കഴിഞ്ഞവർഷം ജപ്പാനിലെ ഫുക്കുവോക്കയിൽ നടന്ന ലോകചാന്പ്യൻഷിപ്പിൽ 400 മീറ്റർ വ്യക്തിഗത മെഡ്‌ലെയിൽ മത്സരിച്ച മർഷോങിന്റെ കുതിപ്പിൽ തകർന്നടിഞ്ഞത് ഫെൽപ്സിന്‍റെ 15 വർഷം പഴക്കമുള്ള റിക്കാർഡായിരുന്നു. ഇതിനു പിന്നാലെയാണ് അടുത്ത മൈക്കൽ ഫെൽപ്സ് എന്ന വിശേഷണം ഇദ്ദേഹത്തെ തേടിയെത്തിയത്.
ഫെൽപ്സിന്‍റെ ആരാധകൻ
ഫെൽപ്സിന്‍റെ കടുത്ത ആരാധകൻ കൂടിയായ മർഷോങ് അമേരിക്കൻ താരത്തിന്‍റെ അതേ ശൈലിയാണ് പിന്തുടരുന്നത്. ഈ ഒളിന്പിക്സിൽ 200 മീറ്റർ ബട്ടർഫ്ളൈയിലെയും ബ്രെസ്റ്റ്സ്ട്രോക്കിലെയും സ്വർണനേട്ടം ഇതിഹാസ പദവിയും ഈ ഫ്രഞ്ചു താരത്തിനു നേടിക്കൊടുത്തു. ഒരേ ഒളിന്പിക്സിൽ ബട്ടർഫ്ളൈയിലും ബ്രെസ്റ്റ് സ്ട്രോക്കിലും സ്വർണം നേടുന്ന വേറൊരു താരം ഒളിന്പിക്സ് ചരിത്രത്തിൽ മുന്പുണ്ടായിട്ടില്ല.
ഇത്രയും കാലം മറ്റ് നീന്തൽതാരങ്ങൾക്കാർക്കും സ്വന്തമാക്കാൻ സാധിക്കാതിരുന്ന സ്വപ്നനേട്ടം ഒരൊറ്റ രാത്രി കൊണ്ടാണ് മർഷോങ് സാക്ഷാത്കരിച്ചതെന്നതും ശ്രദ്ധേയം. ഒരൊറ്റ ദിവസം രണ്ടു വ്യക്തിഗത സ്വർണം നേടുന്ന ഒളിന്പിക് ചരിത്രത്തിലെ നാലാമത്തെ മാത്രം താരമാണ് മർഷോങ്.
ഒരു ഒളിന്പിക്സിൽ ഫ്രാൻസിനായി രണ്ടു വ്യക്തിഗത സ്വർണം നേടുന്ന ആദ്യ നീന്തൽതാരവും മറ്റാരുമല്ല. ആദ്യ സ്വർണനേട്ടത്തെക്കുറിച്ച് ഫ്രഞ്ച് താരം ഇൻസ്റ്റഗ്രാമിൽ കുറിച്ചതിങ്ങനെ: ‘ഒരു സ്വപ്നം യാഥാർഥ്യമായി.’