മാര് അത്തനേഷ്യസില് ബിവോക് കോഴ്സുകള്
കോതമംഗലം: കോതമംഗലം മാര് അത്തനേഷ്യസ് കോളജില് പുതിയ മൂന്നു ബി വോക് കോഴ്സുകൾ ആരംഭിച്ചു. ബി വോക് ഡാറ്റാ അനലിറ്റിക്സ് ആന്ഡ് മെഷീന് ലേണിംഗ്, ബി വോക് ബിസിനസ് അക്കൗണ്ടിംഗ് ആന്ഡ് ടാക്സേഷന്, ഭക്ഷ്യ സംസ്കരണ സാങ്കേതികവിദ്യയില് ബി വോക് ബിരുദം എന്നിവയാണു പുതിയ കോഴ്സുകള്.
സ്റ്റാറ്റിസ്റ്റിക്സ്, മാത്തമാറ്റിക്സ്, കംപ്യൂട്ടര് സയന്സ് എന്നിവ സമന്വയിപ്പിച്ച ഡാറ്റാ സയന്സിന്റെ കീഴില് വരുന്ന ആറു സെമസ്റ്ററുള്ള തൊഴിലധിഷ്ഠിത ബിരുദ കോഴ്സാണു ബി വോക് ഡാറ്റാ അനലിറ്റിക്സ് ആന്ഡ് മെഷീന് ലേണിംഗ്.
നാലു സെമസ്റ്ററുകള് പൂര്ത്തിയാക്കുന്നവര്ക്ക് അഡ്വാന്സ്ഡ് ഡിപ്ലോമയും രണ്ടു സെമസ്റ്ററുകള് പൂര്ത്തിയാക്കുമ്പോള് ഡിപ്ലോമയും ലഭിക്കും. ആറു സെമസ്റ്ററുകളും പൂര്ത്തിയാക്കുന്നവര്ക്കു ബി വോക് ബിരുദം നേടാം.
എഇപി 2020ന്റെ ഭാഗമായ ബി വോക് ബിസിനസ് അക്കൗണ്ടിംഗ് ആന്ഡ് ടാക്സേഷന് കോഴ്സ് മൂന്നു വര്ഷമാണ്.
ഒരു വര്ഷം പൂര്ത്തിയാക്കിയാല് ഡിപ്ലോമയും, രണ്ടു വര്ഷത്തിനു ശേഷം അഡ്വാന്സ് ഡിപ്ലോമ സര്ട്ടിഫിക്കറ്റും ലഭിക്കും.
ഭക്ഷ്യ സംസ്കരണ സാങ്കേതികവിദ്യയുമായി ബന്ധപ്പെട്ട നൈപുണ്യമാണ് ബി വോക് ഡിഗ്രി പ്രോഗ്രാമിലൂടെ ലക്ഷ്യമിടുന്നത്. ഭക്ഷ്യ സുരക്ഷ, ഭക്ഷ്യ ഗുണനിലവാരം, ഭക്ഷ്യ പ്ലാന്റ് ശുചിത്വം, ഭക്ഷ്യ വ്യവസായത്തിലെ നിയമങ്ങള്, നിയന്ത്രണങ്ങള് ഭക്ഷ്യ എൻജിനീയറിംഗ്, പാക്കേജിംഗ് ഫുഡ് ബയോകെമിസ്ട്രി ആന്ഡ് ന്യൂട്രീഷന്, ഫുഡ് മൈക്രോബയോളജി, ഫുഡ് പ്രോസസിംഗ്, പ്രിസര്വേഷന് ടെക്നിക്കുകള് എന്നിവ ഉള്ക്കൊള്ളുന്നതാണ് പാഠ്യപദ്ധതി.