പരാജയത്തിന്റെ ദേഷ്യം പാര്ലമെന്റിൽ തീര്ക്കരുത്; പ്രതിപക്ഷത്തെ വിമര്ശിച്ച് മോദി
Monday, December 4, 2023 12:38 PM IST
ന്യൂഡൽഹി: നിയമസഭാ തെരഞ്ഞെടുപ്പുകളില് പരാജയപ്പെട്ടതിന്റെ ദേഷ്യം പ്രതിപക്ഷം പാര്ലമെന്റില് തീര്ക്കരുതെന്ന് പ്രധാനമന്ത്രി നരേന്ദ്രമോദി. ഇത്തരം സമീപനം മാറ്റാന് പ്രതിപക്ഷം തയാറാകണമെന്ന് മോദി പറഞ്ഞു.
പാര്ലമെന്റിന്റെ ശൈത്യകാല സമ്മേളനം ആരംഭിക്കുന്നതിന് തൊട്ടുമുമ്പാണ് പ്രതിപക്ഷത്തെ വിമര്ശിച്ചുകൊണ്ടുള്ള പ്രധാനമന്ത്രിയുടെ പ്രതികരണം. പ്രതിപക്ഷം ക്രിയാത്മകമായി ഇടപെടണം. എതിര്ക്കാനായി എതിര്ക്കുന്ന രീതി മാറ്റണം.
സര്ക്കാരിന്റെ പോരായ്മകള് പ്രതിപക്ഷം ചൂണ്ടിക്കാട്ടണം. എന്നാല് പാര്ലമെന്റില് ചര്ച്ചകള് നടക്കാത്ത സാഹചര്യമുണ്ടാകരുത്. നിഷേധാത്മക സമീപനത്തെ ജനങ്ങള് തള്ളിക്കളഞ്ഞെന്നാണ് തെരഞ്ഞെടുപ്പ് ഫലം വ്യക്തമാക്കുന്നതെന്നും മോദി പറഞ്ഞു.
പരാജയത്തില് നിന്ന് പഠിക്കണം. പാര്ലമെന്റിനെ സ്വാര്ത്ഥതാത്പര്യങ്ങള്ക്ക് വേദിയാക്കരുത്. നിയമസഭ തെരഞ്ഞെടുപ്പുകളിലെ ഫലം സര്ക്കാരിന് ആത്മവിശ്വാസം പകരുന്നതാണ്. സല്ഭരണം ഉണ്ടായാല് ഭരണവികാരം എന്ന ചിന്ത തന്നെ അപ്രസക്തമാകുമെന്നും മോദി പറഞ്ഞു.