ഇന്ത്യ സഖ്യം :കോ-ഓര്ഡിനേഷന് കമ്മിറ്റി യോഗം ഇന്ന്
Wednesday, December 6, 2023 7:08 AM IST
ന്യൂഡൽഹി: ഇന്ത്യ സഖ്യത്തിൽ നേതാവാരെന്ന തർക്കം മുറുകുന്നതിനിടെ സഖ്യത്തിന്റെ കോ-ഓര്ഡിനേഷന് കമ്മിറ്റി യോഗം ഇന്ന് ചേർന്നേക്കും.പ്രധാന നേതാക്കള് പങ്കെടുക്കില്ലെന്നറിയിച്ചതോടെ ഇന്ന് കോണ്ഗ്രസ് വിളിച്ച വിശാല യോഗം മാറ്റി വച്ചിരുന്നു.
അതിനിടെ നിതീഷ് കുമാറിനെ പ്രധാനമന്ത്രി സ്ഥാനാർഥി ആക്കണമെന്ന് ആവശ്യപ്പെട്ട് ജെഡിയു രംഗത്തെത്തി. 2024 ലെ പൊതു തെരഞ്ഞെടുപ്പിന്റെ സെമി ഫൈനൽ എന്ന് വിശേഷിപ്പിക്കപ്പെട്ട അഞ്ച് സംസ്ഥാനങ്ങളിലെയും ഫലം പുറത്തുവന്നതിന് പിന്നാലെ "ഇന്ത്യ' സഖ്യത്തെക്കുറിച്ചുള്ള നിലപാട് വ്യക്തമാക്കി അഖിലേഷ് യാദവ് ഇന്നലെ രംഗത്തെത്തിയിരുന്നു.
ഈ തെരഞ്ഞടുപ്പ് ഫലം ഇന്ത്യ സഖ്യത്തെ കൂടുതൽ ശക്തിപ്പെടുത്തുന്നതാണെന്നാണ് സമാജ് വാദി പാർട്ടി നേതാവ് അഭിപ്രായപ്പെട്ടത്.ബിജെപിയെ പുറത്താക്കാനാണ് ജനം ആഗ്രഹിക്കുന്നതെന്നും ജനം മാറ്റത്തിനു വേണ്ടി വോട്ട് രേഖപ്പെടുത്തുമെന്നും എസ്പി അധ്യക്ഷൻ പറഞ്ഞു.