ഓള്‍ ഇന്ത്യ മലയാളി അസോസിയേഷന്‍ മാധ്യമ പുരസ്‌കാരം സീമ മോഹന്‍ലാലിന് |

കൊച്ചി: ഓള്‍ ഇന്ത്യ മലയാളി അസോസിയേഷന്‍ ഏര്‍പ്പെടുത്തിയ അച്ചടി മാധ്യമങ്ങളിലെ മികച്ച ന്യൂസ് റിപ്പോര്‍ട്ടര്‍ക്കുള്ള പുരസ്‌കാരത്തിന് ദീപിക കൊച്ചി യൂണിറ്റിലെ സബ് എഡിറ്റര്‍ സീമ മോഹന്‍ലാല്‍ അര്‍ഹയായി.

2022 ജൂണ്‍ 18ലെ രാഷ്ട്രദീപിക പത്രത്തില്‍ പ്രസിദ്ധീകരിച്ച ലഹരിയെ ഓടി തോല്‍പ്പിക്കാന്‍ എന്ന വാര്‍ത്തയ്ക്കാണ് അവാര്‍ഡ്. കൗമാരക്കാരിലും കുട്ടികളിലും മയക്കുമരുന്ന് വിപത്തുകളെക്കുറിച്ച് ബോധവത്കരണം നടത്തുന്നതിനായി 161 കിലോമീറ്റര്‍(100 മൈല്‍) ഓടാന്‍ ഒരുങ്ങുന്ന എറണാകുളം കച്ചേരിപ്പടി എക്‌സൈസ് ഓഫീസിലെ പ്രിവന്‍റീവ് ഓഫീസര്‍ ടി.എക്‌സ്. ജസ്റ്റിനെക്കുറിച്ചുള്ളതായിരുന്നു വാര്‍ത്ത.

ഇതേ വിഭാഗത്തില്‍ മാതൃഭൂമി ദിനപത്രത്തിലെ സീനിയര്‍ ന്യൂസ് എഡിറ്റര്‍ റെജി .ആര്‍.നായര്‍ക്കും അവാര്‍ഡുണ്ട്. പതിനായിരം രൂപയും ഫലകവും പ്രശസ്തിപത്രവും അടങ്ങുന്നതാണ് അവാര്‍ഡ്.

നവംബര്‍ 25ന് വൈകുന്നേരം അഞ്ചിന് കോഴിക്കോട് ബാലുശേരി ഗോകുലം കണ്‍വെന്‍ഷന്‍ സെന്‍ററില്‍ നടക്കുന്ന ചടങ്ങില്‍ അവാര്‍ഡ് സമ്മാനിക്കുമെന്ന് ഭാരവാഹികള്‍ പത്രസമ്മേളത്തില്‍ അറിയിച്ചു. ഡോ.ടി.വി.സുനിത, സംവിധായകന്‍ എം.മോഹനന്‍, സി.കെ.സുനില്‍കുമാര്‍ എന്നിവരടങ്ങുന്ന ജൂറിയാണ് പുരസ്‌കാര ജേതാക്കളെ തെരഞ്ഞെടുത്തത്.

ഇന്ത്യ പ്രസ്‌ക്ലബ് ഓഫ് നോര്‍ത്ത് അമേരിക്ക മാധ്യമശ്രീ പുരസ്‌കാരം, യൂനിസെഫ് മീഡിയ അവാര്‍ഡ്, റീച്ച് ലില്ലി നാഷണല്‍ ഫെലോഷിപ്പ്, ഡോ.ബി.ആര്‍. അംബേദ്കര്‍ നാഷണല്‍ ഫെലോഷിപ്പ്, നാഷണല്‍ ചൈല്‍ഡ് ഡവലപ്‌മെന്‍റ് കൗണ്‍സില്‍ മീഡിയ അവാര്‍ഡ്, കേരള മീഡിയ അക്കാദമി ഫെലോഷിപ്പ് എന്നിവയടക്കം സീമയ്ക്ക് 24 മാധ്യമ പുരസ്‌കാരങ്ങള്‍ ലഭിച്ചിട്ടുണ്ട്. കേരള പത്രപ്രവര്‍ത്തക യൂണിയന്‍ സംസ്ഥാന വൈസ് പ്രസിഡന്‍റാണ്.

കുമ്പളങ്ങി പ്രിയാനിവാസില്‍ സി.പി.മോഹന്‍ലാല്‍(റിട്ട. ഇന്‍കംടാക്‌സ് ഡിപ്പാര്‍ട്ട്‌മെന്‍റ്) പ്രിയ ദമ്പതികളുടെ മകളാണ്. വൈക്കം കുലശേഖരമംഗലം പുളിക്കപ്പറമ്പില്‍ ബിജു മോഹന്‍(സീനിയര്‍ സിവില്‍ പോലീസ് ഓഫീസര്‍, ട്രാഫിക് വെസ്റ്റ് പോലീസ് സ്‌റ്റേഷന്‍, കൊച്ചി സിറ്റി) ആണ് ഭര്‍ത്താവ്. മകന്‍: ശിവകൃഷ്ണ ബിജു(വിദ്യാര്‍ഥി, രാജഗിരി അമല സിഎംഐ പബ്ലിക് സ്‌കൂള്‍, വൈക്കം).

അസോസിയേഷന്‍ എര്‍പ്പെടുത്തിയിട്ടുള്ള ഐക്കണ്‍ ഓഫ് ദി ഇയര്‍ അവാര്‍ഡിന് ജോണി ലൂക്കോസും (ഡയറക്ടര്‍ മനോരമ ന്യൂസ്), സര്‍ഗാത്മക പുരസ്‌കാരത്തിന് സന്തോഷ് ജോര്‍ജ് കുളങ്ങരയും (മാനേജിംഗ് ഡയറക്ടര്‍, സഫാരി ടിവി) അര്‍ഹരായി.

അസോസിയേഷന്‍ പ്രസിഡന്‍റ് എ.കെ.പ്രശാന്ത്, മെഡിമിക്‌സ് ഗ്രൂപ്പ് എംഡി ഡോ.എ.വി.അനൂപ്, രവീന്ദ്രന്‍ പൊയിലൂര്‍, വി.പി.സുകുമാരന്‍. ഡോ.ടി.വി.സുനിത എന്നിവര്‍ പത്രസമ്മേളനത്തില്‍ പങ്കെടുത്തു.