ഭാഗ്യം അങ്ങനെയാണ്; അഞ്ചുകോടി രൂപ ലോട്ടറിയടിച്ച പിസാ ഡെലിവറി ഡ്രൈവര്‍

Thursday, March 14, 2024 10:28 AM IST

ഒരു സാധാരണക്കാരന്‍റെ എക്കാലത്തേയും ആശ്വാസമായ പ്രതീക്ഷമാചകമാണ് "എന്നെങ്കിലും രക്ഷപ്പെടും' എന്നത്. ഈ ചിന്തയ്‌ക്കൊപ്പം കഠിനമായി അധ്വാനം ചെയ്യുന്നവന്‍ എന്തായാലും അവിടെ എത്തും.

മറ്റു ചിലര്‍ ഭാഗ്യം നിമിത്തവും അവര്‍ ഉദ്ദേശിച്ച രക്ഷപ്പെടല്‍ നേടാറുണ്ടുതാനും. മിക്കപ്പോഴും ലോട്ടറി ടിക്കറ്റുകളാണ് ഇത്തരം ഭാഗ്യവാന്‍മാരെ വേഗത്തില്‍ സൃഷ്ടിക്കുന്നത്. അത്തരമൊരാളുടെ കഥയിപ്പോള്‍ സമൂഹ മാധ്യമങ്ങളില്‍ വൈറലാകുന്നു.

മാരിയസ് പ്രെഡ എന്ന 28കാരനാണ് ഈ കഥാനായകന്‍. യുണൈറ്റഡ് കിംഗ്ഡത്തിലെ സ്റ്റാഫോര്‍ഡ്ഷെയറിലെ ടാംവര്‍ത്തില്‍ താമസിക്കുന്ന ഇദ്ദേഹം പാപ്പാ ജോണില്‍ പിസാ ഡെലിവറി ഏജന്‍റായി ജോലി ചെയ്യുകയാണ്. മണിക്കൂറില്‍ 12 പൗണ്ട് (1,272 രൂപ) എന്നതായിരുന്നു ഇദ്ദേഹത്തിന്‍റെ ജോലിവഴിയുള്ള സമ്പാദ്യം.

പ്രെഡയുടെ സ്വദേശം റൊമാനിയ ആണ്. യുകെയില്‍ ഭാര്യയ്ക്കും മകള്‍ക്കുമൊപ്പമാണ് താമസം. കുടുംബം പുലര്‍ത്താന്‍ കഷ്ടപ്പെടുന്നതിനിടെ കഴിഞ്ഞ മാസം ഒരു ലോട്ടറി എടുക്കുകയുണ്ടായി. ഠബെസ്റ്റ് ഓഫ് ദി ബെസ്റ്റ്' എന്ന ബമ്പര്‍ ആണ് എടുത്തത്.

ഫലം വന്നപ്പോള്‍ ജാക്ക്‌പോട്ട് മാരിയസിന്. 500,000 പൗണ്ട് (5,30,05,650 രൂപ) ആണ് സമ്മാനത്തുക. ജീവിതംതന്നെ മാറിമറിഞ്ഞെന്നു പറയാം. നിനയ്ക്കാതെ എത്തിയ ഭാഗ്യത്തില്‍ ആഹ്ലാദവാനാണ് മാരിയസ്. ജന്മനാടായ റൊമാനിയയില്‍ ഒരു വീട് വയ്ക്കണമെന്നാണ് ഇദ്ദേഹത്തിന്‍റെ ആഗ്രഹം.

എന്നിരുന്നാലും തന്‍റെ ജോലികളയാന്‍ ഇദ്ദേഹം ഒരുക്കമല്ല. തുടര്‍ന്നും ഇത്തരത്തില്‍തന്നെ അധ്വാനിച്ചു മുന്നോട്ടുപോകാനാണ് മാരിയസിന്‍റെ തീരുമാനം. ഭാഗ്യവും സന്തോഷവും നല്‍കിയ ജോലി വിട്ടുകളയാന്‍ താത്പര്യമില്ലത്രെ...

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.