കെഎസ്ആര്ടിസി ബസിന്റെ പിന്ഭാഗം സ്കൂട്ടറില് തട്ടി അപകടം; അഭിഭാഷക മരിച്ചു
Friday, May 24, 2024 1:51 PM IST
കോട്ടയം: പള്ളം എംസി റോഡില് കെഎസ്ആര്ടിസി ബസിന്റെ പിന്ഭാഗം സ്കൂട്ടറില് തട്ടി പരിക്കേറ്റ യുവതി മരിച്ചു. ചങ്ങനാശേരി തൃക്കൊടിത്താനം മറ്റക്കാട്ട്പറമ്പില് ഫര്ഹാന ലത്തീഫാണ് (24) മരിച്ചത്. കോട്ടയം ബാറിലെ അഭിഭാഷകയാണ്.
ബുധനാഴ്ച വൈകുന്നേരം ആറരയോടെയാണ് അപകടം. പാലായിലേയ്ക്കു പോകുകയായിരുന്ന ബസിന്റെ പിന്ഭാഗം ഫര്ഹാന സഞ്ചരിച്ച സ്കൂട്ടറില് ഇടിയ്ക്കുകയായിരുന്നു. ഇടിയുടെ ആഘാതത്തില് തെറിച്ചുവീണ യുവതി അല്പനേരം റോഡില് കിടന്നു.
പിന്നീട് ഇതുവഴി എത്തിയ യുവാക്കള് അഭിഭാഷകയെ കോട്ടയം മെഡിക്കല് കോളജ് ആശുപത്രിയില് എത്തിച്ചു. ഗുരുതരമായി പരിക്കേറ്റ ഫര്ഹാന അത്യാഹിത വിഭാഗത്തില് ചികിത്സയിലിരിക്കെയാണ് മരണം സംഭവിച്ചത്.
കോട്ടയം ലീഗല് തോട്ടില് വിദ്യാര്ഥിയായിരിക്കെ എസ്എഫ്ഐയുടെ സജീവ പ്രവര്ത്തകയായിരുന്നു ഫര്ഹാന. മുന് ലീഗല് തോട്ട് യൂണിറ്റ് കമ്മിറ്റി അംഗം, മുന് യൂണിവേഴ്സിറ്റി യൂണിയന് കൗണ്സിലര്, എംജി സര്വകലാശാല യൂണിയന് അംഗം, ലീഗല് തോട്ട് യൂണിയന് ചെയര്പേഴ്സണ് എന്നീ നിലകളില് പ്രവര്ത്തിച്ചിട്ടുണ്ട്.