എന്തായാലും ഉള്ളിലുള്ളത് ആനയാണോ ചേനയാണോ എന്നറിയുന്നതിനുമുന്പേ മാധ്യമങ്ങൾ എല്ലാംകൂടി പുസ്തകത്തിന്‍റെ മുകളിലേക്കു ചാടിവീണു. വലിച്ചുകീറിയും കടിച്ചുകീറിയും പരിശോധിക്കുന്നതിനിടയിലാണ് ദാ കിടക്കുന്നു പുസ്തകത്തിൽ സ്വപ്ന! സ്വപ്നയെക്കുറിച്ചു സ്വപ്ന സ്വപ്നത്തിൽപ്പോലും വിചാരിക്കാത്ത കാര്യങ്ങൾ ആനപ്പുസ്തകത്തിൽ ഉണ്ടെന്നു മാധ്യമങ്ങളുടെ കാക്കദൃ ഷ്ടി കണ്ടുപിടിച്ചു.
പുസ്തകത്തിലാകെ ആനവാലു പോലെ അഞ്ചോ ആറോ സ്വപ്നവരികളേ ഉണ്ടായിരുന്നുള്ളെങ്കിലും മാധ്യമങ്ങൾക്കു കത്തിക്കാൻ അതു ധാരാളം. ഇതോടെ ജയിലിൽനിന്ന് ഇറങ്ങിയതിനു ശേഷം മൗനവ്രതത്തിലായിരുന്ന സ്വപ്നമാഡം സ്വപ്നലോകത്തുനിന്നു ഞെട്ടിയെഴുന്നേറ്റു. ഞാൻ കണ്ട ശിവശങ്കർജി ഇങ്ങനയല്ലെന്നു തുറന്നടിച്ചു. ഈ ആനയെ തളയ്ക്കാനുള്ള ചങ്ങലയും തോട്ടിയുമെല്ലാം തന്‍റെ കൈവശമുണ്ടെന്ന മട്ടിലായിരുന്നു മാഡത്തിന്‍റെ പടപ്പുറപ്പാട്.
എന്നാൽ, ഈ ആനയെ തളയ്ക്കൽ അത്ര എളുപ്പമാകില്ലെന്നാണ് ഒടുവിലത്തെ കാഴ്ചകളിൽ കാണുന്നത്. അല്ലെങ്കിലും ആന മെലിഞ്ഞാലും തൊഴുത്തിൽ കെട്ടാൻ പറ്റില്ലല്ലോ. മാധ്യമങ്ങളിൽ അഭിമുഖങ്ങൾ വന്നതിനു പിന്നാലെ മാഡത്തിനെതിരേയുള്ള പഴയ ഒരു കേസിൽ കുറ്റപത്രം സമർപ്പിച്ചിരിക്കുകയാണ് ക്രൈംബ്രാഞ്ച് സംഘം. വെള്ളത്തിലെ സ്രാവല്ല കരയിലെ ആനയെന്ന് ഇപ്പോൾ മാഡത്തിനു മനസിലായി വരുന്നുണ്ടാകണം. ഇനിയിപ്പോൾ അറ്റകൈ പ്രയോഗമെന്ന നിലയിൽ മാഡത്തിനും പുസ്തകമെഴുതാം. ആനയും സ്രാവുമൊക്കെ പോയെങ്കിൽ പോട്ടെ, സിംഹവും തിമിംഗലവും ദിനോസറുമൊക്കെ ബാക്കിയുണ്ടല്ലോ!
മിസ്ഡ് കോൾ=വോട്ടുതെറ്റിയാൽ യുപി
കേരളമാകുമെന്നു യോഗി.
- വാർത്ത
=നിലവിൽ സ്വിറ്റ്സർലൻഡ് ആണ്!
ഔട്ട് ഓഫ് റേഞ്ച് / ജോണ്‍സണ്‍ പൂവന്തുരുത്ത്