കോണ്ഗ്രസിന്റെ തോല്വിക്ക് കാരണം അത്യാര്ത്തി: മുഖ്യമന്ത്രി
Monday, December 4, 2023 1:07 PM IST
തൃശൂര്: രാജസ്ഥാനില് കോണ്ഗ്രസിന്റെ തോല്വിക്ക് കാരണം അവരുടെ അത്യാര്ത്തിയെന്ന് മുഖ്യമന്ത്രി പിണറായി വിജയന്. തൃശൂര് വടക്കാഞ്ചേരി മണ്ഡലത്തിലെ നവകേരള സദസില് സംസാരിക്കുകയായിരുന്നു മുഖ്യമന്ത്രി.
രാജസ്ഥാനില് കൂടെക്കൂട്ടാന് പറ്റുന്നവരെയൊന്നും കോണ്ഗ്രസ് ഒപ്പം ചേര്ത്തില്ലെന്ന് മുഖ്യമന്ത്രി വിമര്ശിച്ചു. താന് പ്രമാണിത്ത ചിന്ത കാരണം അത് നടന്നില്ല. സിപിഎം സ്ഥാനാര്ഥികള് സിറ്റിംഗ് സീറ്റില് പരാജയപ്പെട്ടതിന്റെ കാരണവും കോണ്ഗ്രസാണ്.
ചില്ലറ വോട്ടിനാണ് അവര് തോറ്റത്. ബിജെപിയെ എവിടെയെങ്കിലും ശക്തിപ്പെടുത്തുന്ന ഒരു നിലപാട് സിപിഎമ്മിനില്ല. കോണ്ഗ്രസ് നിലനില്ക്കണം എന്നാണ് ആഗ്രഹമെന്നും മുഖ്യമന്ത്രി കൂട്ടിച്ചേര്ത്തു.
വലിയ വര്ഗീയത പ്രചരിപ്പിക്കുന്നതില് നിന്ന് മധ്യപ്രദേശിലെ കോണ്ഗ്രസ് നേതാവ് കമല്നാഥിന് എന്താണ് വ്യത്യാസമെന്ന് പരിശോധിക്കണം. ഹനുമാന് സേവകനാണെന്ന് പറഞ്ഞ് കമല്നാഥ് രംഗത്ത് വന്നു. സ്വയം ബിജെപിയുടെ ബി ടീമാകാനാണ് കമല്നാഥ് ശ്രമിച്ചതെന്നും മുഖ്യമന്ത്രി കുറ്റപ്പെടുത്തി.