ബ്രൗൺഷുഗറുമായി മൂന്നുപേർ അറസ്റ്റിൽ
Tuesday, February 27, 2024 7:19 PM IST
മലപ്പുറം: മാരക മയക്കുമരുന്നായ ബ്രൗൺഷുഗറുമായി മൂന്നുപേരെ കൊണ്ടോട്ടി പോലീസ് അറസ്റ്റ് ചെയ്തു.
കൊണ്ടോട്ടി കുറുപ്പത്ത് മണ്ണാരിൽ അജ്മൽ നെയ്യൻ (28), കൊണ്ടോട്ടി നെടിയിരുപ്പ് കാരിമുക്ക് വൈത്തല പറമ്പിൽ ഉമറുൽ ഫാറൂഖ് (30), കൊണ്ടോട്ടി നെടിയിരുപ്പ് കോളനി റോഡിൽ യഥുൻ തലാപ്പിൽ (28) എന്നിവരാണ് അറസ്റ്റിലായത്.
11 ഗ്രാം ബ്രൗൺഷുഗർ ഇവരിൽ നിന്ന് പിടിച്ചെടുത്തു. രഹസ്യവിവരത്തെ തുടർന്ന് മൂന്നുപേരും ദിവസങ്ങളായി പോലീസ് നിരീക്ഷണത്തിലായിരുന്നു. അജ്മലിന്റെ വീട്ടിൽ വച്ച് ബ്രൗൺഷുഗർ വിൽപ്പനയ്ക്കായി പായ്ക്കറ്റുകളാക്കുന്പോഴാണ് പ്രതികൾ പിടിയിലായതെന്ന് പോലീസ് പറഞ്ഞു.
ബ്രൗൺഷുഗർ മുംബൈയിൽ നിന്ന് എത്തിച്ചതാണെന്ന് പ്രതികൾ പോലീസിൽ മൊഴിനൽകി. കോടതിയിൽ ഹാജരാക്കിയ പ്രതികളെ റിമാൻഡു ചെയ്തു.