മദ്യപിച്ചെത്തി സ്റ്റേഷനിൽ ബഹളമുണ്ടാക്കിയ പോലീസുകാരനെതിരെ കേസ്
Monday, June 17, 2024 6:13 PM IST
പത്തനംതിട്ട: മദ്യപിച്ച് സ്റ്റേഷനിൽ ബഹളമുണ്ടാക്കിയ പോലീസുകാരനെതിരെ കേസെടുത്തു. തിരുവല്ല പോലീസ് സ്റ്റേഷനിൽ ബഹളമുണ്ടാക്കിയ സീനിയർ സിവിൽ പോലീസ് ഓഫീസർ രാജ്കുമാറിനെതിരെ തിരുവല്ല സിഐയുടെ പരാതിയിലാണ് കേസെടുത്തത്.
കഴിഞ്ഞ ദിവസം രാത്രി പത്തിനായിരുന്നു സംഭവം. മെഡിക്കൽ പരിശോധനയ്ക്കായി ആശുപത്രിയിൽ എത്തിച്ചപ്പോൾ ആശുപത്രിയിൽവച്ചും ഇയാൾ ബഹളം ഉണ്ടാക്കിയെന്ന് എഫ്ഐആറിൽ പറയുന്നു. സംഭവ ദിവസം രാജ്കുമാറിന് സ്റ്റേഷനിൽ ജിഡി ഡ്യൂട്ടിയുണ്ടായിരുന്നു.
ഡ്യൂട്ടി സമയത്ത് മദ്യപിച്ചെത്തുകയും അസ്വാഭാവികമായ രീതിയില് പെരുമാറുകയും ബഹളം വെക്കുകയുമായിരുന്നു. രാജ്കുമാറിനെതിരെ വകുപ്പുതല അന്വേഷണത്തിനും ശിപാർശ ചെയ്തിട്ടുണ്ട്.