കുസാറ്റ് ദുരന്തം: കെഎസ്യുവിന്റെ ഹര്ജി ഇന്ന്ഹൈക്കോടതിയില്
Tuesday, December 12, 2023 10:23 AM IST
കൊച്ചി: കൊച്ചിന് യൂണിവേഴ്സിറ്റിയില് ടെക്ഫെസ്റ്റിനിടെ നാല് വിദ്യാര്ഥികള് മരിച്ച സംഭവത്തില് ജുഡീഷ്യല് അന്വേഷണം ആവശ്യപ്പെട്ട് കെഎസ്യു സംസ്ഥാന പ്രസിഡന്റ് അലോഷ്യസ് സേവ്യര് നല്കിയ ഹര്ജി ഹൈക്കോടതി ഇന്ന് വീണ്ടും പരിഗണിക്കും.
സംഭവത്തില് സര്ക്കാരും സര്വകലാശാലയും നടത്തിയ അന്വേഷണ റിപ്പോര്ട്ട് ചൊവ്വാഴ്ച ഹാജരാക്കാന് കോടതി നിര്ദേശം നല്കിയിട്ടുണ്ട്.
കുസാറ്റ് ദുരന്തത്തില് തൃക്കാക്കര അസിസ്റ്റന്റ് കമ്മീഷണറുടെ നേതൃത്വത്തിലുള്ള അന്വേഷണം സുതാര്യമല്ല. സര്വകലാശാല, സ്കൂള് നേതൃത്വങ്ങള്ക്ക് ദുരന്തത്തില് ഉത്തരവാദിത്തമുണ്ടെന്നുമാണ് കെഎസ്യുവിന്റെ ആരോപണം.
പോലീസ് സുരക്ഷ ആവശ്യപ്പെട്ട് സ്കൂള് ഓഫ് എന്ജിനീയറിംഗ് പ്രിന്സിപ്പല് നല്കിയ കത്ത് രജിസ്ട്രാര് അവഗണിച്ചത് ദുരന്തത്തിന്റെ ആക്കം കൂട്ടി. കുറ്റക്കാരായ രജിസ്ട്രാര്, യൂത്ത് വെല്ഫെയര് ഡയറക്ടര്, സെക്യൂരിറ്റി ഓഫീസര് എന്നിവര്ക്കെതിരേ ഇതുവരെ നടപടി ഉണ്ടായിട്ടില്ല എന്ന് ഹര്ജിയില് ആരോപിക്കുന്നു.
നഷ്ടമായ ഓരോ ജീവനും വിലപ്പെട്ടതാണെന്നും സംഭവത്തിന്റെ പേരില് വിദ്യാര്ഥികളെ കുറ്റപ്പെടുത്തരുതെന്നും വിദ്യാര്ഥികളോടൊപ്പമാണ് തന്റെ മനസെന്നും നേരത്തെ ഹര്ജി പരിഗണിക്കവെ ജസ്റ്റീസ് ദേവന് രാമചന്ദ്രന് വ്യക്തമാക്കിയിരുന്നു.
കഴിഞ്ഞ മാസം 25ന് ആണ് കൊച്ചിന് യൂണിവേഴ്സിറ്റിയില് ടെക്ഫെസ്റ്റിനിടെ അപകടമുണ്ടായത്. ബോളിവുഡ് ഗായിക നികിത ഗാന്ധിയുടെ ഗാനസന്ധ്യയ്ക്കായാണ് വിദ്യാര്ഥികള് ഒത്തുകൂടിയത്. മഴ പെയ്തതോടെ കൂടുതല് പേര് ഓഡിറ്റോറിയത്തിലേക്ക് തള്ളിക്കയറിയത് തിരക്കിനിടയാക്കുകയും ഇതോടെ മുന്നിലുണ്ടായിരുന്ന വിദ്യാര്ഥികള് വീഴുകയുമായിരുന്നു.
ദുരന്തത്തില് നാലുപേര് മരിച്ചത്. അതുല് തമ്പി, ആന് റുഫ്ത, സാറ തോമസ് എന്നീ വിദ്യാര്ഥികളാണ് മരിച്ചത്. ഇവരെ കൂടാതെ ആല്വിന് ജോസഫ് എന്നയാളും മരിച്ചു. സംഭവത്തില് 70ല് പരം വിദ്യാര്ഥികള്ക്ക് പരിക്കേറ്റിരുന്നു.