നൂറു കോടി നൽകി എംഎൽഎമാരെ കൂറുമാറ്റാൻ നീക്കം; വെളിപ്പെടുത്തി മുഖ്യമന്ത്രി
Friday, October 25, 2024 7:37 AM IST
തിരുവനന്തപുരം: എൻസിപി മന്ത്രിസ്ഥാനത്തിൽ തോമസ് കെ. തോമസ് എംഎൽഎയ്ക്ക് കുരുക്കായത് നൂറു കോടി രൂപ വാഗ്ദാനം ചെയ്ത് രണ്ട് എംഎൽഎമാരെ കൂറുമാറ്റാൻ നീക്കം നടത്തിയതിന്റെ പേരിൽ. ഇതേതുടർന്നാണ് തോമസ് കെ.തോമസിന്റെ മന്ത്രിസഭാ പ്രവേശം മുഖ്യമന്ത്രി അനുവദിക്കാതിരുന്നത്.
അജിത് പവാർ പക്ഷത്തേക്ക് രണ്ട് എംഎൽഎമാരെ എത്തിക്കാൻ 50 കോടി രൂപ വീതം തോമസ് കെ. തോമസ് വാഗ്ദാനം ചെയ്തുവെന്നാണ് വിവരം. ഈ ഗുരുതര ആക്ഷേപം സിപിഎം സംസ്ഥാന സെക്രട്ടേറിയറ്റിൽ മുഖ്യമന്ത്രി റിപ്പോർട്ട് ചെയ്തു.
എംഎൽഎമാരായ ആന്റണി രാജുവിനും കോവൂർ കുഞ്ഞുമോനുമാണ് തോമസ് കെ. തോമസ് പണം വാഗ്ദാനം ചെയ്തത്. എന്നാൽ ആരോപണം പൂർണമായി നിഷേധിക്കുന്ന കത്ത് തോമസ് കെ. തോമസ് മുഖ്യമന്ത്രിക്കു കൈമാറി. സംഭവം ആന്റണി രാജു സ്ഥിരീകരിച്ചതായാണ് വിവരം.