പാക് ആണവശേഖരത്തിന് അന്താരാഷ്‌ട്ര നിരീക്ഷണം വേണം
ഉള്ളതു പറഞ്ഞാൽ / കെ. ഗോപാലകൃഷ്ണൻ
Tuesday, May 20, 2025 12:07 AM IST
ബ്രഹ്‌മോസ് സൂപ്പർ സോണിക് ആയുധങ്ങളടക്കം ഉപയോഗിച്ച് ആഴത്തിലുള്ളതും കൃത്യതയാർന്നതുമായ വ്യോമാക്രമണങ്ങളിലൂടെ പാക്കിസ്ഥാനിലെ നിരവധി വ്യോമതാവളങ്ങൾ തകർത്ത് പ്രധാന ലക്ഷ്യങ്ങൾ നേടിയെടുത്തതിനാൽ ഓപ്പറേഷൻ സിന്ദൂർ താത്കാലികമായി നിർത്താൻ ഇന്ത്യ സമ്മതിച്ചു. ഇന്ത്യ മൂന്ന് പ്രധാന ലക്ഷ്യങ്ങൾ; രാഷ്‌ട്രീയം, സൈനികം, മാനസികം എന്നിവ നേടിയതിനാൽ അവർ ഒരു വെടിനിർത്തലിന് സമ്മർദം ചെലുത്തി. ഭാവിയിൽ ഏതൊരു ഭീകരപ്രവർത്തനവും യുദ്ധപ്രവർത്തനമായി കണക്കാക്കുമെന്ന് ഇന്ത്യൻ സർക്കാർ വൃത്തങ്ങൾ വ്യക്തമാക്കിയിട്ടുമുണ്ട്.
പാക് അധിനിവേശ കാഷ്മീർ (പി‌ഒ‌കെ) തിരിച്ചുപിടിക്കുക എന്നത് മാത്രമാണ് ഇനി ചെയ്യാനുള്ള ഏക കാര്യം എന്ന ഇന്ത്യയുടെ നിലപാട് സുവ‍്യക്തമാണ്. ഇനി രണ്ടു കാര‍്യങ്ങൾകൂടിയുണ്ട്; പഹൽഗാം കൂട്ടക്കൊലയ്ക്ക് ഉത്തരവാദികളായ തീവ്രവാദികളെ കൈമാറാൻ പാക്കിസ്ഥാൻ സമ്മതിച്ചാൽ ഇന്ത്യ സംസാരിക്കും, ആരും മധ്യസ്ഥത വഹിക്കേണ്ടതില്ല, പാക്കിസ്ഥാൻ സ്പോൺസർ ചെയ്യുന്ന ഭീകരത തുടരുന്നിടത്തോളം കാലം സിന്ധു നദീജല കരാർ താത്കാലികമായി നിർത്തിവയ്ക്കും. ഈ നിലപാടിൽ പ്രധാനമന്ത്രി മോദി ഉറച്ചുനിന്നു. ഇരു രാജ്യങ്ങളും തമ്മിലുള്ള ശത്രുത പ്രതികൂലമായപ്പോൾ, സ്വീകരിക്കേണ്ട അടിയന്തര നടപടികളെക്കുറിച്ച് പ്രധാനമന്ത്രി മോദി മുതിർന്ന കാബിനറ്റ് സഹപ്രവർത്തകരുമായും അടുത്ത ഉപദേഷ്ടാക്കളുമായും ചർച്ച ചെയ്തു. പാക്കിസ്ഥാൻ വെടിയുണ്ടകൾ പ്രയോഗിച്ചാൽ, നമ്മൾ പീരങ്കികൾ ഉപയോഗിച്ച് പ്രതികരിക്കും: മോദി ആദ‍്യം മുതലേ തന്‍റെ ഉറച്ച് നിലപാട് വ‍്യക്തമാക്കി.
കൃത്യമായി തിരിച്ചടിച്ച് ഇന്ത്യ
ഒരു ആണവരാഷ്‌ട്രം ആക്രമണത്തിനു തുനിയുന്നതിനാൽ ആക്രമണത്തിനു മോദി തയാറാകില്ലെന്ന് അമേരിക്കൻ വൈസ് പ്രസിഡന്‍റ് വാൻസ് പ്രതീക്ഷിച്ചിരുന്നെങ്കിൽ അദ്ദേഹത്തിന് തെറ്റി. പാക്കിസ്ഥാൻ ആക്രമണം തുടർന്നപ്പോൾ, ഇന്ത്യ ഒന്നിലധികം പാക് വ്യോമതാവളങ്ങളിൽ കൃത്യമായ ആക്രമണങ്ങൾ നടത്തി തിരിച്ചടിച്ചു, വ്യോമ പ്രതിരോധം ഒരുക്കി. മോദിയുടെ ഉദ്ദേശ്യം വിജയകരമായി നടപ്പിലാക്കപ്പെട്ടു. ഇത് ആക്രമണം നിർത്തി ഇന്ത്യയെ സമീപിക്കാൻ പാക്കിസ്ഥാനെ നിർബന്ധിതരാക്കി. ഇന്ത്യ സമ്മതിച്ചു, പക്ഷേ അടിസ്ഥാനപരമായി പറഞ്ഞു: നിങ്ങൾ നടപടിക്കില്ലെങ്കിൽ, ഞങ്ങളുമില്ല; പക്ഷേ, നിങ്ങൾ തുടങ്ങിയാൽ ഞങ്ങൾ തീർത്തിരിക്കും.
വാസ്തവത്തിൽ, അമേരിക്കൻ പ്രസിഡന്‍റ് ട്രംപും വൈസ് പ്രസിഡന്‍റ് വാൻസും സമയം കളയാതെതന്നെ പഠിച്ചത്, ഇത്തരം സാഹചര്യം കൈകാര്യം ചെയ്യാനും അഭിമാനത്തോടെ ഉറച്ചുനിൽക്കാനും അറിയാവുന്ന ഇന്ത്യയുടെ ഉന്നത നേതൃത്വത്തിന് അവരുടെ നല്ല ഓഫീസുകളോ സ്വാധീനമോ സഹായമോ ആവശ്യമില്ല എന്നാണ്. ഇതു തങ്ങളുടെ വിഷയമല്ലെന്ന് മനസിലാക്കിയതിനാൽ ഇരുവരും പിൻവാങ്ങി. പാക്കിസ്ഥാന് എന്തെങ്കിലും പറയണമെങ്കിൽ ഡിജിഎംഒയെ നേരിട്ട് സമീപിക്കണമെന്ന് എസ്. ജയ്ശങ്കർ യുഎസ് സ്റ്റേറ്റ് സെക്രട്ടറി മാർക്കോ റൂബിയോയെ അറിയിച്ചപ്പോൾ കാര്യങ്ങൾ എല്ലാവർക്കും വ്യക്തമായി.
എന്നാൽ മുതിർന്ന ലോകനേതാക്കൾ മാന്യമായി പ്രതികരിച്ചു. യുഎസ് പ്രസിഡന്‍റ് ഡോണൾഡ് ട്രംപ് പറഞ്ഞു, “ഇപ്പോഴത്തെ ആക്രമണം നിർത്താൻ സമയമായി എന്ന് മനസിലാക്കാൻ ഇന്ത്യക്കും പാക്കിസ്ഥാനും ശക്തിയും വിവേകവും ധൈര്യവും നൽകിയതിൽ ഞാൻ വളരെ അഭിമാനിക്കുന്നു….. യുഎസിന് സഹായിക്കാൻ കഴിഞ്ഞതിൽ ഞാൻ അഭിമാനിക്കുന്നു. ഈ രണ്ട് മഹത്തായ രാജ്യങ്ങളുമായുള്ള വ്യാപാരം ഞാൻ ഗണ്യമായി വർധിപ്പിക്കാൻ പോകുന്നു. ‘ആയിരം വർഷങ്ങൾക്ക്’ ശേഷം, കാഷ്മീരിനെക്കുറിച്ച് ഒരു പരിഹാരത്തിലെത്താൻ കഴിയുമോ എന്ന് കാണാൻ ഞാൻ ഇരുവരുമായും പ്രവർത്തിക്കും.”
കെയർ സ്റ്റാർമർ, യുകെ പ്രധാനമന്ത്രി: “കുറച്ച് ദിവസങ്ങളായി യുകെ ഇരുപക്ഷവുമായും ചർച്ചകളിൽ ഏർപ്പെട്ടിരിക്കുകയാണ്… വെടിനിർത്തൽ ഉണ്ടാകുന്നത് കാണുന്നതിൽ എനിക്ക് സന്തോഷമുണ്ട്. അത് ശാശ്വതവും നിലനിൽക്കുന്നതുമാണെന്ന് ഉറപ്പാക്കുക എന്നതാണ് ഇപ്പോൾ ചുമതല.”
ലെയോ പതിനാലാമൻ മാർപാപ്പ: “ഇന്ത്യയും പാക്കിസ്ഥാനും തമ്മിലുള്ള വെടിനിർത്തൽ പ്രഖ്യാപനത്തിൽ ഞാൻ സന്തുഷ്ടനാണ്, വരാനിരിക്കുന്ന ചർച്ചകളിലൂടെ ഉടൻ ഒരു ശാശ്വത കരാറിലെത്തുമെന്ന് ഞാൻ പ്രതീക്ഷിക്കുന്നു.”
സൈനിക നടപടിയിൽ ഗണ്യമായ നേട്ടം
എന്തായാലും, പ്രാരംഭദിവസങ്ങളിൽ ഇന്ത്യൻ സായുധ സേനയുടെ പ്രകടനം വ‍്യക്തമാക്കുന്നത് പാക്കിസ്ഥാന് നന്നായി പ്രതികരിക്കാനായില്ല എന്നാണ്. പാക്കിസ്ഥാനിലെ തീവ്രവാദ ഗ്രൂപ്പുകൾക്കെതിരേ ഇന്ത്യ പോരാടുകയാണെന്ന് മോദി തുടക്കം മുതൽതന്നെ വ്യക്തമാക്കിയിരുന്നു.
പാക്കിസ്ഥാൻ സർക്കാരിന്‍റെ പിന്തുണയോടെയുള്ള ഈ ഗ്രൂപ്പുകളുടെ പ്രവർത്തനങ്ങൾ രാജ്യത്തെ ഈ ഗ്രൂപ്പുകളുടെ നിലനിൽപ്പിനെ പ്രോത്സാഹിപ്പിക്കുന്നതാക്കി മാറ്റി. രാജ്യത്തിന്‍റെ പല ഭാഗങ്ങളിലും പറഞ്ഞറിയിക്കാനാവാത്ത ദുരിതങ്ങൾ വരുത്തിവയ്ക്കുകയും വർഗീയസ്പർധ സൃഷ്ടിക്കുകയും ചെയ്തു. ആദ്യദിവസങ്ങളിൽതന്നെ പാക്കിസ്ഥാന്‍റെ വിവിധ ഭാഗങ്ങളിലുള്ള ഒമ്പത് തീവ്രവാദ ഗ്രൂപ്പുകളുടെ കേന്ദ്രങ്ങൾ ഇന്ത്യക്ക് നശിപ്പിക്കാൻ കഴിഞ്ഞു. പാക്കിസ്ഥാനിലെ നിരവധി സൈനിക കേന്ദ്രങ്ങളിൽ ഇന്ത്യൻ സൈന്യത്തിന് ആക്രമണം നടത്താനുമായി.
സൈനിക നടപടിയിൽ ഗണ്യമായ നേട്ടങ്ങൾ ഉണ്ടായിരുന്നിട്ടും ആദ്യ ആഴ്ചയിൽതന്നെ പ്രധാനമന്ത്രി നരേന്ദ്ര മോദി ഓപ്പറേഷൻ സിന്ദൂർ നടപടികൾ നിർത്തിവയ്ക്കാൻ തീരുമാനിച്ചതും തീവ്രവാദ ഗ്രൂപ്പുകൾക്കെതിരേ ഇന്ത്യ ശക്തമായി പ്രതികരിച്ചതും ശ്രദ്ധേയമായി. ഓപ്പറേഷൻ സിന്ദൂർ താത്കാലികമായി നിർത്തിവച്ചതും ഇന്ത്യക്ക് ഗുണകരമാകും. കൂടുതൽ തീവ്രവാദ, സൈനിക പ്രവർത്തനങ്ങൾ നിർത്തലാക്കുമെന്ന പാക്കിസ്ഥാന്‍റെ ഉറപ്പിനെത്തുടർന്നാണ് പ്രതികാര നടപടികൾ താത്കാലികമായി നിർത്താനുള്ള തീരുമാനമുണ്ടായത്.
“വരും ദിവസങ്ങളിൽ പാക്കിസ്ഥാൻ തീവ്രവാദത്തിനെതിരേ സ്വീകരിക്കുന്ന മനോഭാവത്തിന്‍റെ അടിസ്ഥാനത്തിൽ സ്വീകരിക്കുന്ന ഓരോ ചുവടും ഞങ്ങൾ അളക്കും...” മോദി കൂട്ടിച്ചേർത്തു. ഓപ്പറേഷൻ സിന്ദൂർ വെറുമൊരു ഓപ്പറേഷൻ മാത്രമായിരുന്നില്ല; മറിച്ച്, ഭീകരതയ്‌ക്കെതിരായ ഒരു സിദ്ധാന്തപരമായ മാറ്റവും നയവുമായിരുന്നു.” ‘ആണവാക്രമണമെന്ന ബ്ലാക്മെയിൽ തന്ത്രം’ ഇന്ത്യക്കെതിരേ പ്രവർത്തിക്കില്ലെന്നു ന്യൂഡൽഹി ചൂണ്ടിക്കാട്ടി. പുതിയ മാതൃക ശക്തിപ്പെടുത്തുന്നതിനായി മോദി പറഞ്ഞു, “ഇതൊരു പുതിയ സാഹചര്യമാണ്. നമ്മുടെ പൗരന്മാർ ആക്രമിക്കപ്പെട്ടാൽ ഇന്ത്യ ഭീകരതയുടെ ചങ്കു തകർക്കും.” ചില ലോകനേതാക്കൾക്ക് നേരിട്ടുള്ള സന്ദേശം നൽകിക്കൊണ്ട് മോദി ഉറപ്പിച്ചു പറഞ്ഞു, “ഭീകരതയും ചർച്ചയും ഒരുമിച്ച് പോകില്ല; ഭീകരതയും വ്യാപാരവും ഒരുമിച്ച് പോകില്ല. വെള്ളവും രക്തവും ഒരുമിച്ച് ഒഴുകില്ല.” അദ്ദേഹം കൂട്ടിച്ചേർത്തു, “നമ്മുടെ സഹോദരിമാരുടെ നെറ്റിയിൽനിന്ന് സിന്ദൂരം തുടച്ചുമാറ്റാൻ ഭീകരൻ ധൈര്യപ്പെട്ടു - അതുകൊണ്ടാണ് ഇന്ത്യ പാക്കിസ്ഥാനിലെ ഭീകരതയുടെ ആസ്ഥാനം തന്നെ നശിപ്പിച്ചത്.” പഹൽഗാം ആക്രമണത്തിന് മറുപടി നൽകുന്നതിനായി ഇന്ത്യയുടെ സൈനിക ആക്രമണങ്ങൾ തീവ്രവാദ അടിസ്ഥാന സൗകര്യങ്ങളിൽ ചെലുത്തിയ സ്വാധീനം വിശദീകരിച്ചുകൊണ്ട്, ആക്രമണങ്ങൾ പാക്കിസ്ഥാൻ നേതൃത്വത്തിൽ ഞെട്ടൽ തരംഗങ്ങൾ സൃഷ്ടിച്ചുവെന്നും അദ്ദേഹം പ്രസ്താവിച്ചു.
മതപരമായ സ്ഥലങ്ങൾ, സ്കൂളുകൾ, സൈനിക, സിവിലിയൻ സ്ഥാപനങ്ങൾ എന്നിവ ലക്ഷ്യമിട്ടുള്ള പാക്കിസ്ഥാന്‍റെ പ്രതികാര നടപടിയെ അപലപിച്ച മോദി, ഇന്ത്യ ‘തന്ത്രപരമായി’ ആക്രമണം നടത്തിയെന്നും പാക്കിസ്ഥാന്‍റെ ഭീകര അടിസ്ഥാന സൗകര്യങ്ങളുടെ മർമ്മത്ത് ആക്രമണം നടത്തിയെന്നും വിശദീകരിച്ചു. “പാക്കിസ്ഥാൻ സൈന്യവും പാക്കിസ്ഥാൻ സർക്കാരും ഭീകരതയെ പ്രോത്സാഹിപ്പിക്കുന്ന രീതിപോലെ, ഒരു ദിവസം അവർ പാക്കിസ്ഥാനെതന്നെ നശിപ്പിക്കും. പാക്കിസ്ഥാൻ അതിജീവിക്കാൻ ആഗ്രഹിക്കുന്നെങ്കിൽ, അവരുടെ ഭീകര അടിസ്ഥാന സൗകര്യങ്ങൾ നശിപ്പിക്കേണ്ടിവരും” എന്ന് മോദി മുന്നറിയിപ്പു നൽകി.
ഹോട്ട്‌ലൈൻ ചർച്ച
ചുരുക്കിപ്പറഞ്ഞാൽ, ഏതാനും ദിവസങ്ങൾക്കുള്ളിൽ, ഉഭയകക്ഷി ചർച്ചകളും ശത്രുത അവസാനിപ്പിക്കലും എന്ന ആശയം പാക്കിസ്ഥാന്‍റെ ഭാഗത്തുനിന്ന് ഉയർന്നുവന്നു. ഒരു മോശം ആണവയുദ്ധം ഒഴിവാക്കാൻ ഇരു രാജ്യങ്ങളെയും ചർച്ചകൾക്കായി ഒരുമിച്ച് കൊണ്ടുവരുന്നതിൽ തനിക്കു പങ്കുണ്ടെന്ന് യുഎസ് പ്രസിഡന്‍റ് ഡോണൾഡ് ട്രംപ്‌പോലും അവകാശപ്പെട്ടു. എന്നിരുന്നാലും ഈ അവകാശവാദത്തെ പിന്തുണയ്ക്കുന്നവർ കുറവായിരുന്നു. ഇന്ത്യൻ വൃത്തങ്ങൾ പറയുന്നതനുസരിച്ച്, സംഘർഷം കുറയ്ക്കുന്നതിനുള്ള കരാർ ഇന്ത്യയുടെയും പാക്കിസ്ഥാന്‍റെയും ഡയറക്ടർ ജനറൽ ഓഫ് മിലിട്ടറി ഓപ്പറേഷൻസ് (ഡിജിഎംഒ) തമ്മിലുള്ള ഒരു ഉഭയകക്ഷി സംരംഭമായിരുന്നു, മൂന്നാം കക്ഷി പങ്കാളിത്തമില്ലാതെ. മേയ് 12ന് ഇന്ത്യയുടെയും പാക്കിസ്ഥാന്‍റെയും ഡിജിഎംഒമാർ ആക്രമണാത്മകവും ശത്രുതാപരവുമായ നടപടികൾക്ക് തുടക്കമിടില്ലെന്ന് സമ്മതിച്ചു. വൈകുന്നേരം അഞ്ചിന് ലെഫ്റ്റനന്‍റ് ജനറൽ രാജീവ് ഘായിയും മേജർ ജനറൽ കാഷിഫ് ചൗധരിയും തമ്മിൽ നടന്ന ചർച്ചയിൽ ഇന്ത്യൻ ആർമി വൃത്തങ്ങൾ പറയുന്നതനുസരിച്ച്, “ഇരുപക്ഷവും വെടിയുതിർക്കുകയോ പരസ്പരം ആക്രമണാത്മകവും ശത്രുതാപരവുമായ നടപടി സ്വീകരിക്കുകയോ ചെയ്യരുതെന്ന പ്രതിബദ്ധത തുടരുന്നതുമായി ബന്ധപ്പെട്ട പ്രശ്നങ്ങൾ ചർച്ച ചെയ്യപ്പെട്ടു.”
ഹോട്ട്‌ലൈനിലൂടെയുള്ള ചർച്ചകളിൽ, അതിർത്തികളിൽനിന്നും മുന്നോട്ടുള്ള പ്രദേശങ്ങളിൽനിന്നും സൈനികരെ കുറയ്ക്കുന്നതിനുള്ള അടിയന്തര നടപടികൾ ഇരുപക്ഷവും പരിഗണിക്കണമെന്ന് രണ്ട് സൈനിക ഉദ്യോഗസ്ഥർ സമ്മതിച്ചതായി കരസേനാ പ്രസ്താവന കൂട്ടിച്ചേർത്തു. കരാറിന് തൊട്ടുപിന്നാലെ, പാക്കിസ്ഥാൻ കരാർ ലംഘിച്ചു. ഇന്ത്യ തിരിച്ചടിച്ചു, തുടർന്ന് ചർച്ചകൾ നടത്തി, കാര്യങ്ങൾ നിയന്ത്രണത്തിലായി. തീർച്ചയായും, പാക് വ്യോമതാവളങ്ങളിൽ ആക്രമണം നടത്തിയത് വഴിത്തിരിവായിരുന്നു. പാക്കിസ്ഥാനിലെ നിരവധി നിർണായക വ്യോമതാവളങ്ങളിൽ ബ്രഹ്‌മോസ് സൂപ്പർസോണിക് മിസൈലുകളും മറ്റ് സ്റ്റാൻഡ്‌ ഓഫ് ആയുധങ്ങളും ഉപയോഗിച്ചുള്ള കൃത്യമായ വ്യോമാക്രമണങ്ങൾ നിർണായകമാണെന്ന് തെളിഞ്ഞു. ഇരു രാജ്യങ്ങളും തമ്മിലുള്ള ശത്രുത വർധിച്ചതിനെത്തുടർന്ന് യുഎസ് ഇടപെട്ട് ഒരു വെടിനിർത്തൽ തേടാൻ തുടങ്ങി. റാവൽപിണ്ടിയിലെ നൂർ ഖാൻ-ചക്‌ലാല വ്യോമതാവളത്തിലുണ്ടായ വലിയ ആക്രമണം അവിടത്തെ അടിസ്ഥാന സൗകര്യങ്ങൾക്ക് കേടുപാടുകൾ വരുത്തി. ഇസ്‌ലാമാബാദിൽനിന്ന് കഷ്ടിച്ച് 10 കിലോമീറ്റർ അകലെ, പാക്കിസ്ഥാന്‍റെ ആണവായുധ ശേഖരം കൈകാര്യം ചെയ്യുന്ന സ്ട്രാറ്റജിക് പ്ലാൻ ഡിവിഷന്‍റെ ആസ്ഥാനത്തിന് സമീപമാണ് ഇത് സ്ഥിതിചെയ്യുന്നത്. ഇത് അവിടത്തെ അധികാരികൾക്ക് ഗുരുതരമായ ആശങ്കയാണുണ്ടാക്കിയത്.
സംഭവത്തിനുശേഷം, പാക്കിസ്ഥാൻ അമേരിക്കൻ സഹായികളെ സമീപിച്ചു. മേയ് 10ന്, പാക്കിസ്ഥാൻ സൈനിക മേധാവി അസിം മുനീറുമായി ചർച്ച നടത്തിയ ശേഷം, യുഎസ് വിദേശകാര്യ സെക്രട്ടറി മാർക്കോ റൂബിയോ വിദേശകാര്യ മന്ത്രി എസ്. ജയ്ശങ്കറുമായി സംസാരിക്കുകയും പാക്കിസ്ഥാൻ വെടിനിർത്താൻ തയാറാണെന്ന് അദ്ദേഹത്തോട് പറയുകയും ചെയ്തു. പരിണതപ്രജ്ഞൻ എന്ന നിലയിൽ, ഒരു രാഷ്‌ട്രീയ സംഭാഷണവും ഉണ്ടാകില്ലെന്നും അവർ ഇന്ത്യൻ ഡിജിഎംഒയെ സമീപിക്കണമെന്നും ജയശങ്കർ അദ്ദേഹത്തെ അറിയിച്ചു.
പാക്കിസ്ഥാന്‍റെ നിലപാട് അത്ര സുഖകരമല്ല
അവിടെ വിഷയങ്ങൾ കൈകാര‍്യംചെയ്യാൻ കഴിയുന്ന ഒരു മുതിർന്ന രാഷ്‌ട്രീയ നേതാവുമില്ല. മുതിർന്ന നേതാവായ ഇമ്രാൻ ഖാൻ രാഷ്‌ട്രീയമായി അത്ര സജീവമല്ല. പഞ്ചാബിലെ ചില ഉന്നത നേതാക്കളും സുരക്ഷിതമായ നിലപാടുകൾ സ്വീകരിക്കുന്നു. നിലപാടുകൾ സ്വീകരിക്കുന്ന സൈന്യം അവരുടെ രാഷ്‌ട്രീയ താത്പര‍്യങ്ങൾക്കനുസരിച്ച് തീരുമാനങ്ങൾ എടുക്കുന്നു, അവയിൽ ചിലത് ചിലപ്പോൾ പ്രകടമായ ഭിന്നതകൾക്ക് കാരണമാകുന്നു. സമീപകാല സംഭവവികാസങ്ങളിൽപോലും അക്രമം അവസാനിപ്പിക്കാൻ ഇന്ത്യ ആരെയും സമീപിച്ചില്ല. വ്യത്യസ്ത കാഴ്ചപ്പാടുകളുള്ളതും സംഭവവികാസങ്ങൾ കാത്തിരുന്ന് കാണാൻ ഇഷ്ടപ്പെടുന്നതുമായ ചില മുതിർന്ന സൈനിക ഉദ്യോഗസ്ഥരുള്ളതിനാൽ, സാമ്പത്തിക പ്രശ്‌നങ്ങളും അസ്ഥിരതയുമുള്ള പാക്കിസ്ഥാന്‍റെ നിലപാട് അത്ര സുഖകരമല്ല.
അത്തരമൊരു സാഹചര്യം ഇന്ത്യയുടെ താത്പര്യങ്ങൾക്ക് ഒട്ടും അനുയോജ്യമല്ല. വ്യക്തമായ നേതൃത്വം ഉയർന്നുവരാത്ത സാഹചര്യത്തിൽ, പാക്കിസ്ഥാന്‍റെ ആണവനയത്തെക്കുറിച്ച്, പ്രത്യേകിച്ച് അയൽരാജ‍്യം, ജാഗ്രത പാലിക്കേണ്ടതുണ്ട്. പാക് ആണവായുധ ശേഖരം അന്താരാഷ്‌ട്ര ആണവോർജ ഏജൻസിയുടെ നിരീക്ഷണത്തിൽ സൂക്ഷിക്കാൻ അഭ്യർഥിക്കുക എന്നതാണ് ഏറ്റവും നല്ല മാർഗം. പ്രതിരോധ മന്ത്രി രാജ്നാഥ് സിംഗ് ഇതിനകംതന്നെ ഈ വിഷയം ഉന്നയിച്ചിട്ടുണ്ട്. പാക്കിസ്ഥാന്‍റെ ആണവശേഖരത്തിന്‍റെ സുരക്ഷയെ സിംഗ് ചോദ്യം ചെയ്യുകയും അയൽരാജ്യത്തിന്‍റെ ‘നിരുത്തരവാദപരമായ’ പെരുമാറ്റത്തിൽ ആശങ്ക പ്രകടിപ്പിച്ചുകൊണ്ട് അന്താരാഷ്‌ട്ര ആണവോർജ ഏജൻസിയുടെ മേൽനോട്ടം ആവശ്യപ്പെടുകയും ചെയ്തു.
“നമ്മൾ ഒരിക്കലും ആണവഭീഷണിക്ക് വഴങ്ങില്ല. പാക്കിസ്ഥാന്‍റെ അശ്രദ്ധമായ ആണവഭീഷണികൾ ഭീകരത ഇല്ലാതാക്കാനുള്ള ഇന്ത്യയുടെ ദൃഢനിശ്ചയത്തെ തടഞ്ഞിട്ടില്ല. ഞാൻ ആഗോള സമൂഹത്തോട് ചോദിക്കുന്നു; ഇത്രയും ഉത്തരവാദിത്വമില്ലാത്തതും തെമ്മാടിയുമായ ഒരു രാഷ്‌ട്രത്തിന്‍റെ കൈകളിൽ ആണവായുധങ്ങൾ സുരക്ഷിതമാണോ? ഈ ആയുധങ്ങൾ അന്താരാഷ്‌ട്ര ആണവോർജ ഏജൻസിയുടെ മേൽനോട്ടത്തിൽ വരണം.” ദേശീയ സുരക്ഷയിലും ഭീകരവാദത്തിനെതിരായും ഇന്ത്യയുടെ വിശാല നിലപാട് രാജ്നാഥ് സിംഗ് വീണ്ടും ഉറപ്പിച്ചു പറഞ്ഞു.
രാജ്യത്തിന്‍റെ നയരൂപീകരണത്തിന് പുനർനിർവചനം നൽകിയതിന് പ്രധാനമന്ത്രി നരേന്ദ്ര മോദിയെ അദ്ദേഹം പ്രശംസിച്ചു. “ഇന്ത്യൻ മണ്ണിനെതിരായ ഏതൊരു ആക്രമണവും ഇനി ഒറ്റപ്പെട്ട അക്രമമായി കാണില്ല - അത് ഒരു യുദ്ധപ്രവൃത്തിയായി കണക്കാക്കപ്പെടുന്നു” എന്ന് സിംഗ് പറഞ്ഞു.
പാക്കിസ്ഥാന്‍റെ ആണവായുധ ശേഖരം അന്താരാഷ്‌ട്ര ആണവോർജ ഏജൻസിയുടെ നിരീക്ഷണത്തിലായിരിക്കുന്നതിന് ആവശ്യമായ നീക്കങ്ങൾ ഇന്ത്യ നടത്തേണ്ട സമയം അതിക്രമിച്ചിരിക്കുന്നു.