പാർലമെന്റിനുള്ളിൽ എത്തിയവർക്ക് പാസ് നൽകിയത് ബിജെപി എംപിയുടെ ഓഫീസ്
Wednesday, December 13, 2023 2:38 PM IST
ന്യൂഡൽഹി: പാർലമെന്റിനുള്ളിൽ കളർ സ്പ്രേ പ്രയോഗിച്ച സംഭവത്തിൽ രണ്ടുപേർ പാർലമെന്റിനുള്ളിൽ പ്രവേശിച്ചത് ബിജെപി എംപിയുടെ ഓഫീസ് നൽകിയ പാസ് ഉപയോഗിച്ച്. ബിജെപി എംപി പ്രതാപ് സിംഹയുടെ ഓഫീസാണ് ഇവർക്ക് പാസ് നൽകിയതെന്ന് ബിഎസ്പി എംപി ഡാനിഷ് അലി പറഞ്ഞു.
ലോക്സഭയിലെ പ്രതിഷേധക്കാരെ തടഞ്ഞവരുടെ കൂട്ടത്തിൽ ഡാനിഷ് അലിയുമുണ്ടായിരുന്നു. ഇതിനിടെ ഒരാളുടെ കൈയിലെ പാസ് അദ്ദേഹം പരിശോധിച്ചു. അതിന്റെ ഫോട്ടോ ഫോണിൽ എടുത്തതിനു ശേഷമാണ് ഡാനിഷ് അലി മാധ്യമങ്ങളോട് വെളിപ്പെടുത്തിയത്.
ചെരിപ്പിനുള്ളിൽ ഒളിപ്പിച്ചാണ് പ്രതിഷേധക്കാർ ക്യാൻ കടത്തിയത്. സുരക്ഷാപരിശോധനയിൽ ഇവ കണ്ടെത്താതിരുന്നത് വലിയ സുരക്ഷാവീഴ്ചയാണ് സൂചിപ്പിക്കുന്നത്.
സംഭവവുമായി ബന്ധപ്പെട്ട് ഒരു യുവതിയടക്കം നാലുപേരെയാണ് സുരക്ഷാഉദ്യോഗസ്ഥർ പിടികൂടിയത്. ഇവരെ പാര്ലമെന്റ് പോലീസ് സ്റ്റേഷനിലേക്ക് മാറ്റി.
പിടിയിലായവരിൽ രണ്ടുപേർ പാർലമെന്റിന് പുറത്ത് നിന്നാണ് പ്രതിഷേധിച്ചത്. തങ്ങൾക്ക് ഒരു സംഘടനയുമായും ബന്ധമില്ലെന്നും ഏകാധിപത്യം അനുവദിക്കില്ലെന്നും പോലീസ് കസ്റ്റഡിയിലുള്ള നീലം മാധ്യമങ്ങളോടു പറഞ്ഞു.
നീലം ഹരിയാന സ്വദേശിനിയാണ്. നീലത്തിനൊപ്പം പാർലമെന്റിന് പുറത്തുനിന്ന് പ്രതിഷേധിച്ച അമോൽ മഹാരാഷ്ട്ര സ്വദേശിയാണ്. അതേസമയം, തൊഴിലില്ലായ്മയ്ക്കെതിരെ നടന്ന പ്രതിഷേധമാണെന്ന് നടന്നതെന്ന് കസ്റ്റിഡിയിലുള്ള നീലം പറഞ്ഞു.