ലണ്ടൻ: എംഎൽഎയും യൂത്ത് കോൺഗ്രസ് കേരള അധ്യക്ഷനുമായ രാഹുൽ മാങ്കൂട്ടത്തിൽ ഈ മാസം 13ന് യുകെയിൽ എത്തും. എംഎല്‍എയായതിന് ശേഷമുള്ള രാഹുലിന്‍റെ ആദ്യ വിദേശരാജ്യ യാത്ര എന്ന പ്രത്യേകതയും യുകെ യാത്രയ്ക്കുണ്ട്.
ഹ്രസ്വ സന്ദർശനത്തിനെത്തുന്ന രാഹുൽ യു കെയിൽ മൂന്ന് പൊതുചടങ്ങുകളിൽ പങ്കെടുക്കും. 13ന് കവൻട്രിയിലെ ടിഫിൻ ബോക്സ്‌ റസ്റ്ററന്‍റിൽ വച്ച് സംഘടിപ്പിക്കുന്ന "മീറ്റ് ആൻഡ് ഗ്രീറ്റ് വിത്ത് രാഹുൽ മാങ്കൂട്ടത്തിൽ എംഎൽഎ' ആണ് ആദ്യ പൊതുചടങ്ങ്.
രാത്രി ഏഴ് മുതൽ 10 വരെ ക്രമീകരിച്ചിരിക്കുന്ന ചടങ്ങിൽ രാഹുലുമായി നേരിട്ട് സംവേദിക്കുന്നതിനും ഒരുമിച്ചു ഭക്ഷണം കഴിക്കുന്നതിനുമുള്ള അവസരം സംഘാടകർ ഒരുക്കും. സുരക്ഷയും തിരക്കും പരിഗണിച്ച് മുൻകൂട്ടി രജിസ്റ്റർ ചെയ്യുന്നവർക്ക് മാത്രമായിരിക്കും പരിപാടിയിൽ പങ്കെടുക്കുവാനുള്ള അവസരം.
+447436514048 എന്ന നമ്പറിൽ വിളിച്ച് പരിമിതമായ സീറ്റുകൾ മുൻകൂട്ടി രജിസ്റ്റർ ചെയ്യാവുന്നതാണ്.
വേദി: The Tiffin Box Restaurant 79 The Butts, Coventry CV1 3GJ (13/02/25, 7PM 10PM).
14ന് വെകുന്നേരം ആറിന് ബോൾട്ടനിൽ ഒഐസിസി യുകെ ഓഫീസ് കെട്ടിടത്തിന്‍റെയും പ്രിയദർശിനി ലൈബ്രറിയുടെയും ഉദ്ഘാടനം രാഹുൽ മാങ്കൂട്ടത്തിൽ നിർവഹിക്കും. കെപിസിസി വൈസ് പ്രസിഡന്‍റ് വി.പി. സജീന്ദ്രൻ, ജനറൽ സെക്രട്ടറി എം.എം. നസീർ, ഇൻകാസ് മുൻ പ്രസിഡന്‍റ് മഹാദേവൻ വാഴശേരിൽ എന്നിവർ മുഖ്യാതിഥികളായി ചടങ്ങിൽ പങ്കെടുക്കും.
ഒഐസിസിക്ക്‌ സ്വന്തമായി ഒരു ഓഫീസ് എന്ന ചിരകാലസ്വപ്നമാണ് ബോൾട്ടനിൽ ഓഫീസ് തുറക്കുന്നതോടുകൂടി യാഥാർഥ്യമാകുന്നത്. ഓഫീസിനോടനുബന്ധിച്ച് ഒരുക്കുന്ന പ്രിയദർശിനി ലൈബ്രറിയിൽ ചരിത്രം, പഠനം, മഹാന്മാരുടെ ജീവചരിത്രം, ആത്മകഥ, പ്രഭാഷണങ്ങൾ, ലേഖനങ്ങൾ, ചെറുകഥ, നോവൽ, കവിതാ സമാഹാരങ്ങൾ, കുട്ടികൾക്കായുള്ള രചനകൾ എന്നിങ്ങനെ വിവിധ ശ്രേണിയിലുള്ള പുസ്തകങ്ങൾ ഒരുക്കിയിട്ടുണ്ട്.
കുട്ടികൾക്കായുള്ള പ്ലേ സ്റ്റേഷൻ ആണ് മറ്റൊരു ആകർഷണം. പുതുതായി രൂപീകരിച്ച ഒഐസിസി യുകെ ബോൾട്ടൻ, അക്രിംഗ്ടൺ, ഓൾഡ്ഹം യൂണിറ്റുകളുടെ മെമ്പർഷിപ്പ് ക്യാമ്പയിൻ, പ്രിയദർശിനി ലൈബ്രറിയുടെ ആദ്യ മെമ്പർഷിപ്പ് വിതരണവും ചടങ്ങിൽ വച്ച് നിർവഹിക്കപ്പെടും.
വേദി: No. 4, Beech Avenue Farnworth Bolton BL4 0AT(14/02/25, 6PM).
15ന് രാവിലെ ഒന്പതിന് ഉമ്മൻ ചാണ്ടി മെമ്മോറിയൽ ട്രോഫി പി.ടി. തോമസ് മെമ്മോറിയൽ ട്രോഫിക്കും കാഷ് പ്രൈസിനും വേണ്ടിയുള്ള മെൻസ് ഡബിൾസ്, 40 വയസിന് മുകളിൽ പ്രായമുള്ള മെൻസ് ഡബിൾസ് ബാഡ്മിന്‍റൺ ടൂർണമെന്‍റിന്‍റെ ഉദ്ഘാടനം രാഹുൽ നിർവഹിക്കും.
വി.പി. സജീന്ദ്രൻ, എം.എം. നസീർ, മഹാദേവൻ വാഴശേരിൽ എന്നിവർ മുഖ്യാതിഥികൾ ആയി ചടങ്ങിൽ പങ്കെടുക്കുകയും സമാപന സമ്മേളനത്തിൽ സമ്മാനദാനം നിർവഹിക്കുകയും ചെയ്യും.
വേദി: St Peter's CofE Academy, Fenton Manor, Fenton, StokeonTrent, Staffordshire ST(4 2RR15/02/25, 9 AM).
|