സംസ്ഥാനത്ത് ഇന്നും മഴ; അഞ്ച് ജില്ലകളില് യെല്ലോ അലര്ട്ട്
Thursday, October 24, 2024 8:25 AM IST
തിരുവനന്തപുരം: സംസ്ഥാനത്ത് ഇന്നും ശക്തമായ മഴ മുന്നറിയിപ്പ്. അഞ്ച് ജില്ലകളില് കേന്ദ്ര കാലാവസ്ഥാ വകുപ്പ് യെല്ലോ അലര്ട്ട് പ്രഖ്യാപിച്ചു. പത്തനംതിട്ട, ആലപ്പുഴ, കോട്ടയം, എറണാകുളം, ഇടുക്കി ജില്ലകളിലാണ് അലര്ട്ടുള്ളത്.
ഒറ്റപ്പെട്ട ശക്തമായ മഴയ്ക്കുള്ള സാധ്യതയാണ് പ്രവചിക്കുന്നത്. അതേസമയം, കേരള - കര്ണാടക- ലക്ഷദ്വീപ് തീരങ്ങളില് മത്സ്യബന്ധനത്തിന് തടസമില്ല.
സംസ്ഥാനത്ത് മിക്കയിടങ്ങളിലും കഴിഞ്ഞദിവസം കനത്ത മഴയായിരുന്നു പെയ്തത്. വിതുര ബോണക്കാട് റോഡില് മണ്ണിടിച്ചിലിനെ തുടര്ന്ന് റോഡ് അടച്ചു. രാവിലെ മണ്ണ് മാറ്റി ഗതാഗതം പുനഃസ്ഥാപിക്കും. ആറ്റിങ്ങല് വെഞ്ഞാറമൂട് റോഡില് വാകമരം കടപുഴകി റോഡില് വീണു. ഇലക്ട്രിക് ലൈനിലും സമീപത്തെ കടയുടെ മുകളിലേക്കുമാണ് മരം വീണത്. സംഭവത്തില് ഇരുചക്രവാഹന യാത്രികന് പരിക്കേറ്റിരുന്നു.
എറണാകുളത്ത് മഴയില് കുസാറ്റ് ഗ്രൗണ്ടിന്റെ ചുറ്റുമതില് ഇടിഞ്ഞുവീണു. രാത്രി എട്ടരയോടെയാണ് മതില് ഇടിഞ്ഞ് വീണത്. ആളപായമില്ല. ഇടുക്കിയില് ശക്തമായി പെയ്ത മഴയില് വണ്ണപ്പുറത്ത് രണ്ട് പേര് ഒഴുക്കില് പെട്ടിരുന്നു. ഇതില് ഒരാള് മരിച്ചു. വണ്ണപ്പുറം സ്വദേശികളായ ദിവാകരന്, ഭാര്യ ഓമന എന്നിവരാണ് ഒഴുക്കില് പെട്ടത്. ഓമനയാണ് മരിച്ചത്.