ജമ്മു കാഷ്മീരിൽ വാഹനാപകടം; നാല് മലയാളികൾ ഉൾപ്പെടെ അഞ്ച് പേർ മരിച്ചു
Tuesday, December 5, 2023 7:26 PM IST
ശ്രീനഗർ: ജമ്മു കാഷ്മീരിൽ നിയന്ത്രണംവിട്ട ട്രക്ക് കൊക്കയിലേക്കു മറിഞ്ഞ് നാല് മലയാളികൾ ഉൾപ്പെടെ അഞ്ച് പേർ മരിച്ചു. രണ്ടു പേർക്കു ഗുരുതരമായ പരിക്കേറ്റു.
പാലക്കാട് ചിറ്റൂര് സ്വദേശികളായ രാജേന്ദ്രന്റെ മകൻ അനിൽ (33), സുന്ദരന്റെ മകൻ സുധീഷ് (23), ശിവന്റെ മകൻ വിഘ്നേഷ് (22), കൃഷ്ണന്റെ മകൻ രാഹുൽ (26) എന്നിവരും വാഹനത്തിന്റെ ഡ്രൈവറും കാഷ്മീർ സ്വദേശിയുമായ അജാസ് അഹമ്മദ് അവാനുമാണ് മരിച്ചത്.
കാഷ്മീരിലെ സോജില പാസിലാണ് അപകടമുണ്ടായത്. സോനമാർഗിലേക്ക് പോവുകയായിരുന്ന വാഹനം റോഡിൽനിന്ന് തെന്നിമാറി കൊക്കയിലേക്ക് പതിക്കുകയായിരുന്നുവെന്ന് അധികൃതർ പറഞ്ഞു.
മൃതദേഹങ്ങൾ ബുധനാഴ്ച ശ്രീനഗറിലെത്തിച്ച് പോസ്റ്റ്മോർട്ടം നടത്തും. നവംബർ 30 നാണ് ചിറ്റൂര് മാഞ്ചിറയിൽനിന്നും 13 യുവാക്കൾ വിനോദയാത്രയ്ക്കു പോയത്. രണ്ടു ട്രക്കുകളിലായാണ് സംഘം സഞ്ചരിച്ചിരുന്നത്.