രശ്മികയ്ക്കു പിന്നാലെ ആലിയ ഭട്ടിന്റെയും ഡീപ് ഫേക്ക് വീഡിയോ; അന്വേഷണം
Tuesday, November 28, 2023 2:00 AM IST
മുംബൈ: തെന്നിന്ത്യൻ സിനിമാതാരം രശ്മിക മന്ദണ്ണയുടേതെന്ന പേരിൽ പുറത്തിറങ്ങിയ ഡീപ് ഫേക്ക് വീഡിയോയെക്കുറിച്ചുള്ള അന്വേഷണം പുരോഗമിക്കുന്നതിനിടെ ബോളിവുഡ് നടി ആലിയ ഭട്ടിന്റെ ഡീപ് ഫേക്ക് വീഡിയോയും പുറത്ത്.
സോഷ്യൽ മീഡിയയിൽ വൈറലായ വീഡിയോയെക്കുറിച്ച് പോലീസ് അന്വേഷണം തുടങ്ങി. നേരത്തെ രശ്മികയുടെ വീഡിയോ പുറത്തുവന്നതിന് പിന്നാലെ കേന്ദ്ര ഐടി മന്ത്രാലയം സംഭവത്തിൽ നടപടിയെടുക്കുമെന്ന് മുന്നറിയിപ്പ് നൽകിയിരുന്നു.
ഡീപ് ഫേക്കുകൾ നീക്കം ചെയ്യാൻ സോഷ്യൽ മീഡിയ പ്ലാറ്റ് ഫോമുകൾ മതിയായ നടപടി സ്വീകരിക്കണമെന്ന് കേന്ദ്ര ഐടി മന്ത്രി അശ്വനി വൈഷ്ണവ് ആവശ്യപ്പെട്ടിരുന്നു.
പ്രധാനമന്ത്രി നരേന്ദ്രമോദിയും ഡീപ് ഫേക്കിനെതിരെ രംഗത്തെത്തിയിരുന്നു. ഡീപ് ഫേക്കുകളുടെ ഭീഷണിയെക്കുറിച്ച് മാധ്യമങ്ങൾ ജനങ്ങളെ ബോധവത്കരിക്കണമെന്നും പ്രധാനമന്ത്രി ആവശ്യപ്പെട്ടിരുന്നു.
സോഷ്യൽ മീഡിയ ഇൻഫ്ളുവൻസറായ യുവതിയുടെ വീഡിയോയാണ് ഡീപ് ഫേക്ക് ടെക്നോളജി ഉപയോഗിച്ച് രശ്മികയുടേതാക്കി മാറ്റിയത്. ഇതിനു പിന്നാലെ നടി കജോളിന്റെ എഐ ജനറേറ്റഡ് വീഡിയോയും ഇന്റർനെറ്റിൽ പ്രചരിച്ചിരുന്നു.
ടിക്ക്ടോക്കിൽ ക്ലിപ്പ് പങ്കിട്ട റോസി ബ്രീനയുടെ വീഡിയോയിൽ കാജോളിന്റെ മുഖം മോർഫ് ചെയ്ത വീഡിയോ ആണ് പുറത്തുവന്നത്. കജോൾ വസ്ത്രം മാറുന്ന വീഡിയോ എന്ന പേരിലാണ് വീഡിയോ പ്രചരിച്ചത്.
അതേസമയം വാസൻ ബാല സംവിധാനം ചെയ്യുന്ന ജിഗ്ര എന്ന ആക്ഷൻ ചിത്രത്തിന്റെ തിരക്കിലാണ് ആലിയ ഭട്ട്. ആലിയയും കരൺ ജോഹറും ചേർന്ന് നിർമ്മിക്കുന്ന ചിത്രത്തിന്റെ ഷൂട്ടിംഗ് പുരോഗമിക്കുകയാണ്.