മ​സാ​ല​ബോ​ണ്ട് കേ​സ്: തോ​മ​സ് ഐ​സ​ക് ഇ​ന്നും ഇ​ഡി​ക്ക് മു​ന്നി​ല്‍ ഹാ​ജ​രാ​കി​ല്ല

കൊച്ചി: മസാലബോണ്ട് കേസില്‍ തോമസ് ഐസക് ഇന്ന് എന്‍ഫോഴ്‌സ്‌മെന്‍റ് ഡയറക്ടറേറ്റിനു(ഇഡി) മുന്നില്‍ ഹാജരാകില്ല. സമന്‍സ് ചോദ്യംചെയ്ത് ഐസക് നല്‍കിയ ഹര്‍ജിയില്‍ വെള്ളിയാഴ്ച ഹൈക്കോടതി വാദം കേള്‍ക്കാമെന്ന് വ്യക്തമാക്കിയിട്ടുണ്ട്. ഹര്‍ജിയില്‍ കോടതി ഉത്തരവ് അറിഞ്ഞ ശേഷമായിരിക്കും ഹാജരാകുന്നതില്‍ തുടര്‍ നടപടി.

മസാല ബോണ്ട് അന്വേഷണവുമായി ബന്ധപ്പെട്ട് വെള്ളിയാഴ്ച വരെ തോമസ് ഐസക്കിനെതിരേ മറ്റു നടപടികള്‍ സ്വീകരിക്കരുതെന്ന് ഇഡിക്ക് ഹൈക്കോടതി നിര്‍ദേശം നല്‍കിയിട്ടുണ്ട്. ബോണ്ടുകള്‍ ഇറക്കിയതില്‍ വിദേശനാണ്യ വിനിമയ നിയമത്തിന്‍റെ ലംഘനമുണ്ടോയെന്ന അന്വേഷണത്തിന്‍റെ പേരില്‍ ഇന്ന് ഹാജരാകാന്‍ ആവശ്യപ്പെട്ട് ഇഡിയുടെ പുതിയ സമന്‍സിനെതിരെ തോമസ് ഐസക് നല്‍കിയ ഹര്‍ജിയിലാണ് ജസ്റ്റിസ് ടി.ആര്‍. രവിയുടെ ഇടക്കാല ഉത്തരവ്. വെള്ളിയാഴ്ച ഹര്‍ജിയില്‍ വിശദമായ വാദം കേള്‍ക്കും.

തുടര്‍ച്ചയായി സമന്‍സ് അയച്ചിട്ടും ഹാജരാകാത്തതിനെ തുടര്‍ന്നാണ് ഇന്ന് ഹാജരാകണമെന്നാവശ്യപ്പെട്ട് ഇഡി പുതിയ സമന്‍സ് തോമസ് ഐസക്കിന് അയച്ചത്. സമന്‍സുകള്‍ ചോദ്യം ചെയ്ത് ഹര്‍ജികള്‍ കോടതിയുടെ പരിഗണനയിലുണ്ട്. കിഫ്ബി മസാല ബോണ്ട് ഇടപാടുമായി ബന്ധപ്പെട്ട് തോമസ് ഐസക് ഇനിയും ഹാജരായില്ലെങ്കില്‍ നിയമാനുസൃതമായ നടപടികള്‍ സ്വീകരിക്കുമെന്ന് എന്‍ഫോഴ്‌സ്‌മെന്‍റ് ഡയറക്ടററേറ്റ് കോടതിയെ അറിയിച്ചിരുന്നു.

ലോക്‌സഭ തെരഞ്ഞെടുപ്പ് കഴിയും വരെ സമന്‍സും ചോദ്യം ചെയ്യലും തടയണമെന്നായിരുന്നു തോമസ് ഐസക്കിന്‍റെ ആവശ്യം. ഇക്കാര്യം പരിഗണിച്ചു കുടെയെന്ന് കോടതി ആരാഞ്ഞു. എന്നാല്‍ തെരഞ്ഞെടുപ്പുമായി ഇഡിയുടെ നടപടികള്‍ക്ക് ബന്ധമില്ലെന്ന് ഇഡിക്ക് വേണ്ടി ഹാജരായ ജയ്ശങ്കര്‍ വി. നായര്‍ കോടതിയെ അറിയിക്കുകയുണ്ടായി.

തെരഞ്ഞെടുപ്പ് പ്രഖ്യാപനത്തിന് മുമ്പേ തന്നെ ഹാജരാകാന്‍ സമന്‍സുകള്‍ അയച്ചിട്ടുള്ളതാണ്. അതിനാല്‍ തെരഞ്ഞെടുപ്പിന്‍റെ പേരില്‍ നടപടികള്‍ തടഞ്ഞുവയ്ക്കാനാവില്ലെന്നും സ്‌റ്റേ അനുവദിക്കരുതെന്നും ഇഡി ആവശ്യപ്പെട്ടു. ഇക്കാര്യത്തില്‍ കൂടുതല്‍ വാദം കേള്‍ക്കേണ്ടതുണ്ടെന്ന് ചൂണ്ടിക്കാട്ടിയാണ് കോടതി ഹര്‍ജി മാറ്റിയത്.