ഫയല് തീര്പ്പാക്കിയതിൽ വീഴ്ചയില്ല; നവീന് ബാബുവിന് കളക്ടറുടെ ക്ലീന്ചിറ്റ്
Friday, October 18, 2024 9:24 AM IST
കണ്ണൂർ: പെട്രോള് പമ്പുമായി ബന്ധപ്പെട്ട് എഡിഎം നവീന് ബാബു ഫയല് അകാരണമായി വൈകിപ്പിച്ചിട്ടില്ലെന്ന് കണ്ണൂര് ജില്ലാ കളക്ടറുടെ റിപ്പോര്ട്ട്. കൈക്കൂലി ആരോപണം ഉന്നയിച്ച പ്രശാന്തിന്റെ അപേക്ഷയുമായി ബന്ധപ്പെട്ട കാര്യത്തില് തീര്പ്പുകല്പ്പിക്കുന്നതില് സ്വാഭാവിക സമയം മാത്രമാണ് നവീന് ബാബു എടുത്തത്. ഫയല് തീര്പ്പാക്കുന്നതില് വീഴ്ച പറ്റിയിട്ടില്ലെന്നും റിപ്പോർട്ടിൽ പറയുന്നു.
യാത്രയയപ്പ് സമ്മേളനത്തിന്റെ പിറ്റേന്ന് നവീന് ബാബു ജീവനൊടുക്കിയതിനേ തുടർന്നാണ് സംഭവത്തിൽ കെ.രാജന് കളക്ടറോട് റിപ്പോർട്ട് തേടിയത്. ഇതിന്റെ അടിസ്ഥാനത്തില് തയാറാക്കിയ റിപ്പോര്ട്ടിലാണ് നവീന് ബാബുവിന് ക്ലീന്ചിറ്റ് നല്കിയിരിക്കുന്നത്.
പെട്രോള് പമ്പ് സ്ഥാപിക്കാന് ഉദ്ദേശിച്ച സ്ഥലത്തെ ഭൂമിയുടെ ചരിവാണ് ഒരു പ്രശ്നമായി ജില്ലാ പോ ലീസ് മേധാവി ചൂണ്ടിക്കാട്ടിയത്. എന്നാല് ആ ഭൂമിയില് ചില മാറ്റങ്ങള് വരുത്തിയാല് സംരംഭം തുടങ്ങാമെന്ന് കാണിച്ച് ടൗണ് പ്ലാനര് റിപ്പോര്ട്ട് നല്കി. ടൗണ് പ്ലാനറുടെ റിപ്പോര്ട്ടിന്റെ അടിസ്ഥാനത്തില് ആറു ദിവസം കൊണ്ട് നവീന് ബാബു ഫയല് തീര്പ്പാക്കിയെന്നും ജില്ലാ കലക്ടറുടെ റിപ്പോര്ട്ടിൽ പറയുന്നു.