ത​ളി​ക​ക്ക​ല്ല് ആ​ദി​വാ​സികോ​ള​നി​ക്കാർ താ​മ​സം ഉ​ൾ​ക്കാ​ടു​ക​ളി​ലേ​ക്കു മാ​റ്റി
Saturday, May 4, 2024 1:56 AM IST
ഫ്രാ​ൻ​സി​സ് ത​യ്യൂ​ർ

മം​ഗ​ലം​ഡാം: ജ​ല​ക്ഷാ​മം രൂ​ക്ഷ​മാ​യ​തോ​ടെ ക​ട​പ്പാ​റ ത​ളി​ക​ക്ക​ല്ല് ആ​ദി​വാ​സി കോ​ള​നി​യി​ലെ വീ​ട്ടു​കാ​രെ​ല്ലാം ചാ​ല​ക്കു​ടി പു​ഴ​യ്ക്കു തു​ട​ക്കം കു​റി​ക്കു​ന്ന കാ​ര​പ്പാ​റ പു​ഴ ഒ​ഴു​കു​ന്ന ഉ​ൾ​വ​ന​ങ്ങ​ളി​ലേ​ക്ക് താ​മ​സം മാ​റ്റി.

കാ​ര​പ്പാ​റ പു​ഴ​യു​ടെ ഉ​ത്ഭ​വ സ്ഥാ​ന​ങ്ങ​ളെ​ല്ലാം വ​റ്റി​വ​ര​ണ്ടു കി​ട​ക്കു​ന്നു​ണ്ടെ​ങ്കി​ലും താ​ഴെ പ​ല​ഭാ​ഗ​ത്തും ന​ല്ല വെ​ള്ള​മു​ണ്ടെ​ന്നു കോ​ള​നി​ക്കാ​ർ പ​റ​യു​ന്നു.

54 വീ​ടു​ക​ളു​ള്ള ത​ളി​ക​ക്ക​ല്ല് ആ​ദി​വാ​സി കോ​ള​നി​യി​ൽ ഇ​പ്പോ​ൾ 15ൽ ​താ​ഴെ മാ​ത്ര​മെ കു​ടും​ബ​ങ്ങ​ളു​ള്ളു. മ​റ്റു​ള്ള​വ​രെ​ല്ലാം വെ​ള്ള​മു​ള്ള കാ​ടു​ക​ളി​ലാ​ണ് താ​മ​സ​മെ​ന്നു മൂ​പ്പ​ൻ നാ​രാ​യ​ണ​ൻ പ​റ​ഞ്ഞു.

ഇ​നി മ​ഴ​പെ​യ്ത് കോ​ള​നി​യി​ൽ വെ​ള്ള​മാ​കു​ന്ന ജൂ​ൺ മാ​സ​ത്തി​ലേ കു​ടും​ബ​ങ്ങ​ൾ കോ​ള​നി​യി​ൽ തി​രി​ച്ചെ​ത്തു​ക​യു​ള്ളു. മ​ഴ വൈ​കി​യാ​ൽ കാ​ട്ടി​ലു​ള്ള കു​ട്ടി​ക​ളു​ടെ പ​ഠ​ന​വും വൈ​കും.

മം​ഗ​ലം​ഡാം മ​ല​യി​ൽ കു​ഞ്ചി​യാ​ർ പ​തി​ക്ക​ടു​ത്ത് പ​ടി​ക്കു​റ്റി, മു​ത​ല​ച്ചാ​ൽ, ഒ​രു​കൊ​മ്പ​ൻ, പു​ളി​ക്ക​ൽ തോ​ട്, ചേ​രു​പു​ളി തു​ട​ങ്ങി​യ കാ​ടു​ക​ളി​ലാ​ണ് വീ​ട്ടു​കാ​ർ താ​മ​സി​ക്കു​ന്ന​ത്.

തേ​ൻ ശേ​ഖ​ര​ണ​വു​മാ​യി ക​ഴി​യു​ക​യാ​ണ് ആ​ദി​വാ​സി കു​ടും​ബ​ങ്ങ​ളെ​ല്ലാം. കോ​ള​നി​ക്കാ​രെ​ല്ലാം കാ​ടു​ക​യ​റി​യ​പ്പോ​ൾ ആ​ന​ക്കൂ​ട്ട​ങ്ങ​ളാ​ണ് ഇ​പ്പോ​ൾ കോ​ള​നി​യി​ൽ.

രാ​പ്പ​ക​ൽ വ്യ​ത്യാ​സ​മി​ല്ലാ​തെ ആ​ന​ക​ൾ കോ​ള​നി​യി​ലു​ണ്ടെ​ന്ന് മൂ​പ്പ​ൻ നാ​രാ​യ​ണ​ൻ പ​റ​ഞ്ഞു. ക​ട​പ്പാ​റ​യി​ൽ നി​ന്നും കോ​ള​നി​യി​ലേ​ക്കു​ള്ള വ​ഴി​യി​ലും ആ​ന​ക​ളു​ണ്ട്.
ക​ഴി​ഞ്ഞ രാ​ത്രി ഇ​വി​ടെ സ്വ​കാ​ര്യ തോ​ട്ട​ങ്ങ​ളി​ലും ആ​ന​ക​ളെ​ത്തി​യി​രു​ന്നു.

ത​ളി​ക​ക്ക​ല്ല് കു​ന്നി​ലെ കോ​ള​നി​ക്കാ​രു​ടെ വെ​ള്ള ടാ​ങ്കി​ൽ നി​ന്നാ​ണ് ആ​ന​ക​ൾ വെ​ള്ളം കു​ടി​ച്ച് പ്ര​ദേ​ശ​ത്ത് ത​മ്പ​ടി​ക്കു​ന്ന​ത്. ഇ​വി​ടെ കാ​ട്ടു​ചോ​ല​ക​ളി​ലും വെ​ള്ള​മി​ല്ലാ​ത്ത സ്ഥി​തി​യാ​ണ്.

Copyright @ 2022 , Rashtra Deepika Ltd.