നേതാക്കള് പ്രവര്ത്തിക്കുന്നത് സ്വന്തം കാര്യത്തിന് വേണ്ടി; കെപിസിസി നേതൃത്വത്തിനെതിരേ സുധീരന്
Saturday, December 30, 2023 1:45 PM IST
തിരുവനന്തപുരം: എക്സിക്യുട്ടീവ് യോഗത്തില് കെപിസിസി നേതൃത്വത്തിനെതിരേ ആഞ്ഞടിച്ച് മുതിര്ന്ന നേതാവ് വി.എം.സുധീരന്. സംസ്ഥാനത്ത് കൂടിയാലോചനകള് ഉണ്ടാകുന്നില്ലെന്നും കെപിസിസി നേതൃത്വം പൂര്ണ പരാജയമാണെന്നും സുധീരന് തുറന്നടിച്ചു.
നേതാക്കള് പ്രവര്ത്തിക്കുന്നത് പാര്ട്ടിക്കുവേണ്ടിയല്ല അവരവര്ക്ക് വേണ്ടിയാണ്. രണ്ട് ഗ്രൂപ്പുണ്ടായിരുന്ന പാര്ട്ടിയില് ഇപ്പോള് അഞ്ച് ഗ്രൂപ്പായെന്നും സുധീരന് വിമര്ശിച്ചു. കേരളത്തിന്റെ ചുമതലയുള്ള എഐസിസി ജനറല് സെക്രട്ടറി ദീപ ദാസ്മുന്ഷി അടക്കം പങ്കെടുത്ത യോഗത്തില്വച്ചാണ് വിമര്ശനം.
താന് ഏറ്റവുമധികം പഴി കേള്ക്കാനിടയായ 2016ലെ തെരഞ്ഞെടുപ്പ് പരാജയത്തിന്റെ പ്രധാനകാരണം സ്ഥാനാര്ഥി നിര്ണയം അടക്കമുള്ള കാര്യങ്ങളാണെന്നും സുധീരന് ചൂണ്ടിക്കാട്ടി. പാര്ട്ടിയുടെ സാമ്പത്തികനയം ഉള്പ്പെടെയുള്ള കാര്യങ്ങളിലും വീഴ്ചയുണ്ടായി. അന്ന് സോണിയാഗാന്ധിക്ക് താന് ഇതുസംബന്ധിച്ച കത്ത് നല്കിയിരുന്നെന്നും സുധീരന് വ്യക്തമാക്കി.
സോണിയയ്ക്ക് നല്കിയ കത്തും സുധീരന് യോഗത്തില് വായിച്ചു. 2017 മാര്ച്ച് പത്തിന് പ്രസിഡന്റ് സ്ഥാനം രാജിവച്ചതിന് ശേഷം കെപിസിസി നേതൃത്വവുമായി അകല്ച്ചയിലായിരുന്ന സുധീരന്. എന്നാല് ഇന്ന് യോഗത്തില് പങ്കെടുത്ത ശേഷം നേതൃത്വത്തിനെതിരേ രൂക്ഷവിമർശനം ഉന്നയിക്കുകയായിരുന്നു.