അടിയില്പ്പെട്ട സ്കൂട്ടറുമായി ആറ് കിലോമീറ്റര് സഞ്ചരിച്ച് ലോറി; രണ്ടുപേര്ക്ക് പരിക്ക്
Tuesday, September 24, 2024 12:45 PM IST
കോട്ടയം: പാലായില് അപകടശേഷം അടിയില് അകപ്പെട്ട സ്കൂട്ടറുമായി ആറ് കിലോമീറ്ററില് അധികം സഞ്ചരിച്ച് ലോറി. അപകടത്തില് രണ്ട് യുവാക്കള്ക്ക് പരിക്കേറ്റു.
മേവടി സ്വദേശികളായ അലന് കുരിയന്, നോബി എന്നിവര്ക്കാണ് പരിക്കേറ്റത്. ഗുരുതരമായി പരിക്കേറ്റ ഇവരെ പാലായിലെ സ്വകാര്യ ആശുപത്രിയിലേക്ക് മാറ്റി.
പാലാ ബൈപ്പാസില് തിങ്കളാഴ്ച അര്ധരാത്രിയിലാണ് സംഭവം. റോഡരികില് തങ്ങളുടെ സ്കൂട്ടറില് ഇരുന്ന് സംസാരിച്ച യുവാക്കളുടെ ഇടയിലേക്ക് ലോറി ഇടിച്ചുകയറുകയായിരുന്നു. ഇടിയുടെ ആഘാതത്തില് യുവാക്കള് തെറിച്ചുവീണു.
പിന്നീട് സ്കൂട്ടറുമായി ആറ് കിലോമീറ്ററിലധികം സ്കൂട്ടറുമായി ലോറി സഞ്ചരിച്ചു. മരങ്ങാട്ടുപള്ളിക്ക് സമീപം ഒരു പോസ്റ്റില് ഇടിച്ചാണ് ലോറി നിന്നത്.
ഈ സമയത്ത് ലോറി ഡ്രൈവര് ഓടിരക്ഷപെട്ടു.
സംഭവത്തില് ലോറി ഡ്രൈവര്ക്കെതിരേ പാലാ പോലീസ് കേസെടുത്തിട്ടുണ്ട്. ഇയാള്ക്കായുള്ള തിരച്ചില് തുടങ്ങിയിട്ടുണ്ട്.