വായ്പാ പരിധിയില് കേരളത്തിന് മാത്രം ഇളവ് നല്കാനാവില്ല: കേന്ദ്ര ധനമന്ത്രി
Monday, December 4, 2023 3:31 PM IST
ന്യൂഡല്ഹി: വായ്പാ പരിധിയില് കേരളത്തിന് മാത്രം ഇളവ് നല്കാനാവില്ലെന്ന് കേന്ദ്ര ധനമന്ത്രി നിര്മല സീതാരമന്. എന്.കെ.പ്രേമചന്ദ്രന് എംപിയുടെ ചോദ്യത്തിന് ലോക്സഭയില് മറുപടി പറയുകയായിരുന്നു മന്ത്രി.
ഭരണഘടനപ്രകാരം ധനകാര്യ കമ്മീഷന്റെ മാര്ഗനിര്ദേശം കണക്കിലെടുത്ത് പൊതുമാനദണ്ഡം അനുസരിച്ചാണ് എല്ലാ സംസ്ഥാനങ്ങള്ക്കും വായ്പാ പരിധി നിശ്ചയിച്ചിട്ടുള്ളത്. അതുകൊണ്ട് കേരളത്തിന് വേണ്ടി രാജ്യത്ത് ആകമാനമുള്ള പൊതുനിബന്ധനകളില് മാറ്റം വരുത്താനാകില്ലെന്ന് മന്ത്രി പറഞ്ഞു.
നിലവിലെ വായ്പാ പരിധിക്ക് പുറമേ കേരളത്തിന്റെ മൊത്തം ആഭ്യന്തര ചരക്ക്, സേവന ഉത്പാദനത്തിന്റെ ഒരു ശതമാനം കൂടി വായ്പ അധികമായി എടുക്കാന് അനുവദിക്കണമെന്നാണ് കേരളം ആവശ്യപ്പെട്ടിരിക്കുന്നത്. സംസ്ഥാനത്തിന്റെ മൂലധന ചെലവ് വര്ധിപ്പിക്കാന് കേരളത്തിന് 50 വര്ഷത്തെ പലിശരഹിത വായ്പ അനുവദിച്ചുണ്ടെന്നും മന്ത്രി വ്യക്തമാക്കി.