേഖരൻ, ലക്ഷ്മിക്കുട്ടി എന്നിവർ പരിക്കേൽക്കാതെ അത്ഭുതകരമായി രക്ഷപ്പെട്ടു. മണക്കടവ് , മുക്കട, കോഴിത്താവളം, ചുള്ളിപ്പള്ള,കാർത്തികപുരം, പൂവഞ്ചാൽ, മുതുശേരി പ്രദേശങ്ങളിലും വ്യാപക നാശമുണ്ടായി. തെങ്ങും മരങ്ങളും റോഡിലേക്ക് ഒടിഞ്ഞ് വീണ് പലയിടത്തും വാഹന ഗതാഗതം തടസപ്പെട്ടു. ഉദയഗിരി പഞ്ചായത്തിലെ പല മേഖലയിലും വൈദ്യുത തൂണുകൾ തകർന്ന് വൈദ്യുത ബന്ധമില്ലാതായി. തൂണുകൾ തകർന്നതിലൂടെ മാത്രം ലക്ഷങ്ങളുടെ നഷ്ടമാണ് കെഎസ്ഇബിക്കുണ്ടായത്. നാശനഷ്ടമുണ്ടായ പ്രദേശങ്ങൾ പഞ്ചായത്ത് പ്രസിഡന്‍റ് കെ.എസ്. ചന്ദ്രശേഖരൻ, വൈസ് പ്രസിഡന്‍റ് ബിന്ദു ഷാജു, ജില്ലാ പഞ്ചായത്തംഗം തോമസ് വെക്കത്താനം, വില്ലേജ് ഓഫീസർ എസ്. നകുലരാജൻ എന്നിവർ സന്ദർശിച്ചു. നാശനഷ്ടമുണ്ടായവർക്ക് എത്രയും പെട്ടെന്ന നഷ്ട പരിഹാരം ലഭ്യമാക്കണമെന്ന് പഞ്ചായത്ത് പ്രസിഡന്‍റ് കെ.എസ്. ചന്ദ്രശേഖരൻ സർക്കാരിനോട് ആവശ്യപ്പെട്ടു.

കണ്ണൂരിൽ യൂത്ത് കോൺഗ്രസ് മാർച്ചിൽ സംഘർഷം; പോലീസ് ജലപീരങ്കി പ്രയോഗിച്ചു

കണ്ണൂർ: മകൾ വീണ വിജയനെ മാസപ്പടി കേസിൽ പ്രതിചേർത്ത സാഹചര്യത്തിൽ പിണറായി വിജയൻ മുഖ്യമന്ത്രി സ്ഥാനം രാജിവയ്ക്കണമെന്ന് ആവശ്യപ്പെട്ട് യൂത്ത് കോൺഗ്രസ് നടത്തിയ കളക്ടറേറ്റ് മാർച്ചിൽ സംഘർഷം. കെപിസിസി മെംബർ ടി.ഒ. മോഹനന്‍റെ ഉദ്ഘാടന പ്രസംഗത്തിന് ശേഷം പ്രവർത്തകർ ബാരിക്കേഡ് മറികടക്കാൻ ശ്രമിച്ചതോടെ പോലീസ് ജലപീരങ്കി പ്രയോഗിക്കുകയായിരുന്നു. തുടർന്ന് പ്രവർത്തകരും പോലീസും തമ്മിൽ ഏറെ നേരം ഉന്തും തള്ളും വാക്കേറ്റവും ഉണ്ടായി. പ്രവർത്തകർ ചെരിപ്പും കൊടിക്കമ്പുകളും പോലീസിനും ജലപീരങ്കിക്കും നേരെ വലിച്ചെറിഞ്ഞു. യൂത്ത് കോൺഗ്രസ് ജില്ലാ പ്രസിഡഡന്‍റ് വിജിൽ മോഹനൻ, നേതാക്കളായ ഫർസീൻ മജീദ്, ജോഷി കണ്ടത്തിൽ, ജയ്സൺ തുടങ്ങി ഏഴുപേരെ അറസ്റ്റ് ചെയ്തു മാറ്റിയ വാഹനത്തിന് മുന്നിൽ നിന്നും പ്രവർത്തകർ പ്രതിഷേധിച്ചത് സംഘർഷാവസ്ഥയ്ക്ക് ആക്കം കൂട്ടി. പോലീസ് ബലം പ്രയോഗിച്ചായിരുന്നു പ്രവർത്തകരെ വാഹനത്തിലേക്ക് തള്ളിക്കയറ്റിയത്. ജില്ലാ പ്രസിഡഡന്‍റ് വിജിൽ മോഹനൻ അധ്യക്ഷത വഹിച്ചു. രാഹുൽ വെച്ചിയോട്ട്, വി.കെ. ഷിബിന, മുഹ്സിൻ ഖാദിയോട് , സുധീഷ് വെള്ളച്ചാൽ, ഫർഹാൻ മുണ്ടേരി, എം.കെ. വരുണ, ജിതിൻ കൊളപ്പ, അമൽ കുറ്റ്യാട്ടൂർ തുടങ്ങിയവരും നേതൃത്വം നല്കി. യൂത്ത് കോൺഗ്രസ് മാർച്ചിനോടനുബന്ധിച്ച് വളപട്ടണം എസ്എച്ച്ഒ ബി. കാർത്തികിന്‍റെ നേതൃത്വത്തിൽ കളക്ടറേറ്റ് പരിസരത്ത് വൻ സുരക്ഷ സന്നാഹമാണ് പോലീസ് ഒരുക്കിയത്.

ദിശ എഡ്യുക്കേഷണൽ എക്സ്പോ 12ന് കണ്ണൂരിൽ; രജിസ്ട്രേഷൻ തുടങ്ങി

കണ്ണൂർ: ദീപിക ദിനപത്രവും തലശേരി അതിരൂപതയുടെ സാമൂഹ്യ സേവന വിഭാഗമായ തലശേരി സോഷ്യൽ സർവീസ് സൊസൈറ്റിയും (ടിഎസ്എസ്എസ് ) എഡ്യുസ്പാർക്കും സംയുക്തമായി സംഘടിപ്പിക്കുന്ന ദിശ എഡ്യുക്കേഷണൽ എക്സ്പോ 12 ന് കണ്ണൂർ ശ്രീപുരം ഇംഗ്ലീഷ് മീഡിയം സ്കൂളിൽ നടക്കും. രാവിലെ 9.30ന് ആരംഭിക്കുന്ന എക്സ്പോ കണ്ണൂർ സർവകലാശാല വൈസ് ചാൻസിലർ ഡോ.കെ.കെ. സാജു ഉദ്ഘാടനം ചെയ്യും. എഡ്യൂക്കേഷണൽ എക്സ്പോയിൽ അക്കാദമിക്ക് എക്സ്പേർട്ടും കേരളത്തിന്‍റെ മുൻ ഡിജിപിയുമായിരുന്ന ഡോ. അലക്സാണ്ടർ ജേക്കബ് ഐപിഎസ് നൂതന വിദ്യാഭ്യാസ സാധ്യതകളെക്കുറിച്ച് വിദ്യാർഥികളോട് സംസാരിക്കും. കേരളത്തിനകത്തും പുറത്തുമുള്ള പ്രശസ്തമായ പ്രഫഷണൽ വിദ്യാഭ്യാസ സ്ഥാപനങ്ങളെ പരിചയപ്പെടാനും സ്പോട്ട് അഡ്മിഷനെടുക്കാനും എക്സ്പോയിൽ സൗകര്യമുണ്ടാകും. പ്ലസ് ടു പരീക്ഷ കഴിഞ്ഞ് ഉന്നത വിദ്യാഭ്യാസത്തിന് കാത്തിരിക്കുന്ന കണ്ണൂർ, കാസർഗോഡ് ജില്ലകളിലെ വിദ്യാർഥികൾക്ക് എഡ്യൂക്കേഷണൽ എക്സ്പോയിൽ സൗജന്യമായി പങ്കെടുക്കാം. വിദ്യാഭ്യാസരംഗത്തെ മാറ്റങ്ങളെക്കുറിച്ചും പുതിയ ട്രെൻഡുകളെക്കുറിച്ചും മാതാപിതാക്കൾക്ക് അറിവ് നൽകുന്നതോടൊപ്പം പങ്കെടുക്കുന്ന എല്ലാ കുട്ടികൾക്കും ആകർഷകമായ എഡ്യൂക്കേഷൻ പാക്കേജും എക്സ്പോ ലഭ്യമാക്കും. കൂടുതൽ വിവരങ്ങൾക്ക് 9496684784, 8943615547 എന്നീ നന്പറുകളിൽ ബന്ധപ്പെടുക. രജിസ്റ്റർ ചെയ്യുവാൻ ക്യൂ ആർ കോഡ് സ്കാൻ ചെയ്തു ഉപയോഗിക്കുക.

കാട്ടുപന്നി ബൈക്കിലിടിച്ച് ഗൃഹനാഥന് ഗുരുതരം

കേളകം: അടയ്ക്കാത്തോട് കരിയംകാപ്പിൽ ബൈക്കിൽ യാത്ര ചെയ്യവേ കാട്ടുപന്നിയിടിച്ച് ഗൃഹനാഥന് ഗുരുതര പരിക്ക്. കരിയംകാപ്പിലെ കുന്നത്ത് സുമോദിനാണ് (48)ഗുരുതര പരിക്കേറ്റത്. സുമോദിന്‍റെ തലയ്ക്കും കൈയ്ക്കും കാലിനും നട്ടെല്ലിനുമാണ് പരിക്ക്. ഞായറാഴ്ച രാത്രി അടയ്ക്കാത്തോട്ടിൽ നിന്ന് വീട്ടിലേക്ക് മടങ്ങുന്ന വഴി പാലക്കാട് റെന്നിയുടെ വീടിന് സമീപത്തു നിന്നാണ് കാട്ടുപന്നി ബൈക്കിൽ ഇടിച്ചത്. ഇടിയുടെ ആഘാതത്തിൽ തെറിച്ചുവീണ സുമോദിനെ കാട്ടുപന്നി ആക്രമിക്കുകയും ചെയ്തു. ഭാഗ്യം കൊണ്ട് മാത്രമാണ് രക്ഷപ്പെട്ടതെന്ന് സുമോദ് പറയുന്നു. ഇതേ സ്ഥലത്തിന് സമീപത്താണ് കഴിഞ്ഞദിവസം കിണറ്റിൽ വീണ ആറ് കാട്ടുപന്നികളെ വെടിവച്ചുകൊന്നത്.

അവധിക്കാലം ആഘോഷമാക്കാന്‍ വിസ്‌മയയില്‍ പുതിയ രണ്ടു റൈഡുകള്‍

പറശിനിക്കടവ്: അവധിക്കാലം ആഘോഷമാക്കാന്‍ പറശിനിക്കടവ് വിസ്മയ പാർക്ക് ഒരുങ്ങി. നൂതനമായ പുതിയ രണ്ടു റൈഡുകള്‍ സ്ഥാപിച്ചാണ് ഓരോ അവധിക്കാലവും വിസ്‌മയ വരവേല്‍ക്കുന്നത്‌. ഈ വര്‍ഷം 50 ലക്ഷം രൂപാ ചെലവിലായി കൊച്ചു കുട്ടികള്‍ക്ക്‌ ഏറെ ഇഷ്‌ടപ്പെടുന്ന 'ഗെല്ലോപ്പ്‌ റൈഡും' മുതിര്‍ന്നവര്‍ക്കും കുട്ടികള്‍ക്കും ആസ്വദിക്കാവുന്ന 'മിറര്‍ മാജിക്കു'മാണ്‌ സ്ഥാപിച്ചിരിക്കുന്നത്. റൈഡുകളുടെ ഉദ്‌ഘാടനം സിനിമാതാരം ഉണ്ണിരാജും ഫ്‌ളവേഴ്‌സ്‌ ടോപ്പ്‌ സിംഗര്‍-5 ലെ റാനിയ റഫീഖും ചേര്‍ന്ന്‌ നിർവഹിച്ചു. വിസ്‌മയ പാര്‍ക്ക്‌ ചെയര്‍മാന്‍ പി.വി ഗോപിനാഥ് അധ്യക്ഷത വഹിച്ചു. ആന്തൂര്‍ നഗരസഭ ചെയര്‍മാന്‍ പി.മുകുന്ദന്‍ മുഖ്യാതിഥിയായിരുന്നു. വിസ്മയ പാർക്ക് വൈസ് ചെയർമാൻ കെ. സന്തോഷ്,എം.ബിസിത, എം.വി ജനാര്‍ദനൻ, പി.കെ മുജീബ്‌ റഹ്മാന്‍, വല്‍സന്‍ കടമ്പേരി, സമദ്‌ കടമ്പേരി, കെ. രാജീവന്‍, എം.ദാമോദരന്‍, ഒ.സുഭാഗ്യം, കെ. സന്തോഷ്‌ ഇ. വൈശാഖ്‌ എന്നിവർ പ്രസംഗിച്ചു. അവധിക്കാലത്ത്‌ സന്ദര്‍ശകര്‍ക്കായി വിവിധ ഇവന്‍റുകളും ഫണ്‍ഷോകളും ഫുഡ്‌ ഫെസ്റ്റും വിസ്മയയിൽ ഒരുക്കുന്നുണ്ട്.

ചെടിക്കുളം പള്ളി സുവർണ ജൂബിലി ആഘോഷങ്ങൾക്ക് തുടക്കമായി

ചെടിക്കുളം: ചെടിക്കുളം സെന്‍റ് സെബാസ്റ്റ്യൻസ് പള്ളിയിൽ ഒരുവർഷം നീണ്ടുനിൽക്കുന്ന സുവർണ ജൂബിലി ആഘോഷങ്ങൾക്ക് തുടക്കമായി. ആർച്ച് ബിഷപ് എമരിറ്റസ് മാർ ജോർജ് ഞറളക്കാട്ട് ജൂബിലി ആഘോഷങ്ങൾ ഉദ്ഘാടനം ചെയ്തു. മാർ ജോർജ് ഞറളക്കാട്ടിനൊപ്പം ഇടവക വികാരി ഫാ. പോൾ കണ്ടത്തിൽ, ഇടവകാംഗമായ പൗരോഹിത്യത്തിന്‍റെ അമ്പതാം വർഷം ആഘോഷിക്കുന്ന ഫാ. ശാന്തി ദാസ് എന്നിവർ ചേർന്ന് ദിവ്യബലിയർപ്പിച്ചു. ഇടവക കോ-ഓർഡിനേറ്റർ മാത്തുക്കുട്ടി പന്തപ്ലാക്കൽ, പാരിഷ് കൗൺസിൽ സെക്രട്ടറി തോമസ് കണ്ടനാംകുഴിയിൽ, കൈക്കാരൻമാരായ ജോസഫ് ഓരത്തേൽ, ജയിംസ് അന്തിനാട്, ഡെന്നീസ് ആലുങ്കൽ, ജിൻസ് മാത്യുവള്ളിക്കൽ, മദർ അനിൽറ്റ്, സിസ്റ്റർ നിഷ, വിവിധ ഭക്ത സംഘടനകളെ പ്രതിനിധീകരിച്ച് ചാക്കോ പന്നിക്കോട്ടിൽ, ജെസി ഉമ്മകുഴിയിൽ എന്നിവർ ആഘോഷങ്ങൾ നേതൃത്വം നൽകി.

കനത്ത കാറ്റും മഴയും: പുന്നാട് മേഖലയിൽ വ്യാപക നാശനഷ്ടം

ഇരിട്ടി: കഴിഞ്ഞ ദിവസം മലയോര മേഖലകളിൽ ഉണ്ടായ കനത്ത മഴയിലും മീത്തിലെ പുന്നാട്, കല്ലങ്ങോട് മേഖലയിൽ വ്യാപക നാശനഷ്ടം. ശക്തമായ കാറ്റിൽ നിവേദിത വിദ്യാലയത്തിന് സമീപത്തുള്ള പി.കെ. സരളയുടെ വീടിന്‍റെ മേൽക്കൂര പറന്നുപോയി. ഈസമയം വീട്ടിൽ ആളുകൾ ഉണ്ടായിരുന്നെങ്കിലും പരിക്കേൽക്കാതെ രക്ഷപ്പെടുകയായിരുന്നു. മേൽക്കൂര പറന്നുപോയതോടെ മഴവെള്ളം മുഴുവൻ വീട്ടിനുള്ളിൽ വീണു ഗൃഹോപകാരങ്ങൾക്ക് കേടുപാടുകൾ സംഭവിച്ചു. ഇതിനു സമീപം കല്ലങ്ങോടുള്ള മാവില ഹരീന്ദ്രന്‍റെ 150 ഓളം വാഴകൾ കാറ്റിൽ നിലം പതിച്ചു. ഇതിൽ തൊണ്ണൂറു ശതമാനം വാഴകളും ഒരു മാസത്തിനുള്ളിൽ വിളവെടുക്കാറായവയാണ്. ഇതോട് ചേർന്ന പള്ളിപ്രവന്‍ പദ്മനാഭന്‍റെ നൂറോളം വാഴകളും കാറ്റിൽ നശിച്ചു. പി.പി. രാമചന്ദ്രന്‍റെ വീട്ടിനു സമീപത്തെ മുപ്പതോളം റബർ മരങ്ങളും കവുങ്ങുകളും പ്ലാവുകളും കാറ്റിൽ പൊട്ടിവീണും കടപുഴകിവീണും നശിച്ചു. വൈദ്യുത ലൈനിനുമുകളിൽ മരംപൊട്ടി വീണ് പ്രദേശത്തെ വൈദ്യുതി ബന്ധം താറുമാറായി.

ചേലോറ ലെഗസി വേസ്റ്റ് നീക്കം ചെയ്യൽ: കരാർ കമ്പനിക്കെതിരേ നടപടിയെടുക്കും

കണ്ണൂർ: കോർപറേഷന്‍റെ ചേലോറ ‌ട്രഞ്ചിംഗ് ഗ്രൗണ്ടിലെ മാലിന്യം നീക്കം ചെയ്യുന്നതിന് കരാർ എടുത്ത റോയൽ വെസ്റ്റേൺ പ്രോജക്ട് കമ്പനിയെ നീക്കം ചെയ്യാൻ ഇന്നലെ ചേർന്ന കൗൺസിൽ യോഗം തീരുമാനിച്ചു. ഏറെ വിവാദങ്ങൾക്കും ചർച്ചകൾക്കും വഴി വച്ച ഈ പ്രവൃത്തിയുടെ കാലാവധി 31/12/23 കഴിഞ്ഞിരുന്നു . പ്രവൃത്തി തുടരുന്നതിന് നിരന്തരം കമ്പനിയോട് ആവശ്യപ്പെട്ടിട്ടും പ്രവൃത്തി തുടങ്ങിയിട്ടില്ല. തുടർന്ന് കമ്പനിക്കെതിരെ നിയമനടപടി സ്വീകരിക്കാൻ കൗൺസിൽ തീരുമാനം എടുക്കുകയും വിവരം കമ്പനിയെ അറിയിക്കുകയും ചെയ്തിരുന്നു. ഇതിന്‍റെ അടിസ്ഥാനത്തിൽ കമ്പനി അപേക്ഷ സമർപ്പിക്കുകയും കൗൺസിൽ ചർച്ചചെയ്യുകയും ചെയ്തു. എഗ്രിമെന്‍റ് പുതുക്കി നൽകുന്നതിന് പെർഫോമൻസ് ഗാരണ്ടി ഇനത്തിൽ 3,73,72,327 രൂപ അടക്കുന്നതിനും 2025 മേയ് 31 നകം പ്രവൃത്തി പൂർത്തികരിച്ച് സീറോ വേസ്റ്റ് ആക്കി സ്ഥലം തിരികെ ഏൽപ്പിക്കുകയും ചെയ്യണമെന്ന വ്യവസ്ഥയിൽ നോട്ടീസ് നൽകുകയും ചെയ്തിരുന്നു. എന്നാൽ പെർഫോമൻസ് ഗാരണ്ടി അടക്കാൻ തയാറല്ലെന്ന് കന്പനി അറിയിച്ചതിന്‍റെ അടിസ്ഥാനത്തിലാണ് കമ്പനിയെ കരാറിൽ നിന്നും നീക്കം ചെയ്യുന്നത്. കൂടാതെ കമ്പനിക്ക് അധികമായി നൽകി എന്ന് ഓഡിറ്റിൽ കണ്ടെത്തിയ തുക തിരിച്ചു പിടിക്കുന്നതിന് നിയമ നടപടി സ്വീകരിക്കാൻ തീരുമാനിച്ചതായും മേയർ മുസ്‌ലിഹ് മഠത്തിൽ കൗൺസിൽ യോഗത്തെ അറിയിച്ചു. ചേലോറ ട്രഞ്ചിംഗ് ഗ്രൗണ്ടിൽ വേസ്റ്റ് ടു എനർജി പദ്ധതിക്കായി കെഎസ്ഐഡിസിക്ക് കൈമാറിയ സ്ഥലം തിരികെ ലഭ്യമാക്കുന്നതിനും പ്രസ്തുത സ്ഥലത്ത് കോർപറേഷൻ ഉടമസ്ഥതയിൽ വെറ്റ് വേസ്റ്റ് ടു സിഎൻജി എനർജി പ്ലാന്‍റ് സ്ഥാപിക്കാനും തീരുമാനിച്ചു. ജീവനക്കാരുടെ ഒഴിവ് നികത്താത്തതും നിലവിലുള്ളവരെ സ്ഥലം മാറ്റിയതും കാരണം പദ്ധതി പ്രവർത്തനങ്ങളിൽ പുരോഗതി കൈവരിക്കാൻ സാധിച്ചിട്ടില്ലെന്ന് കൗൺസിൽ അഭിപ്രായപ്പെട്ടു. ഉദ്യോഗസ്ഥരുടെ അലംഭാവം പദ്ധതി പ്രവൃത്തികൾ പൂർത്തികരിക്കുന്നതിന് തടസമായിട്ടുണ്ട്. പാശ്ചാത്തല മേഖല ഒഴികെ മറ്റ് മേഖലകളിലെ നിർവഹണ ഉദ്യോഗസ്ഥർ യഥാവിധി പ്രവർത്തിച്ചിട്ടുണ്ട്. നികുതി-നികുതിയേതര വരുമാനം പിരിച്ചെടുക്കുന്നതിൽ കോർപറേഷൻ സംസ്ഥാന തലത്തിൽ ഒന്നാം സ്ഥാനം കൈവരിച്ചിട്ടുണ്ടെന്നും ഇതിന് പ്രവർത്തിച്ച മുഴുവൻ ഉദ്യോഗസ്ഥരെയും അഭിനന്ദിക്കുന്നതായും മേയർ പറഞ്ഞു.

നടുവനാട് വോളി: കേരള റിയൽ എസ്റ്റേറ്റിന് കിരീടം

ഇരിട്ടി: നടുവനാട് പി.വി. നാരായണൻ മാസ്റ്റർ സ്മാരക ഫ്ലഡ്‌ലിറ്റ് സ്റ്റേഡിയത്തിൽ നടന്ന നടുവനാട് വോളിബോൾ ടൂർണമെന്‍റിൽ എം.പി. ഗോപാലൻ മാസ്റ്റർ മെമ്മോറിയൽ വിന്നേഴ്സ് ട്രോഫിക്കും പി.വി. രവീന്ദ്രൻ (കെഎസ്ആർടിസി) മെമ്മോറിയൽ റണ്ണേഴ്സ് ട്രോഫിക്കും വേണ്ടിയുള്ള മേജർ വോളിയിൽ കേരള റിയൽ എസ്റ്റേറ്റ് വോളി ടീം ജേതാക്കളായി. ഫൈനലിൽ ക്രൈസ്റ്റ് കോളജ്, ഇരിങ്ങാലക്കുടയെ പരാജയപ്പെടുത്തിയാണ് കേരള റിയൽ എസ്റ്റേറ്റ് വിജയിച്ചത്. എം.വി. കുഞ്ഞിക്കൃഷ്ണൻ മാസ്റ്റർ മെമ്മോറിയൽ വിന്നേഴ്സ് ട്രോഫിയ്ക്കും പിവിആർ വെജിറ്റബിൾസ് നടുവനാട് സ്പോൺസർ ചെയ്ത റണ്ണേഴ്സ് ട്രോഫിക്കും വേണ്ടിയുള്ള ജില്ലാ വോളി മത്സരത്തിൽ ഭഗത് സിംഗ് അന്നൂരിനെ പരാജയപ്പെടുത്തി ടാസ്ക് മക്രേരി കിരീടം നേടി. കോങ്ങാട് ശോഭ മെമ്മോറിയൽ വിന്നേഴ്സ് ട്രോഫിയ്ക്കും കേളോത്ത് പദ്മിനി മെമ്മോറിയൽ റണ്ണേഴ്സ് ട്രോഫിയ്ക്കും വേണ്ടിയുള്ള വനിതാ വോളി ഫൈനൽ മത്സരത്തിൽ സെന്‍റ് മേരീസ് കോളജ് സുൽത്താൻ ബത്തേരിയെ പരാജയപ്പെടുത്തി അൽഫോൺസ കോളജ് പാല ജേതാക്കളായി. സമാപന സമ്മേളനം ജില്ലാ പഞ്ചായത്ത് വൈസ് പ്രസിഡന്‍റ് ബിനോയ് കുര്യൻ ഉദ്ഘാടനം ചെയ്തു. ഇരിട്ടി ബ്ലോക്ക് പഞ്ചായത്ത് പ്രസിഡന്‍റ് കെ. വേലായുധൻ സമ്മാനദാനം നടത്തി. നടുവനാട് കൂട്ടായ്മ ചെയർമാൻ സി. ഉസ്മാൻ അധ്യക്ഷത വഹിച്ചു. ഇരിട്ടി നഗരസഭാംഗങ്ങളായ കെ. സോയ, കെ.പി. അജേഷ്, കെ.വി. പവിത്രൻ, കെ. പ്രേമ നിവാസൻ, കെ.വി. ജിതേഷ്, എം.വി. ആദിത്യൻ, പി.എം. അഷ്റഫ് എന്നിവ൪ പ്രസംഗിച്ചു. തുടർന്ന് ഗ്രോമോത്സവവും നടന്നു.

മണത്തണ-ഓടന്തോട് റോഡ് നവീകരണം: എംഎൽഎയുടെ നേതൃത്വത്തിൽ പരിശോധന നടത്തി

മണത്തണ: മണത്തണ-ഓടന്തോട് റോഡ് നവീകരണവുമായി ബന്ധപ്പെട്ട് പ്ലാൻ, എസ്റ്റിമേറ്റ് എന്നിവ തയാറാക്കുന്നതിനായി സണ്ണി ജോസഫ് എംഎൽഎയുടെ നേതൃത്വത്തിൽ റോഡ്സ് വിഭാഗം ഉദ്യോഗസ്ഥർ, ജനപ്രതിനിധികൾ, പൊതുപ്രവർത്തകർ എന്നിവരുടെ സംഘം സ്ഥലം സന്ദർശിച്ച് പദ്ധതി തയാറാക്കി. നവീകരണ പ്രവൃത്തികൾക്കായി ബജറ്റിൽ 4.5 കോ‌ടി രൂപ വകയിരുത്തിയിട്ടുണ്ട്. വീതി കുറഞ്ഞ ഭാഗങ്ങളിൽ ജനകീയ പങ്കാളിത്തത്തോടെ ആളുകളെ വിളിച്ചു കൂട്ടി സ്ഥലമെടുപ്പ് നടത്തും. ജനപ്രതിനിധികളും ഉദ്യോഗസ്ഥരും നടത്തിയ ചർച്ചയിൽ ഇക്കാര്യത്തിൽ ധാരണയായി. വരുംദിവസം ഗുണഭോക്താക്കളുടെയും സ്ഥലം ലഭ്യമാക്കേണ്ടവരുടെയും ജനപ്രതിനിധികളുടെയും യോഗം മണത്തണയിൽ ചേരും. സണ്ണി ജോസഫ് എംഎൽഎക്ക് പുറമേ കണിച്ചാർ പഞ്ചായത്ത് വൈസ് പ്രസിഡന്‍റ് ഷാന്‍റി തോമസ്, പേരാവൂർ ബ്ലോക്ക് പഞ്ചായത്തംഗം ബൈജു വർഗീസ്, പേരാവൂർ പഞ്ചായത്തംഗം ബേബി സോജ, സി.ജെ. മാത്യു, ജോസ് എടനാട്ടുതാഴെ, വി.വി. തോമസ്, ജോയി ചെറുപറമ്പിൽ, ജോയി തൃക്കകുന്നേൽ, റോഡ് ഡിവിഷൻ എഇ ടി.വി. രേഷ്മ, ടി.ബിജു, കെ. കെവിൻരാജ്, എം. പ്രിൻസി എന്നിവരും സംഘത്തിലുണ്ടായിരുന്നു.

മനുഷ്യച്ചങ്ങലയും പ്രതിഷേധ ജ്വാലയും

ഇരിട്ടി: യുവതലമുറയെ ബോധവത്കരിച്ച് ലഹരിയുടെ വഴികൾ തടയുക എന്ന ലക്ഷ്യത്തോടെ മലയോരത്തെ ഗ്രാമങ്ങൾ കേന്ദ്രീകരിച്ച് പ്രാദേശികമായി കൂട്ടായ്മകൾ രൂപീകരിക്കുന്നു. മുണ്ടയാംപറമ്പ് ഗ്രാമദീപം സ്വാശ്രയ സംഘം 25-ാം വാർഷികം ഗ്രാമോത്സവം പരിപാടിയുടെ ഭാഗമായി ലഹരിക്കെതിരെ അഞ്ചുകിലോമീറ്ററിൽ മനുഷ്യചങ്ങല തീർത്തു ലഹരിക്കെതിരെ പ്രതിഞ്ജയെടുത്തു. സ്ത്രീകളും കുട്ടികളും വയോധികരും ചങ്ങലയിൽ കണ്ണികളായി. അയ്യൻകുന്ന് പഞ്ചായത്ത് സ്റ്റാൻഡിംഗ് കമ്മിറ്റി ചെയർപേഴ്സൺ മിനി വിശ്വനാഥൻ, കെ.ജെ. സജീവൻ, പി.പി. അനിൽകുമാർ, ബാലകൃഷ്‌ണൻ പതിയിൽ, റോസമ്മ രാജൻ, സി.കെ. കാർത്തികേയൻ, വി.വി. സനൽ, പി.കെ. സുകു, ഷീബ,കെ.ആർ. സനീഷ്, സ്വരൂപ് ഇ. മാത്യു, തോമസ് ജോസഫ് എന്നിവർ നേതൃത്വം നൽകി. ചീങ്ങാക്കുണ്ടത്ത് നാട്ടുകാരുടെ നേതൃത്വത്തിൽ രൂപീകരിച്ച ലഹരി വിരുദ്ധ സമിതിയുടെ നേതൃത്വത്തിൽ നടത്തിയ പ്രതിഷേധ ജ്വാല തെളിയിച്ചു. മഴയെ പോലും അവഗണിച്ച് നൂറുകണക്കിനാളുകൾ പങ്കെടുത്തു. പായം പഞ്ചായത്ത് പ്രസിഡന്‍റ് പി. രജനി ഉദ്ഘോടനം ചെയ്തു. ലഹരി വിരുദ്ധ സമിതി ചെയർമാൻ കെ. പ്രദോഷ്കുമാർ അധ്യക്ഷത വഹിച്ചു. ഇരിട്ടി പ്രിൻസിപ്പൽ എസ്ഐ കെ. ഷറഫുദ്ദീൻ, സിവിൽ എക്സൈസ് ഓഫിസർ നെൽസൺ, പഞ്ചായത്ത് വൈസ് പ്രസിഡന്‍റ് എം. വിനോദ്കുമാർ, അംഗങ്ങളായ വി. പ്രമീള, പി. പങ്കജാക്ഷി, ലഹരി വിരുദ്ധസമിതി കൺവീനർ ജോമോൻ സെബാസ്റ്റ്യൻ, ബിപിൻ വിജയൻ, ജയ്‌സൺ പുതുപ്പള്ളിൽ, മുകുന്ദൻ ആലക്കാട്, ഷാജി ഒതയോത്ത്, ഷിജു മനിയേരി, സഞ്ജീവൻ, സുനിൽ തോമസ്, സ്വപ്ന മുളവിനാൽ, എം. സുരേഷ് ബാബു എന്നിവർ പ്രസംഗിച്ചു.

ഓടിക്കൊണ്ടിരുന്ന കാർ കാട്ടുപന്നി ഇടിച്ചുതകർത്തു

തലശേരി: പാനൂർ മേഖലയിൽ വീണ്ടും കാട്ടുപന്നി ആക്രമണം. മേക്കുന്നിൽ ഓടിക്കൊണ്ടിരിക്കുന്ന കാറിൽ കാട്ടുപന്നി കുത്തിയതിനെ തുടർന്ന് കാറിന് കേടുപാടുകൾ സംഭവിച്ചു. ഒലിപ്പിൽ സ്വദേശി മന്നിക്കുന്നത്ത് ഖാലിദ് മമ്മുവിന്‍റെ കാറിന് നേരെയാണ് കാട്ടുപന്നിയാക്രമണം ഉണ്ടായത്. തിങ്കളാഴ്ച വൈകുന്നേരം നാലോടെ മത്തിപ്പറമ്പ് സേട്ടുമുക്കിലായിരുന്നു സംഭവം. കാറിന്‍റെ ബോണറ്റ്, ബംബർ എന്നിവ പൂർണമായും തകർന്നു. ഇടിയുടെ ആഘാതത്തിൽ തൊട്ടടുത്ത ഓവുചാലിലേക്ക് വീണ കാട്ടുപന്നി ചത്തു. ഈ മേഖലയിൽ കാട്ടുപന്നി ശല്യം രൂക്ഷമായതോടെ വാഹനത്തിൽ പോലും യാത്ര ചെയ്യാൻ ആളുകൾ ഭയക്കുന്ന അവസ്ഥയാണ്.

ജബൽപൂരിലെ അക്രമം: പ്രതിഷേധ റാലി നടത്തി

ചെമ്പേരി: മധ്യപ്രദേശിലെ ജബൽപൂരിൽ ക്രൈസ്തവ വൈദികരെയും വിശ്വാസികളെയും ആക്രമിച്ച സംഭവത്തിൽ ചെമ്പേരി ലൂർദ് മാതാ ബസിലിക്ക ഇടവകയിലെ വിശ്വാസി സമൂഹം പ്രതിഷേധിച്ചു. മെഴുകുതിരി ദീപങ്ങളുമായി ബസിലിക്ക അങ്കണത്തിൽ നിന്നാരംഭിച്ച മൗനജാഥ ചെമ്പേരി ടൗണിലെ കപ്പേള ചുറ്റി ബസിലിക്ക കവാടത്തിൽ സമാപിച്ചു. ബസിലിക്ക റെക്ടർ റവ. ഡോ. ജോർജ് കാഞ്ഞിരക്കാട്ട്, ഇടവക കോ-ഓർഡിനേറ്റർ സുനിൽ ജോസഫ് നായിപ്പുരയിടത്തിൽ എന്നിവർ പ്രസംഗിച്ചു. ബസിലിക്ക അസി. റെക്ടർ ഫാ. സിറിൽ ചെറുകരക്കുന്നേൽ, പാരിഷ് ട്രസ്റ്റി ജോൺസൺ പുലിയുറുമ്പിൽ, പാരിഷ് സെക്രട്ടറി ജോസ് കാളിയാനിയിൽ, മാതൃവേദി ചെമ്പേരി യൂണിറ്റ് പ്രസിഡന്‍റ് ഷീബ തെക്കേടത്ത്, റോസമ്മ പുളിയ്ക്കൽ, ജോസ് ചെമ്പേരി എന്നിവർ നേതൃത്വം നൽകി.

നടപ്പാത കൈയേറ്റം വ്യാപകം

കരുവഞ്ചാൽ: മലയോരമേഖലയിൽ വ്യാപാര സ്ഥാപനങ്ങൾ നടപ്പാത കൈയേറുന്നതായി പരാതി. ചപ്പാരപ്പടവ്, കരുവഞ്ചാൽ, ആലക്കോട്, നടുവിൽ, തേർത്തല്ലി ടൗണുകളിലെ ചില വ്യാപാരികൾ കടകൾക്കു മുന്നിലായുള്ള നടപ്പാതകൾ കൈയടക്കുന്നതു കാരണം കാൽനടയാത്രികർ റോഡിലൂടെ നടക്കേണ്ടി വരുന്നതായാണ് പരാതി. കടകളോട് ചേർന്നുള്ള നടപ്പാതയിൽ വില്പനയ്ക്കുള്ള സാധനങ്ങൾ നിരത്തി വെക്കുന്നത് പതിവാണ്. നടപ്പാത കൈയേറ്റത്തിന് നടപടി ഉണ്ടാകണമെന്ന് ആവശ്യപ്പെട്ട് പഞ്ചായത്തിലും പോലീസിലും പരാതി നൽകിയിട്ടും നടപടി ഉണ്ടാകുന്നില്ലെന്നും ആക്ഷേപമുണ്ട്. ഇതു സംബന്ധിച്ച് പൗരാവകാശ സമിതി കൺവീനർ കെ.സി. ലക്ഷ്മണൻ ആലക്കോട് പഞ്ചായത്ത് സെക്രട്ടറിക്ക് പരാതി നൽകി.

കാട്ടുപന്നി ശല്യം രൂക്ഷം: ജീവിതം വഴിമുട്ടി കർഷകർ

മണക്കടവ്: ഉദയഗിരി പഞ്ചായത്തിലെ മണക്കടവ്, മധുവനം പ്രദേശത്ത് കാട്ടുപന്നി അടക്കമുള്ള വന്യമൃഗശല്യം രൂക്ഷമായത് കർഷകരെ ദുരിതത്തിലാഴ്ത്തുന്നു. പ്രദേശത്തെ നിരവധി കർഷകരുടെ വാഴ, കപ്പ, ചേന, ചേമ്പ്, തെങ്ങ്, കവുങ്ങ് തുടങ്ങിയ കാർഷികവിളകൾ കാട്ടുപന്നിക്കുട്ടം വ്യാപകമായി നശിപ്പിച്ചു. മധുവനത്തെ കുന്നേൽ അജിത്തിന്‍റെ വാഴ, കവുങ്ങ്, കപ്പ എന്നിവ വ്യാപകമായി നശിപ്പിച്ചു. കാർഷിക പ്രതിസന്ധി രൂക്ഷമായ സാഹചര്യം നിലനില്ക്കുമ്പോഴാണ് കർഷകർക്ക് ഭീഷണിയായി കാട്ടുമൃഗങ്ങൾ നാട്ടിലിറങ്ങി നാശനഷ്ടങ്ങൾ വിതക്കുന്നത്. ഇതോടെ ജീവിതം വഴി മുട്ടിയ അവസ്ഥയിലാണ് കർഷകർ. വന്യ മൃഗശല്യത്തിൽ നിന്ന് കർഷകരുടെ വിളകൾ സംരക്ഷിക്കാൻ പഞ്ചായത്തും, ബന്ധപ്പെട്ട വകുപ്പുകളും അടിയന്തരമായും ഇടപെടണമെന്ന് ചീക്കാട് വികസന സമിതി ആവശ്യപ്പെട്ടു.

എളമ്പേരംപാറയിൽ കാർ അപകടത്തിൽപ്പെട്ടു

നാടുകാണി: നാടുകാണി എളമ്പേരംപാറയിൽ കാർ അപകടത്തിൽപ്പെട്ടു കീഴ്മേൽ മറിഞ്ഞു. കാർ യാത്രക്കാർക്ക് പരിക്കേറ്റെങ്കിലും പരിക്ക് സാരമുള്ളതല്ല. മലപ്പുറത്തുനിന്നു ചപ്പാരപ്പടവിൽ പോയി മടങ്ങുകയായിരുന്ന സംഘം സഞ്ചരിച്ച കാറാണ് ഞായറാഴ്ച പുലർച്ചെ അപകടത്തിൽപ്പെട്ടത്. എളമ്പേരം പാറയിൽ ബൈക്കിന് സൈഡ് കൊടുക്കുന്നതിനിടെ നിയന്ത്രണം വിട്ട് സമീപത്തെ കടയിലേക്ക് ഇടിച്ചു കയറി മറിയുകയായിരുന്നുവെന്ന് ദൃക്സാക്ഷികൾ പറഞ്ഞു. അടുത്തുള്ള കടയിലേക്ക് ഇടിച്ചുകയറിയാണ് അപകടത്തിൽപ്പെട്ടതെന്ന് പ്രദേശവാസികൾ പറയുന്നു. കാർ തിങ്കളാഴ്ച രാവിലെ ഇവിടെ നിന്ന് മാറ്റുകയും ചെയ്തു.

ചമതച്ചാലിൽ റബർ തോട്ടത്തിൽ പുലിയെ കണ്ടെന്ന് ടാപ്പിംഗ് തൊഴിലാളി

ചമതച്ചാൽ: ചമതച്ചാലിലെ റബർ തോട്ടത്തിൽ പുലിയെ കണ്ടതായി ടാപ്പിംഗ് തൊഴിലാളി. സെന്‍റ് സ്റ്റീഫൻസ് പള്ളിക്കു സമീപത്തെ റബർ തോട്ടത്തിൽ പുലിയെ കണ്ടെന്നാണ് ടാപ്പിംഗ് തൊഴിലാളി അറാക്കൽ ഫ്രാൻസിസ് പറഞ്ഞത്. ചമതച്ചാൽ റഗുലേറ്റർ കം ബ്രിഡ്ജിനോട് ചേർന്ന മഴുപ്പേൽ മത്തായിയുടെ തോട്ടത്തിൽ ഇന്നലെ പുലർച്ചെ അഞ്ചോടെ ടാപ്പിംഗിനിടെയാണ് പുലിയെ പോലെയുള്ള ജീവിയെ കണ്ടത്. തോട്ടത്തിന്‍റെ മുകൾ ഭാഗത്തെ മരങ്ങൾ ടാപ്പിംഗ് നടത്തി താഴെത്തട്ടിൽ എത്തി ഹെഡ് ലൈറ്റ് ചുറ്റും തെളിച്ചപ്പോഴാണ് പുഴയോട് ചേർന്ന ഭാഗത്തെ ജനവാസ മേഖലയിൽ വന്യജീവിയെ കണ്ടത്. വന്യജീവിയുടെ കണ്ണിൽ ഹെഡ് ലൈറ്റ് കുറേ സമയം ഫോക്കസ് ചെയ്ത് അടിച്ച ശേഷം ജീവനും കൊണ്ട് ഓടി രക്ഷപ്പെടുകയും തോട്ടമുടമയോടും മറ്റു തൊഴിലാളികളോടും പറയുകയായിരുന്നു. പുഴയോരത്ത് മണലിൽ കാൽപ്പാടുകൾ കണ്ടെത്തിയിട്ടുണ്ടെങ്കിലും വ്യക്തമല്ല. വിവരമറിഞ്ഞ് വാർഡ് മെംബർ സിജി ഓഴാങ്കൽ, മുണ്ടാന്നൂരിലെ ഫോട്ടോഗ്രാഫർ റോയി സ്ഥലത്തെത്തി കാൽപ്പാടിന്‍റെ ഫോട്ടോയെടുക്കുകയും ചെയ്ത ശേഷം വനം വകുപ്പിനെ വിവരമറിയിച്ചു. രാവിലെ വനം വകുപ്പ് സ്ഥലത്ത് എത്തി പരിശോധിച്ചെങ്കിലും കാൽപ്പാട് പുലിയുടെയാണെന്ന് സ്ഥിരീകരിച്ചിട്ടില്ല. പരിസരത്തെ വീടുകളിൽ സ്ഥാപിച്ച നിരീക്ഷണ കാമറയിൽ വന്യജീവിയുടെ ദൃശ്യം പതിഞ്ഞിട്ടുണ്ടോ എന്ന് പരിശോധിച്ചു വരികയാണ്. കഴിഞ്ഞ ബുധനാഴ്ച രാത്രിയും വ്യാഴാഴ്ച പുലർച്ചെയും പള്ളിയുടെ പിൻവശത്തെ റബർതോട്ടത്തിൽ പുലിയെന്നു തോന്നിപ്പിക്കുന്ന വന്യജീവിയുടെ നിഴൽ കണ്ടതായും അഭ്യൂഹമുണ്ട്. മുണ്ടാന്നൂർ, തിരൂർ, ചമതച്ചാൽ ഭാഗങ്ങളിൽ കഴിഞ്ഞ രണ്ടാഴ്ചയായി പുലിയെന്ന് സംശയിക്കുന്ന വന്യജീവിയ കണ്ടതായി നാട്ടുകാർ പറയുന്നു. മുണ്ടാന്നൂർ എസ്റ്റേറ്റ് സമീപത്തായി ടാപ്പിംഗ് തൊഴിലാളിയും ഇരുചക്രവാഹന യാത്രക്കാരനും പുലിയെ കണ്ടിരുന്നുവെന്നും പറയപ്പെടുന്നു. പുലിയെ കണ്ടതായി പറയപ്പെടുന്ന സാഹചര്യത്തിൽ പ്രദേശത്ത് ജാഗ്രതാ നിർദേശം നൽകിയിട്ടുണ്ട്. പ്രദേശത്ത് പുലി ഭീതി ഉയർന്ന സാഹചര്യത്തിൽ വനംവകുപ്പ് നിരീക്ഷണ കാമറ സ്ഥാപിക്കണമെന്ന് വാർഡ് മെംബർ ആവശ്യപ്പെട്ടു. വന്യജീവി പുലിയാണെന്ന് സ്ഥിരീകരിച്ചാൽ കൂട് സ്ഥാപിക്കുന്നതുൾപ്പടെയുള്ള നടപടികൾ സ്വീകരിക്കുമെന്ന് വനംവകുപ്പ് അറിയിച്ചു.

കാറ്റെടുത്തത് ജീവിതമാർഗം: നശിച്ചത് 12,500 വാഴകൾ

നടുവിൽ: കഴിഞ്ഞ ദിവസങ്ങളിലുണ്ടായ വേനൽമഴയോടൊപ്പമുണ്ടായ കാറ്റെടുത്തത് നിരവധി പേരുടെ ജീവിതമാർഗം. വിഷു വിപണി മുന്നിൽ കണ്ടുള്ള കർഷകരുടെ വാഴക്കൃഷിയാണ് കാറ്റിൽ നാമാവശേഷമായത്. നടുവിൽ പഞ്ചായത്തിൽ മാത്രം 12,500 ലേറെ വാഴകളാണ് നിലംപൊത്തിയത്. വ്യാഴാഴ്ചയും ശനിയാഴ്ചയുമായി വീശിയടിച്ച കാറ്റാണ് കർഷകരെ കണ്ണീർക്കയത്തിലാക്കിയത്. പാത്തൻപാറയിലെ രാജൻ കല്ലറയ്ക്കലിനു മാത്രം 3500 വാഴകൾ നഷ്ടപ്പെട്ടു. കരാമരംതട്ട്, നൂലിട്ടാമല, പൊതിവച്ചതട്ട്, നരയൻകല്ല്, മൈലംപെട്ടി, തുരുമ്പി, കുട്ടിപ്പുല്ല് എന്നിവിടങ്ങളിലാണ് കാറ്റ് കനത്ത നാശം വിതച്ചത്. ദേവസ്യ കുമ്പിടിയാമാക്കലിന്‍റെ രണ്ടായിരം വാഴകഴും ജോസഫ് കുന്പിയാമാക്കലിന്‍റെ 1500 വാഴകളും ഷൈജു മുതുപ്ലാക്കൽ, ജോയി മഠത്തിൽ എന്നിവരുടെ ആയിരം വാഴകളും കുഞ്ഞുമോൻ എരമംഗലത്തിന്‍റെ വിളവെടുക്കാറായ ആയിരത്തിലധികം വാഴകളും ഒടിഞ്ഞു നശിച്ചു. റോയി മൂലേക്കാട്ടിൽ, രാഹുൽ,ജോർജ്, കെ.എസ്. ബെന്നി, നിമ്മി ഷാജി, ദേവസ്യ, വിജയൻ, വിൻസന്‍റ്, വിനീത്, മോളി രാജൻ എന്നിവരുടെ തോട്ടങ്ങളിലും നൂറുകണക്കിന് വാഴകൾ നശിച്ചു. ജോസഫ് പട്ടാംകുളം, സാബു ആനപ്പാറ എന്നിവരുടെ കായ്ച്ചു നിൽക്കുന്ന നിരവധി ജാതി മരങ്ങളും നിലംപൊത്തി. ഈ മേഖലയിൽ കഴിഞ്ഞ മാസം 25നും കാറ്റ് വൻ നാശം വിതച്ചിരുന്നു. കാർഷിക രോഗങ്ങൾ മൂലം തെങ്ങും കവുങ്ങും കുരുമുളകും നശിച്ച മണ്ണിലാണ് കർഷകർ വാഴ കൃഷി ചെയ്ത് പിടിച്ചു നിൽക്കാൻ ശ്രമിക്കുന്നതിനിടെയാണ് കാറ്റ് പ്രതീക്ഷകൾ തച്ചുടച്ചത്. വന്യജീവി ശല്യവും വർധിച്ചു കൊണ്ടിരിക്കുന്ന സാഹചര്യത്തിൽ കുടിയിറക്കം നടക്കുന്ന പ്രദേശം കൂടിയാണ് പാത്തൻപാറ. വിള ഇൻഷ്വർ എടുത്തവർക്ക് മാത്രമാണ് പേരിനെങ്കിലും ആശ്വാസമായി ധനസഹായം ലഭിക്കുന്നത്. ഒരു വാഴയ്ക്ക് 300 രൂപയാണ് ഇൻഷ്വർ തുകയായിലി കിട്ടുക. ചെറിയ രീതിയിൽ വാഴക്കൃഷിയുള്ളവർ വിള ഇൻഷ്വർ ചെയ്യുന്നത് കുറവാണ്. പ്രൃകൃതി ക്ഷോഭത്തിന് സർക്കാർ നഷ്ടപരിഹാരമായി നൽകുന്നത് നൂറുരൂപ മാത്രമാണ്. കഴിഞ്ഞ വർഷത്തെ തുകപോലും ഇനിയും കിട്ടിയിട്ടില്ലെന്നാണ് കർഷകർ പറയുന്നത്. ആലക്കോട് പഞ്ചായത്തിലും ശനിയാഴ്ച കാറ്റ് കനത്ത നാശനഷ്ടമുണ്ടാക്കി. നാശനഷ്ടം സംഭവിച്ച കൃഷിയിടങ്ങൾ കൃഷി ഉദ്യോഗസ്ഥർ സന്ദർശിച്ച് നഷ്ടം വിലയിരുത്തി.

75 ശതമാനം വരെ വിലക്കുറവുമായി നിക്‌ഷാനില്‍ വിഷു "പൊന്‍കണി ഓഫര്‍'

കണ്ണൂർ: വിഷു-ഈസ്റ്റര്‍ സീസണില്‍ ഏതൊരു ഉപഭോക്താവിനും ഏറ്റവും അനായാസമായി ഗൃഹോപകരണങ്ങളും ഗാഡ്ജറ്റുകളും 75 ശതമാനം വരെ വിലക്കുറവില്‍ സ്വന്തമാക്കാനുള്ള സുവര്‍ണാവസരവുമായി നിക്‌ഷാനില്‍ വിഷു "പൊന്‍കണി ഓഫര്‍' സെയിലിനു തുടക്കമായി. സെയിലിനോടനുബന്ധിച്ച് വൈവിധ്യമാര്‍ന്ന ഗൃഹോപകരണങ്ങള്‍ക്ക് അവിശ്വസനീയമായ വിലക്കുറവാണ് നിക്‌ഷാൻ അവതരിപ്പിക്കുന്നത്. ബ്രാന്‍ഡഡ് എയര്‍കണ്ടീഷണറുകള്‍ക്കും വാഷിംഗ് മെഷീനുകള്‍ക്കും 55 ശതമാനം വരെ വിലക്കുറവാണ് നിക്‌ഷാനില്‍. സ്മാര്‍ട്ട് ഫോണ്‍ വാങ്ങുമ്പോള്‍ സ്ക്രാച്ച് കാര്‍ഡിലൂടെ ഉറപ്പായും സമ്മാനങ്ങള്‍ നേടാന്‍ അവസരമുണ്ട്. കമ്പനികള്‍ നല്‍കുന്ന ഓഫറുകള്‍ക്ക് പുറമെ ഒരു സ്‌കോഡ കുഷാക്ക്, രണ്ട് ബിഎംഡബ്ള്യു ജി 310 ആർആർ സ്പോർട്സ് ബൈക്ക്, ഏഥര്‍ റിസ്റ്റാ സ്‌കൂട്ടറുകള്‍ തുടങ്ങിയ കിടിലന്‍ സമ്മാനങ്ങളും നറുക്കെടുപ്പിലൂടെ നേടാന്‍ സാധിക്കും. കൂടാതെ പഴയ ഗൃഹോപകരണങ്ങള്‍ അപ്‌ഗ്രേഡ് ചെയ്ത് നിലവിലുള്ള എല്ലാ ഓഫറുകളോടും കൂടി പുതുപുത്തന്‍ ഉത്പന്നങ്ങള്‍ വിഷു-ഈസ്റ്റര്‍ സ്‌പെഷൽ എക്‌സ്‌ചേഞ്ച് ഓഫറിലൂടെ സ്വന്തമാക്കാം. ഒപ്പം തന്നെ ഗൃഹോപകരണങ്ങള്‍ സ്വന്തമാക്കാന്‍ ഏറ്റവും ആകര്‍ഷകമായ ഈസി ഇഎംഐ സൗകര്യവും ലഭ്യമാണ്. ഏതൊരു ഉപഭോക്താവിനും സൗകര്യപ്രദമായ പലിശരഹിത വായ്പാ സൗകര്യത്തോടെ ഗൃഹോപകരണങ്ങള്‍ സ്വന്തമാക്കാം. കൂടാതെ 25,000 രൂപ വരെ മികച്ച കാഷ്ബാക്ക് ഓഫറും എക്‌സ്ട്രാ വാറന്‍റിയും നിക്‌ഷാന്‍ നിങ്ങള്‍ക്കായി ഒരുക്കിയിരിക്കുന്നു. കേരളത്തിലെവിടെയും സൗജന്യ ഹോം ഡെലിവറി സൗകര്യവും വൈവിധ്യമാര്‍ന്ന ഉത്പന്നങ്ങള്‍ക്കായുള്ള വണ്‍സ്റ്റോപ്പ് ഷോപ്പ് സൊല്യൂഷനായ നിക്‌ഷാന്‍ ഒരുക്കിയിരിക്കുന്നു. ഓഫറുകളെക്കുറിച്ച് കൂടുതലറിയാൻ 7902818181 എന്ന ഫോൺ നന്പറിൽ ബന്ധപ്പെടുക.

വിമാനത്താവള റൺവേ വികസനം; നിരവധി കുടുംബങ്ങൾ ദുരിതത്തിൽ

സ്വന്തം ലേഖകൻ മട്ടന്നൂർ: കണ്ണൂർ വിമാനത്താവള റൺവേ വികസനത്തിന് സ്ഥലം ഏറ്റെടുക്കുന്നത് വൈകുന്നത് കുടുംബങ്ങളെ ദുരിതത്തിലാക്കുന്നു. വീടും സ്ഥലവും ഏറ്റെടുക്കുമെന്ന പ്രഖ്യാപനം വന്നിട്ട് എട്ടുവർഷം കഴിഞ്ഞിട്ടും സ്ഥലം ഏറ്റെടുക്കൽ നടപടി ആരംഭിച്ചില്ല. കുടിയൊഴിപ്പിക്കപ്പെട്ട കുടുംബങ്ങൾ നഷ്ടപരിഹാരത്തിനും പുനരധിവാസത്തിനുമായി കാത്തിരിപ്പ് തുടരുകയാണ്. എട്ടു വർഷം മുമ്പാണ് കീഴല്ലൂർ പഞ്ചായത്തിലെ കാനാട്, കോളിപ്പാലം ഭാഗത്തുള്ള വീട്ടുകാരെ മാറ്റി പാർപ്പിച്ചത്. വിമാനത്താവള പ്രദേശത്തുനിന്ന് മഴയിൽ വൻതോതിൽ കല്ലും മണ്ണും കുത്തിയൊഴുകിയതിനെ തുടർന്നായിരുന്നു ഇത്. ഇവരുടെ വീടും സ്ഥലവും ഉടൻ വിമാനത്താവളത്തിന് ഏറ്റെടുക്കുമെന്നും അതുവരെ വീട്ടുവാടക ഉൾപ്പടെ നൽകുമെന്നായിരുന്നു വാഗ്ദാനം. എന്നാൽ, ഇവയൊന്നും പാലിക്കപ്പെട്ടില്ല. വർഷങ്ങൾ കഴിഞ്ഞിട്ടും പുനരധിവാസവും നഷ്ടപരിഹാരവും തേടി അലയുകയാണ് ഇവർ. നിരവധി വീടുകൾ കാടുകയറി നശിച്ചുകിടക്കുകയാണ്. ഭൂവുടമകളുടെ നേതൃത്വത്തിൽ നിരവധി പ്രക്ഷോഭങ്ങൾ നടത്തി. പ്രദേശത്തെ വനിതാ കൂട്ടായ്മയുടെ നേതൃത്വത്തിലാണ് ഇപ്പോൾ സമരപരിപാടികൾ നടത്തി വരുന്നത്. റൺവേ വികസനത്തിനായി 245 ഏക്കർ ഭൂമിയാണ് കാനാട്, കോളിപ്പാലം ഭാഗത്തായി ഏറ്റെടുക്കാനുള്ളത്. ഇത് ഏറ്റെടുത്ത് നഷ്ടപരിഹാരം നൽകുന്നതിനൊപ്പം മാത്രമാണ് കുടിയൊഴിപ്പിക്കപ്പെട്ട കുടുംബങ്ങളുടെ തുകയും ലഭ്യമാക്കുകയെന്നാണ് അറിയിച്ചിട്ടുള്ളത്. 942.93 കോടി രൂപയാണ് നഷ്ടപരിഹാരം നൽകുന്നതിന് വേണ്ടിവരിക. 2017 മേയ് മാസത്തിലാണ് വേനൽമഴയിൽ വിമാനത്താവള പദ്ധതി പ്രദേശത്തുനിന്ന് ചെളിയും വെള്ളവും കുത്തിയൊഴുകി സമീപത്തെ നിരവധി വീടുകൾക്ക് കേടുപാടുണ്ടാകുകയും കിണറുകൾ മൂടിപ്പോകുകയും ചെയ്തത്. കാനാട്, കോളിപ്പാലം, കടാങ്കോട് ഭാഗങ്ങളിൽ ഉരുൾപൊട്ടലിന് സമാനമായ നാശനഷ്ടമാണ് സംഭവിച്ചത്. അന്നു കളക്ടറുടെ നേതൃത്വത്തിൽ ചേർന്ന ദുരന്തവിവാരണ സമിതി യോഗത്തിൽ ഇവരെ വാടക വീടുകളിലേക്ക് മാറ്റാനും ആറു മാസത്തിനകം വീടും സ്ഥലവും ഏറ്റെടുക്കാനും തീരുമാനിച്ചിരുന്നു. വിമാനത്താവള കമ്പനിയായ കിയാൽ വാടക നൽകണമെന്നും ധാരണയായിരുന്നു. എന്നാൽ, എട്ടു മാസത്തോളം മാത്രമാണ് വാടക ലഭിച്ചത്. പിന്നീട് അധികൃതരെ സമീപിച്ചെങ്കിലു കാര്യമുണ്ടായില്ല. താമസിക്കാനാകാതെ കുടിയൊഴിഞ്ഞ കുടുംബങ്ങൾ ഇപ്പോൾ വാടക വീടുകളിലും മറ്റുമായി താമസിച്ചു വരികയാണ്. ജനങ്ങളിൽ പ്രതിഷേധം ഉയർന്നതോടെ കഴിഞ്ഞ മാസം പ്രതിപക്ഷ നേതാവ് വി.ഡി. സതീശൻ പ്രദേശം സന്ദർശിക്കുകയും സ്ഥല ഉടമകളിൽ നിന്ന് പരാതി കേൾക്കുകയും ചെയ്തിരുന്നു. പ്രദേശത്തുക്കാർ അനുവഭിക്കുന്ന പ്രയാസങ്ങൾ പ്രതിപക്ഷ നേതാവ് നിയമസഭയിൽ ഉന്നയിക്കുകയും ചെയ്തിരുന്നു.

എംഡിഎംഎയുമായി പിടിയിലായ യുവതി എക്സൈസിനെതിരേ "ലൈവിൽ'

തളിപ്പറമ്പ്: കഴിഞ്ഞ ശനിയാഴ്ച പറശിനി, കോൾമൊട്ട ഭാഗങ്ങളിൽ എക്സെസ് പരിശോധനയിൽ ലോഡ്ജ് മുറിയിൽനിന്ന് രണ്ടു യുവതികളെ അടക്കം നാല് പേരെ തളിപ്പറമ്പ് എക്സൈസ് പിടികൂടിയ സംഭവത്തിൽ എക്സെസിനെതിരേ സമൂഹമാധ്യമത്തിൽ ലൈവിൽ വന്ന് ആരോപണമുന്നയിച്ച് കുറ്റാരോപിത റഫീന. തന്‍റെ പേരിൽ ഒരു കേസുമില്ലെന്നും തന്നെ പോലീസ് പിടിച്ചിട്ടില്ലെന്നും റഫീന പറയുന്നു. തന്‍റെ ചിത്രം മാധ്യമങ്ങളിൽ എത്തിയത് ഒറ്റിയതാണെന്നും റഫീന വീഡിയോയിൽ പറയുന്നു. പരിശോധനാ സമയത്ത് ലോഡ്ജിലെ സിസിടിവി ഓഫാക്കിയാണ് എക്സൈസ് പരിശോധന നടത്തിയത്. ലോഡ്ജ് മുറിയിൽ എംഡിഎംഎ കൊണ്ടുവച്ചത് എക്സൈസ് ഉദ്യോഗസ്ഥരാണെന്നും കൈക്കൂലി വാങ്ങിയാണ് ഉദ്യോഗസ്ഥർ തന്നെ പിടിച്ചതെന്നും റഫീന ആരോപിക്കുന്നു. കേസെടുത്തിട്ടുണ്ടെങ്കിൽ തന്നെ റിമാൻഡ് ചെയ്യാതിരുന്നത് എന്തുകൊണ്ടെന്നും റഫീന ചോദി ക്കുന്നു. കേസെടുക്കാതെ തന്നെ മാധ്യമങ്ങളിലൂടെ നാറ്റിക്കാനാണെന്നും സത്യം അറിയുന്നതുവരെ ഇതിനു പിന്നാലെ ഉണ്ടാകുമെന്നും വീഡിയോയിൽ റഫീന പറയുന്നു. അതേസമയം റഫീനയുടെ വാദം എക്സൈസ് പൂർണമായും തള്ളി. റഫീന ലഹരി ഉപയോഗിച്ചിരുന്നുവെന്നും കേസെടുത്തിട്ടുണ്ടെന്നും എക്സൈസ് വ്യക്തമാക്കി. കുറഞ്ഞ അളവു മാത്രമായതു കൊണ്ടാണ് റിമാൻഡ് ചെയ്യാതെ ജാമ്യത്തിൽ വിട്ടതെന്നും എക്സൈസ് പറഞ്ഞു. ഇരിക്കൂർ സ്വദേശിനിയായ റഫീനയെ കൂടാതെ മട്ടന്നൂർ സ്വദേശി മുഹമ്മദ് ഷംനാദ്, വളപട്ടണം സ്വദേശി മുഹമ്മദ് ജംഷിൽ, കണ്ണൂർ സ്വദേശിനി ജസീന എന്നിവരാണ് കഴിഞ്ഞ ദിവസം എക്സൈസിന്‍റെ പിടിയിലായത്. 490 മില്ലി എംഡിഎംഎയ്ക്ക് പുറമെ എംഡിഎംഎ ഉപയോഗിക്കാനുള്ള ടെസ്റ്റ് ട്യൂബുകളും ഇവരിൽനിന്ന് പിടികൂടിയിരുന്നു.

അവഗണനകൾക്കെതിരേ പ്രതികരണമുണ്ടാകും: കത്തോലിക്ക കോൺഗ്രസ് യൂത്ത് കൗൺസിൽ

ചെന്പേരി: കത്തോലിക്ക കോൺഗ്രസ് യൂത്ത് കൗൺസിൽ തലശേരി അതിരൂപത നേതൃയോഗം ചെമ്പേരി അൽഫോൻസാ ഓഡിറ്റോറിയത്തിൽ നടന്നു. നിലവിലെ രാഷ്‌ട്രീയ സാഹചര്യങ്ങളെക്കുറിച്ച് ചർച്ച ചെയ്ത യോഗത്തിൽ രാഷ്‌ട്രീയത്തിലും പൊതുസമൂഹത്തിലും ക്രൈസ്തവർ അവഗണിക്കപ്പെടുന്ന സാഹചര്യമുണ്ടായാൽ അതിനെതിരെ ശക്തമായ നിലപാട് ഉണ്ടാകണമെന്ന് തീരുമാനിച്ചു. ക്രൈസ്തവ സമൂഹത്തെ അവഗണിച്ച് മുന്നോട്ടു പോകാൻ ഒരു രാഷ്‌ട്രീയ പാർട്ടിക്കും കഴിയാത്തവിധം രാഷ്‌ട്രീയ വളർച്ച നേടാൻ സമുദായ നേതൃത്വം വിവിധ ശാക്തീകരണപരിപാടികളിലൂടെ ലക്ഷ്യം വയ്ക്കണമെന്ന് യോഗം ഉദ്ഘാടനം ചെയ്ത കത്തോലിക്ക കോൺഗ്രസ് ഗ്ലോബൽ ഡയറക്‌ടർ റവ. ഡോ. ഫിലിപ്പ് കവിയിൽ പറഞ്ഞു. ഇനിമേൽ ജനപ്രതിനിധികളുടെയോ രാഷ്‌ട്രീയ നേതൃത്വത്തിന്‍റെയോ ഭാഗത്തുനിന്നും ക്രൈസ്തവ സമുദായത്തെ അവഗണിക്കുന്ന നീക്കങ്ങളോ സമുദായ നേതാക്കളെ അപഹസിക്കുന്ന നിലപാടുകളോ ഉണ്ടായാൽ അതിനെതിരെ അതിശക്തമായി പ്രതികരിക്കാൻ കത്തോലിക്കാ കോൺഗ്രസ് യൂത്ത് കൗൺസിൽ ഉണ്ടാകുമെന്ന് യോഗം മുന്നറിയിപ്പ് നൽകി. ഈ മാസം 27ന് പാലക്കാട് ടൗണിൽ നടത്തുന്ന കത്തോലിക്കാ കോൺഗ്രസ് ജന്മദിന സമ്മേളനത്തിനും മഹാറാലിക്കും മുന്നോടിയായി യൂത്ത് കൗൺസിലിന്‍റെ നേതൃത്വത്തിൽ അതിരൂപതയിലെ ഇരിട്ടി, ആലക്കോട്, കാസർഗോഡ് റീജിയനുകൾ കേന്ദ്രീകരിച്ച് കണ്ണൂർ, കാസർഗോഡ് ജില്ലകളിൽ ക്രൈസ്തവ യുവജന മഹാസംഗമങ്ങൾ നടത്താൻ തീരുമാനിച്ചു. കത്തോലിക്കാ കോൺഗ്രസ് ഗ്ലോബൽ യൂത്ത് കോ-ഓർഡിനേറ്റർ സിജോ കണ്ണേഴത്ത്, അതിരൂപത ട്രഷറർ സുരേഷ് കാഞ്ഞിരത്തിങ്കൽ, അതിരൂപത യൂത്ത് കോ-ഓർഡിനേറ്റർമാരായ പാട്രിക്ക് കുരുവിള, എബിൻ കുമ്പുക്കൽ, ഷിന്‍റോ കൈപ്പനാനിക്കൽ, ബിജു ഈട്ടിക്കൽ, കിരൺ ഇലവുങ്കൽചാലിൽ, ജിസ് പുളിങ്ങോം, ബിനു കാഞ്ഞിരത്തിങ്കൽ, ജസ്റ്റിൻ കല്ലുവരപ്പറമ്പിൽ, റിജേഷ് തോമസ് എന്നിവർ പ്രസംഗിച്ചു.

യുഡിഎഫ് സായാഹ്ന ധർണ നടത്തി

പയ്യാവൂർ: തദ്ദേശസ്വയംഭരണ സ്ഥാപനങ്ങൾക്കുള്ള ഫണ്ട് വെട്ടിക്കുറച്ച നടപടി തിരുത്തണമെന്നാവശ്യപ്പെട്ട് യുഡിഎഫ് പയ്യാവൂർ മണ്ഡലം കമ്മിറ്റിയുടെ ആഭിമുഖ്യത്തിൽ പയ്യാവൂർ പഞ്ചായത്ത് ഓഫീസിനു മുന്നിൽ സായാഹ്ന ധർണ നടത്തി. കണ്ണൂർ ഡിസിസി ജനറൽ സെക്രട്ടറി ബേബി തോലാനി ഉദ്ഘാടനം ചെയ്തു. യുഡിഎഫ് മണ്ഡലം ചെയർമാൻ ഇ.കെ. കുര്യൻ അധ്യക്ഷത വഹിച്ചു. ബ്ലോക്ക് കോൺഗ്രസ് വൈസ് പ്രസിഡന്‍റുമാരായ സി.പി. ജോസ്, ജോയ് പുന്നശേരിമലയിൽ, വി.പി.അബ്ദുൾ ഖാദർ, ഒ.കെ.ശ്രീധരൻ, ഫിലിപ്പ് പാത്തിയ്ക്കൽ, കെ.ടി.മൈക്കിൾ, ബേബി മുല്ലക്കരി, ടി.പി.അഷ്റഫ്, ജയിംസ് തുരുത്തേൽ, പി.ആർ. രാഘവൻ, കെ.വി. ഫ്രാൻസിസ്, കുഞ്ഞുമോൻ കുഴിവേലി, ജേക്കബ് പനന്താനം, സവിത ജയപ്രകാശ്, അമൽ തോമസ്, കുര്യാക്കോസ് തെരുവത്ത്, തോമസ് കൊടിയംകുന്നേൽ എന്നിവർ പ്രസംഗിച്ചു.

നീന്തൽ പരിശീലന ക്യാമ്പിന് തുടക്കമായി

നെല്ലിക്കുറ്റി: കേരളോദയ വായനശാലയുടെ ആഭിമുഖ്യത്തിൽ സ്കൂൾ വിദ്യാർഥികൾക്കായി സംഘടിപ്പിച്ച അവധിക്കാല നീന്തൽ പരിശീലന ക്യാമ്പിന് തുടക്കമായി. നെല്ലിക്കുറ്റി സെന്‍റ് അഗസ്റ്റിൻസ് ഹൈസ്കൂളിന് സമീപമുള്ള ഏരുവേശി പഞ്ചായത്തിന്‍റെ നീന്തൽക്കുളത്തിൽ പഞ്ചായത്ത് പ്രസിഡന്‍റ് മിനി ഷൈബി ഉദ്ഘാടനം ചെയ്തു. ടോമി ചാമക്കാല, ജൂബി സി. ജസ്റ്റിൻ, ഷൈജു ഇലവുങ്കൽ, സാവിയോ ഇടയാടിയിൽ എന്നിവർ പ്രസംഗിച്ചു. ദിവസവും വൈകുന്നേരം നാലു മുതൽ 5.30വരെ 10 ദിവസത്തെ ശാസ്ത്രീയ പരിശീലനമാണ് നൽകുന്നത്. ആൺകുട്ടികൾക്കും പെൺകുട്ടികൾക്കും പങ്കെടുക്കാം. ഫോൺ: 9447048592, 9496832214.

കോഴിയും കൂടും വിതരണോദ്ഘാടനം

കാർത്തികപുരം: ഉദയഗിരി പഞ്ചായത്ത് കുടുംബശ്രീ, സിഡിഎസ് നേതൃത്വത്തിൽ എസ്ടി മേഖലയിൽ വിധവകളായ സ്ത്രീകൾക്ക് കോഴിയും കൂടും വിതരണം ചെയ്തു. പതിനെട്ടായിരം രൂപ സബ്സിഡി നിരക്കിൽ 24 കോഴികളെ കൂട് അടക്കമാണ് നൽകിയത്. വിതരണോദ്ഘാടനം പഞ്ചായത്ത് പ്രസിഡന്‍റ് കെ.എസ്. ചന്ദ്രശേഖരൻ നിർവഹിച്ചു.സിഡിഎസ് ചെയർപേഴ്സൺ സൂര്യ പ്രകാശ് അധ്യക്ഷത വഹിച്ചു. എം.കെ. സുരേന്ദ്രൻ, രജനി രാജൻ, രമ്യ ശ്രീനിവാസൻ എന്നിവർ പ്രസംഗിച്ചു.

കൈയേറ്റത്തിന് റവന്യൂ വകുപ്പ് ഒത്താശയെന്ന്

ചെന്പന്തൊട്ടി: കിഫ്ബി പദ്ധതിയിൽ ഉൾപ്പെടുത്തി നവീകരിക്കുന്ന ശ്രീകണ്ഠപുരം-ചെമ്പന്തൊട്ടി-നടുവിൽ റോഡിൽ കൊക്കായി പാലത്തിന്‍റെ ഇടതു ഭാഗത്ത് തോടിന്‍റെ ഇരുകരകളിലുമായി റീസർവേ നമ്പർ 104ൽ ഉൾപ്പെട്ട സ്ഥലം സ്വകാര്യ വ്യക്തികൾ കൈയേറിയത് റവന്യു വകുപ്പിന്‍റെ ഒത്താശയോടെയെന്ന് ആംആദ്മി പാർട്ടി കിസാൻ വിംഗ്. അനധികൃത കൈയേറ്റം കാരണം കൊക്കായി പാലത്തിന്‍റെ പുനർനിർമാണവും റോഡിന്‍റെ 6.900 മുതൽ 7.200 കിലോമീറ്റർ വരെയുള്ള ദൂരത്തെ നവീകരണ പ്രവൃത്തിയും തടസപ്പെട്ടിരിക്കുകയാണ്. സ്വകാര്യ വ്യക്തികളുടെ കൈയേറ്റം പ്രസ്തുത 104 സർവേ നമ്പറിൽ ഉണ്ടെന്നും നടുവിൽ നെടിയേങ്ങ വില്ലേജുകളുടെ അതിർത്തിയായതുകൊണ്ട് താലൂക്ക് സർവേയറുടെ സേവനം ഉണ്ടെങ്കിൽ മാത്രമേ ഭൂമി അളന്നു തിട്ടപ്പെടുത്താൻ കഴിയൂവെന്നും നെടിയേങ്ങ വില്ലേജ് ഓഫീസർ അറിയിച്ചിരുന്നു. റവന്യു വകുപ്പ് ഇടപെട്ട് കൈയേറ്റം ഒഴിപ്പിക്കണമെന്നും മഴക്കാലം തുടങ്ങും മുന്പ് കൊക്കായി പാലവും റോഡും പൂർത്തികരിക്കണമെന്നും എഎപി ആവശ്യപ്പെട്ടു.

കോൺഗ്രസ് പ്രതിഷേധ പ്രകടനം നടത്തി

ചെറുപുഴ: മാസപ്പടി കേസിൽ വീണ വിജയൻ പ്രതിയായ സാഹചര്യത്തിൽ പിണറായി വിജയൻ മുഖ്യമന്ത്രി സ്ഥാനം രാജിവയ്ക്കണമെന്ന് ആവശ്യപ്പെട്ട് കോൺഗ്രസ് ചെറുപുഴ മണ്ഡലം കമ്മിറ്റിയുടെ നേതൃത്വത്തിൽ ചെറുപുഴ ടൗണിൽ പ്രകടനവും പൊതുയോഗവും നടത്തി. ഡിസിസി നിർവാഹക സമിതിയംഗം തങ്കച്ചൻ കാവാലം യോഗം ഉദ്ഘാടനം ചെയ്തു. മണ്ഡലം പ്രസിഡന്‍റ് ടി.പി. ചന്ദ്രൻ അധ്യക്ഷത വഹിച്ചു. ഡിസിസി നിർവാഹക സമിതിയംഗം ആലയിൽ ബാലകൃഷ്ണൻ, സലിം തേക്കാട്ടിൽ, പി.വി. ബാബു, മാത്യു തടത്തിൽ, ടി.വി. ജനാർദനൻ, വി.വി. ദാമോദരൻ, ജോൺ ജോസഫ് തയ്യിൽ, ജിജി കൊച്ചുപറമ്പിൽ, എം.ടി.പി. മുഹമ്മദ് കുഞ്ഞി, ജയ്സൺ പൂക്കളം, പി.പി. ബാലകൃഷ്ണൻ, ലളിതാ ബാബു, പ്രണവ് കരള, ബിജു പുളിമൂട്ടിൽ, കെ.ജെ. സാജു, കൃഷ്ണൻകുട്ടി, ജോയ്സി ഷാജി, കെ. ഡി. പ്രവീൺ, ലൈസമ്മ പനക്കൽ, രേഷ്മ വി. രാജു, പി. മിഥുൻ, അനീഷ് ആന്‍റണി, പി. തമ്പാൻ, സന്ദീപ്, അമൽ, കൃഷ്ണൻ പള്ളിക്കര, നസീമ കാസിം എന്നിവർ പ്രസംഗിച്ചു.

മഴയിലും കാറ്റിലും വൻ നാശനഷ്ടം

തേർത്തല്ലി: കഴിഞ്ഞ ദിവസം ഉണ്ടായ ശക്തമായ മഴയിലും കാറ്റിലും വ്യാപക നാശനഷ്ടം. തേർത്തല്ലി ആനത്താംവളപ്പിലെ അങ്കണവാടിക്ക് സമീപം താമസിക്കുന്ന എടാട്ടേൽ സേവ്യർ, ജോമോൻ കിഴക്കേക്കൂറ്റ് എന്നിവർക്കാണ് വലിയ നാശനഷ്ടം ഉണ്ടായത്. സേവ്യറിന് പത്തിലധികം റബറും ആറ് കവുങ്ങും 40 വർഷം പഴക്കമുള്ള ഏഴ് ജാതികളും, ജോമോന് 40 കവുങ്ങ് കുലയ്ക്കാറായതും, കുലച്ചതുമായ 75 വാഴയും പൂർണമായും കാറ്റിൽ നിലം നിലംപൊത്തി. കൂടാതെ അയൽവാസിയുടെ പന മരം ഒടിഞ്ഞുവീണത് ജോമോന്‍റെ കുളത്തിലേക്കാണ്. ഇതുമൂലം കുളം ഇടിയുകയും കുളത്തിലുണ്ടായിരുന്ന രണ്ടു മോട്ടോറുകൾക്കും കേടുപാടുകളും സംഭവിച്ചു.

പാലത്തിലേക്കുള്ള വഴി തകർന്നു: യാത്രക്കാർ ദുരിതത്തിൽ

ആലക്കോട്: വെള്ളാട് കണ്ടത്തിൽ പീടിക-പത്തങ്ങാടി പ്രദേശങ്ങളെ ബന്ധിപ്പിച്ചുള്ള പാലത്തിന്‍റെ പ്രവേശന വഴി ശോചനീയാവസ്ഥയിലായത് അപകടഭീഷണിയുയർത്തുന്നു. നടുവിൽ പഞ്ചായത്തിലെ കണിയൻചാൽ-പാറ്റാക്കളം വാർഡുകളെ ബന്ധിപ്പിച്ചുള്ളതും പത്തങ്ങാടി പ്രദേശത്തെ നിരവധി കുടുംബങ്ങളെ പുറംലോകവുമായി ബന്ധിപ്പിക്കുന്ന ഏക മാർഗമാണ് പാലം. കരുവഞ്ചാൽ പുഴയ്ക്ക് കുറുകെയാണ് പാലം നിർമിച്ചിരിക്കുന്നത്. കാൽനടയാത്രക്കുള്ള വീതി മാത്രമേ പാലത്തിനുള്ളൂ. ഈ പാലത്തിന്‍റെ പ്രവേശന വഴിയിൽ വലിയ ഗർത്തം രൂപപ്പെട്ടിരിക്കുകയാണ്. കാലൊന്നു തെറ്റിയിൽ പുഴയിലോ കുഴിയിലോ വീഴുമെന്ന ഭീതിയിലാണ് യാത്രക്കാർ ഇതുവഴി സഞ്ചരിക്കുന്നത്. സ്ത്രീകളും കുട്ടികളുമടക്കം പലരും ഈ കുഴിയിൽ വീണിരുന്നു. ഭാഗ്യം കൊണ്ടാണ് ഇവർ രക്ഷപ്പെട്ടത്. പാലത്തിനോട് ചേർന്നുള്ള പുഴയുടെ ഭാഗം കെട്ടി സംരക്ഷണഭിത്തി നിർമിക്കുകയും സഞ്ചാരയോഗ്യമായ വഴി നിർമിക്കുകയും ചെയ്യണമെന്നാണ് നാട്ടുകാരുടെ ആവശ്യം.

സൗജന്യ മെഗാ മെഡിക്കൽ ക്യാമ്പ് സംഘടിപ്പിച്ചു

ഇരിട്ടി: ഐആർപിസി അയ്യൻകുന്ന്, ലയൺസ് ഇരിട്ടി സിറ്റി, ആസ്റ്റർ മിംസ് ഹോസ്പിറ്റൽ കണ്ണൂർ എന്നിയുടെ സംയുക്താഭിമുഖ്യത്തിൽ അങ്ങാടിക്കടവ് പ്ലാക്കിൽ ഓഡിറ്റോറിയത്തിൽ മെഗാ മെഡിക്കൽ ക്യാമ്പ് നടത്തി. ജില്ലാ പഞ്ചായത്ത് വൈസ് പ്രസിഡന്‍റ് ബിനോയി കുര്യൻ ഉദ്ഘാടനം ചെയ്തു. ഒ.എ. ഏബ്രഹാം അധ്യക്ഷത വഹിച്ചു. അയ്യൻകുന്ന് പഞ്ചായത്ത് പ്രസിഡന്‍റ് കുര്യാച്ചൻ പൈമ്പള്ളിക്കുന്നേൽ, അങ്ങാടിക്കടവ് ഇടവക വികാരി ഫാ. ബോബൻ റാത്തപ്പള്ളി, കെ.വി. സക്കീർ ഹുസൈൻ, സിബി വാഴക്കാല, ബിജോയി പ്ലാത്തോട്ടം, പവിത്രൻ പായം, ആന്‍റണി പുളിയംമാക്കൽ, സുധീഷ് ജോസഫ്, ഒ.ടി. അപ്പച്ചൻ, ജയിംസ് പ്ലാക്കിൽ എന്നിവർ പ്രസംഗിച്ചു. 100ൽ അധികം രോഗികൾ ക്യാമ്പിലെത്തി പരിശോധന നടത്തി. ആദ്യം രജിസ്റ്റർ ചെയ്ത 100 രോഗികൾക്ക് സൗജന്യമായി മരുന്ന് നൽകി.

രാജ്യം നേരിടുന്നത് ഗുരുതര പ്രതിസന്ധി: പി. സന്തോഷ്കുമാർ എംപി

കൂത്തുപറമ്പ്: രാജ്യം ഗുരുതരമായ പ്രതിസന്ധികളിലൂടെ കടന്നുപോകുകയാണെന്ന് പി. സന്തോഷ് കുമാര്‍ എംപി. ജാതിയുടെയും മതത്തിന്‍റെയും അടിസ്ഥാനത്തില്‍ ജനങ്ങളെ ഭിന്നിപ്പിച്ചു ഭരിക്കുന്ന രീതി കേന്ദ്ര സർക്കാർ സ്വീകരിച്ചു വരികയാണ്. രാജ്യത്തെ ഏക ഇടതുപക്ഷ സർക്കാരായ കേരളത്തിലെ എല്‍ഡിഎഫ് സര്‍ക്കാരിനെ എല്ലാ തരത്തിലും ശ്വാസംമുട്ടിക്കുക എന്ന നിലപാടാണ് കേന്ദ്രം സ്വീകരിച്ചു വരുന്നതെന്നും അദ്ദേഹം പറഞ്ഞു. സിപിഐ ചിറ്റാരിപ്പറമ്പ് ലോക്കല്‍ സമ്മേളനത്തിന്‍റെ ഭാഗമായുള്ള പ്രതിനിധി സമ്മേളനം കണ്ണവം വി.വി. കൃഷ്ണമാരാര്‍ നഗറില്‍ ഉദ്ഘാടനം ചെയ്തു പ്രസംഗിക്കുകയായിരുന്നു എംപി. കെ.വി. ശ്രീധരന്‍ പതാക ഉയര്‍ത്തി. വി.കെ. സുരേഷ് ബാബു, സി. വിജയന്‍, എം. വിനോദന്‍, പി.വി. സുരേന്ദ്രന്‍, വി.സുനില്‍കുമാര്‍ എന്നിവർ പ്രസംഗിച്ചു.

അടയ്ക്കാത്തൊണ്ടു കൊണ്ട് ഇമ്മാനുവലിന്‍റെ ജൈവവളം

ചെറുപുഴ: പാഴാക്കിക്കളയുന്ന അടയ്ക്കാത്തൊണ്ടു കൊണ്ട് മികച്ച ജൈവവളമുണ്ടാക്കുകയാണ് തിരുമേനിയിലെ ചെമ്പരത്തിക്കൽ ഇമ്മാനുവൽ എന്ന കർഷകൻ. അടയ്ക്കാ പൊളിച്ചു കഴിഞ്ഞാൽ പിന്നീട് തൊണ്ട് കത്തിച്ചുകളയുകയോ കൃഷിയിടത്തിലെവിടെയെങ്കിലും കൂട്ടിയിടുകയോ ചെയ്യാറാണു പതിവ്. എന്നാൽ ഇമ്മാനുവൽ അടയ്ക്കാ തൊണ്ടിനെ മികച്ച ജൈവവളമാക്കി മാറ്റുകയാണ് ചെയ്യുന്നത്. തിരുമേനി ചട്ടിവയലിലെ തന്നെ മൂന്നേക്കർ കൃഷിയിടത്തിലാണ് അടയ്ക്കാത്തൊണ്ടു കൊണ്ട് ജൈവവളം നിർമിക്കുവാനുള്ള ടാങ്ക് ഇമ്മാനുവൽ നിർമിച്ചിരിക്കുന്നത്. അഞ്ചുമീറ്റർ നീളവും മൂന്നു മീറ്റർ വീതിയും രണ്ടുമീറ്റർ ആഴവുമുള്ള ടാങ്കാണ് നിർമിച്ചിരിക്കുന്നത്. ഇതിൽ അടയ്ക്കാ ത്തൊണ്ട് ആദ്യം ഇടുന്നു. അതിന് മുകളിൽ ചാണകമിടും. ഇങ്ങനെ ആവർത്തിച്ച് ആവർത്തിച്ച് ഇടും. ആഴ്ചയിൽ ഒന്ന് നനച്ചു കൊടുക്കണം. ഇടയ്ക്ക് കിളച്ച് ഇളക്കി ഇടണം. അഞ്ച് മാസം കൊണ്ട് അടയ്ക്കാ തൊണ്ട് പൊടിഞ്ഞ് ചാണകവുമായി ചേർന്ന് മികച്ച ജൈവവളമായി മാറും. ‌ മേയ് മാസത്തിൽ ഇടുകയാണെങ്കിൽ നനയ്ക്കൽ ഒഴിവാക്കാം. തെങ്ങിനും കമുകിനുമൊക്കെ താൻ നിർമിക്കുന്ന ഈ ജൈവവളമാണ് ഉപയോഗിക്കുന്നതെന്ന് ഇമ്മാനുവൽ പറയുന്നു. 400 ചാക്ക് അടയ്ക്കാത്തൊണ്ടും 300 കുട്ട ചാണകവും ടാങ്കിൽ ഇടാം. തന്‍റെ മൂന്നേക്കർ കൃഷിയിടത്തിൽ നിന്നും 10 ക്വിന്‍റൽ അടയ്ക്കയും 7,000 തേങ്ങയും ഉത്പാദിപ്പിക്കുന്ന മികച്ച കർഷകനാണ് ഇമ്മാനുവൽ.

യുഡിഫ് വൈൽഡ് ലൈഫ് മാർച്ച്; സംഘാടക സമിതി രൂപീകരിച്ചു

ഇരിട്ടി: വന്യമൃഗ ആക്രമണത്തിനെതിരെ നടപടി സ്വീകരിക്കാത്ത കേന്ദ്ര സംസ്ഥാന സർക്കാരുകൾക്കെതിരെ യുഡിഎഫ് നടത്തിവരുന്ന പ്രക്ഷോഭത്തിന്‍റെ ഭാഗമായി 10ന് ഇരിട്ടി വൈൽഡ് ലൈഫ് വാർഡന്‍റെ ഓഫീസിലേക്ക് നടത്തുന്ന മാർച്ച് വിജയിപ്പിക്കാൻ യുഡിഎഫ് പേരാവൂർ, മട്ടന്നൂർ ഇരിക്കൂർ നിയോജക മണ്ഡലം സംയുക്ത കമ്മിറ്റി യോഗം തീരുമാനിച്ചു. സംഘാടക സമിതി രൂപീകരണ യോഗം സണ്ണി ജോസഫ് എംഎൽഎ ഉദ്ഘാടനം ചെയ്തു. പുന്നാട് ബാങ്ക് ഓഡിറ്റോറിയത്തിൽ നടന്ന യോഗത്തിൽ യുഡിഎഫ് ജില്ലാ ചെയര്‍മാന്‍ പി.ടി. മാത്യു അധ്യക്ഷ വഹിച്ചു. മുസ്‌ലീം ലീഗ് കണ്ണൂർ ജില്ലാ പ്രസിഡന്‍റ് അബ്ദുൾ കരീം ചേലേരി, ഇബ്രാഹിം മുണ്ടേരി, ചാക്കോ പാലക്കലോടി, കെ. വേലായുധൻ, മോഹനൻ, ലിസി ജോസഫ്, ബെന്നി തോമസ്‌, ജെയ്സണ്‍ കാരക്കാട്ട്, പി.സി. രാമകൃഷ്ണന്‍, വി.ടി. തോമസ്‌, സാജു യോമസ്, ജൂബിലി ചാക്കോ, കെ.പി. ഷാജി, എം.കെ. കുഞ്ഞിക്കണ്ണൻ, എം.എം. മജീദ്, ഒമ്പാൻ ഹംസ, ഇ.പി. ഷംസുദ്ദീൻ, സുരേഷ് മാവില, കാഞ്ഞിരോളി രാഘവൻ, പി.കെ. കുട്ട്യാലി, ടി.എൻ.എ. ഖാദർ, ടി.വി. രവീന്ദ്രൻ, വി.ആര്‍. ഭാസ്കരന്‍, തോമസ്‌ വര്‍ഗീസ്‌ തുടങ്ങിയവര്‍ പ്രസംഗിച്ചു.

ബാബുരാജിന് വിടചൊല്ലി നാട്

പയ്യന്നൂർ: മുൻ സന്തോഷ് ട്രോഫി താരവും കേരള പോലീസിലെ അസി. കമാൻഡന്‍റുമായിരുന്ന പയ്യന്നൂർ അന്നൂരിലെ എം. ബാബുരാജിന് (60) നാടിന്‍റെ യാത്രാമൊഴി. വീട്ടുമുറ്റത്ത് പൊതുദർശനത്തിനു വച്ച മൃതദേഹത്തിൽ അന്തിമോപചാരമർപ്പിക്കാൻ ജീവിതത്തിന്‍റെ നാനാതുറകളിൽപ്പെട്ടവർ എത്തി. ഐ.എം. വിജയൻ, യു. ഷറഫലി, കുരികേശ് മാത്യൂ, തോബിയാസ്, സി. എം. സുധീർ, എഡിസൺ, ശ്യാം സുന്ദർ, മെഹബൂബ്, സാജൻ, ഹബീബ് റഹ്മാൻ, ശ്രീനിവാസൻ, എം. സുരേഷ്, സക്കീർ ഹുസൈൻ, ഷാജി, കോച്ച് കുഞ്ഞികൃഷ്‌ണൻ, മറ്റ് ഫുട്‌ബോൾ താരങ്ങൾ, ആരാധകർ, രാഷ്‌ട്രീയ-സാമൂഹ്യ-സാംസ്‌കാരിക രംഗത്തുള്ളവർ, നാട്ടുകാർ തുടങ്ങി ആയിരങ്ങളാണ് അന്ത്യോപചാരം അർപ്പിക്കാൻ ഒഴുകിയെത്തിയത്. പയ്യന്നൂർ ഡിവൈഎസ്‌പി കെ. വിനോദ്കുമാർ, പയ്യന്നൂർ എസ്എച്ച്ഒ കെ.പി. ശ്രീഹരി തുടങ്ങിയവരുടെ നേതൃത്വത്തിൽ ഔദ്യോഗിക ബഹുമതിയോടെയായിരുന്നു വിടനല്കൽ. മൂരിക്കൊവ്വലിൽ നടന്ന അനുശോചന യോഗത്തിൽ കെ. കെ. ഗംഗാധരൻ അധ്യക്ഷനായിരുന്നു. യു. ഷറഫലി, പ്രഫ. കെ. രാജഗോപാലൻ, പോത്തേര കൃഷ്‌ണൻ, കെ.കെ. ഫൽഗുനൻ, കെ.ടി. സഹദുള്ള, ബി. സജിത് ലാൽ, സി. എച്ച്. അശോക്‌കുമാർ, കെ. രവീന്ദ്രൻ എന്നിവർ പ്രസംഗിച്ചു.

പുഴയോര ശുചീകരണ യജ്ഞത്തിന് തുടക്കമായി

പയ്യന്നൂര്‍: മാലിന്യമുക്ത നവകേരള ജനകീയ കാന്പയിന്‍റെ ഭാഗമായി കണ്ണൂര്‍ ജില്ലയിലെ പ്രധാന പുഴകളിലൂടെ ചാള്‍സണ്‍ സ്വിമ്മിംഗ് അക്കാദമിയുടെ നേതൃത്വത്തില്‍ നടത്തുന്ന പുഴയോര ശുചീകരണ യജ്ഞത്തിന് തുടക്കമായി. പെരുമ്പ പുഴ, കുപ്പം പുഴ, വളപട്ടണം പുഴ, മാഹി പുഴ, രാമന്തളി പുഴ, കവ്വായി കായൽ എന്നിവിടങ്ങളിലാണ് ശുചീകരണം നടത്തുന്നത്. പുഴകളെ മലിനമാക്കുന്ന പ്ലാസ്റ്റിക് ഉള്‍പ്പെടെയുള്ള മാലിന്യങ്ങള്‍ നീക്കം ചെയ്ത് പുഴകളെ ഭംഗിയോടെ നിലനിർത്തുകയാണ് ശുചീകരണ യജ്ഞത്തിലൂടെ ലക്ഷ്യമിടുന്നത്. ശുചീകരണ യജ്ഞത്തിന്‍റെ ജില്ലാതല ഉദ്ഘാടനം ഇന്നലെ രാവിലെ പെരുമ്പപുഴയില്‍ പയ്യന്നൂര്‍ നഗരസഭ വൈസ്‌ചെയര്‍മാന്‍ പി.വി. കുഞ്ഞപ്പന്‍ നിര്‍വഹിച്ചു. തുടര്‍ന്ന് പെരുമ്പ മുതല്‍ പാലക്കോട് അഴിമുഖം വരെയുള്ള പുഴയുടെ ഇരുകരകളിലുമുള്ള മാലിന്യങ്ങള്‍ ശേഖരിച്ചു. കയാക്കിംഗ് തോണികളും നാടന്‍ വള്ളങ്ങളും ഫൈബര്‍ വള്ളങ്ങളും ഉപയോഗിച്ചാണ് പുഴയിലെ ശുചീകരണം നടത്തിയത്. ഇന്നലെ നടന്ന ശുചീകരണ യജ്ഞത്തിന്‍റെ സമാപനോദ്ഘാടനം രാമന്തളി പഞ്ചായത്ത് പ്രസിഡന്‍റ് വി. ഷൈമ നിര്‍വഹിച്ചു. ഫൈബർ ഓടത്തിലും നാടൻ വള്ളങ്ങളിലും നിറഞ്ഞു കവിഞ്ഞ പ്ലാസ്റ്റിക് കുപ്പികളടങ്ങുന്ന മാലിന്യങ്ങളാണ് ഇന്നലെ ഇവർക്ക് ശേഖരിക്കാനായത്. മാലിന്യ മുക്ത പദ്ധതിയുടെ ഭാഗമായി കർശന നിയന്ത്രണങ്ങൾ വന്നതോടെ പുതിയ പ്ലാസ്റ്റിക് ഇനങ്ങൾ വളരെ കുറവായിരുന്നു. വർഷങ്ങൾക്ക് മുമ്പേ പുഴയോരങ്ങളിൽ അടിഞ്ഞുകൂടി കിടക്കുകയായിരുന്ന മാലിന്യങ്ങളാണ് ശേഖരിച്ച് പുഴയെ ശുചീകരിച്ചതെന്നും പരിപാടിക്ക് നേതൃത്വം നൽകിയ ചാൾസൺ ഏഴിമല പറഞ്ഞു.13ന് കുപ്പം-പഴയങ്ങാടി പുഴയിലും തുടർന്ന് വളപട്ടണം പുഴ, മാഹി പുഴ, രാമന്തളി ഏറന്‍ പുഴ, കവ്വായി കായൽ എന്നിവിടങ്ങളിലായി ശുചീകരണം നടത്തും.

കീഴ്പള്ളി മേഖലയിൽ മഴയിലും കാറ്റിലും മരങ്ങൾ വീണു; ഗതാഗതം തടസപ്പെട്ടു

ഇരിട്ടി: ആറളം പഞ്ചായത്തിലെ കീഴ്പള്ളി കക്കുവ ആറളം ഫാം റോഡിൽ വേനൽ മഴയിലും കാറ്റിലും മരങ്ങൾ വീണ് ഗതാഗതവും വൈദ്യുതിയും തടസപ്പെട്ടു. ഇന്നലെ വൈകുന്നേരം 4.30 ഓടെ ആരംഭിച്ച കനത്ത കാറ്റിലും മഴയിലുമാണ് മരങ്ങൾ കടപുഴകിയത്. കാരക്കാട്ട് ജോർജിന്‍റെ 75 വാഴകളും, 22 കവുങ്ങുകളും കാറ്റിൽ ഒടിഞ്ഞു വീണു. നാട്ടുകാരുടെ നേതൃത്വത്തിൽ മരങ്ങൾ മുറിച്ചു മാറ്റി ഗതാഗതം പുനഃസ്ഥാപിച്ചു. എങ്കിലും മേഖലയിലെ വൈദ്യുതി ബന്ധം പുനഃസ്ഥാപിച്ചിട്ടില്ല. മരങ്ങൾ വീണതിൽ പോസ്റ്റ് ഉൾപ്പെടെ തകർന്നതാണ് വൈദ്യുത ബന്ധം തകരാൻ കാരണം.

പണം വിഴുങ്ങാൻ കരാറുകാരന്‍റെ കുഴിയടയ്ക്കൽ ചെപ്പടിവിദ്യ: കണ്ണടച്ച് പൊതുമരാമത്ത് വകുപ്പും

ഇരിട്ടി: ആറളം ഫാം, പുനരധിവാസ മേഖല എന്നിവിടങ്ങളിലൂടെ കടന്നുപോകുന്ന കുഴിയില്ലാത്ത പൊതുമരാമത്ത് റോഡിൽ പണം വിഴുങ്ങാൻ കരാറുകാരന്‍റെ കുഴിയടയ്ക്കൽ ചെപ്പടിവിദ്യ. ശ്രദ്ധയിൽപെട്ടിട്ടും ഇതിനുനേരെ കണ്ണടയ്ക്കുകയാണ് പൊതുമരാമത്ത് വകുപ്പെന്നാണ് ആരോപണം. കീഴ്പള്ളിയിൽ നിന്നും പാലപുഴയിലേക്ക് പോകുന്ന ഒന്പത് കിലോമീറ്റർ വരുന്ന റോഡിൽ വർഷാവർഷം ഇത്തരത്തിൽ മെയിന്‍റനൻസ് എന്ന പേരിൽ പ്രവൃത്തി നടത്തിയെന്നു പറഞ്ഞ് പണം വിഴുങ്ങുന്നതായാണ് ആരോപണം. പൊതുമരാമത്ത് വകുപ്പ് അറിഞ്ഞാണ് ഈ വ്യാജ പ്രവൃത്തി എന്നാണ് ആരോപണം. ആറളം ആദിവാസി പുനരധിവാസ മേഖലയിലൂടെ കടന്നുപോകുന്ന റോഡായതിനാൽ ആരും ചോദിക്കാൻ വരില്ലെന്ന കരാറുകന്‍റെ വിശ്വാസമാണ് കുഴിയില്ലാത്ത സ്ഥലത്ത് കുഴി നികത്തിയെന്നു കാണിച്ചുള്ള തട്ടിപ്പ്. ഇത്തരം തട്ടിപ്പ് തടയാൻ പൊതുമരാമത്ത് മന്ത്രി ഇടപെടണമെന്നാണ് യാത്രക്കാരുടെ ആവശ്യം.

വേനൽ മഴയിൽ മലയോരത്തെ റോഡുകൾ അപകടാവസ്ഥയിൽ

ഉളിക്കൽ: കഴിഞ്ഞ ദിവസം പെയ്ത മഴയിൽ ജൽജീവൻ മിഷന്‍റെ പ്രവൃത്തി നടന്ന പ്രദേശങ്ങളിലെ റോഡിന്‍റെ ഇരുവശങ്ങളിലേയും മണ്ണൊലിച്ച് പോയതോടെ പ്രദേശ വാസികൾ ദുരിതത്തിൽ. ഉളിക്കൽ പഞ്ചായത്തിലെ കോളിത്തട്ട്-അറബി റോഡിലാണ് കാൽനടയാത്രപോലും ദുഷ്കരമായി മാറിയത്. മണ്ണൊലിച്ച് പോയതോടെ വലിയ ഗർത്തമാണ് രൂപപ്പെട്ടിരിക്കുന്നത്. കുടിവെള്ള പദ്ധതിക്കായി റോഡിന്‍റെ വശങ്ങളിൽ ജെസിബി ഉപയോഗിച്ച് ആഴത്തിൽ മണ്ണ് നീക്കി വലിയ പൈപ്പ് സ്ഥാപിച്ചിരുന്നു. പൈപ്പ് സ്ഥാപിച്ച സ്ഥാലങ്ങളിൽ മണ്ണിട്ട് മൂടിയിരുന്നുവെങ്കിലും കോൺക്രീറ്റ് ചെയ്യാനുണ്ടായ കാലതാമസമാണ് ജനങ്ങളെ ദുരുതത്തിലാക്കിയത്. ഇപ്പോൾ വാഹനങ്ങൾക്ക് സൈഡ് കൊടുക്കാനോ കാൽനടയത്രയോ പോലും ഈ റോഡിൽ ദുഷ്കരമാണ്. ഇതുസംബന്ധിച്ച് ഇരിട്ടി താലൂക്ക് വികസന സമിതി യോഗത്തിൽ വാട്ടർ അതോറിറ്റിക്കെതിരെ കടുത്ത വിമർശനം ഉയർന്നിരുന്നു. റോഡുകൾ കുത്തിപ്പൊളിച്ചശേഷം പണി പൂർത്തികരിക്കാതെ മലയോര മേഖലയിലെ നിരവധി പഞ്ചയത്തുകളാണ് ദുരിതമനുഭവിക്കുന്നതെന്നും പദ്ധിതി നടത്തിപ്പുകാരയ വാട്ടർ അതോറിറ്റിയുടെ മെല്ലെപ്പോക്കാണ് റോഡ് അപകടാവസ്ഥയിലാകാൻ കാരണമെന്നും ഉളിക്കൽ പഞ്ചായത്ത് പ്രസിഡന്‍റ് പി.സി. ഷാജി പറഞ്ഞു. കഴിഞ്ഞ മഴക്കാലത്തും റോഡിന് സൈഡിലെ മണ്ണൊലിച്ച് പോയി അപകടഭീഷണിയുയർത്തിയിരുന്നെങ്കിലും ഇതുവരെ നടപടിയൊന്നും എടുത്തിട്ടില്ല. ഈ വിഷയത്തിൽ വാട്ടർ അതോറിറ്റി അടിയന്തരമായിടപെട്ട് ജനങ്ങളുടെ യാത്ര സൗകര്യം ഉറപ്പാക്കണമെന്ന് ഉളിക്കൽ കോൺഗ്രസ് മണ്ഡലം പ്രസിഡന്‍റ് ടോമി മൂക്കനോലിയും ആവശ്യപ്പെട്ടു.

ലോഡ്ജിൽ മുറിയെടുത്ത് ലഹരി ഉപയോഗം; യുവതികളടങ്ങുന്ന സംഘം അറസ്റ്റിൽ

തളിപ്പറമ്പ്: ലോഡ്ജിൽ മുറിയെടുത്ത് എംഡിഎംഎ ഉപയോഗിക്കാനെത്തിയ യുവതികളും യുവാക്കളും പിടിയിൽ. പറശിനി കോൾമൊട്ടയിലെ ഒരു ലോഡ്ജിൽ മുറിയെടുത്ത് മയക്കുമരുന്നുപയോഗിക്കാനെത്തിയ രണ്ടു യുവതികളെയും രണ്ടു യുവാക്കളെയുമാണ് എക്സൈസ് സംഘം അറസ്റ്റ് ചെയ്തത്. മട്ടന്നൂർ മരുതായി സ്വദേശി മുഹമ്മദ് ഷംനാദ് (23), വളപട്ടണം സ്വദേശി മുഹമ്മദ്‌ ജെംഷിൽ (37) ഇരിക്കൂർ സ്വദേശിനി റഫീന(24) കണ്ണൂർ സ്വദേശിനി ജസീന (22) എന്നിവരാണ് പിടിയിലാത്. മുറിയിൽ നിന്ന് 490 മില്ലി ഗ്രാം എംഡിഎംഎയും ലഹരി ഉപയോഗിക്കുന്നതിനുള്ള വസ്തുക്കളും പിടിച്ചെടുത്തു. ഇന്നലെ രാവിലെ തളിപ്പറന്പ് സർക്കിൾ എക്സൈസ് ഇൻസ്പെക്ടർ ഷിജിൽ കുമാറിന് ലഭിച്ച രഹസ്യ വിവരത്തെ തുടർന്ന് നടത്തിയ പരിശോധനയിലാണ് നാലംഗ സംഘം പിടിയിലായത്. ‌ യുവതികൾ പെരുന്നാൾ ദിവസം സൃഹൃത്തിന്‍റെ വീട്ടിലേക്ക് പോകുന്നെന്ന് പറഞ്ഞാണ് സ്വന്തം വീടുകളിൽ നിന്നിറങ്ങിയത്. തുടർന്ന് ആൺ സുഹൃത്തുക്കൾക്കൊപ്പം പല സ്ഥലങ്ങളിലായി മുറിയെടുത്ത് മയക്കുമരുന്ന് ഉപയോഗിക്കുകയായിരുന്നുവെന്നാണ് എക്സൈസ് സംഘം കണ്ടെത്തിയത്. വീട്ടിൽ നിന്നു വിളിക്കുന്പോൾ കൂട്ടുകാരിക്കൊപ്പമാണെന്ന് പറഞ്ഞ് ഫോൺ കൈമാറി വീട്ടുകാർക്ക് ഒരു സംശയത്തിനി‌ട നൽകാതെയായിരുന്നു ഇവരുടെ കറങ്ങി നടത്തവും ലഹരി ഉപയോഗവും. പിടിയിലായ ശേഷം എക്സൈസ് ഉദ്യോഗസ്ഥർ വീട്ടുകാരുമായി ബന്ധപ്പെട്ടപ്പോഴാണ് ഇവർ യാഥാർഥ്യം മനസിലാക്കുന്നത്. പിടിയിലായവർക്ക് മയക്കുമരുന്ന് വില്പനയിൽ പങ്കുണ്ടോഎന്നകാര്യം അന്വേഷിച്ചു വരികയാണ്. കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു. അസി. എക്സൈസ് ഇൻസ്‌പെക്ടർമാരായ വി.വി ഷാജി , അഷ്റഫ് മലപ്പട്ടം, പ്രിവന്‍റീവ് ഓഫീസർമാരായ നികേഷ് ഫെമിൻ, സിവിൽ എക്സൈസ് ഓഫീസർമാരായ വിജിത്ത് കലേഷ്, സനേഷ്, വിനോദ്, വനിതാ സിവിൽ എക്സൈസ് ഓഫീസർ സുജിത എന്നിവരും അന്വേഷണ സംഘത്തിലുണ്ടായിരുന്നു.

നിക്ഷേപ തട്ടിപ്പ്: മുഖ്യപ്രതി കോടതിയിൽ കീഴടങ്ങി

പഴയങ്ങാടി: നിക്ഷേപത്തിന് ഇരട്ടി ലാഭം തരാമെന്ന് വിശ്വസിപ്പിച്ച് മാർക്കറ്റിംഗ് കന്പനിയുടെ മറവിൽ ലക്ഷങ്ങൾ തട്ടിപ്പ് നടത്തിയ കേസിലെ മുഖ്യപ്രതി കോടതിയിൽ കീഴടങ്ങി. തളിപ്പറന്പ് ചിറവക്കിലെ സിഗ്ടെക് മാർക്കറ്റിംഗ് പ്രൈവറ്റ് ലിമിറ്റഡിന്‍റെ പേരിൽ ലക്ഷങ്ങളുടെ തട്ടിപ്പ് നടത്തി മുങ്ങിയ കോട്ടയം അയ്മനം സ്വദേശിനി വൃന്ദാ രാജേഷാണ് (44) പയ്യന്നൂർ കോടതിയിൽ കീഴടങ്ങിയത്. പ്രതിയെ റിമാൻഡ് ചെയ്ത കോടതി കണ്ണൂർ വനിതാ ജയിലിലേക്കയച്ചു.നാട്ടിലും വിദേശത്തും ഒളിവിൽ കഴിഞ്ഞിരുന്ന പ്രതിക്കെതിരെ 2022ൽ കോടതി ലുക്ക് ഔട്ട് നോട്ടീസ് പുറപ്പെടുച്ചിരുന്നു. പരിയാരം സ്റ്റേഷനിലും ഇവർക്കെതിരേ സമാന രീതിയിലുള്ള കേസുകളുണ്ടെന്ന് പഴയങ്ങാടി പോലീസ് പറഞ്ഞു.

നൂറിലധികം കവർച്ചാ കേസുകളിലെ പ്രതി കണ്ണൂരിൽ അറസ്റ്റിൽ

കണ്ണൂര്‍: നൂറിലധികം കവര്‍ച്ചാകേസുകളില്‍ പ്രതിയായ കുപ്രസിദ്ധ മോഷ്ടാവ് അറസ്റ്റില്‍. ആലപ്പുഴ ചെന്നിത്തല സ്വദേശി പ്രസാദ് എന്ന തീപ്പൊരി പ്രസാദിനെയാണ് കണ്ണൂര്‍ ടൗണ്‍ പോലീസ് അറസ്റ്റ് ചെയ്തത്. വെള്ളിയാഴ്ച രാത്രി കണ്ണൂർ പഴയ ബസ് സ്റ്റാൻഡിലാണ് ഇയാൾ പിടിയിലായത്. ടൗൺ ഇന്‍സ്‌പെക്ടര്‍ ശ്രീജിത്ത് കൊടേരിയുടെ നിര്‍ദേശപ്രകാരം എസ്ഐമാരായ വി.വി. ദീപ്തി, പി.കെ സന്തോഷ്, അനുരൂപ്, ഉദ്യോഗസ്ഥരായ നാസര്‍, റമീസ് എന്നിവരുള്‍പ്പെട്ട പോലീസ് സംഘമാണ് പ്രതിയെ അറസ്റ്റ് ചെയ്തത്. കണ്ണൂര്‍ ടൗണ്‍ സ്റ്റേഷന്‍, വളപട്ടണം, പയ്യന്നൂര്‍ തുടങ്ങി ജില്ലയ്ക്കകത്തും പുറത്തുമുള്ള പോലീസ് സ്റ്റേഷനുകളില്‍ ഭവന ഭേദനമുള്‍പ്പെടെയുള്ള നിരവധി കേസുകളിലെ പ്രതിയാണ് ഇയാള്‍. സംസ്ഥാനത്ത് വിവിധ പോലീസ് സ്റ്റേഷനുകളില്‍ ഇയാള്‍ക്കെതിരേ മോഷണം നടത്തിയതിന് കേസുകളുണ്ടെന്ന് പോലീസ് പറഞ്ഞു. നേരത്തെ ജാമ്യത്തിലിറങ്ങി ഒളിച്ച് നടക്കുന്നതിനാല്‍ പ്രസാദിനെതിരെ വാറണ്ടും നിലവിലുണ്ടെന്ന് കേസന്വേഷിക്കുന്ന സി.ഐ ശ്രീജിത്ത് കൊടേരി പറഞ്ഞു.

പെണ്‍കുട്ടിയെ കൂടാതെ സഹോദരനെയും പീഡിപ്പിച്ചു; അറസ്റ്റിലായ യുവതിക്കെതിരേ വീണ്ടും പോക്സോ കേസ്

തളിപ്പറമ്പ്: പന്ത്രണ്ടുകാരിയായ പെണ്‍കുട്ടിയെ പീഡിപ്പിച്ചതിന് റിമാന്‍ഡില്‍ കഴിയുന്ന യുവതിക്കെതിരെ വീണ്ടും പോക്‌സോ കേസ്. പെൺകുട്ടിയെ പീഡിപ്പിച്ചതിന് കഴിഞ്ഞ മാസം അറസ്റ്റിലായി റിമാന്‍ഡിൽ കഴിയുന്ന സ്‌നേഹ മെർലിനെതിരെയാണ് (23) തളിപ്പറമ്പ് പോലീസ് വീണ്ടും പോക്സോ കേസ് രജിസ്റ്റർ ചെയ്തത്. നേരത്തെ പീഡനത്തിന് ഇരയായ തളിപ്പറമ്പ് സ്വദേശിനിയായ വിദ്യാർഥിനിയുടെ സഹോദരനായ പതിനഞ്ചുകാരനെയും പീഡിപ്പിച്ചെന്ന പരാതിയിലാണ് കേസ്. തന്നെ നിർബന്ധിച്ച് ലൈംഗികമായി ഉപയോഗിച്ചെന്ന് പതിനഞ്ചുകാരൻ പോലീസിന് മൊഴി നൽകി. ആണ്‍കുട്ടിയെ പീഡിപ്പിക്കുന്നതിന്‍റെ ദൃശ്യങ്ങള്‍ യുവതി ഫോണില്‍ പകര്‍ത്തിയിരുന്നു. പരാതിപ്പെട്ടാൽ വീഡിയോ പുറത്തു വിടുമെന്ന് ഭീഷണിപ്പെടുത്തുകയും ചെയ്തു. പീഡന വിവരം കുട്ടി തന്നെയാണ് വീട്ടുകാരോട് പറഞ്ഞത്. വീട്ടുകാര്‍ ചൈല്‍ഡ് ലൈനിനെയും പോലീസിനെയും അറിയിക്കുകയായിരുന്നു. പെണ്‍കുട്ടിയെ പീഡിപ്പിച്ച കേസില്‍ മാർച്ച് 14 നാണ് സ്‌നേഹയെ അറസ്റ്റ് ചെയ്തത്. പന്ത്രണ്ടുകാരിയായ പെണ്‍കുട്ടിയുടെ ബാഗില്‍ അധ്യാപകർക്ക് ഫോൺ ലഭിച്ചിരുന്നു. ഇതു പരിശോധിച്ചപ്പോൾ ചില അസ്വാഭാവിക കാര്യങ്ങൾ കണ്ടെത്തിയതിനെ തുടർന്ന് വീട്ടുകാരെ അറിയിക്കുകയായിരന്നു. തുടര്‍ന്ന് ചൈല്‍ഡ് ലൈന്‍ അധികൃതര്‍ നടത്തിയ കൗൺസിലിംഗിലാണ് പീഡന വിവരം പെൺകുട്ടി വെളിപ്പെടുത്തിയത്. പെണ്‍കുട്ടിയോട് വാത്സല്യം നടിച്ച് പ്രതി സ്വര്‍ണ ബ്രേസ്‌ലറ്റും മറ്റും സമ്മാനമായി നൽകി വരുതിയിലാക്കിയാണ് പീഡിപ്പിച്ചത്. സിപിഐ ജില്ലാ കൗൺസിൽ അംഗം കോമത്ത് മുരളീധരനെ ആക്രമിച്ച കേസിലും പ്രതിയാണ് യുവതി.

പോലീസ് സ്റ്റേഷനിലെ വെടി; അന്വേഷണമാരംഭിച്ചു

തലശേരി: ടൗൺ പോലീസ് സ്റ്റേഷനിൽ പാറാവുകാരന്‍റെ കൈയിലെ പിസ്റ്റളിൽ നിന്ന് വെടിപൊട്ടി വനിതാ പോലീസ് ഓഫീ സർക്ക് പരിക്കേറ്റ സംഭവത്തിൽ വകുപ്പുതല അന്വേഷണം ആരംഭിച്ചു. സിറ്റി പോലീസ് കമ്മീഷണർ നിധിൻരാജാണ് അന്വേഷണത്തിന് ഉത്തരവിട്ടത്. ചൊക്ലി സിഐ കെ.വി. മഹേഷിനാണ് അന്വേഷണച്ചുമതല. സംഭവത്തിൽ പാറാവ് ഡ്യൂട്ടിയിലുണ്ടായിരുന്ന സിവിൽ പോലീസ് ഓഫീസർ സുബിനിനെ അന്വേഷണ വിധേയമായി സസ്പെൻഡ് ചെയ്തിട്ടുണ്ട്. ഇക്കഴിഞ്ഞ ബുധനാഴ്ച ഉച്ചകഴിഞ്ഞ് രണ്ടിനായിരുന്നു സംഭവം. പാറാവ് ഡ്യൂട്ടി മാറുന്നതിനിടെ സുബിന്‍റെ കൈയിൽനിന്നും നിലത്ത് വീണ പിസ്റ്റൾ അശ്രദ്ധമായി കൈകാര്യം ചെയ്തപ്പോൾ അബദ്ധത്തിൽ വെടിപൊട്ടിയെന്നാണ് പ്രാഥമിക നിഗമനം.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact editor@deepika.com