നവീൻ ബാബുവിന്റെ മരണം; പി.പി.ദിവ്യയ്ക്കെതിരെ കേസെടുത്തു
Thursday, October 17, 2024 6:46 PM IST
കണ്ണൂർ: എഡിഎം നവീൻ ബാബുവിന്റെ മരണത്തിൽ കണ്ണൂർ ജില്ലാ പഞ്ചായത്ത് പ്രസിഡന്റ് പി.പി.ദിവ്യയ്ക്കെതിരെ പോലീസ് കേസെടുത്തു. നവീൻ ബാബുവിന്റെ സഹോദരൻ നൽകിയ പരാതിയുടെ അടിസ്ഥാനത്തിൽ ആത്മഹത്യാ പ്രേരണ കുറ്റം ചുമത്തിയാണ് കേസ്.
ദിവ്യയ്ക്കെതിരെ നവീന്റെ സഹോദരൻ സിറ്റി പോലീസ് കമ്മീഷണർക്ക് പരാതി നൽകിയിട്ടും നടപടിയെടുക്കാൻ പോലീസ് ആദ്യം തയാറായിരുന്നില്ല. ജാമ്യമില്ലാ കുറ്റം ചുമത്തി പോലീസ് കേസ് എടുത്തിട്ടും ദിവ്യയെ ജില്ലാ പഞ്ചായത്ത് പ്രസിഡന്റ് സ്ഥാനത്ത് നിന്ന് നീക്കുന്നതടമുള്ള കാര്യങ്ങളില് സിപിഎം നിലപാട് വ്യക്തമാക്കിയിട്ടില്ല.
നിലവില് ദിവ്യയെ മാത്രമാണ് പ്രതി ചേര്ത്തിട്ടുള്ളതെങ്കിലും കൂടുതല് പേര് പ്രതികളാകുമെന്ന് സൂചനയുണ്ട്. ദിവ്യയ്ക്കും പെട്രോള് പമ്പിന് അപേക്ഷ നല്കിയ പ്രശാന്തിനുമെതിരെ നവീന്റെ കുടുംബം പരാതി നല്കിയിരുന്നു.
ഭാരതീയ ന്യായ സംഹിതയിലെ വകുപ്പ് 108 പ്രകാരം പത്ത് വര്ഷം വരെ തടവ് ശിക്ഷ ലഭാക്കാവുന്ന കുറ്റം ചുമത്തിയാണ് ദിവ്യയ്ക്കെതിരെ പോലീസ് കണ്ണൂര് സെഷന്സ് കോടതിയില് റിപ്പോര്ട്ട് നല്കിയത്.