പ്രതീക്ഷകള്‍ക്ക് അപ്പുറമാണ് രണം!
പ്രിഥ്വിരാജ്, റഹ്മാന്‍, ഇഷ തല്‍വാര്‍ എന്നിവരെ കേന്ദ്രകഥാപാത്രങ്ങളാക്കി പുതുമുഖ സംവിധായകന്‍ നിര്‍മല്‍ സഹദേവ് അണിയിച്ചൊരുക്കിയ ആക്ഷന്‍ ത്രില്ലര്‍ ചിത്രമാണ് രണം. പെടുക, പെട്ടുപോകുക എന്നീ രണ്ട് അവസ്ഥകളില്‍ നിന്നുള്ള അതിജീവനമാണ് ചിത്രം പറയുന്നത്...
ട്രെയിലറിലെ ഇടിവെട്ട് പശ്ചാത്തല സംഗീതവും ആക്ഷനും കണ്ട് ഇടിപ്പടം പ്രതീക്ഷിച്ച് രണത്തിന് കയറിയാൽ ഇതെന്തൊരു പടമെന്ന് ആർക്കും തോന്നാം. പക്ഷേ, സംഭവം കൊള്ളാം ഇമോഷണൽ ഡ്രാമയ്ക്ക് ഇടയിലേക്ക് ആക്ഷൻ കയറിയിറങ്ങി പോവുകയാണ്.
അതേ, കഥ ആവശ്യപ്പെടുന്നിടത്ത് മാത്രമേ രണത്തിൽ ആക്ഷൻ രംഗങ്ങളുള്ളു. ഈ ഒരു മുന്നറിയിപ്പ് മനസിലിട്ടോണ്ട് രണത്തിന് കയറിക്കോ, പിന്നെ കാര്യങ്ങളെല്ലാം വെടിപ്പായിരിക്കും.
പൃഥ്വിരാജ്-നന്ദു-റഹ്‌മാൻ ത്രയത്തിന്‍റെ അഭിനയ മികവ് തന്നെയാണ് രണത്തിന്‍റെ പ്ലസ് പോയിന്റ്. അമേരിക്കയെന്നു കേൾക്കുന്പോൾ സന്പന്നതയുടെ ദൃശ്യങ്ങളാവും പലരുടെയും മനസിൽ വരിക. ഇവിടെ പക്ഷേ, നവാഗത സംവിധായകൻ നിർമൽ സഹദേവ് പ്രേക്ഷകരെ കൂട്ടിക്കൊണ്ടു പോകുന്നത് മയക്കുമരുന്ന് മാഫിയ പൂണ്ടുവിളയാടുന്ന ഡിട്രോയിറ്റെന്ന നഗരത്തിലേക്കാണ്.
പൃഥ്വിയുടെ ശബ്ദത്തിൽ കഥ പതിയെ നീങ്ങിത്തുടങ്ങുന്പോൾ എന്തോ വലിയ ഒരു സംഭവം പറയാൻ പോകുന്നുവെന്നുള്ള തോന്നൽ പ്രേക്ഷകകന് ഉണ്ടാകും. എന്നാൽ സംഭവം ഗ്യാംഗ്സ്റ്റർ പോരാട്ടമാണെന്ന് പ്രേക്ഷകന് പതിയെ മനസിലാകും.
അമേരിക്കൻ പശ്ചാത്തലത്തിന്‍റെ പിൻബലത്തിൽ ആവിഷ്കരണത്തിൽ വ്യത്യസ്തത കൊണ്ടുവരാനാണ് സംവിധായകൻ ശ്രമിച്ചിരിക്കുന്നത്. തുടക്കത്തിൽ ആ ശ്രമത്തിന് കൈയടിയും കിട്ടുന്നുണ്ട്.
എന്നാൽ ചിത്രം പതിയെ അമേരിക്കയിലെ മലയാളി കുടുംബത്തിലെ പ്രശ്നങ്ങൾക്കിടയിലേക്ക് കടക്കുന്നതോടെ ചെറുതായി വിഷയത്തിൽ നിന്നും തെന്നിമാറുന്നുണ്ട്.
തിരക്കഥയ്ക്ക് വലിയ മേന്മയൊന്നും പറയാനില്ലെങ്കിലും കിട്ടിയ വേഷം കൈയടക്കത്തോടെ ചെയ്യാൻ പൃഥ്വിക്ക് കഴിഞ്ഞതോടെ രണം പതിയെ താളം കണ്ടെത്തിത്തുടങ്ങി. സാഹചര്യങ്ങൾ കൊണ്ട് ഡ്രഗ് ഡീലറായി മാറേണ്ടി വരുന്ന ആദിയായി പൃഥ്വി ചിത്രത്തിൽ നിറഞ്ഞു നിൽക്കുകയാണ്.
ഓരോ കഥാപാത്രങ്ങളുടെയും ഉള്ളിലുള്ള വികാരങ്ങളെ പുറത്തേക്ക് എടുത്തിട്ടുകൊണ്ടുള്ള ഒരു ഇമോഷണൽ ഫൈറ്റാണ് ചിത്രത്തിൽ ഉടനീളം കാണാൻ കഴിയുക. പെടുക, പെട്ടുപോകുക എന്നീ രണ്ട് അവസ്ഥകളെ അതിജീവനത്തിന്‍റെ പാതയിലേക്ക് കൊണ്ടെത്തിക്കുന്നതിൽ സംവിധായകൻ വിജയിച്ചിട്ടുണ്ട്.
ദാമോദറായി എത്തി റഹ്‌മാൻ നെഗറ്റീവ് ടച്ചുള്ള കഥാപാത്രം കൈയടക്കത്തോടെ കൈകാര്യം ചെയ്തിട്ടുണ്ട്. സീരിയസ് മൂഡിലുള്ള ചിത്രത്തിൽ ഇടയ്ക്കിടെ ചിരി വിടർത്താൻ ചില കുഞ്ഞുകുഞ്ഞ് സംഭാഷണങ്ങൾക്ക് കഴിയുന്നുണ്ട്. അത്തരം രംഗങ്ങൾ പ്രേക്ഷകർക്ക് നൽകിയ ആശ്വാസം ചെറുതല്ല. മനസിൽ പതിഞ്ഞും പതിയാതെയും പോകുന്ന നിരവധി കഥാപാത്രങ്ങൾ ചിത്രത്തിലുണ്ട്.
ഇഷ തൽവാർ സീമയായി എത്തി ചിത്രത്തെ കുടുംബ പ്രേക്ഷകരിലേക്ക് അടുപ്പിക്കുകയായിരുന്നു. നന്ദുവാകട്ടെ പൃഥ്വിയുമൊത്തുള്ള രംഗങ്ങൾ ആസ്വദിച്ച് ചെയ്തതിന്‍റെ ഫലം സക്രീനിൽ കാണാനും കഴിയും. ആക്ഷൻ രംഗങ്ങൾ എന്നും പൃഥ്വി മിന്നിച്ചിട്ടല്ലേ ഉള്ളൂ.
ആ പതിവ് രണത്തിലും തെറ്റിച്ചിട്ടില്ല. മനുഷ്യമനസുകളിലെ വിള്ളലുകളും കപടതകളും കാട്ടി പോകുന്ന ആദ്യ പകുതിയിൽ ഓർത്തിരിക്കാൻ പാകത്തിനുള്ള നിരവധി ഫ്രെയിമുകൾ ഛായാഗ്രാഹകൻ സമ്മാനിച്ചിട്ടുണ്ട്.
അകപ്പെടലിന്‍റെയും രക്ഷപ്പെടലിന്‍റെയും കഥയാണ് രണം പറയുന്നത്. അതുകൊണ്ടുതന്നെ രണ്ടാം പകുതി രക്ഷപെടലുകൾക്ക് ഉൗന്നൽ നൽകിയാണ് മുന്നോട്ടുപോകുന്നത്.
ഗ്യാംഗ്സ്റ്റർ സിനിമകളിൽ സാധാരണ കണ്ടുവരാറുള്ള മുട്ടിനുമുട്ടിനുള്ള ആക്ഷൻ രംഗങ്ങൾ രണത്തിൽ കാണാനാവില്ല. പകരം റിയലിസ്റ്റിക്കായ അവതരണമാണ് സംവിധായകൻ രണത്തിൽ പരീക്ഷിച്ചിരിക്കുന്നത്.
ജെയ്ക്സ് ബിജോയി ഒരുക്കിയ പശ്ചാത്തല സംഗീതം പ്രേക്ഷകരെ ആവോളം തൃപ്തിപ്പെടുത്തിയിട്ടുണ്ട്. പലപ്പോഴും പശ്ചാത്തല സംഗീതത്തിന്‍റെ മറപറ്റിയാണ് കഥയുടെ നല്ലൊഴുക്ക് ചിത്രം വീണ്ടെടുത്തതും. പതിവ് രീതികളിൽ നിന്നും മാറി സഞ്ചരിക്കാനുള്ള ശ്രമമെല്ലാം സംവിധായകന്‍റെ ഭാഗത്തു നിന്നുണ്ടായിട്ടുണ്ട്.
രണം മാറ്റത്തിനൊപ്പം നിൽക്കുന്ന നല്ല ചിത്രമാണ്. ആ മാറ്റങ്ങൾ എന്തൊക്കെയെന്നറിയാൻ ആഗ്രഹിക്കുന്നവർക്ക് തീർച്ചയായും ചിത്രം ആസ്വാദ്യകരമായിരിക്കും.
വി. ശ്രീകാന്ത്