പാണ്ഡ്യയ്ക്ക് പകരക്കാരൻ; ടൈറ്റൻസിനെ ഗിൽ നയിക്കും
Monday, November 27, 2023 7:58 PM IST
ന്യൂഡൽഹി: ഐപിഎൽ ടീം ഗുജറാത്ത് ടൈറ്റൻസ് പുതിയ നായകനെ പ്രഖ്യാപിച്ചു. ഇന്ത്യൻ യുവതാരം ശുഭ്മാൻ ഗില്ലാണ് ടൈറ്റൻസിനെ ഇനി നയിക്കുന്നത്. മുംബൈ ഇന്ത്യൻസിലേക്ക് കൂടുമാറിയ ഹർദിക് പാണ്ഡ്യയ്ക്ക് പകരമാണ് ഗില്ലിന്റെ നിയമനം.
രണ്ട് സീസൺ മാത്രം പ്രായമുള്ള ടൈറ്റൻസിനെ മികച്ച ടീമാക്കിയ നായകനായിരുന്നു പാണ്ഡ്യ. ആദ്യ സീസണിൽ തന്നെ കിരീടം നേടിയ ടൈറ്റൻസ് രണ്ടാം സീസണിൽ റണ്ണർ അപ്പ് ആകുകയും ചെയ്തിരുന്നു.
കഴിഞ്ഞ സീസണിൽ മിന്നുന്ന ഫോമിലായിരുന്ന ഗിൽ 17 മത്സരങ്ങളിൽ നിന്നായി 890 റൺസ് അടിച്ചുകൂട്ടിയിരുന്നു. ഇന്ത്യൻ ടീമിലെ മൂന്ന് ഫോർമാറ്റിലും കളിക്കുന്ന യുവതാരം കൂടിയാണ് ഗിൽ.
ക്യാപ്റ്റൻസി എറ്റെടുക്കുന്നതിൽ സന്തോഷവാനാണെന്നും ടീമിന്റെ കഴിഞ്ഞ രണ്ട് സീസണുകളിലെ മിന്നും പ്രകടനം തന്റെ നേതൃത്വത്തിൽ തുടരുമെന്നും ഗിൽ ആത്മവിശ്വാസം പ്രകടിപ്പിച്ചു. കളിക്കാരനും നായകനുമായി ഗിൽ മികച്ച മുന്നേറ്റം നടത്തുമെന്ന് ടൈറ്റൻസ് മാനേജ്മെന്റും പ്രതീക്ഷ പ്രകടിപ്പിച്ചു.