പാർലമെന്റിലെ സുരക്ഷാവീഴ്ച: നാലുപേർ കസ്റ്റഡിയിൽ; ഏകാധിപത്യം അനുവദിക്കില്ലെന്ന് മുദ്രാവാക്യം
Wednesday, December 13, 2023 2:14 PM IST
ന്യൂഡൽഹി: പാര്ലമെന്റ് ആക്രമണത്തിന്റെ വാര്ഷികദിനത്തില് ലോക്സഭയിലുണ്ടായ സുരക്ഷാവീഴ്ചയുമായി ബന്ധപ്പെട്ട് നാലുപേരെ പോലീസ് കസ്റ്റഡിയിലെടുത്തു. ഒരു യുവതിയടക്കം നാലുപേരെയാണ് പിടികൂടിയത്. ഇവരെ പാര്ലമെന്റ് പോലീസ് സ്റ്റേഷനിലേക്ക് മാറ്റി.
പിടിയിലായവരിൽ രണ്ടുപേർ പാർലമെന്റിന് പുറത്ത് നിന്നാണ് പ്രതിഷേധിച്ചത്. തങ്ങൾക്ക് ഒരു സംഘടനയുമായും ബന്ധമില്ലെന്നും ഏകാധിപത്യം അനുവദിക്കില്ലെന്നും പോലീസ് കസ്റ്റഡിയിലുള്ള നീലം മാധ്യമങ്ങളോടു പറഞ്ഞു.
നീലം ഹരിയാന സ്വദേശിനിയാണ്. നീലത്തിനൊപ്പം പാർലമെന്റിന് പുറത്തുനിന്ന് പ്രതിഷേധിച്ച അമോൽ മഹാരാഷ്ട്ര സ്വദേശിയാണ്. അതേസമയം, തൊഴിലില്ലായ്മയ്ക്കെതിരെ നടന്ന പ്രതിഷേധമാണെന്ന് നടന്നതെന്ന് കസ്റ്റഡിയിലുള്ള നീലം പറഞ്ഞു.
ബിജെപി എംപി പ്രതാപ് സിംഹ നൽകിയ പാസിലാണ് രണ്ടുപേർ പാർലമെന്റിന് അകത്ത് പ്രവേശിച്ചത്. സന്ദർശക ഗാലറിയിൽ ഇരുന്ന ഇവർ ചാടുകയായിരുന്നു.