യുവാക്കളെ മർദിച്ച ബാർ ജീവനക്കാർ അറസ്റ്റിൽ
Monday, November 27, 2023 10:32 PM IST
തിരുവനന്തപുരം: മദ്യപിക്കാനെത്തിയവരെ മർദിച്ച ബാർ ജീവനക്കാർ അറസ്റ്റിൽ. കുളത്തൂര് ഗുരു നഗറിലെ ബാര് ജീവനക്കാരായ വക്കം ജാനകി സദനത്തില് പ്രസാദ് (54), ആനാട് ലക്ഷ്മി ഭവനില് വിഷ്ണു (32), പത്തനാപുരം മുല്ലപറമ്പില് അനീഷ് (40), പാലക്കാട് പുതുക്കാട് കുന്നത്തു വീട്ടില് ബാബു (50) എന്നിവരാണ് പിടിയിലായത്.
അക്രമണത്തില് പരുക്കേറ്റ ആറ്റിപ്ര സ്വദേശികളായ ആകാശ് ബിന്ദു കുമാര് (24), അഖില് (25), നിധിന് (27) എന്നിവര് മെഡിക്കല് കോളജ് ആശുപത്രിയില് ചികിത്സയിലാണ്.
ഞായറാഴ്ച രാത്രിയാണ് സംഭവം. മദ്യം നൽകണമെങ്കിൽ പണം ആദ്യം നൽകണമെന്ന് ആവശ്യപ്പെട്ട ജീവനക്കാരുമായി യുവാക്കൾ വാക്കുതർക്കമുണ്ടായി. തുടർന്ന് ബാർ ജീവനക്കാർ ഇവരെ ഇരുമ്പ് കമ്പികൊണ്ട് അടിക്കുകയായിരുന്നു.
ഗുരുതരമായി പരിക്കേറ്റ ഇവരെ ഉടൻതന്നെ ആശുപത്രിയിലെത്തിച്ചു. അറസ്റ്റ് ചെയ്ത പ്രതികളെ കോടതിയില് ഹാജരാക്കി റിമാൻഡ് ചെയ്തു.