കോഴിക്കോട്ട് കാൽവഴുതി ഓടയിൽ വീണയാളുടെ മൃതദേഹം കണ്ടെത്തി
Monday, March 17, 2025 7:47 AM IST
കോഴിക്കോട്: കോവൂരിൽ അബദ്ധത്തിൽ കാൽ വഴുതി ഓടയിൽ വീണയാൾ മരിച്ചു. കളത്തിന്പൊയില് ശശിയാണ് മരിച്ചത്.
പത്ത് മണിക്കൂർ നീണ്ട തെരച്ചിലിനൊടുവിൽ പാലാഴിയിലെ റോഡിന് സമീപത്തെ ഓടയിൽ നിന്നുമാണ് മൃതദേഹം കണ്ടെത്തിയത്.
കോഴിക്കോട് കോവൂരിൽ ഞായറാഴ്ച രാത്രി എട്ടരയോടെയാണ് സംഭവം. കോവൂര് എംഎല്എ റോഡിലെ ബസ് സ്റ്റോപ്പില് ഇരിക്കുകയായിരുന്ന ശശി അബദ്ധത്തില് കാല് വഴുതി ഓവുചാലില് വീഴുകയായിരുന്നു.
വീടിന് തൊട്ടടുത്ത് വച്ചാണ് അപകടം സംഭവിച്ചത്. ശക്തമായ മഴയായതിനാല് ഓവുചാലില് വെള്ളം കുത്തിയൊലിക്കുന്ന നിലയിലായിരുന്നു.
ആദ്യം നാട്ടുകാരും പിന്നീട് ബീച്ചില് നിന്നുള്ള ഫയര്ഫോഴ്സ് യൂണിറ്റും ഓടയില് രണ്ടരക്കിലോമീറ്ററോളം ദൂരം തെരച്ചില് നടത്തിയിട്ടും ശശിയെ കണ്ടെത്താന് കഴിഞ്ഞില്ല. പുലർച്ചെ രണ്ടുവരെ തെരച്ചില് നടത്തിയിരുന്നു. തുടർന്ന് ഇന്ന് രാവിലെ തെരച്ചിൽ പുനഃരാരംഭിച്ചപ്പോഴാണ് മൃതദേഹം കണ്ടെത്തിയത്.