ഹേമ കമ്മീഷന് റിപ്പോര്ട്ട് പുറത്തുവിടണം; നിര്ണായക ഉത്തരവുമായി വിവരാവകാശ കമ്മീഷന്
Saturday, July 6, 2024 12:09 PM IST
തിരുവനന്തപുരം: സിനിമാ മേഖലയില് സ്ത്രീകള് അനുഭവിക്കുന്ന പ്രശ്നങ്ങള് പഠിച്ചുകൊണ്ടുള്ള ഹേമ കമ്മീഷന് റിപ്പോര്ട്ട് പുറത്തുവിടണമെന്ന നിര്ണായക ഉത്തരവുമായി വിവരാവകാശ കമ്മീഷന്. വ്യക്തികളുടെ സ്വകാര്യവിവരങ്ങളിലേക്ക് കടന്നുകയറുന്നത് ഒഴിച്ചുള്ള മറ്റൊരു വിവരങ്ങളും മറച്ചുവയ്ക്കരുതെന്നാണ് ഉത്തരവ്.
സിനിമാ മേഖലയില് സ്ത്രീകൾ അനുഭവിക്കുന്ന പ്രശ്നങ്ങള് സമഗ്രമായി പഠിച്ച് അവരില്നിന്ന് മൊഴി അടക്കം ശേഖരിച്ചുകൊണ്ടാണ് റിപ്പോര്ട്ട് തയാറാക്കിയത്. നടി ശാരദ, മുന് ഐഎഎസ് ഉദ്യോഗസ്ഥ കെ.ബി.വത്സലകുമാരി അടക്കമുള്ളവര് കമ്മിറ്റിയിൽ അംഗങ്ങളായിരുന്നു.
റിപ്പോര്ട്ട് പുറത്തുവിടണമെന്ന് ഡബ്യൂസിസി അടക്കമുള്ള സംഘടനകളും പലതവണ ആവശ്യപ്പെട്ടിരുന്നു. എന്നാല് റിപ്പോര്ട്ടില് വ്യക്തികളെ ബാധിക്കുന്ന സ്വകാര്യ വിവരങ്ങള് ഉള്ളതിനാല് ഇത് പുറത്തുവിടാന് പറ്റില്ലെന്നായിരുന്നു സാംസ്കാരിക വകുപ്പിന്റെ നിലപാട്.
വിവരാവകാശ അപേക്ഷകളില്പോലും ഈ റിപ്പോര്ട്ട് കൈമാറിയിരുന്നില്ല. ഇതോടെ റിപ്പോര്ട്ട് പുറത്തുവിടണമെന്ന ആവശ്യവുമായി വിവരാവകാശ കമ്മീഷണര്ക്ക് ലഭിച്ച പരാതിയിലാണ് നിലവില് അനുകൂല ഉത്തരവുണ്ടായത്.