അഗ്നിപർവത സ്ഫോടനത്തിനു ശേഷം രൂപം കൊണ്ടത് പുതിയ ദ്വീപ്

തെക്കൻ പസഫിക്ക് സമുദ്രത്തിലെ ഹുംഗ ടോംഗ, ഹുംഗ ഹാപയ് ദ്വീപുകൾക്കു നടുവിൽ രൂപം കൊണ്ട പുതിയ ദ്വീപാണ് ഗവേഷകർക്ക് അത്ഭുതം സമ്മാനിക്കുന്നത്. ഇവിടെ സ്ഥിതി ചെയ്തിരുന്ന ഒരു അഗ്നിപർവതം 2014- 2015 കാലഘട്ടത്തിൽ പൊട്ടിയിരുന്നു. തുടർന്ന് ഇവിടെ വന്ന പുകയും ചാരവും കുമിഞ്ഞു കൂടിയാണ് ഈ പുതിയ ദ്വീപുണ്ടായതെന്നായിരുന്നു ഇതുവരെയുള്ള ഗവേഷകരുടെ നിഗമനം. മാത്രമല്ല ഈ ദ്വീപിനെ എപ്പോഴും നിരീക്ഷിക്കാൻ നാസയും രംഗത്തെത്തിയിരുന്നു.

ഈ ദ്വീപ് നശിച്ചു പോകുമെന്നായിരുന്നു ഏവരുടെയും കണക്ക് കൂട്ടൽ. എന്നാൽ ചെടികൾ മുളച്ചു പൊങ്ങുകയും പക്ഷികൾ കൂട്ടമായി എത്തുവാൻ തുടങ്ങിയതോടെ ഈ ദ്വീപ് കുറയധികം നാൾ നിലനിൽക്കുമെന്ന നിഗമനത്തിൽ ഗവേഷകരെത്തി.

കഴിഞ്ഞ വർഷം നാസ പുറത്തിറക്കിയ റിപ്പോർട്ട് അനുസരിച്ച് ഈ ദ്വീപ് ഏകദേശം 30 വർഷത്തോളം നിലനിൽക്കുമെന്നാണ് അറിയാൻ സാധിക്കുന്നത്. 2017 ഒക്ടോബറിലാണ് നാസയുടെ ഗവേഷക സംഘം ആദ്യമായി ഈ ദ്വീപിൽ എത്തുന്നത്. എന്നാൽ അവരുടെ അന്വേഷണത്തിൽ അഗ്നിപർവത സ്ഫോടനത്തിലുള്ള ചാരമല്ല ദ്വീപിലെ മണ്ണെന്ന് അവർ കണ്ടെത്തി.

ഇളം കറുപ്പ് നിറത്തിലുള്ള പശിമയുള്ള മണ്ണാണിതെന്ന് അവർ അറിയിക്കുന്നു. ഇതിനെക്കുറിച്ചുള്ള കൂടുതൽ പഠനങ്ങൾക്ക് തയാറാകുകയാണ് നാസ. തങ്ങൾ കരുതിയതിലും മുൻപ് ഈ ദ്വീപ് ഇല്ലാതാകാൻ സാധ്യതയുണ്ടെന്ന് ഗവേഷകർ വിശ്വസിക്കുന്നു കാരണം ശക്തമായ തിരയും മഴയും കൊണ്ട് ദ്വീപിന്‍റെ പല ഭാഗങ്ങളും നശിച്ചുകൊണ്ടിരിക്കുകയാണ്.

ജിപിഎസും ഡ്രോണുകളും ഉപയോഗിച്ച് ദ്വീപിന്‍റെ 3ഡി മാപ്പിംഗിനായുള്ള ശ്രമത്തിലാണ് നാസ ഇപ്പോൾ.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.