കണ്ണൂർ സർവകലാശാലയിൽ അഫിലിയേറ്റഡ് കോളജുകളിലെ മൂന്നാം സെമസ്റ്റർ ബിരുദാനന്തര ബിരുദ (റഗുലർ/സപ്ലിമെന്ററി/ഇംപ്രൂവ്മെന്റ്), നവംബർ 2021 പരീക്ഷാഫലം സർവകലാശാല വെബ്സൈറ്റിൽ പ്രസിദ്ധീകരിച്ചു. പുനർമൂല്യനിർണയത്തിനും സൂക്ഷ്മപരിശോധനയ്ക്കും പകർപ്പിനും ജൂൺ മൂന്നുവരെ ഓൺലൈനായി അപേക്ഷിക്കാം.
പരീക്ഷാവിജ്ഞാപനം
അഞ്ചാം സെമസ്റ്റർ ബിരുദ സ്പോർട്സ് സ്പെഷൽ (റഗുലർ), നവംബർ 2021 പരീക്ഷകൾക്ക് 30 വരെ അപേക്ഷിക്കാം. വിശദമായ പരീക്ഷാവിജ്ഞാപനം സർവകലാശാല വെബ്സൈറ്റിൽ.
തീയതി നീട്ടി
അഫിലിയേറ്റഡ് കോളജുകളിലെ നാലാം സെമസ്റ്റർ ബിരുദാനന്തര ബിരുദ (ഏപ്രിൽ 2022) പരീക്ഷകളുടെ ഇന്റേണൽ മാർക്ക് സമർപ്പിക്കുന്നതിനുള്ള അവസാന തീയതി ജൂൺ രണ്ടുവരെ നീട്ടി.
പരീക്ഷ പുനഃക്രമീകരിച്ചു
സർവകലാശാല പഠനവകുപ്പിലെ മൂന്നാം സെമസ്റ്റർ എംഎസ്സി ക്ലിനിക്കൽ ആൻഡ് കൗൺസലിംഗ് സൈക്കോളജി (റഗുലർ2019 അഡ്മിഷൻ), നവംബർ 2021 പരീക്ഷകൾ ജൂൺ രണ്ടിന് ആരംഭിക്കുന്ന രീതിയിൽ പുനഃക്രമീകരിച്ചു.
മൂല്യനിർണയ ക്യാന്പിൽ ഹാജരാകണം
ആറാം സെമസ്റ്റർ ബിരുദ (ഏപ്രിൽ 2022) പരീക്ഷാഫലം സമയബന്ധിതമായി പ്രഖ്യാപിക്കുന്നതിനു വേണ്ടി 24 മുതൽ വിവിധ കേന്ദ്രങ്ങളിൽ മൂല്യനിർണയം ആരംഭിച്ചു. ക്യാന്പിൽ ഹാജരാകേണ്ട ചില അധ്യാപകർ സർവകലാശാല ഉത്തരവ് ലഭിച്ചിട്ടും ഹാജരാകാത്തത് ശ്രദ്ധയിൽപ്പെട്ടിട്ടുണ്ടെന്നും ഇത് ഫലപ്രഖ്യാപനത്തെ സാരമായി ബാധിക്കുമെന്നതിനാൽ ക്യാന്പിൽ ഹാജരാകാത്തത് വീഴ്ചയായി കണക്കാക്കുമെന്നും നടപടികൾ കൈക്കൊള്ളുമെന്നും സർവകലാശാല അറിയിച്ചു.
കോഴ്സ് ഡയറക്ടർ നിയമനം
കണ്ണൂർ സർവകലാശാലയുടെ കാസർഗോഡ് കാന്പസിൽ പ്രവർത്തിക്കുന്ന കന്നഡ പഠനവകുപ്പിലേക്ക് കരാർ അടിസ്ഥാനത്തിൽ കോഴ്സ് ഡയറക്ടറെ നിയമിക്കുന്നതിനായി അപേക്ഷ ക്ഷണിച്ചു. ഓഫ് ലൈനായി അപേക്ഷകൾ സ്വീകരിക്കുന്ന അവസാന തീയതി ജൂൺ13. അപേക്ഷഫീസ് 220 രൂപ. കന്നഡ സാഹിത്യത്തിൽ 55 ശതമാനം മാർക്കിൽ കുറയാതെ പിജി, നെറ്റ്, പിഎച്ച്ഡി എന്നിവയാണ് വിദ്യാഭ്യാസ യോഗ്യത. പിഎച്ച്ഡി ഉള്ളവരുടെ അഭാവത്തിൽ നെറ്റ് ഉള്ളവരെ പരിഗണിക്കും. വിശദവിവരങ്ങൾ സർവകലാശാലാ വെബ്സൈറ്റിൽ.