ആറ് വയസുകാരിയെ തട്ടിക്കൊണ്ടുപോയ കേസ്; പ്രതികള് റൂട്ട് മാപ്പ് തയാറാക്കിയെന്ന് കണ്ടെത്തൽ
Saturday, December 9, 2023 11:05 AM IST
കൊല്ലം: ഓയൂരില് ആറ് വയസുകാരിയെ തട്ടിക്കൊണ്ടുപോയ കേസില് ആസൂത്രണത്തിന്റെ കൂടുതല് തെളിവുകള് ലഭിച്ചെന്ന് പോലീസ്. റൂട്ട് മാപ്പ് തയാറാക്കിയ ശേഷമാണ് കുട്ടിയെ തട്ടിക്കൊണ്ടുപോയത്.
പ്രതികളായ പത്മകുമാറും അനുപമയും സാങ്കേതിക വിദ്യയില് മികവ് പുലര്ത്തുന്നവരാണ്. ഗൂഗിള് മാപ്പ് വഴിയുള്ള വിവരങ്ങള് ഉപയോഗിച്ചും അല്ലാതെയും ഇവര് റൂട്ട് മാപ്പ് തയാറാക്കി.
കുട്ടിയുമായി വിവിധ റോഡുകളിലേക്ക് രക്ഷപെടാനുള്ള മാപ്പിന്റെ ബ്ലൂ പ്രിന്റ് ഇവര് തയാറാക്കി. സിസിടിവി ഇല്ലാത്ത സ്ഥലങ്ങളില് വച്ച് നമ്പര് പ്ലേറ്റ് മാറ്റുന്നതുള്പ്പെടെയുള്ള കാര്യങ്ങളിലും വ്യക്തമായ പദ്ധതിയുണ്ടാക്കി.
പ്രതികളുടെ ഫോണില്നിന്ന് റൂട്ട് മാപ്പ് കണ്ടെത്തിയിട്ടുണ്ട്. ഒരിക്കലും പിടിക്കപ്പെടില്ല എന്നായിരുന്നു പ്രതികള് വിചാരിച്ചിരുന്നതെന്നും അന്വേഷണസംഘം വ്യക്തമാക്കി.
കേസിലെ പ്രതികളായ മൂന്ന് പേരേയും ചാത്തന്നൂരിലെ വീട്ടില് തെളിവെടുപ്പിനെത്തിച്ചു. കുട്ടിയെ തട്ടിക്കൊണ്ടുപോകാനുള്ള ആസൂത്രണം അടക്കം നടന്നത് ഇവിടെയാണ്. ഫോറന്സിക് സംഘവും അന്വേഷണസംഘത്തിനൊപ്പമുണ്ട്.