തൊഴിലാളികൾക്ക് അരികിലേയ്ക്കെത്താൻ അഞ്ചുമീറ്റർ കൂടി; ശുഭപ്രതീക്ഷയോടെ ദൗത്യസംഘം
Tuesday, November 28, 2023 10:38 AM IST
ഉത്തരകാശി: സിൽക്യാര തുരങ്കത്തിൽ കുടുങ്ങികിടക്കുന്ന 41 തൊഴിലാളികളെ രക്ഷിക്കാനുള്ള ദൗത്യം തുടരുന്നു. മാനുവൽ ഡ്രില്ലിംഗ് തിങ്കളാഴ്ച രാത്രിയോടെ ഒന്നര മീറ്റർ പിന്നിട്ടുവെന്നാണ് റിപ്പോർട്ടുകൾ. രക്ഷാദൗത്യം ഇന്ന് പൂർത്തീകരിക്കാനുള്ള തീവ്രശ്രമങ്ങളാണ് സംഘം നടത്തുന്നത്.
വന മേഖലയിൽ നിന്ന് ലംബമായി കുഴിക്കുന്നതും തുടരുകയാണ്. ഇവിടെ 40 മീറ്ററോളം കുഴിക്കാൻ ആയെന്നാണ് സൂചന. ഓഗര് ഡ്രില്ലിന്റെ പ്രവര്ത്തനം നിലച്ചതോടെയാണ് തിങ്കളാഴ്ച രാത്രിമുതൽ മാനുവല് ഡ്രില്ലിംഗ് ആരംഭിച്ചത്.
പൈപ്പിൽ കുടുങ്ങിയിരുന്ന ഓഗർ യന്ത്രത്തിന്റെ ഭാഗങ്ങൾ പൂർണമായും നീക്കി. പൈപ്പില് തൊഴിലാളികള് കയറിയായിരിക്കും തുരക്കല് തുടങ്ങുക. അതേസമയം പ്രധാനമന്ത്രിയുടെ പ്രിൻസിപ്പൽ സെക്രട്ടറി ഡോ. കെ.പി. മിശ്ര അടക്കമുള്ള ഉന്നതതലസംഘം സ്ഥലത്തെത്തി രക്ഷാദൗത്യം വിലയിരുത്തുന്നുണ്ട്.