മലരിക്കൽ ആമ്പൽ ഫെസ്റ്റ് സന്ദർശിച്ച് മന്ത്രി എം.ബി.രാജേഷ്
Tuesday, September 24, 2024 5:30 PM IST
കോട്ടയം: ജനകീയ ഇടപെടലിലൂടെ പ്രാദേശികമായി അത്ഭുതകരമായ മാറ്റങ്ങൾ സാധ്യമാക്കാമെന്നതിന്റെ തെളിവാണ് മലരിക്കൽ ആമ്പൽ ഫെസ്റ്റെന്ന് മന്ത്രി എം.ബി.രാജേഷ്. മീനച്ചിലാർ - മീനന്തറയാർ - കൊടൂരാർ പുനർ സംയോജന പദ്ധതിയെ ലോക ഭൂപടത്തിൽ അടയാളപ്പെടുത്തിയതിൽ ജല ടൂറിസം വലിയ പങ്കാണ് വഹിക്കുന്നതെന്ന് ആമ്പൽ ഫെസ്റ്റ് സന്ദർശിച്ച് മന്ത്രി പറഞ്ഞു.
കുടുംബശ്രീ അംഗങ്ങൾ ആമ്പൽ പൂക്കൾവിറ്റ് മികച്ചവരുമാനം നേടി. വാഹന പാർക്കിംഗ് ഏർപ്പെടുത്തിയും നാടൻ ഭക്ഷണശാലകൾ നടത്തിയും വരുമാനം വർധിപ്പിക്കാനായതും മികച്ച നേട്ടമാണെന്ന് മന്ത്രി പറഞ്ഞു. നദീ പുനർ സംയോജന പദ്ധതി കോ-ഓർഡിനേറ്റർ അഡ്വ.കെ.അനിൽകുമാർ അധ്യക്ഷത വഹിച്ചു.
തിരുവാർപ്പ് പഞ്ചായത്ത് പ്രസിഡന്റ് അജയൻ കെ.മേനോൻ, ടൂറിസം സൊസൈറ്റി സെക്രട്ടറി വി.കെ.ഷാജിമോൻ, പഞ്ചായത്തംഗം ഒ.എസ്.അനീഷ് തുടങ്ങിയവർ പ്രസംഗിച്ചു.