റഷ്യയിലെ കഫേയിൽ സ്ഫോടനം; പ്രശസ്ത യുദ്ധ വ്ലോഗർ കൊല്ലപ്പെട്ടു
Monday, April 3, 2023 4:32 AM IST
മോസ്കോ: റഷ്യയുടെ യുക്രെയ്ൻ അധിനിവേശത്തെ പിന്തുണയ്ക്കുന്ന വ്ലോഗുകൾ നിർമിച്ചിരുന്ന വ്ലാഡ്ലൻ ടടാർസ്കി(മാക്സിം ഫോമിൻ) എന്ന യുവാവ് ബോംബ് സ്ഫോടനത്തിൽ കൊല്ലപ്പെട്ടു. സെന്റ് പീറ്റേഴ്സ്ബെർഗിലെ കഫേയിൽ ഞായറാഴ്ച നടന്ന സ്ഫോടനത്തിൽ 25 പേർക്ക് പരിക്കേറ്റു.
സ്ട്രീറ്റ് ഫുഡ് ബാർ നംബർ 1 എന്ന കഫേയിൽ ആരാധകരുമായി സംവദിക്കുന്ന പരിപാടിക്കായി എത്തിയ വേളയിലാണ് ടടാർസ്കി ആക്രമിക്കപ്പെട്ടത്. ആരാധിക എന്ന വ്യാജേന ടടാർസ്കിയുടെ അടുത്തെത്തിയ ഒരു യുവതി നൽകിയ ശിൽപം പൊട്ടിത്തെറിക്കുകയായിരുന്നു.
യുക്രെയ്ൻ യുദ്ധത്തെപ്പറ്റിയുള്ള വാർത്തകൾ ടെലഗ്രാമിലൂടെ പങ്കുവയ്ക്കുന്ന ടടാർസ്കി ലക്ഷക്കണക്കിന് ഫോളോവേഴ്സുള്ള വ്ലോഗറാണ്. യുദ്ധത്തെ പിന്തുണയ്ക്കുമെങ്കിലും റഷ്യൻ യുദ്ധതന്ത്രങ്ങളിലെ പാളിച്ചകളെ വീഡിയോകളിലൂടെ ടടാർസ്കി വിമർശിച്ചിരുന്നു.
റഷ്യൻ പ്രസിഡന്റ് വ്ലാദിമിർ പുടിന്റെ വിശ്വസ്തനും വാഗ്നർ കൂലിപടയാളി സംഘത്തിന്റെ തലവനുമായ യെവ്നെയ് പ്രിഗോഴിന്റെ ഉടമസ്ഥതയിൽ ഉണ്ടായിരുന്ന സ്ഥാപനത്തിലാണ് സ്ഫോടനം നടന്നതെന്നത് ശ്രദ്ധേയമാണ്.