ലിലി പരികർമ തീർഥാടനം; ആകാശ നിരീക്ഷണത്തിനായി പാരാ മോട്ടറും
Monday, November 27, 2023 8:54 PM IST
ജുനഗഡ്: ലിലി പരികർമ തീർഥാടനത്തിന്റെ സുരക്ഷ ശക്തമാക്കുന്നതിന്റെ ഭാഗമായി പാരാമോട്ടറിൽ ആകാശ നിരീക്ഷണം നടത്തി ഗുജറാത്ത് പോലീസ്.
പോലീസ് ഉദ്യോഗസ്ഥർ പാരാഗ്ലയ്ഡിംഗിലൂടെ ജുനഗഡ് നഗരത്തിന് മുകളിലൂടെ പറക്കുന്നതിന്റെ ദൃശ്യങ്ങൾ പുറത്തുവന്നിട്ടുണ്ട്.
എക്സിലൂടെയാണ് പോലീസ് വീഡിയോ പങ്കുവച്ചത്. ടൂ സ്ട്രോക്ക് എഞ്ചിൻ ഘടിപ്പിച്ച പാരാമോട്ടറിൽ ഒരു പോലീസ് ഉദ്യോഗസ്ഥനും പൈലറ്റും പറന്നുയരുന്നതാണ് ദൃശ്യങ്ങളിലുള്ളത്. പിന്നിലുള്ള പൈലറ്റാണ് പാരാഗ്ലയ്ഡർ പൂർണമായും നിയന്ത്രിക്കുന്നത്.
പാരാഗ്ലയ്ഡിംഗിനായി പ്രത്യേക ലൈസൻസ് ആവശ്യമില്ലെങ്കിലും വീഡിയോയിലുള്ള രണ്ട് ഉദ്യേഗസ്ഥരും പരിശീലനം നേടിയവരാണ്.
ജുനഗഡ് നഗരത്തിൽ നടക്കുന്ന പ്രശസ്തമായ ലിലി പരികർമ തീർഥാടനത്തിൽ തിരക്കേറുന്നതിനാലാണ് പാരാഗ്ലയ്ഡിംഗ് നിരീക്ഷണം ഏർപ്പെടുത്തിയതെന്ന് പോലീസ് പറയുന്നു. പ്രതിവർഷം ഒരുലക്ഷം പേരാണ് തീർഥാടനത്തിൽ പങ്കെടുക്കുന്നത്.