ടാറ്റാ ഇൻസ്റ്റിറ്റ്യൂട്ട് ഓഫ് സോഷ്യൽ സയൻസിൽ അഡ്മിഷൻ ടെസ്റ്റ് ഏപ്രിൽ 25ന്
ടാറ്റാ ഇൻസ്റ്റിറ്റ്യൂട്ട് ഓഫ് സോഷ്യൽ സയൻസിൽ (ടിസ്) ഇന്റഗ്രേറ്റഡ് എംഎ കോഴ്സിന്റെ ഭാഗമായുള്ള ബിഎ അഡ്മിഷനു ടാറ്റാ ഇൻസ്റ്റിറ്റ്യൂട്ട് ഓഫ് സോഷ്യൽ സയൻസസ് നടത്തുന്ന ബാച്ചിലേഴ്സ് അഡ്മിഷൻ ടെസ്റ്റ് (ടിസ് ബാറ്റ്) ഏപ്രിൽ 25നു രാജ്യത്തെ വിവിധ കേന്ദ്രങ്ങളിൽ നടത്തും. സോഷ്യൽ സയൻസിൽ ബിഎ, ഇന്റഗ്രേറ്റഡ് എംഎ കോഴ്സുകളിലേക്കുള്ള അഡ്മിഷനാണു ടിസ് ബാറ്റ് നടത്തുന്നത്.
മൂന്നു വർഷത്തെ ബിഎ പഠനത്തിനു ശേഷം രണ്ടു വർഷത്തെ എംഎ ആണ് ഇന്റഗ്രേറ്റഡ് കോഴ്സിന്റെ ഘടന. ടിസിന്റെ ഗോഹട്ടി, ഹൈദരാബാദ്, തുൽജാപൂർ കാന്പസുകളിൽ 60 സീറ്റുകൾ വീതമാണുള്ളത്.
തുൽജാപൂർ കാന്പസിൽ നടത്തുന്ന മൂന്നു വർഷത്തെ ബിഎ ഓണേഴ്സ് കോഴ്സിനും ഇതോടൊപ്പം അപേക്ഷിക്കാം. കോഴ്സ് പൂർത്തിയാക്കുന്നവർക്കു സോഷ്യൽ വർക്കിൽ റൂറൽ ഡവലപ്മെന്റിൽ സ്പെഷലൈസേഷനോടു കൂടി ബിരുദം ലഭിക്കും. ഓണ്ലൈൻ പരീക്ഷയ്ക്ക് തിരുവനന്തപുരവും കൊച്ചിയും പരീക്ഷാ കേന്ദ്രങ്ങളാണ്. മാർച്ച് 23നകം അപേക്ഷിക്കണം.
ഒന്നര മണിക്കൂർ ദൈർഘ്യമുള്ളതാണു പ്രവേശന പരീക്ഷ. പ്രവേശന പരീക്ഷയ്ക്കു രണ്ടു ഭാഗങ്ങളുണ്ടായിരിക്കും. ഒരു മണിക്കൂർ ദൈർഘ്യമുള്ളതായിരിക്കും ആദ്യ ഭാഗം. ഇതിൽ കറന്റ് അഫയേഴ്സ്, ലോജിക്കൽ ആൻഡ് അനലിറ്റിക്കൽ റീസണിംഗ് എന്നീ വിഭാഗങ്ങളിലായി 60 മാർക്കിന്റെ മൾട്ടിപ്പിൾ ചോയ്സ് ക്വസ്റ്റ്യനുകളായിരിക്കും ഉണ്ടായിരിക്കുക. രണ്ടാം ഭാഗത്തിൽ ഇംഗ്ലീഷിൽ വിശദമായി ഉത്തരം എഴുതേണ്ട 40 മാർക്കിന്റെ ചോദ്യങ്ങൾ ഉണ്ടായിരിക്കും.
പ്ലസ്ടു പാസായവർക്കും അവസാന വർഷ വിദ്യാർഥികൾക്കും അപേക്ഷിക്കാം. പ്രായം 2020 ജൂൺ 30നു 23 വയസ് കവിയരുത്. ഓരോ സെമസ്റ്ററിനും 6,000 രൂപ വീതമാണു ടൂഷൻ ഫീസ്.
കോഴ്സിന്റെ ആദ്യ രണ്ടു വർഷം സോഷ്യോളജി, ഇക്കണോമിക്സ്, പൊളിറ്റിക്കൽ സയൻസ്, ഹിസ്റ്ററി, സൈക്കോളജി തുടങ്ങിയ വിഷയങ്ങൾ പഠിക്കണം. മൂന്നാം വർഷം എൻവയണ്മെന്റ്, ഡവലപ്മെന്റ്, ജെൻഡർ തുടങ്ങിയ വിഷയങ്ങൾക്കാണു പ്രാധാന്യം. ബിഎ പഠനത്തിനു ശേഷം ടിസ് കാന്പസുകളിലുള്ള എംഎ കോഴ്സിനു തുടർന്നു പഠിക്കാം.
ഓണ്ലൈനായി വേണം അപേക്ഷിക്കാൻ. അപേക്ഷാ ഫീസ് 1,000 രൂപ. പട്ടിക ജാതിപട്ടിക വർഗക്കാർക്കും സാന്പത്തികമായി പിന്നോക്കം നിൽക്കുന്നവർക്കും 250 രൂപ. ഒന്നിൽ കൂടുതൽ പ്രോഗ്രാമുകൾക്ക് അപേക്ഷിക്കുന്നവർ ആനുപാതികമായി അപേക്ഷാ ഫീസും നൽകണം. കൂടാതെ ബാങ്ക് ചാർജും.
അപേഷാ ഫീസ് ക്രെഡിറ്റ് കാർഡ് ഉപയോഗിച്ചോ ഓണ്ലൈനായി ലഭിക്കുന്ന ചെലാൻ ഉപയോഗിച്ച് എസ്ബിഐ ശാഖ വഴിയോ അടയ്ക്കാം. കൂടുതൽ വിവരങ്ങൾക്ക്:
വെബ്സൈറ്റ്: admiss ions.tiss.edu. ഇമെയിൽ: BAadmissions @tiss. edu. ഫോണ്: 022 40110457. ഹെൽപ് ലൈൻ: 022 25525252.