മെൽബൺ: വിക്‌ടോറിയയിലെ ഏറ്റവും വലിയ മലയാളി കൂട്ടായ്മയായ മലയാളി അസോസിയേഷൻ ഓഫ് വിക്ടോറിയ(എംഎവി) അൻപതാം വർഷത്തിലേക്ക്. ഇതിന്‍റെ ഭാഗമായി മെൽബണിലെ റോവില്ലിൽ ഒരു വർഷത്തോളം നീണ്ടുനിൽക്കുന്ന വിവിധങ്ങളായ പരിപാടികളുടെ ഉദ്ഘാടനം നടന്നു.
മലയാളി അസോസിയേഷൻ ഓഫ് വിക്‌ടോറിയയുടെ പുതിയ ഭരണസമിതിയും ചടങ്ങിൽ ചുമതലയേറ്റു. ഓസ്ട്രേലിയൻ ഇന്ത്യൻ കമ്യൂണിറ്റി ഹാളിൽ നടന്ന ചടങ്ങ് മുഖ്യതിഥിയായ ഹോൾട്ട് പാർലമെന്‍റ് അംഗം കസാൻഡ്ര ഫെർണാഡോ ഉദ്ഘാടനം ചെയ്തു.
ഓസ്ട്രേലിയയിലേക്ക് കുടിയേറിയെത്തുന്നവരെ മാതൃഭാഷയുമായും സംസ്കാരവുമായും ബന്ധിപ്പിച്ച് നിറുത്തുന്നതിൽ സാംസ്കാരിക സംഘടനകൾക്കുള്ള പങ്ക് കുടിയേറി എത്തിയ തനിക്കറിയാമെന്ന് കസാൻഡ്ര ഫെർണാഡോ പറഞ്ഞു.
ഫെഡറേഷൻ ഓഫ് ഇന്ത്യൻ അസോസിയേഷൻസ് ഇൻ വിക്ടോറിയ മുൻ പ്രസിഡന്‍റ് വാസൻ ശ്രീനിവാസൻ വിശിഷ്‌ടാതിഥി ആയിരുന്നു. ചടങ്ങിൽ പ്രസിഡന്‍റ് മദനൻ ചെല്ലപ്പൻ അധ്യക്ഷത വഹിച്ചു.
വിക്‌ടോറിയയിലെ മലയാളി അസോസിയേഷനുകൾ ഒത്തൊരുമയോടെ പ്രവർത്തിച്ചാൽ മാത്രമേ നേട്ടങ്ങൾ കൈവരിക്കാൻ പറ്റുകയുള്ളുവെന്ന് മദനൻ ചെല്ലപ്പൻ അധ്യക്ഷ പ്രസംഗത്തിൽ പറഞ്ഞു.
മുൻ സെക്രട്ടറി ഹരിഹരൻ വിശ്വനാഥൻ സ്വാഗതവും പിആർഒ ബിജു സ്കറിയ നന്ദിയും പറഞ്ഞു. വ്യത്യസ്ത മേഖലകളിൽ നേട്ടം കൈവരിച്ച ക്യാപ്റ്റൻ ഡോ. സ്മൃതി മുരളി കൃഷ്ണ, വിദ്യ വിനു, വേദിക, സേതുനാഥ് പ്രഭാകർ എന്നിവരെ ചടങ്ങിൽ ആദരിച്ചു.
ഐറിൻ സാറ, ഷമ്റിൻ എന്നിവരുടെ അവതരണവും വൈവിധ്യമാർന്ന കലാപരിപാടികളും ചടങ്ങിന്‍റെ മാറ്റുകൂട്ടി. വിക്‌ടോറിയയിലെ വിവിധ അസോസിയേഷൻ പ്രതിനിധികൾ പങ്കെടുത്തു.
1976ലാണ് മലയാളി അസോസിയേഷൻ ഓഫ് വിക്ടോറിയ മെൽബണിൽ സ്ഥാപിതമായത്. ഗോൾഡൻ ജൂബിലി ആഘോഷങ്ങളുടെ ഭാഗമായി വൈവിധ്യമാർന്ന പരിപാടികളാണ് എംഎവി ആസൂത്രണം ചെയ്തിരിക്കുന്നതെന്ന് സെക്രട്ടറി അലൻ അബ്രഹാം പറഞ്ഞു. ഇരുപതംഗ കമ്മിറ്റിയാണ് ആഘോഷ പരിപാടികൾക്ക് ചുക്കാൻ പിടിക്കുന്നത്.
202426 വർഷത്തെ കമ്മിറ്റി അംഗങ്ങൾ: പ്രസിഡന്‍റ് മദനൻ ചെല്ലപ്പൻ, ജനറൽ സെക്രട്ടറി അലൻ എബ്രഹാം കാക്കത്തോട്ടത്തിൽ, ട്രഷറർ ഹരിഹരൻ വിശ്വനാഥൻ, വൈസ്പ്രസിഡന്‍റ് ഷോബി തോമസ്, ലിൻറോ ദേവസി മാളിയേക്കൽ, ജോയിന്‍റ് സെക്രട്ടറി ഡാനി ഷാജി, സലീൽ സോമൻ,
എക്സിക്യൂട്ടിവ് അംഗങ്ങൾ ജോസ് പ്ലാക്കൽ, അരുൺ സത്യൻ, അതുൽ വിഷ്ണുപ്രതാപ്, അശ്വതി ഉണ്ണികൃഷ്ണൻ, ജിബു ഫിലിപ്പ്, ലിക്കു ജോസഫ്, ബിജു സ്കറിയ, അശ്വിൻ ആനന്ദ് പുതുറാത്ത്, സുബാഷ് കുമാർ കേശവൻ, അരുൺ രാജൻ, ഹരിത പുന്നുള്ളി, വിശ്വംഭരൻ രാജേഷ് നായർ, നിയ ബെൻ.
|