ശബരിമലയിലേക്ക് ഭക്തജനപ്രവാഹം; മണിക്കൂറുകൾ കാത്തുനിന്ന് തീർഥാടകർ
Sunday, December 10, 2023 10:44 AM IST
ശബരിമല: ശബരിമലയില് ഭക്തജനത്തിരക്കേറി. എല്ലാ വഴികളിലൂടെയും തീർഥാടകര് ശബരിമലയിലേക്ക് ഒഴുകിയെത്താന് തുടങ്ങിയതോടെ തീർഥാടന പാതകളില് മണിക്കൂറുകള് നീണ്ട ഗതാഗതക്കുരുക്കാണ് അനുഭവപ്പെടുന്നത്.
വ്യാഴാഴ്ച രാത്രി മുതല് ആരംഭിച്ച തിരക്ക് ഇന്നു രാവിലെയും തുടരുകയാണ്. ശനിയാഴ്ച പതിനെട്ട് മണിക്കൂറോളംനീണ്ട കാത്തുനില്പ്പിനൊടുവിലാണ് ഭക്തർക്ക് ദര്ശനം സാധ്യമായത്. വരുംദിവസങ്ങളിലെ വെര്ച്വല്ക്യൂ ബുക്കിംഗുകളെല്ലാം പൂര്ണമാണ്. ഞായറാഴ്ച 70,000-ത്തോളം പേരും തിങ്കളാഴ്ച 90,000 പേരുമാണ് വെർച്വൽ ക്യൂ വഴി ദർശനത്തിന് ബുക്ക് ചെയ്തിട്ടുള്ളത്.
തിരക്ക് കൂടിയതോടെ പത്തനംതിട്ട, എരുമേലി എന്നിവിടങ്ങളില് തീര്ഥാടക വാഹനങ്ങള്ക്ക് നിയന്ത്രണം ഏര്പ്പെടുത്തിയിരുന്നു. നിലയ്ക്കല്, ഇലവുങ്കല്, നാറാണംതോട് എന്നിവിടങ്ങളിലും വാഹനങ്ങള് തടഞ്ഞു ഘട്ടംഘട്ടമായിട്ടാണ് പമ്പയിലേക്ക് അയച്ചത്. മരക്കൂട്ടംവരെ നിര നീണ്ടതോടെ പമ്പയിലും നിയന്ത്രണങ്ങള് ഏര്പ്പെടുത്തി.
പമ്പയിൽ മൂന്നുമുതൽ നാല് മണിക്കൂർ വരെ ക്യൂനിന്നാണ് അയ്യപ്പന്മാർ വെള്ളിയാഴ്ചയും ശനിയാഴ്ചയും മലകയറിയത്. വഴിയിൽ പലരും കുഴഞ്ഞുവീണു.
സന്നിധാനം നടപ്പന്തലില് നാല് മണിക്കൂറിലേറെയാണ് പലരും ക്യൂ നില്ക്കുന്നത്. മരക്കൂട്ടം പിന്നിടുമ്പോള് തീര്ഥാടകരെ ക്യൂ കോംപ്ലക്സില് കയറ്റി വിശ്രമിക്കാന് അനുവദിച്ചശേഷമാണ് തുടര്യാത്ര അനുവദിക്കുക.
പ്രത്യേക ക്യൂ കോംപ്ലക്സ് സംവിധാനം പ്രയോജനപ്പെടുത്തുന്നതിൽ പോലീസ് പരാജയപ്പെട്ടതോടെ ക്യൂ കോംപ്ലക്സിൽ 10 മണിക്കൂറോളം ഭക്തർ വരിനിൽക്കേണ്ടിവന്നു. വെള്ളിയാഴ്ചയും ശനിയാഴ്ചയും ഒരു ലക്ഷത്തോളം പേരാണ് ദർശനത്തിനായി ബുക്ക് ചെയ്തിരുന്നത്. മിനിറ്റിൽ 70 പേരെവരെ പതിനെട്ടാം പടി കടത്തിവിടണമെന്നായിരുന്നു നിശ്ചയിച്ചിരുന്നത്. രണ്ടുദിവസമായി മിനിറ്റിൽ 50-ൽ താഴെ ഭക്തരെ മാത്രമാണ് പടികയറ്റിവിടുന്നത്.