രാവിലെ പത്തിന് വീണ്ടും വിളിക്കും, കുഞ്ഞിനെ തിരികെ നല്കാം; അവസാന ഫോണ് കോള് ഇങ്ങനെ
Tuesday, November 28, 2023 9:37 AM IST
കൊല്ലം: ഓയൂരില് നിന്ന് ആറു വയസുകാരിയെ തട്ടിക്കൊണ്ടുപോയ സംഭവത്തില് വീട്ടുകാരെ ഫോണില് വിളിച്ച് മോചനദ്രവ്യം ആവശ്യപ്പെട്ടത് രണ്ട് തവണ. അഞ്ച് ലക്ഷം രൂപ മോചനദ്രവ്യം ആവശ്യപ്പെട്ടായിരുന്നു ആദ്യ ഫോണ് കോള്.
പണം നല്കിയാല് കുട്ടിയെ വിട്ടയ്ക്കാമെന്നാണ് സംഘം അറിയിച്ചത്. പാരിപ്പള്ളിയിലെ കടയുടമയുടെ ഫോണില് നിന്നായിരുന്നു കോള് എത്തിയത്. സംഘം ഓട്ടോയിലാണ് ഇവിടെ എത്തിയതെന്നാണ് വിവരം.
എന്നാല് 10 ലക്ഷം രൂപ മോചനദ്രവ്യം ആവശ്യപ്പെട്ട് തിങ്കളാഴ്ച തന്നെ രണ്ടാമതും ഫോണ് കോള് എത്തി. കുട്ടി സുരക്ഷിതയാണ്. നാളെ രാവിലെ പത്തിന് തങ്ങള് വിളിക്കാം. 10 ലക്ഷം അറേഞ്ച് ചെയ്യണമെന്നായിരുന്നു സന്ദേശം.
നാളെ പത്തിന് കുഞ്ഞിനെ നല്കാമെന്നാണ് ബോസ് പറഞ്ഞിരിക്കുന്നത്. കുഞ്ഞിനെ വീട്ടില് കൊണ്ടുവരും. കുഞ്ഞിന് ആപത്തു വരാതിരിക്കണമെങ്കില് പോലീസില് അറിയിക്കാന് നില്ക്കരുത്. ഈ ഫോണില് ഇങ്ങോട്ടു വിളിക്കരുത്, ഇതു തങ്ങളുടേതല്ല. എന്നിങ്ങനെയായിരുന്നു ഫോണിലൂടെ അറിയിച്ചത്.
ഇപ്പോള് പണം നല്കിയാല് കുഞ്ഞിനെ വിടുമോ എന്ന ചോദ്യത്തിനും ഫോണ് വിളിച്ച സ്ത്രീ മറുപടി നല്കിയില്ല.