തലപ്പുഴയിൽ മാവോയിസ്റ്റുകൾ ക്യാമ്പ് ചെയ്തതായി സൂചന
Tuesday, July 9, 2024 6:01 PM IST
വയനാട്: തലപ്പുഴയിൽ തണ്ടർബോൾട്ട് സംഘം നടത്തിയ പരിശോധനയിൽ മാവോയിസ്റ്റുകൾ ഉപേക്ഷിച്ചതെന്ന് കരുതുന്ന സാധന സാമഗ്രികൾ കണ്ടെത്തി.
ഉൾവനത്തിൽ നടത്തിയ പരിശോധനയിൽ ഭക്ഷ്യ വസ്തുക്കളുടെ കവറുകൾ, ടോർച്ച് , മാവോയിസ്റ്റുകളുടേത് എന്ന് കരുതുന്ന യൂണിഫോം, ടെന്റ് കെട്ടാൻ ഉപയോഗിച്ച ടാർപ്പോളിൻ ഷീറ്റുകൾ എന്നിവ കണ്ടെത്തിയത്.
വിരലടയാള വിദഗ്ധരും, ഡോഗ് സ്ക്വാഡും, എടിഎസും, ഉന്നത പോലീസ് ഉദ്യോഗസ്ഥരും സ്ഥലത്തെത്തി പരിശോധന നടത്തി. അടുത്തിടെ മക്കിമലയിൽ കുഴി ബോംബുകൾ കണ്ടെത്തിയ സംഭവത്തിൽ തണ്ടർബോൾട്ടിന്റെയും പോലീസിന്റെയും നേതൃത്വത്തിൽ പരിശോധന കർശനമാക്കിയിരുന്നു.
ഇതിനിടെയാണ് മാവോയിസ്റ്റുകൾ ഉപേക്ഷിച്ചതെന്ന് കരുതുന്ന സാധന സാമഗ്രികൾ കണ്ടെത്തിയത്. വയനാട്, കണ്ണൂർ ജില്ലകളിൽ മാവോയിസ്റ്റ് സാന്നിധ്യം നേരത്തെ സ്ഥിരീകരിച്ചിരുന്നു.