ന്യൂനമർദം ചുഴലിക്കാറ്റായി ശക്തിപ്രാപിക്കും; വെള്ളിയാഴ്ചയോടെ സംസ്ഥാനത്ത് ഇടിമിന്നലോട് കൂടിയ മഴ
Tuesday, November 28, 2023 8:54 AM IST
തിരുവനന്തപുരം: ന്യൂനമർദം ശക്തിപ്രാപിക്കുന്നതിന്റെ ഭാഗമായി സംസ്ഥാനത്ത് നാലുദിവസം ഇടിമിന്നലോട് കൂടിയ മഴയുണ്ടാകുമെന്ന് കാലാവസ്ഥ നിരീക്ഷണ കേന്ദ്രത്തിന്റെ മുന്നറിയിപ്പ്.
ബംഗാള് ഉള്ക്കടലില് രൂപപ്പെട്ട ന്യൂനമര്ദ്ദം ചുഴലിക്കാറ്റായി മാറാന് സാധ്യതയുണ്ട്. തെക്കന് ആന്ഡമാന് കടലിനു മുകളിലായി നില നിന്നിരുന്ന ചക്രവാതച്ചുഴി ശക്തി പ്രാപിച്ചാണ് ന്യൂനമര്ദ്ദം രൂപപ്പെട്ടത്.
അതിനാല് ജനങ്ങൾ ജാഗ്രത പാലിക്കണമെന്ന് കാലാവസ്ഥ നിരീക്ഷണകേന്ദ്രം അറിയിച്ചു. ന്യൂനമര്ദ്ദം പടിഞ്ഞാറു - വടക്ക് പടിഞ്ഞാറു ദിശയില് സഞ്ചരിച്ച് ബുധനാഴ്ചയോടെ തെക്ക് കിഴക്കന് ബംഗാള് ഉള്ക്കടലില് തീവ്ര ന്യൂനമര്ദ്ദമായി ശക്തി പ്രാപിക്കാന് സാധ്യതയുണ്ട്.
തുടര്ന്ന് വടക്കു പടിഞ്ഞാറു ദിശയില് സഞ്ചരിക്കുന്ന തീവ്ര ന്യൂനമര്ദ്ദം ശക്തിപ്രാപിച്ച് പിന്നീടുള്ള 48 മണിക്കൂറിനുള്ളില് ചുഴലിക്കാറ്റായി മാറാന് സാധ്യതയുണ്ടെന്നും മുന്നറിയിപ്പില് പറയുന്നു.
കേരളത്തീരത്തും തെക്കന് തമിഴ്നാട് തീരത്തും ഇന്ന് രാത്രി 11.30 വരെ 0.5 മുതല് 1.5 മീറ്റര് വരെ ഉയര്ന്ന തിരമാലയ്ക്കും കടലാക്രമണത്തിനും സാധ്യതയുള്ളതിനാൽ മത്സ്യത്തൊഴിലാളികളും തീരദേശവാസികളും ജാഗ്രത പുലർത്തണമെന്ന് ദേശീയ സമുദ്രസ്ഥിതിപഠന ഗവേഷണ കേന്ദ്രം അറിയിച്ചു.